E Faapefea i Sagato Moni Ona Fesoasoani iā te Oe?

I LE Tusi Paia, o le upu Eleni ua faaliliuina i le “sagato,” i isi faaliliuga ua faaliliuina i le “tagata paia.” O ai e faatatau i ai lenei taʻu? Ua taʻua i le Expository Dictionary of New Testament Words e faapea: “I le numera tele, e pei o le faaaogāina o tagata talitonu, e faasino atu i tagata uma lava ae e lē faatatau atu na o ni tagata e sili ona paia, po o i latou ua maliliu ae na iloga ni gaoioiga lelei e avea ai ma tagata paia.”

O lea, na taʻua ai e le aposetolo o Paulo uluaʻi Kerisiano uma o ni sagato moni, po o tagata paia. Mo se faaaʻoaʻoga, na ia auina atu se tusi na tusia i le uluaʻi senituri T.A. “i le ekalesia a le Atua o i Korinito, atoa ma le au paia uma o i [le itumalo o Roma o] Akaia uma lava.” (2 Korinito 1:1) Mulimuli ane, na tusi atu ai e Paulo se tusi ‘ia te i latou uma lava o i Roma, o e ua alofaina e le Atua, o e ua valaauina e fai ma tagata paia.’ (Roma 1:7) E manino sa leʻi maliliu nei tagata paia i lenā taimi, pe faapea ona o ni uiga lelei na faaesea ai i latou e sili i lo isi tagata talitonu. O ā ni faavae na faaesea ai i latou o ni sagato?

Na Faapaiaina e le Atua

Ua faaalia mai e le Afioga a le Atua, e lē faapaiaina se tasi e fai ma tagata paia e ni tagata po o se faalapotopotoga. Ua faapea mai le Tusi Paia: “Na faaola mai [le Atua] ia i tatou, ma valaau mai i le valaau paia, e le tusa ma a tatou galuega, a e tusa ma lona lava finagalo ma lona alofa tunoa.” (2 Timoteo 1:9) E faapaiaina se tagata paia pe a valaauina e Ieova, e tusa ma le alofa tunoa o le Atua, ma e ōgatusa ma Lana fuafuaga.

O le ʻaupaia o le faapotopotoga Kerisiano o ni vaega ia o le “feagaiga fou.” O le toto masaa o Iesu Keriso ua faailogaina ai faaletulafono lenei feagaiga ma faapaiaina ai ē o loo aofia ai. (Eperu 9:15; 10:29; 13:20, 24) O le mamā i le silafaga a le Atua, ua avea ai i latou o ‘le au ositaulaga paia ma avatu taulaga faaleagaga e mālie i le Atua ona o Iesu Keriso.’—1 Peteru 2:5, 9.

Aioiga ma Olega a Sagato

I le talitonuga faapea e mafai e “sagato” ona auina mai le mana i tagata talitonu, ua faatāuaina ai e le faitau miliona i latou e ala i le faaaogā o se meatotino a se sagato po o le ole atu iā i latou o ni fautua. Po o se aʻoaʻoga ea lenei a le Tusi Paia? I le Lauga i luga o le Mauga, na aʻoaʻoina ai e Iesu ono soo e faalatalata atu i le Atua e faapea: “O lenei, ia faapea outou ona tatalo, Lo matou Tamā e,  o i le lagi, Ia paia lou suafa.” (Mataio 6:9) O tatalo e tuusaʻo atu lava iā Ieova le Atua.

I se taumafaiga ina ia faamaonia olega a “sagato,” ua sii mai ai e nisi e suʻesuʻe i mataupu faalelotu le Roma 15:30, lea tatou te faitau ai e faapea: “Le au uso e, ou te aioi atu ia te outou, ona o lo tatou Alii o Iesu Keriso, ma le alofa o le Agaga, ia outou matuā finafinau faatasi ma aʻu i talosaga i le Atua mo aʻu.” Pe na faalaeiauina e Paulo tagata talitonu e tatalo atu iā te ia po o le ole atu i lona igoa ina ia faalatalata atu ai i le Atua? E leai. A o faalaeiauina e le Tusi Paia e ofo atu tatalo mo sagato moni po o tagata paia, e lē faatonuina ai i tatou e le Atua e tatalo atu i ai pe e faaauala atu i na tagata paia.—Filipi 1:1, 3, 4.

