E Faamanuiaina Ē e Faamamaluina le Atua

“Latou [te] ifo atu i ou luma, le Alii e; ma latou faaneenee atu i lou suafa.”—SALAMO 86:9.

1. Aiseā ua sili atu ai auala e tatou te faamamaluina ai le Atua na i lo foafoaga e leai ni ola?

UA ALAGATATAU ona maua e Ieova le viiga mai ana foafoaga uma. A o faamamaluina lē leoa o ia e ana foafoaga e leai ni ola, ua iā i tatou o tagata le tomai e fefulisaʻi ai, ia malamalama, talisapaia ma ia tapuaʻi. O lea la, o i tatou na faaautū i ai upu a le faisalamo e faapea: “Le lalolagi uma e, ia outou alalaga atu i le Atua. Ia outou pepese atu i lona suafa mamalu; ia mamalu iā te outou lona viiga.”—Salamo 66:1, 2.

2. O ai ua tali atu i le faatonuga e avatu le viiga i le suafa o le Atua, ma aiseā?

² O le toʻatele o tagata latou te lē o amanaʻia pe faamamaluina le Atua. Peitaʻi ane, i atunuu e 235, ua silia i le ono miliona Molimau a Ieova ua faaalia e faapea ua latou iloaina uiga “lē vaaia” o le Atua e ala i mea na ia foafoaina, ma ua latou “lagona” foʻi le molimau lē leoa a le foafoaga. (Roma 1:20; Salamo 19:2, 3) E ala i le suʻesuʻeina o le Tusi Paia, ua latou iloa ma alolofa ai iā Ieova. Na valoia e le Salamo 86:9, 10: “O nuu uma na e faia latou te ō mai, ma latou ifo atu i ou luma, le Alii e; ma latou faaneenee atu i lou suafa. Auā e sili oe, o loo e fai foʻi vavega; o le Atua oe, na o oe lava.”

3. E faapefea i le “motu o tagata e toʻatele” ona ‘⁠auauna i le ao ma le pō’?

³ O loo faamatalaina foʻi e le Faaaliga 7:9, 15 “le motu o tagata e toʻatele” o tagata tapuaʻi o ē o loo “auauna foʻi [i le Atua] i lona malumalu i le ao ma le pō.” E lē faapea ua faatonuina moni e le Atua ana auauna ina ia lē mālōlō i le avatuina o le viiga peitaʻi, o ona tagata tapuaʻi o se faalapotopotoga i le lalolagi aoao. A o pō isi atunuu, o loo pisi auauna a le Atua i le isi itu o le lalolagi e molimau atu i isi. O lea la, e mafai ona faapea atu o loo faaauau ona faamamaluina Ieova i le ao atoa ma le pō. Ua toeitiiti ona alalaga atu lea o “mea uma lava e mānava” i viiga o Ieova. (Salamo 150:6) Ae o le ā e mafai ona fai e i tatou taʻitoʻatasi e avatu ai le viiga i le Atua i le taimi nei? O ā ni luʻi e ono fetaiaʻi ma i  tatou? O ā faamanuiaga o le a maua i le lumanaʻi e i latou e faamamaluina le Atua? Ina ia maua le tali, seʻi o tatou iloiloina se tala o le Tusi Paia e faatatau i le ituaiga o Isaraelu o Kato.

Se Luʻi i Aso Anamua

4. O ā luʻi na fetaiaʻi ma le ituaiga o Kato?

⁴ A o leʻi ulu atu i le Nuu Folafolaina, na talosaga atu tagata o le ituaiga o Isaraelu o Kato, ina ia latou faamautū i laufanua lelei mo lafumanu i le itu i sasaʻe o le vaitafe o Ioritana. (Numera 32:1-5) O le faamautū i inā o le a feagai ai ma ni luʻi tugā. O ituaiga e nonofo i le itu i sisifo, e malupuipuia i latou e le vanu o Ioritana—o se mea e punitia ai mai osofaʻiga a vaegaau. (Iosua 3:13-17) Ae e tusa ai ma laufanua i le itu i sasaʻe o le Ioritana, na faapea mai se tusi na tusia e George Adam Smith: “E laugatasi uma [laufanua nei], e toetoe a leai se mea e punitia ai nei laufanua tetele o Arapi. O le iʻuga, e lē malupuipuia i latou i taimi uma mai osofaʻiga a tagata maumausolo fia aai, o nisi e osofaʻia e se vaega toʻatele i tausaga taʻitasi ina ia fafaga ai a latou lafumanu.”—The Historical Geography of the Holy Land.

