E na o le Tasi le Faatuatuaga Moni Faa-Kerisiano

E NA o le tasi le lotu po o le faapotopotoga na faavae e Iesu Keriso. O lenā faapotopotoga o se faapotopotoga faaleagaga, ma o se aiga faaleagaga foʻi. O lona uiga na aoaoina tagata na filifilia e le agaga paia o le Atua—lea na silasila i ai le Atua o lana “fanau.”—Roma 8:16, 17; Kalatia 3:26.

Na fetalai Iesu e na o le tasi lava le ala na faaaogā e le Atua e faasino ai tagata i le upu moni ma le ola. Ina ia faaalia le tāua o lenā upu moni, na faatusa ai e Iesu le mauaina o le ola e faavavau i le ui atu i se ala. Na fetalai o ia: “Ia outou ulu atu i le faitotoʻa va apiapi; auā e va tele le faitotoʻa, e lautele foʻi le ala e tau atu i le malaia, e toʻatele foʻi i latou o ē ui atu ai. Auā e va apiapi le faitotoʻa, e lauitiiti foʻi le ala e tau atu i le ola, e toʻaitiiti foʻi i latou o ē maua.”—Mataio 7:13, 14; Ioane 14:6; Galuega 4:11, 12.

Se Faapotopotoga Autasi

E lē tatau ona tatou manatu i le faapotopotoga lea na iai i le uluaʻi senituri, o “se sosaiete maopoopo i le lalolagi aoao e pei ona iai le lotu katoliko i aso nei,” o le tala lenā a le tusi The New Dictionary of Theology. Aiseā? “Auā e leʻi iai muamua se sosaiete maopoopo faapena i le lalolagi.”

E faigofie ona iloa e faapea, e leʻi pei le uluaʻi faapotopotoga Kerisiano o faalapotopotoga faalotu aloaʻia o loo tatou vaaia i aso nei. Na maopoopo le faiga o uluaʻi faapotopotoga Kerisiano. E leʻi faapea na pule lava le faapotopotoga i ana mea na fai. Peitaʻi na latou amanaʻiaina uma le taʻitaʻiga a se vaega pule i Ierusalema. O lenā vaega—lea na faia aʻe i le ʻauaposetolo ma toeaina o le faapotopotoga i Ierusalema—na fesoasoani e faatumauina le autasi o le faapotopotoga o “le tino” lea e tasi o Keriso.—Efeso 4:4, 11-16; Galuega 15:22-31; 16:4, 5.

 O le ā na tupu i lenā faapotopotoga moni e tasi? Pe na avea mulimuli ane ma le Lotu Katoliko malosi? Pe na avea ma faiga faalotu Porotesano lea na tupuga mai ai le mau lotu eseese i aso nei? Faamata na iai se isi tulaga na oo i ai?

“Saito” ma “Titania”

Ina ia tali fesili na, seʻi o tatou iloiloina lelei le mea na fetalai Iesu o le a tupu. Atonu e faateʻia oe pe a e iloaina, na faatalitalia e Iesu o le a iai se taimi e mou atu ai lana faapotopotoga ma e na te faatagaina foʻi lenā tulaga lē lelei e tupu mo le faitau selau o tausaga.

Na faafesootaʻi e Iesu lana faapotopotoga i “le malo o le lagi,” ina ua ia fetalai mai: “Ua faatusaina le malo o le lagi i le tagata na lūlūina le saito lelei i lona fanua; ua momoe tagata, ona alu ane ai lea o lē ua ita mai iā te ia, ua na lūlūina le titania i totonu o le saito, ona alu ese ai lea o ia. Ua totogo aʻe le saito, ma fua mai, ona iloa ai lea o le titania. Ona ō mai ai lea o auauna a le matai o le aiga, ua faapea mai iā te ia, Le alii e, e lē o le saito lelei ea na e lūlūina i lou fanua? O lenei, pe naifea nei titania? Ona fai atu ai lea o ia iā te i latou, Ua fai lenei mea e se tagata ua ita mai. Ona fai mai ai lea o auauna iā te ia, E te finagalo ea matou te ō atu e veleeseina ia mea? A ua fai atu ia, Aua; ina neʻi outou liaʻi ma le saito pe a outou vele ese le titania. Tuu ia, ia tupu lua pea seʻia oo i le seleselega; a oo atu i ona pō e selesele ai, ou te fai atu ai i ē selesele, Ia outou muaʻi faapotopoto mai le titania, ma outou fusia i fusi e susunu ai; a o le saito, tou te faaputuina lea i loʻu fale saito.”—Mataio 13:24-30.