E ui i lea, ua tofia e le Atua se Fautua mo a tatou tatalo. Na faapea mai Iesu Keriso: “O aʻu nei le ala, ma le upu moni, ma le ola; e le alu atu lava se tasi i le Tamā, pe a le ui mai ia te au.” Ua taʻua atili e Iesu: “O mea uma foi tou te ole atu ai i loʻu igoa, ou te faia lava; ina ia viia le Tamā ona o le Atalii. Afai tou te ole atu i se mea i loʻu igoa, ou te faia lava.” (Ioane 14:6, 13, 14) E tatou te mautinoa le finagalo malie o Ieova e faafofoga mai i tatalo e ala atu i le suafa o Iesu. E tusa ai o Iesu, ua faapea mai le Tusi Paia: “O le mea foi lea e mafai ai ia te ia ona faaola pea lava i e faalatalata atu i le Atua ona o ia, auā o loo soifua pea ia e fautua mo i latou.”—Eperu 7:25.

Pe afai e finagalo malie Iesu e aioi mo i tatou, aiseā la e masani ai ona ole atu i le tatalo tagata tapuaʻi Kerisinetoma i “sagato”? I lana tusi o le Age of Faith o loo faamatalaina ai e le tusitala o le talafaasolopito o Will Durant le amataga mai o lenei faiga. A o mātauina le matataʻu i le Atua ma sili atu ona faigofie ona faalatalata iā Iesu, ua faapea mai Durant: “E faigatā lava i se tasi tagata ona taumafai e talanoa tuusaʻo atu iā [Iesu] pe a māeʻa ona ia matuā lē amanaʻiaina Ana Aʻoaʻoga. Na foliga mai e atamai ona tatalo atu i se sagato ua faamaonia e ala i le faapaiaina ina ia iai i le lagi, ma aioi atu iā Keriso.” Pe e saʻo ea nei atugaluga?

Ua aʻoaʻoina e le Tusi Paia i tatou e faapea e ala mai iā Iesu, ua mafai ai ona tatou maua ‘le faamalosi, ma le loto tele.’ (Efeso 3:11, 12)  E latalata pe e lē mamao ese le Atua e Ona le Malosi Uma Lava mai tagata ina ia faafofoga i a tatou tatalo. Na tatalo ma le mautinoa le faisalamo o Tavita e faapea: “Le faafofoga tatalo e, e o atu ia te oe tagata uma lava.” (Salamo 65:2) Na i lo le faaauala mai o le mana i ni meatotino a ni “sagato” ua maliliu, e liligi mai e Ieova lona agaga paia i luga o ē ole atu i ai ma le talitonu. Ua fetalai mai Iesu: “Afai ua iloa e outou ona avatu o mea lelei mā a outou fanau, e le sili ea ona foaiina mai e lo outou Tamā o i le lagi le Agaga Paia i e ole atu ai ia te ia?”—Luka 11:13.

O le Matafaioi a le ʻAupaia

O le ʻaupaia lea na tusi atu i ai Paulo, na maliliu i senituri ua mavae ma mulimuli ane o latou maua ai le “pale o le ola,” o se toetū faalelagi. (Faaaliga 2:10) Ua iloa lelei e auauna a Ieova le Atua, o le faamamaluina o nei tagata paia moni, e lē faale-Tusi Paia ma e lē mafai ona puipuia mai ai i faamaʻi, o mala faalenatura, le tulaga lē mautū tau tamaoaiga, le olaga matua, po o le oti. O lea, atonu e te fesili faapea, ‘Po o silasila alofa mai ea le ʻaupaia a le Atua iā i tatou? Pe e tatau ona tatou faatalitalia i latou e galulue mo i tatou?

Ua faaata mai ma le mataʻina tagata paia i se valoaga na faamauina e Tanielu. I le senituri lona ono T.L.M., na ia vaaia ai se vaaiga faagaeeloto, o loo faalauaʻitele mai lona faataunuuga i o tatou aso. O ni manufeʻai mataʻutia e ō mai i le sami, lea ua faatusaina i malo faaletagata e lē mafai ona latou faamalieina manaʻoga moni o le fanau a tagata. Ona vavalo lea o Tanielu: “O ia manu tetele e fa i latou o tupu ia e toafa o le a tutū mai i le lalolagi. A e maua le malo e le au paia a lē Silisili ese, e fai foi mo i latou le malo e faavavau, e faavavau lava.”—Tanielu 7:17, 18.