5. Na faapefea ona faalaeiau e Iakopo ē na tupuga mai iā Kato e gaoioi pe a osofaʻia i latou?

⁵ E faapefea ona feagai le ituaiga o Kato ma nei omiga faigatā? I senituri muamua atu, na valoia e lo latou augātamā o Iakopo a o latalata ina maliu e faapea: “O Kato, e malo se ʻau iā te ia; a o ia, e iʻu ina malo lava ia.” (Kenese 49:19) O le uluaʻi taimi e faitauina ai na upu, e aliali mai o se tulaga faanoanoa. Ae o le mea moni, o loo faasino atu i se faatonuga ina ia tau le ituaiga o Kato faasaga i ia ʻau. Na faamautinoa i ai e Iakopo, afai latou te faia faapea, o le a māsiasi tagata osofaʻi ma tuumuli ai, ae o le a tuliloaina i latou e le ʻau Kato ma malo ai.

Luʻi i la Tatou Tapuaʻiga i Aso Nei

6, 7. E faapefea ona pei le tulaga o Kerisiano i aso nei o le ituaiga o Kato?

⁶ I le pei o le ituaiga o Kato, ua oo i Kerisiano i aso nei luʻi ma omiga o le faiga o mea a Satani ma e lē puipuia faavavega i tatou ina ia sao mai ai. (Iopu 1:10-12) O le toʻatele o i tatou, e tatau ona feagai ma omiga o le auai i aʻoga, suʻeina o tupe ma le tausia aʻe o fanau. O loo iai foʻi omiga e fitoitonu i le tagata lava ia. O nisi o loo tauivi ma “le mea matuitui i le tino” e pei o se maʻi tigāina po o le lē atoatoa o le malosi. (2 Korinito 12:7-10) O nisi ua lofitūina i faalogona e faapea e lē tāua i latou. E ono faalavelavea nisi Kerisiano matutua mai le auauna atu iā Ieova i le malosi lea na iā i latou muamua, ona o “aso leaga” o le soifuaga matua.—Failauga 12:1.

⁷ Na faamanatu mai foʻi e le aposetolo o Paulo, o loo tatou “tau . . . ma agaga leaga i mea  o i le lagi.” (Efeso 6:12) Ua tatou mātauina e lē aunoa “le agaga o lenei lalolagi,” o le agaga o le fouvale ma le amioleaga ua faaauiluma e Satani ma ana temoni. (1 Korinito 2:12; Efeso 2:2, 3) I le pei o Lota o lē na mataʻu i le Atua, e ono faapopoleina i tatou i amioga ma faaupuga lē mamā a tagata i aso nei. (2 Peteru 2:7) Ua tatou vāai foʻi i osofaʻiga tuusaʻo a Satani. O loo tau e Satani le taua ma le vaega totoe faauuina, o ē “ua tausi i poloaʻiga a le Atua, ma ua taofi le mau iā Iesu.” (Faaaliga 12:17) Ua feagai foʻi “isi mamoe” a Iesu ma osofaʻiga a Satani e ala i faasāsāaga ma sauāga.—Ioane 10:16.

Lolo Atu pe Tau Faasaga i Ai?

8. E ao faapefea ona tatou tali atu i osofaʻiga a Satani, ma aiseā?

⁸ E ao faapefea ona tatou tali atu i osofaʻiga a Satani? E pei o le ituaiga o Kato i aso anamua, e tatau ona tatou malolosi faaleagaga ma tau faasaga i ai, e tusa ai ma faatonuga a le Atua. O le mea e faanoanoa ai, ua amata ona fiu isi ona o omiga o le olaga, ma tuulafoaʻi ai o latou tiute tauave faaleagaga. (Mataio 13:20-22) Na taʻua e se tasi Molimau le pogai na toʻaitiiti ai ē na auai i sauniga i lana faapotopotoga: “Ua amata ona lē lavavā uso. Ua faatumulia i latou i popolega.” O le mea moni, e tele māfuaaga ua lē lavavā ai tagata i aso nei. O lea la, e faigofie ona manatu i le tapuaʻiga a le Atua e faapea o se isi foʻi mea e faapopoleina ai ma o se tiutefai mamafa. Ae pe o se vaaiga lelei po o se vaaiga saʻo lenā?

