Fiafia e Ui Ina Sauāina
Fiafia e Ui Ina Sauāina
“Amuia [fiafia] outou pe a latou upu leaga, ma faasauā iā te outou, ma latou tuuaʻiina pepelo outou i mea leaga uma ona o aʻu.”—MATAIO 5:11.
1. O le ā na faamautinoa e Iesu i ona soo e tusa ai ma le fiafia faapea ma sauāga?
INA ua muaʻi auina atu e Iesu ona aposetolo e talaʻi le Malo, na ia lapataʻia i latou e faapea o le a latou fesagaʻi ma teteega. Na ia taʻu atu iā i latou: “E inosia foʻi outou e tagata uma ona o loʻu igoa.” (Mataio 10:5-18, 22) Ae peitaʻi, muamua atu i lana Lauga i le Mauga, na ia faamautinoa atu i ona aposetolo ma isi, e lē mafai e na sauāga ona faaleagaina ai lo latou fiafia. O le mea moni, na faafesootaʻi atu e Iesu le fiafia i le sauāina ona o se Kerisiano! E faapefea ona aumaia e sauāga le fiafia?
Mafatia Ona o le Amiotonu
2. E tusa ai ma faamatalaga a Iesu ma le aposetolo o Peteru, o le ā le ituaiga mafatia e maua ai le fiafia?
2 O le māfuaaga lona valu mo le fiafia lea na taʻua e Iesu: “Amuia e sauāina ona o le amiotonu; auā e o latou le malo o le lagi.” (Mataio 5:10) O le mafatia i sauāga e lē o se mea e fiafia ai. Na tusi Peteru: “Pe se ā se viiga e maua pe afai tou te onosai pe a tuʻia outou ona o le agasala? A e afai tou te onosai pe a tigāina outou a o amio lelei, o le mea lava lea e mālie i le Atua.” Na ia taʻua atili: “Aua foʻi neʻi ala ona faatigāina so outou ina ua fasioti tagata, pe gaoi, pe amio leaga, po ina ua asiasi fua i mea a isi tagata; a e afai e faatigāina se tasi auā o ia o le Kerisiano, aua le māsiasi ai o ia, a ia vivii atu i le Atua ona o lea lava mea.” (1 Peteru 2:20; 4:15, 16) E tusa ai ma fetalaiga a Iesu, o le onosai e maua ai le fiafia pe a tumau ona o le amiotonu.
3. (a) O le ā le uiga o le sauāina ona o le amiotonu? (e) O le ā le aafiaga o sauāga i uluaʻi Kerisiano?
3 O le amiotonu moni e fua i le faia o le finagalo o le Atua ma usitai i ana tulafono. O lea la, o le mafatia ona o le amiotonu, o lona uiga o le sauāina ona o le teena e se tasi o omiga e solia ai tapulaa po o mea e faafinagaloina e le Atua. Na sauāina aposetolo e taʻitaʻi Iutaia ona sa latou lē taofia le talaʻia o le suafa o Iesu. (Galuega 4:18-20; 5:27-29, 40) Pe sa faaitiitia ai lo latou fiafia ma taofia ai la latou talaʻiga? E mautinoa e leai! “Ona ō lea o i latou nai luma o le fono, ua olioli ina ua taʻuaogāina i latou ia faaleagaina ona o lona suafa. Ua lē mapu foʻi i latou i aso uma ona aʻoaʻo atu, ma talaʻi atu i le malumalu, ma lea fale ma lea fale le tala lelei o Iesu le Keriso.” (Galuega 5:41, 42) O lenei sauāga na aumaia ai le olioli iā i latou ma toe faafouina ai lo latou maelega i le talaʻiga. Mulimuli ane, na sauāina uluaʻi Kerisiano e tagata Roma ona o le lē tapuaʻi i le emeperoa.
4. O ā nisi o māfuaaga o le sauāina o Kerisiano?
4 I aso nei, ua sauāina Molimau a Ieova ona o le talaʻia o le “tala lelei o le malo.” (Mataio 24:14) Ina ua faasāina a latou sauniga faa-Kerisiano, na lotomalilie i latou e mafatia na i lo le taofia o le potopoto faatasi e pei ona faatonuina e le Tusi Paia. (Eperu 10:24, 25) Na sauāina i latou ona o le solitū faa-Kerisiano po o le teena o le faaaogāina o le toto. (Ioane 17:14; Galuega 15:28, 29) Ae peitaʻi, o lenei tulaga ona o le amiotonu ua aumaia ai i tagata o le Atua i aso nei le filemu ma le fiafia.—1 Peteru 3:14.