Na faamautinoa mai e Paulo lenei “tofiga ua silisili mo le au paia,” o le avea lea ma suli faatasi ma Keriso i le lagi. (Efeso 1:18-21) Ua tatalaina e le toto o Iesu le ala mo le ʻaupaia e 144,000 o ē e faatutūina mo le viiga faalelagi. Na faalauiloa mai e le aposetolo o Ioane: “Amuia mona ua paia le ua i ai se tofi i le uluai toe tu; e le oo foi le pule a le oti faalua ia te i latou, a e avea i latou ma ositaulaga a le Atua ma Keriso, latou te fai ma tupu foi faatasi ma ia i tausaga e afe.” (Faaaliga 20:4, 6; 14:1, 3, LF ) I le vaaiga, na lagona ai e Ioane se ʻau o meafaiola faalelagi o loo pepese i luma o Iesu ua faamamaluina: “Ua e faatauina foi tagata i lou lava toto mo le Atua, mai ituaiga uma, ma gagana eseese, ma nuu, atoa ma atunuu; ua e faia foi i latou ma nuu faatupu, o ositaulaga foi i lo matou Atua; e fai foi i latou ma tupu i le lalolagi.” (Faaaliga 5:9, 10) Maʻeu se faamautinoaga! O Ieova le Atua lava ia na filifilia ma le faaeteete nei tane ma fafine. E lē gata i lenā, sa latou auauna ma le faamaoni i le lalolagi, na latou faafesagaʻia toetoe lava o faafitauli uma o loo feagai ma tagata. (1 Korinito 10:13) O lea la, e mafai ona tatou mautinoa e faapea o nei ʻaupaia ua toe faatutūina aʻe, po o sagato, o le a avea ma pule agaalofa ma malamalama, e latou te iloa o tatou vaivaiga ma mea e gata ai lo tatou mafai.

Faamanuiaga i le Pulega o le Malo

O le a lē toe umi ae gaoioi loa le pulega o le Malo e aveesea le amioleaga uma ma mafatiaga o le lalolagi. I lenā taimi, o le a sili atu ona vavalalata tagata i le Atua na i lo se isi lava taimi. Na tusi Ioane e faapea: “Faauta, ua i ai le afioaga o le Atua faatasi ma tagata, e mau foi o ia ma i latou; e fai foi i latou mona nuu, e ia te i latou le Atua lava.” O le a aumaia ai le anoanoaʻi  o faamanuiaga i tagata, auā ua faapea mai atili le valoaga: “E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:3, 4.

Maʻeu se olioli o le a iai! O iʻuga o le pulega lelei atoatoa a Keriso Iesu ma le 144,000 o le ʻaupaia, ua faamatala atili mai i upu nei o loo faamauina i le Mika 4:3, 4, LT: “E faamasino foi [Ieova] i nuu e tele, e aoai atu foi i nuu malolosi e mamao; ona latou tuʻi ai lea i a latou pelu e fai ma uamea o suotosina, o latou tao foi e fai ma polo teu vine; e le sii atu foi le pelu e le tasi nuu i le tasi nuu, latou te le toe aʻoaʻo foi i taua. A e taitasi ma nofo i lalo o lona vine, ma lalo o lona mati; e leai foi se na te faamatau mai; auā ua faapea ona tulei mai ai le siufofoga o Ieova o ʻau.”

O loo faalauiloa atu e le ʻaupaia le valaaulia ina ia tofo i na faamanuiaga. I le faaataina mai e se faatoanofotane, ua faaauau ai ona faapea mai le sagato moni: “Ina sau ia.” Ua faapea mai atili le mau: “Ina fai atu foi ia o lē faalogo, ‘Ina sau ia’; o lē fia inu, ina sau ia, atoa ma lē manao i ai, ina ave fua ia le vai o le ola.” (Faaaliga 22:17) O le ā e aofia ai i le “vai o le ola.” E aofia ai le poto saʻo i fuafuaga a le Atua. I lana tatalo i le Atua, na faapea atu ai Iesu: “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.” (Ioane 17:3) O lenei poto e maua e ala mai i le suʻesuʻeina e lē aunoa o le Tusi Paia. Maʻeu se fiafia ua iā i tatou e ala mai i le Afioga a le Atua, ona ua mafai ona tatou iloa le tulaga moni o le ʻaupaia ma aʻoaʻoina le auala o le a ia faaaogā ai i latou e aogā e faavavau mo le fanau a tagata!

[Ata i le itulau 4]

Na faagaeeina Paulo e tusia tusi i sagato moni

[Ata i le itulau 5]

Na avea aposetolo faamaoni o Iesu ma sagato moni, po o tagata paia

[Ata i le itulau 6]

E mafai ona tatou tatalo ma le mautinoa i le Atua e ala iā Iesu Keriso

[Ata i le itulau 7]

O sagato ua toe faatutūina aʻe, po o tagata paia, o le a avea ma taʻitaʻi alolofa mo le lalolagi