9. E faapefea ona mālōlō se tasi pe a amoina le amo a Keriso?

⁹ Ia manatu foʻi i fetalaiga a Iesu i le motu o tagata i ona aso, o ē na faapena foʻi ona fiu ona o omiga o le olaga: “Ia outou ō mai iā te aʻu, o outou uma o ē tigāina ma mafatia i avega, o aʻu foʻi e mālōlō ai outou.” Po o le uiga o le fetalaiga a Iesu, e maua le mālōlōga pe a faavaivai i le auaunaga a le Atua? E leai, na i lo lea, na fetalai Iesu: “Ia outou amoina laʻu amo, ma ia outou faaaʻoaʻo iā te aʻu, auā o aʻu lē agamalu ma le loto maulalo; ona maua lea e outou o le mālōlōga mo outou agaga.” O le amo o se laau po o se uʻamea lea e mafai ai e se tagata po o se manu ona amoina se uta mamafa. Aiseā o le a manaʻo ai fua se tagata e tauave se amo faapena? Pe e lē o lea ea ua tatou “mafatia i avega”? E moni, ae i le gagana Eleni e ono faitauina foʻi faapenei le mau lea: “Ia ta amoina faatasi laʻu amo.” Ia manatu i ai, ua ofoina mai e Iesu le fesoasoani i le amoina o a tatou avega! E lē manaʻomia ona amoina i lo tatou lava malosi!—Mataio 9:36; 11:28, 29; 2 Korinito 4:7.

10. O le ā le iʻuga o a tatou taumafaiga e faamamaluina le Atua?

¹⁰ Pe afai tatou te taliaina le amo o le avea lea o i tatou ma soo, o loo tatou tau la faasaga iā Satani. Na folafola mai le Iakopo 4:7: “Ia outou tetee atu i le tiapolo, ona sola ese ai lea o ia iā te outou.” E lē faapea e faigofie le tetee atu i le tiapolo. O le auaunaga i le Atua e aofia ai ni taumafaiga filigā. (Luka 13:24) Ae ua folafola mai le Tusi Paia i le Salamo 126:5: “O ē lūlū saito ma loimata, latou te seleseleina ma le alaga fiafia.” Ioe, o loo tatou auauna i se Atua e talisapaia a tatou taumafaiga. “O ia foʻi na te tauia mai o ē matuā saʻili iā te ia,” ma na te faamanuiaina ē e faamamaluina o ia.—Eperu 11:6.

Faamamaluina le Atua Ona o Ē e Talaʻia le Malo

11. E faapefea ona avea le faiva i le fanua ma puipuiga mai osofaʻiga a Satani?

¹¹ Na poloaʻi Iesu: “Ia outou ō atu e fai nuu uma lava ma soo.” O le galuega talaʻi o le auala autū lenā e ofoina ai i le Atua “taulaga o le viiga.” (Mataio 28:19; Eperu 13:15) O le “faaseevaeina o [tatou] vae i le sauniga o le tala lelei o le filemu,” o se vaega tāua lenā o lo tatou “ofutau atoatoa”—o lo tatou puipuiga mai osofaʻiga a Satani. (Efeso 6:11-15) O le viiaina o le Atua i le faiva i le fanua, o se auala lelei lenā e faamalosia ai lo tatou faatuatua. (2 Korinito 4:13) E fesoasoani iā i tatou e ʻalofia ai mafaufauga lē ati aʻe. (Filipi 4:8) O le auai i le faiva i le fanua, e mafai ai ona tatou olioli i faatasiga faamalosiau ma o tatou uso tapuaʻi.

12, 13. E faapefea ona maua e aiga aogā e ala i le auai e lē aunoa i le faiva i le fanua? Ia faataʻitaʻi.

¹² E mafai foʻi ona avea le talaʻiga o se galuega lelei mo le aiga atoa. O le mea moni, e manaʻomia  e le fanau faafiafiaga paleni. Ae o le taimi lea e faaaogā faatasi e le aiga i le faiva i le fanua, e lē tatau ona avea o se mea e tau ina fai. E mafai ona faatupuina e mātua le fiafia o tamaiti i le faiva i le fanua, e ala i le toleniina o le fanau ia uigā a latou talanoaga ma tagata. Pe e lē fiafia ea tamaiti e faia mea latou te popoto e fai? O le faaalia o se vaaiga lelei e mafai ai e mātua ona fesoasoani i le fanau ina ia fiafia i le faiva, ae lē o le faatalitalia o le fanau e faia mea latou te lē gafatia.—Kenese 33:13, 14.