Upu Leaga Ona o Keriso
5. O le ā le māfuaaga autū e sauāina ai tagata o Ieova i aso nei?
5 O le māfuaaga lona iva e fiafia ai lea na taʻua e Iesu i lana Lauga i le Mauga e fesootaʻi atu foʻi i le sauāina. Na ia fetalai: “Amuia outou pe a latou upu leaga, ma faasauā iā te outou, ma latou tuuaʻiina pepelo outou i mea leaga uma ona o aʻu.” (Mataio 5:11) O le māfuaaga autū e sauāina ai tagata o Ieova ona e leai sa latou vaega i lenei faiga leaga o mea. Na fetalai Iesu i ona soo: “Afai a ni tagata o le lalolagi outou, po ua alofa mai le lalolagi i ona tagata; a e lē ni o le lalolagi outou, a ua ou filifilia outou nai le lalolagi, o le mea lea e ʻinoʻino ai le lalolagi iā te outou.” (Ioane 15:19) I se tulaga tutusa, na taʻua e Peteru: “O le mea lea e ofo ai ma faifai ai i latou, auā tou te lē taufetuli ma i latou i lea lava ulavale silisili.”—1 Peteru 4:4.
6. (a) Aiseā ua upu leaga ma sauāina ai le vaega totoe ma a latou aumea? (e) Pe ua faaitiitia ai lo tatou fiafia ona o na upu leaga?
6 Ua tatou iloa na sauāina uluaʻi Kerisiano ona o le talaʻia o le suafa o Iesu. Na faatonuina e Keriso ona soo: “E fai foʻi outou ma molimau iā te aʻu . . . i le tuluʻiga o le lalolagi.” (Galuega 1:8) Ua maelega le vaega totoe faamaoni o uso faauuina o Keriso e faataunuu lenā faatonuga, ona o le fesoasoani a a latou aumea faamaoni le “motu o tagata e toʻatele.” (Faaaliga 7:9) O lea la, ua tau ai e Satani le taua ma ē ua “totoe o lana fanau [fanau a le “fafine,” le vaega faalelagi o le faalapotopotoga a le Atua], o ē ua tausi i poloaʻiga a le Atua, ma ua taofi le mau iā Iesu.” (Faaaliga 12:9, 17) I le avea o ni Molimau a Ieova, tatou te molimau ai iā Iesu, le Tupu o loo pule i le Malo, lea o le a faaumatiaina malo faaletagata o loo faalavelave i le lalolagi fou amiotonu a le Atua. (Tanielu 2:44; 2 Peteru 3:13) Talu ai lea tulaga, ua upu leaga ma sauāina ai i tatou, ae peitaʻi tatou te fiafia e mafatia ona o le suafa o Keriso.—1 Peteru 4:14.
7, 8. O le ā na tuuaʻia pepelo ai e tagata tetee uluaʻi Kerisiano?
7 Na taʻua e Iesu e ao i ona soo ona fiafia e tusa lava pe ‘tuuaʻiina pepelo i latou i mea leaga uma’ ona o ia. (Mataio 5:11) Na tupu moni lenei mea i uluaʻi Kerisiano. A o taofia Paulo i Roma, pe tusa o le 59-61 T.A., na faapea mai ai taʻitaʻi Iutaia e uiga i Kerisiano: “Ua iloa e i matou ua talaeseina lenā lotu i nuu uma lava.” (Galuega 28:22) Na tuuaʻia Paulo ma Sila ua “faatupu le fouvale i le lalolagi uma” ma ua “faatuʻiese foʻi i latou nei uma lava i poloaʻiga a Kaisara.”—Galuega 17:6, 7.
8 Na taʻua e le tusitala o talafaasolopito o K. S. Latourette e uiga i Kerisiano i le taimi o le Emepaea o Roma: “E eseese ituaiga tuuaʻiga. Na tuuaʻia Kerisiano e lē talitonu i le Atua talu ai na lē auai i aso faamanatu faapaupau. E ala i lo latou lē auai i mea e masani ai olaga o tagata—tausamiga faapaupau, faafiafiaga i le lautele . . .—na faifaia ai i latou o ē ʻinoʻino i tagata. . . . Na latou faapea mai, e feiloaʻi tane ma fafine Kerisiano i le pō . . . ma faia feusuaʻiga lē mamā. . . . Talu ai o le [Faamanatuga o le maliu o Keriso] sa na o ē talitonu na faamanatuina, na manatu ai nisi ua faia e Kerisiano taulaga i pepe ma inu o latou toto ma ʻaina o latou tino.” E lē gata i lea, ona sa teena e uluaʻi Kerisiano le auai i tapuaʻiga i le emeperoa, na tuuaʻia ai i latou o fili o le Setete.