Na faapea atu Iesu o ia o ‘lē lūlū saito.’ Na faaatagia e ona soo moni “le saito lelei.” O “lē ua ita mai” iā te ia, o Satani le Tiapolo. O “titania” o Kerisiano pepelo ia na faasolosolo mālie ona iai i le uluaʻi faapotopotoga Kerisiano. Na fetalai Iesu, o le a ia faatagaina le ola faatasi o “le saito” ma “le titania” seʻia oo i “le seleselega,” lea o le a “faia i le gataaga o lenei lalolagi.” (Mataio 13:37-43) O le ā le uiga o fetalaiga na?

Faaleagaina le Faapotopotoga Kerisiano

E leʻi leva ona maliliu le ʻauaposetolo, ae amata loa ona puleaina le faapotopotoga e aʻoaʻo pepelo ia na auai ai. Na tautatala i latou “i mea faapiʻopiʻo, e fetoso ese ai le ʻau soo ia mulimuli iā i latou.” (Galuega 20:29, 30) O le iʻuga, na toʻatele Kerisiano na ‘ō ese i le faatuatua.’ Na ‘liliu atu i latou i tala o le vavau.’—1 Timoteo 4:1-3; 2 Timoteo 4:3, 4.

 Ua fai mai se tasi tusi, e oo atu i le senituri lona fā T.A., ua “avea le Lotu Katoliko Kerisiano ma lotu . . . autū a le Emepaea o Roma.” (The New Dictionary of Theology) Na “palu faatasia ai faiga faalotu ma faiga faalemalo”—na tuufaatasia le Lotu ma le Setete ma o se faiga lea na matuā tetee malosi i talitonuga a uluaʻi Kerisiano. (Ioane 17:16; Iakopo 4:4) Na faapea mai le tusi lava lenā, na suia atoatoa mulimuli ane le lotu ma le tele o ana aʻoaʻoga faavae “talu ai o aafiaga lē lelei o le palu faatasia o aʻoaʻoga o le Feagaiga Tuai atoa ai ma aʻoaʻoga fou ma faiga fou.” Ua moni ai fetalaiga a Iesu, na mou atu ona soo moni ae ua olaola faiga a Kerisiano pepelo.

Na silafia e i latou na faalogologo iā Iesu, le faigatā tele ona iloa le eseesega o saito maoʻi ma titania, e pei o le titania leaga e taʻua o le darnel, lea e tai foliga o se saito pe a oo ina ola. O lea la, na fetalai Iesu i le talafaatusa ina ia iloa ai, e umi se taimi o faigatā ona iloa le eseesega o Kerisiano moni ma Kerisiano pepelo. Ae e lē faapea e leʻi toe iai le faapotopotoga Kerisiano, talu ai na fai le folafolaga a Iesu o le a faaauau ona ia taʻitaʻiina ona uso faaleagaga “i aso uma lava, e oo lava i le gataaga o le lalolagi.” (Mataio 28:20) Na fetalai Iesu o le a faaauau ona ola le saito. O lea la, a o faagasolo le faitau selau o tausaga, e lē taumatea na faia e Kerisiano moni—taʻitoʻatasi po o se vaega—le mea silisili latou te mafai ina ia pipiimau ai i aʻoaʻoga a Iesu. Peitaʻi, e leʻi toe mātaulia i latou o se vaega po o se faalapotopotoga vaaia. E leʻi faia sa latou vaega i faiga faalotu pepelo a le lalolagi, lea na faaluma ma faaleagaina ai le suafa o Iesu Keriso i le faagasologa mai o tausaga.—2 Peteru 2:1, 2.