¹³ E lē gata i lea, o se aiga e auai faatasi i le faamamaluina o le Atua, e faamalosia atili la latou faiā. Ia manatu foʻi i se tuafafine o lē na tuua e lana tane lē talitonu o ia ma la laʻua fanau e toʻalima. O lea, na ia feagai ai ma le luʻi o le faigaluega ma saunia meafaitino mo lana fanau. Pe na matuā lē lavā o ia ma tuulafoaʻia ai manaʻoga faaleagaga o lana fanau? Na fai mai o ia: “Na ou tinoū e suʻesuʻe le Tusi Paia ma lomiga faale-Tusi Paia, ma taumafai e faatatau mea na ou faitauina. Na fai ma aʻu masani le ave o laʻu fanau i sauniga ma le galuega talaʻi i le fale i le fale. O ā iʻuga o aʻu taumafaiga? Ua papatisoina laʻu fanau uma e toʻalima.” O le faia o se sao atoatoa i le faiva, e mafai foʻi ona fesoasoani i au taumafaiga e tausi aʻe ou alo “i aʻoaʻiga ma apoapoaʻiga a le Alii.”—Efeso 6:4.

14. (a) E faapefea i le fanau ona faamamaluina le Atua i aʻoga? (e) O le ā e fesoasoani i talavou ina ia lē “mā i le tala lelei”?

¹⁴ Le fanau e, afai tou te nonofo i se atunuu e faataga e le tulafono ona talanoa i mataupu faalelotu i aʻoga, pe faamata o outou faamamaluina le Atua e ala i le molimau atu, pe e taofia outou mai le molimau atu ona o le fefe i tagata? (Faataoto 29:25) Na tusi se Molimau e 13 tausaga mai Puerto Rico e faapea: “E leai se taimi na ou māsiasi ai e talaʻi i le aʻoga ona ou te iloa o le upu moni lenei. I totonu o le vasega, e masani ona sii i luga loʻu lima ma faamatala atu mea ua ou aʻoaʻoina mai le Tusi Paia. O taimi ou te avanoa ai, ou te alu i le potutusi ma faitau ai le tusi Ua Fesili Mai Talavou.” * Pe na faamanuiaina e Ieova ana taumafaiga? Na fai mai o ia: “O nisi taimi, e fai mai ai fesili a tamaiti o laʻu vasega ma talosaga mai mo se kopi o le tusi.” Afai e te faatalatū e molimau atu, atonu e tatau ona e malamalama lelei i “le finagalo o le Atua, o mea ua lelei, ma le mālie, ma le atoatoa” e ala i le toʻaga e faia au lava suʻesuʻega. (Roma 12:2) Afai e te matuā talitonu o mea ua e aʻoaʻoina o le upu moni lenā, e lē taitai la ona e “mā i le tala lelei.”—Roma 1:16.

Ua ‘Avanoa se Faitotoʻa’ o le Auaunaga

15, 16. O le ā “le faitotoʻa lautele” ua ulu atu i ai isi Kerisiano, ma o ā ni faamanuiaga ua latou maua?

¹⁵ Na tusi le aposetolo o Paulo e faapea “ua faaavanoa mo aʻu le faitotoʻa lautele” o le auaunaga. (1 Korinito 16:9) Pe e mafai ona e ulu atu i se faitotoʻa o le auaunaga e tusa ai ma ou tulaga? O se faaaʻoaʻoga, o le avea o se paeonia sauatoa po o se paeonia lagolago e manaʻomia ona galue pe tusa e 70 po o le 50 itula i le masina i le galuega talaʻi. E masani lava ona talisapaia e uso Kerisiano le ʻaupaeonia ona o a latou auaunaga faamaoni. Ae e lē faapea ai ua sili atu paeonia i o latou uso ma tuafāfine, ona e tele atu lo latou taimi e alu i le faiva. Na i lo lea, latou te ati aʻe le uiga na faalaeiauina e Iesu: “O auauna lē aogā i matou nei; auā o mea e tatau ona matou fai, o mea ia ua matou faia.”—Luka 17:10.

