“Se Aso e Lē Faalavelave ai i Talitonuga Faalotu”

I LE faaosofiaina o lona naunau e fiailoa atili i se talanoaga na ia faia ma ni Molimau a Ieova, na faatulaga ai e le tamaʻitaʻi pule aʻoga i se aʻoga i Polani “Se Aso e Lē Faalavelave ai i Talitonuga Faalotu” mo lana aʻoga. Sa ia fautuaina e faapea, ia tauofo mai ni tamaiti aʻoga—o le Lotu Katoliko, Lotu Puta, ma Molimau a Ieova—e sauniuni ni taulimaga pupuu e faailoa atu ai i isi tamaiti aʻoga o latou talitonuga ma tū faalotu. Sa tauofo loa lava ia talavou Molimau a Ieova e toʻatolu.

Ina ua oo mai lea aso, na muamua lava tautala ia Malwina e 15 ona tausaga. I se vaega na ia taʻua ai e faapea: “O le toʻatele o outou na outou muaʻi iloa i matou ae leʻi amata ona matou auai i lenei aʻoga auā sa matou asiasi atu iā te outou i o outou aiga. Atonu o loo outou tau manatu pe aiseā ua matou faia ai pea lenā mea. Talu ai o loo matou mulimuli i le faaaʻoaʻoga a Iesu Keriso, o Lē na Faavaeina le Faa-Kerisiano. Sa ia talaʻia le tala lelei o le Malo o le Atua i so o se mea lava sa mafai ona maua i ai tagata. O le mea lava foʻi lenā na faia e aposetolo ma isi uluaʻi Kerisiano. I le tele o nofoaga, sa onosaia ai e Molimau a Ieova tofotofoga faigatā o le faatuatua, ae e matou te fiafia ona i la tatou aʻoga, o loo tatou olioli ai i le filemu, lea o loo outou tau fai saosaolaumea i ai. E matou te faafetai atu ai ona o lenā mea!”

I le faaiʻuga o lana tautalaga, na taʻua ai e Malwina e faapea: “E iai se isi māfuaaga e matou te asiasi atu ai i o outou aiga. Ona e matou te alolofa iā te outou. Ua faapea mai le Tusi Paia, e lē o toe umi se taimi ona oo lea o le fanau a tagata i mea tutupu e gatete ai le lalolagi. O lea, o le isi taimi e matou te toe tuʻituʻi atu ai i faitotoʻa o outou fale, faamolemole ia faaavanoa se taimi e faalogologo ai. E matou te fia taʻu atu iā te outou le auala e mafai ai ona tatou nonofo faatasi e faavavau i le parataiso i le lalolagi.”

O le isi failauga na sosoo ai, o Mateusz, e 15 foʻi ona tausaga. Na faamatala atu e Mateusz i lana aofia e faapea, i le faagasologa o tausaga, na faaaogā ai e Molimau a Ieova metotia eseese e faasalalau atu ai le tala lelei. Mo se faaaʻoaʻoga, i le 1914—i le vaitaimi o tifaga e lē tautala—na faaalia ai e Molimau le “Ata o le Tala o le Foafoaga,” (Photo-Drama of Creation), o se ata e gaoioi faapea ma ni ata e lē gaoioi sa sau faatasi ma se leo.

Sa faamatala e Mateusz se vaega na faia e leitiō  i le faasalalauina o le feʻau o le Malo, ona faamatala foʻi lea ma le auala tutasi ua faaaogāina ai le komepiuta e saunia mai ai ia faaliliuga i le tele o gagana i le taimi lava e tasi lea e taʻua o le MEPS, na faavaeina e Molimau a Ieova. Sa ia faamatalaina foʻi le auala ua fesoasoani ai Molimau a Ieova e faailoa atu i fomaʻi e uiga i le tomai e faia ai togafitiga e lē faaaogāina ai le toto. Na ia faapea atu: “I le taimi nei, ua faamālō mai ai fomaʻi iloga i Polani i lo matou talitonuga ma faamamafa mai e faapea, i tausaga taʻitasi, ua faasolosolo pea ina toʻatele tagata mamaʻi e lē o ni Molimau ua faia taotoga e aunoa ma le faaaogāina ai o le toto.”

Na faaiʻu upu a Mateusz i le faamatalaina atu iā i latou e uiga i le fausiaina o Maota o le Malo ma faapea atu: “Pe tou te fia asiasi atu i lo matou Maota o le Malo? E ulu fua, e leai se totogi, e lē aoina ai foʻi ni tupe.” I le faamatalaina o le nofoaga e fai ai le tauaofiaga i Sosnowiec, na faapea atu ai Mateusz: “E tatau lava ona outou ō atu e vaavaai i lenei fale matuā telē na fauina mo lenei lava fuafuaga. Aiseā tatou te lē ō atu faatasi ai i inā? E iai sa matou fautuaga e fia fai atu, ma o lea o le a faamatalaina atu e la matou uō o Katarzyna lenā mea.”

Ona sosoo ai lea ma le faapea atu ma le naunau o Katarzyna ua 15 tausaga le matua: “E talia fiafia outou e tou te ō atu i Sosnowiec mo le tauaofiaga itumalo a Molimau a Ieova. O le a talanoaina ai i inā ia mataupu e faatatau i talavou.” Sa taʻua foʻi e Katarzyna le aso faamanatu e sili ona tāua mo Kerisiano—o le Faamanatuga o le maliu o Iesu Keriso. Sa ia faalaeiauina lana ʻaufaalogologo e faapea: “I le tausaga ua mavae, e sili atu i le 14 miliona tagata na auai i lenā faamanatuga. Aiseā tou te lē auai ai ma i matou i se isi taimi o i luma?”

Ina ua uma a latou tautalaga, ona tuuina atu lea e Malwina, Mateusz, ma Katarzyna i faiaʻoga le tusi, Jehovah’s Witnesses—Proclaimers of God’s Kingdom faatasi ai ma ni kaseti vitiō se lua o loo talanoaina ai talitonuga ma gaoioiga a Molimau a Ieova. * Sa taliaina ma le fiafia e faiaʻoga ma folafola atu o le a faaaogā na mea i vasega pe a fai le mataupu i le talafaasolopito.

I le faaiʻuga o le polokalame, na tāina ai e Martyna e 12 tausaga le matua mo i latou uma na faapotopoto ai le pese o lona matua e faapea, “Ieova e, ua Matou Faafetai ia te Oe.” Sa maua e nei Molimau talavou ‘⁠le lototele ona o lo latou Atua’ ma avatu ai se molimau lelei. (1 Tesalonia 2:2) Maʻeu se faaaʻoaʻoga e sili ona lelei mo Molimau talavou i so o se mea!

[Faamatalaga pito i lalo]

[Ata i le itulau 26]

O Malwina o loo saunia le taulimaga i ni nai aso muamua atu a o leʻi fofogaina atu i le aʻoga

[Ata i le itulau 26]

O Katarzyna o loo filifilia mau mo le taulimaga