“Faaalia Mai o le Tagata o le Amio Leaga”

Na valoia foʻi e le aposetolo o Paulo se mea o le a faailogaina ai lenei faiga sesē faalotu. Na faapea mai: “Aua neʻi faasesē se tasi iā te outou i se togafiti e tasi; auā e lē oo mai [le aso o Ieova], seʻia muaʻi ona taunuu o le teteʻa ese [mai le lotu moni], ma ia faaalia mai o le tagata o le amio leaga.” (2 Tesalonia 2:2-4) O le mea moni, o lenei “tagata o le amio leaga” ua faasino atu i le ʻautaʻitaʻi lotu lea na latou faasilisilia i latou lava, ma avea i latou ma pule i le faapotopotoga “Kerisiano.” *

Na amata ona ō ese tagata mai le lotu moni a o soifua le aposetolo o Paulo. Na matuā salalau atu lenā tulaga ina ua maliliu le ʻauaposetolo ma mou atu ai la latou taaʻiga malosi. Na taʻua e Paulo o le a mātaulia lelei lenā tulaga e ala i “le galuega a Satani . . . i le mana uma, ma faailoga, ma vavega pepelo, ma mea faasesē uma o le amio leaga.” (2 Tesalonia 2:6-12) Ioe, ua matuā talafeagai lenā mau e faamatalaina ai gaoioiga a le toʻatele o taʻitaʻi lotu i le faagasologa mai o le faitau selau o tausaga!

Ina ia lagolagoina lo latou taofi e faapea o le Katoliko Roma o le lotu moni, ua fai mai taʻitaʻi Katoliko o o latou epikopō e “amata mai lo latou talaaga i tuā lava i le taimi o uluaʻi aposetolo.” O le mea moni, e lē o faamaonia e le talafaasolopito lenā manatu, ma e leai foʻi se faamaoniga faale-Tusi Paia. E leai ni faamaoniga maufaatuatuaina e iloa ai, na taʻitaʻia e le agaga paia o le Atua faiga faalotu na tulaʻi mai ina ua mavae le maliu o le ʻauaposetolo.—Roma 8:9; Kalatia 5:19-21.

Ae faapefea lotu na faatutūina ina ua māeʻa le vaitaimi na taʻua o le Toefuataʻiina? Pe na latou toe mulimuli atu ea i le uluaʻi faapotopotoga Kerisiano? Faamata na latou toe faafoʻisia le tulaga mamā o le uluaʻi faapotopotoga Kerisiano? E moni ina ua māeʻa le Toefuataʻiina, na mafai ona maua e le toʻatele o tagata lautele le Tusi Paia ina ua faaliliuina i gagana na latou malamalama i ai. Peitaʻi, ua faaalia e le talafaasolopito, na faaauau pea ona aʻoaʻoina e lotu nei aʻoaʻoga sesē. *—Mataio 15:7-9.

 Ae seʻi mātau mai lenei manatu. E mautinoa lava na valoia e Iesu Keriso le toe faafoʻisiaina o lana faapotopotoga moni e tasi, i le vaitaimi na taʻua e ia, o le gataaga o le lalolagi (po o le faaiʻuga o se faiga o mea e tusa ai ma le gagana Eleni). (Mataio 13:30, 39) O le faataunuuga o valoaga o le Tusi Paia, ua faaalia ai o loo tatou ola nei i lenā taimi. (Mataio 24:3-35) Ona o lea, e moomia ona fesili ifo le tagata iā te ia lava, ‘O fea o iai lenā lotu moni e tasi?’ E tatau ona faasolosolo ina iloagofie lenā lotu moni e tasi.

Atonu e te manatu, o lenā ua e mauaina le lotu po o le faapotopotoga moni. E tāua ona e faamautinoa i lenā manatu. Aiseā? Auā foʻi e na o le tasi lava le lotu moni e pei foʻi ona sa iai i le uluaʻi senituri. Faamata ua e faamautinoa po o mulimulituʻi le lotu o e iai, i le faaaʻoaʻoga na faia e uluaʻi faapotopotoga Kerisiano, ma o loo pipiimau foʻi i aʻoaʻoga a Iesu Keriso? Aiseā e lē iloilo ai loa i le taimi nei? O le a fiafia Molimau a Ieova e fesoasoani iā te oe ina ia iloiloina lenā mataupu.—Galuega 17:11.

[Faamatalaga pito i lalo]

[Ata i le itulau 5]

O le ā ua tatou iloa mai le talafaatusa a Iesu i le saito ma le titania e uiga i le faapotopotoga moni e tasi?

[Ata i le itulau 7]

Po o mulimuli ea lau lotu i le faaaʻoaʻoga a Kerisiano i le uluaʻi senituri i le talaʻi ma le suʻesuʻe?