 ¹⁶ O le auaunaga paeonia e manaʻomia ai le pulea o le tagata lava ia, ia maopoopo ma ia lotomalie e faataulaga isi mea. Peitaʻi, e anoanoaʻi faamanuiaga e maua mai ai. Na fai mai se paeonia talavou e igoa iā Tamika: “O se faamanuiaga loʻu iloa ona vaevaetonuina le Afioga a le Atua. Afai e avea oe o se paeonia, e tele ina e faaaogā le Tusi Paia. I le taimi nei pe a ou alu mai lea fale i lea fale, ua mafai ona ou mafaufau i ni mau e talafeagai lelei ma le tagata e ona le fale.” (2 Timoteo 2:15) O upu nei a se paeonia e igoa iā Mika: “O se isi faamanuiaga ofoofogia, o le vaaia lea o aafiaga i olaga o tagata ona o le upu moni.” Na taʻua foʻi e se isi paeonia talavou e igoa iā Mataio, le fiafiaga i le “vaaia o se tagata ua taliaina le upu moni. E leai se isi fiafiaga e sili atu i lenā.”

17. Na faapefea ona foʻia e se Kerisiano le vaaiga sesē na iā te ia e faatatau i le auaunaga paeonia?

¹⁷ Pe e mafai ona e mafaufau e ulu atu i le faitotoʻa mo le auaunaga paeonia? Atonu o lou faanaunauga lenā ae e te manatu e te lē agavaa. Na taʻutino mai e se tuafafine talavou e igoa iā Kenyatte: “Na sesē laʻu vaai i le auaunaga paeonia. Na ou manatu ou te lē mafaia. Ou te leʻi iloa sauni ni taulimaga pe faaaogā foʻi le Tusi Paia e fefulisaʻi ai.” Ae ui i lea, na tofia e toeaina se tuafafine paeonia taʻumatuaina la te galulue faatasi. Na faapea mai Kenyatte: “O se fiafiaga iā te aʻu le ma galulue faatasi. O le māfuaaga lenā na ou manaʻo ai e fai laʻu paeonia.” E ala i ni faalaeiauga ma toleniga, atonu e te manaʻo foʻi e fai sau paeonia.

18. O ā faamanuiaga e ono maua e i latou e ulu atu i le auaunaga faamisionare?

¹⁸ E ono faaavanoaina e le auaunaga paeonia le faitotoʻa mo isi faaeaga o le auaunaga. O se faaaʻoaʻoga, o isi ulugalii faaipoipo e ono agavaa mo le toleniga faamisionare ma auina atu e talaʻi i isi atunuu. E tatau i misionare ona faamasani i se isi atunuu, atonu o se gagana, aganuu ma meataumafa e fou iā i latou. Peitaʻi, e faatauvaa na tulaga faalētonu pe a fua atu i faamanuiaga e maua mai ai. Na fai mai Mildred o lē ua loa ona avea ma misionare i Mekisikō: “E leai lava se taimi na ou salamō ai i laʻu filifiliga e avea aʻu ma misionare. O se  mea na ou faanaunau i ai talu mai o oʻu laʻitiiti.” O ā faamanuiaga na ia olioli ai? “I le atunuu na ou ola aʻe ai, e faigatā ona maua se suʻesuʻega faale-Tusi Paia. Ae i inei, i se tasi taimi, pe tusa e toʻafā aʻu suʻesuʻega faale-Tusi Paia na amata i le taimi e tasi i le faiva i le fanua!”

19, 20. E faapefea ona faamanuiaina le toʻatele o tagata ona o le auaunaga i le Peteli, le auaunaga faavaomalo ma le Aʻoga mo Toleniga i le Faiva?

¹⁹ E sosia foʻi faamanuiaga e maua e i latou e auauna i le Peteli i ofisa o lālā a Molimau a Ieova. Na faapea mai Sven, o se uso talavou o loo auauna i Siamani e faatatau i lana galuega i le Peteli: “Ou te manatu o loo oʻu faia se galuega e tumau ona aogā. Na ono mafai ona ou faaaogāina oʻu tomai i le lalolagi. Ae o le faia faapea e pei o le teuina o tupe i se faletupe e mautinoa o le a gau.” E moni, o le galue tauofo e aunoa ma se totogi e aofia ai le ola e aunoa ma le tele o mea. Ae na fai mai Sven: “Pe a e toe foʻi i le fale, e te iloa o mea uma lava na e faia i lenā aso, na e faia mo Ieova. O se mea e ‘matuā faagaeetia ai.’”

