Pe na o le Tasi le ‘Lotu Moni’?

“E PEI ona toʻatasi le Keriso e faapena foʻi ona tasi le tino o Keriso, e tasi le Avā a Keriso: ‘e tasi le Lotu Katoliko ma o le lotu faaaposetolo lava lenā.’”—Dominus Iesus (Le Alii o Iesu Keriso).

O le taʻutinoga lenā a se alii katinale o le lotu Katoliko Roma e suafa iā Joseph Ratzinger, e tusa ai ma aʻoaʻoga a lana lotu e faapea, e na o le tasi lava le lotu moni. Na faapea mai o ia o lenā lotu “e na o le pau lea o le Lotu a Keriso ma e faasino atu i le Lotu Katoliko.”

“E Lē o ni Lotu Aloaʻia”

E ui lava na faapea mai Pope Ioane Paulo II o lenā pepa Dominus Iesus “e lē o fiasili pe lē faaaloalo foʻi i isi tapuaʻiga,” ae sa matuā lē malilie ai taʻitaʻi lotu Porotesano. O se faaaʻoaʻoga, i le Fono a le Lotu Perepereane i le aai o Belfast i le itu i matu o Aialani iā Iuni 2001, na fai mai ai se faifeʻau e faapea o le māfuaaga na iai lenā pepa ona sa tusia e “se vaega mapolotu o le Lotu Katoliko Roma . . . ia na matuā popole i le saʻolotoga e faaali ai manatu lea na amata mai i le Fono Lona Lua a le Vatikana.”

Na faapea mai le epikopō sili o le Lotu Aialani e suafa iā Robin Eames, e “matuā lē fiafia lava” pe afai o lenā pepa, “o le a toe foʻi ai i talitonuga muamua sa iai a o leʻi faia le Fono Lona Lua a le Vatikana.” E tusa ai ma le taofi a le Vatikana e faapea o lotu ia e teena nisi o aʻoaʻoga a le lotu Katoliko e “lē o ni Lotu aloaʻia,” fai mai Eames: “O se manatu e faalumaina ai.”

Aiseā la na tusiaina ai le pepa Dominus Iesus? E foliga mai ua popole le Taupulega a le Lotu Katoliko Roma i le manatu e faapea, e mafai ona suia talitonuga faalotu e tusa ai ma manaʻoga o tagata ma faapotopotoga. Na taʻua e le mekasini The Irish Times, “o le fotuaʻi mai o se talitonuga e faapea e lelei lotu uma—o lona uiga e tutusa uma lava tapuaʻiga . . . ua atili ai ona faapopoleina le Katinale o Ratzinger.” E foliga mai o lenā manatu na ala ai ona fai lana faamatalaga e faapea, e na o le tasi le lotu moni.

Pe e Tāua le Lotu E te Auai Ai?

O le mea moni, e sili atu ona logolelei ma talafeagai i nisi le manatu e faapea e tutusa uma lotu pe e lelei lotu uma, na i lo le manatu e na o le tasi le lotu moni. O lo latou taofi, e pule lava le tagata ia i lana tapuaʻiga. Ua latou faapea mai ‘e lē tāua le lotu e auai ai le tagata.’

E foliga mai e logolelei le manatu lenā i le toʻatele o tagata—e ui o ona āuga o le  vaevaeina o tapuaʻiga i le tele o mau lotu eseese. Ua fai mai le toʻatele o tagata, ‘o le tele o mau tapuaʻiga eseese, o se faailoga talafeagai lenā o le saʻolotoga o le tagata lava ia.’ Peitaʻi, e tusa ai ma le alii tusitala o Steve Bruce, o le “fiafia i lotu uma” o lona uiga o le “lē manatu mamafa i tapuaʻiga.”—A House Divided: Protestantism, Schism, and Secularization.

O lea la, o le ā le vaaiga saʻo? Pe na o le tasi ea le lotu moni? Po o le Lotu Katoliko Roma ea le lotu moni? Faamata e taliaina e le Atua isi lotu? Talu ai o loo iai se fesootaʻiga o fesili nei ma la tatou faiā ma Lē na Foafoaina i tatou, e mautinoa e tāua ona saʻili po o le ā le finagalo o le Atua e tusa ai ma lenei mataupu. E faapefea ona tatou faia lenā mea? E ala i le iloiloina o le Afioga a le Atua, le Tusi Paia. (Galuega 17:11; 2 Timoteo 3:16, 17) Seʻi o tatou tilofaʻia la, po o le ā le tala a le Tusi Paia e uiga i le tasi o le lotu moni.