²⁰ O isi uso ua latou tofo i faamanuiaga o le auaunaga faavaomalo, e galulue i faugāfale o lālā i isi atunuu. Na tusi se ulugalii o ē na auauna i ni tofiga i atunuu eseese e valu: “E ese le lelei o uso i inei. O le a mafatia o maʻua loto pe a ma ō ese—o le taimi lona valu lenei ua ‘mafatia’ ai o maʻua loto. Maʻeu le matagofie o mea na ma tofo i ai!” E iai foʻi le Aʻoga mo Toleniga i le Faiva, lea e maua ai e uso agavaa nofofua ia toleniga faaleagaga. Na tusi se uso na faauu mai ai e faapea: “E lē mafai ona faamatala i upu loʻu lotofaafetai mo lenei aʻoga matagofie. E leai lava se isi faalapotopotoga ua saunia ni toleniga lelei faapenei!”

21. O le ā le luʻi ua feagai ma Kerisiano uma i la latou auaunaga i le Atua?

²¹ Ioe, e anoanoaʻi faitotoʻa o le auaunaga o loo avanoa. E moni o le toʻatele o i tatou e lē mafai ona auauna i le Peteli po o se isi atunuu. Na fetalai Iesu e eseese le aofaʻiga o “fua” e fuaina e Kerisiano ona e eseese o latou tulaga. (Mataio 13:23) O lea la, o le luʻi mo i tatou o Kerisiano, o le faia lea o le mea silisili tatou te mafaia e tusa ai ma o tatou tulaga—ia faia se sao atoatoa i le auaunaga a Ieova. Pe a tatou faia faapea, ua tatou faamamaluina ai Ieova ma tatou mautinoa ai o loo olioli lona finagalo. Seʻi manatu foʻi iā Ethel, o se tuafafine ua afu lona soifua e nofo i se fale mo tagata matutua. E talaʻi o ia e lē aunoa i ē matutua latou te nonofo faatasi, ma e molimau atu foʻi e ala i le telefoni. E ui i le faatapulaa o lona tulaga, ae o loo auauna atu iā Ieova ma lona lotoatoa.—Mataio 22:37.

22. (a) O ā nisi auala e mafai ai ona tatou faamamaluina le Atua? (e) O ā taimi matagofie o loo tatou faatalitalia?

²² Ia manatua, o le talaʻiga ua na o se tasi lenā o auala tatou te faamamaluina ai Ieova. Tatou te faafiafiaina le finagalo o Ieova pe a avea i tatou ma faaaʻoaʻoga lelei i amioga ma teuga pe a tatou iai i galuega, aʻoga po o le aiga. (Faataoto 27:11) Ua folafola mai e le Faataoto 28:20: “O le tagata faamaoni, e tele mea e manuia ai o ia.” O lea la, ia ‘tele mea tatou te lūlūina’ i le auaunaga a le Atua, auā ua tatou iloa e anoanoaʻi faamanuiaga tatou te selesele mai ai. (2 Korinito 9:6) O le faia faapea, ua tatou maua ai le faaeaga e ola i le taimi matagofie o le a avatu ai e “mea uma lava e mānava” le viiga iā Ieova, lea ua matuā alagatatau ona ia mauaina!—Salamo 150:6.

[Faamatalaga pito i lalo]

Pe E te Manatua?

• E faapefea i tagata o le Atua ona auauna iā Ieova “i le ao ma le pō”?

• O le ā le luʻi na feagai ma le ituaiga o Kato, ma o le ā ua aʻoaʻoina mai ai e Kerisiano i aso nei?

• E faapefea ona avea le faiva i le fanua ma puipuiga mai osofaʻiga a Satani?

• O ā ‘faitotoʻa ua avanoa’ ua ulu atu i ai isi, ma o ā faamanuiaga ua latou olioli ai?

[Fesili mo le Suʻesuʻega]

[Ata i le itulau 15]

E pei ona tau le ʻau Kato faasaga i ē osofaʻia i latou, e tatau foʻi i Kerisiano ona tau faasaga i osofaʻiga a Satani

[Ata i le itulau 17]

Ua tatou olioli i faatasiga faamalosiau i le auaunaga i le fanua

[Ata i le itulau 18]

E ono faaavanoaina e le auaunaga paeonia le faitotoʻa mo isi faaeaga o le auaunaga, e aofia ai le:

1. Auaunaga faavaomalo

2. Auaunaga i le Peteli

3. Auaunaga faamisionare