9. Na faapefea ona tali atu Kerisiano o le uluaʻi senituri i tuuaʻiga sesē faasaga iā i latou, ma o le ā le tulaga i aso nei?
9 O na tuuaʻiga sesē e leʻi taofia ai uluaʻi Kerisiano mai le faataunuuina o lo latou tofiga e talaʻi le tala lelei o le Malo. I le 60-61 T.A., sa tautala ai Paulo e uiga i le “tala lelei . . . e pei ona i le lalolagi uma lava; o loo fua mai ai foʻi le fua,” ma ua “talaʻiina atu foʻi i tagata uma lava i le lalolagi.” (Kolose 1:5, 6, 23) O loo faia foʻi i aso nei. Ua tuuaʻia sesē Molimau a Ieova e pei o Kerisiano i le uluaʻi senituri. Peitaʻi, ua olaola le talaʻiga o le feʻau o le Malo i aso nei ma ua maua ai le fiafia e i latou o faia.
Amuia Ē o Sauāina e Pei o Perofeta
10, 11. (a) Na faaiʻu faapefea e Iesu lona talanoaina o māfuaaga e iva e fiafia ai? (e) Aiseā na sauāina ai perofeta? Ia aumai ni faaaʻoaʻoga.
10 Na faaiʻu e Iesu lona talanoaina o māfuaaga e iva e fiafia ai i le faapea mai: “Ia outou olioli . . . , auā na faapea ona latou faasauā i perofeta ē na muamua iā te outou.” (Mataio 5:12) O perofeta ia na auina atu e Ieova e lapataʻia Isaraelu lē faamaoni, na teena ma sauāina i latou. (Ieremia 7:25, 26) Na faamaonia e Paulo lenei mea moni ina ua ia tusi: “Se ā foʻi laʻu e toe fai atu? Auā e saasaa le aso e tala atu ai . . . le ʻau perofeta; o ē . . . na tofotofoina isi i tauemuga, ma sasaina, atoa ma noanoataga, ma tuuina i fale puipui.”—Eperu 11:32-38.
11 I le taimi o le pulega a le tupu amioleaga o Aapo ma lana avā o Iesepela, e toʻatele perofeta a Ieova na fasiotia i le pelu. (1 Tupu 18:4, 13; 19:10) Na tuuina Ieremia i laau faamau ma mulimuli ane lafoina i se lua palapalā. (Ieremia 20:1, 2; 38:6) Na lafo le perofeta o Tanielu i le lua o leona. (Tanielu 6:16, 17) Na sauāina nei perofeta anamua ona sa latou faatāua le tapuaʻiga mamā a Ieova. E toʻatele perofeta na sauāina e taʻitaʻi lotu Iutaia. Na taʻua e Iesu tusiupu ma le ʻau faresaio o “fanau outou a ē na fasiotia perofeta.”—Mataio 23:31.
12. Aiseā e manatu ai Molimau a Ieova o se faaeaga le sauāina e pei o perofeta anamua?
12 I aso nei, ua masani ona sauāina i tatou o Molimau a Ieova ona, o le maelega i le talaʻiga o le tala lelei o le Malo. Ua tuuaʻia e o tatou fili i tatou o ē “faaliulotu fai faamalosi,” ae peitaʻi, ua tatou iloa na feagai foʻi tagata tapuaʻi faamaoni muamua atu a Ieova ma faitioga faapena. (Ieremia 11:21; 20:8, 11) E tatou te manatu i ai o se faaeaga le mafatia e pei lava foʻi o perofeta faamaoni anamua. Na tusi Iakopo: “Oʻu uso e, ia outou faaaʻoaʻo i le faatoatoa i le leaga, atoa ma le onosai o le ʻau perofeta, ē na tautala mai i le suafa o le Alii. Faauta, ua tatou taʻuamuia i ē onosai.”—Iakopo 5:10, 11.
Māfuaaga Sili o le Fiafia
13. (a) Aiseā tatou te lē lotovaivai ai i sauāga? (e) O le ā ua mafai ai ona tatou tumau, ma o le ā ua faamaonia ai e lenei mea?
13 E ese mai le lotovaivai ona o sauāga, ua faamāfanafanaina i tatou i le manatu, o loo tatou mulimuli i tulaga aao o perofeta, uluaʻi Kerisiano ma Iesu Keriso. (1 Peteru 2:21) Ua matuā faafiafiaina i tatou e le Tusi Paia, e pei o upu a Peteru: “Le ʻau pele e, aua tou te ofo i le tofotofoga pei o le afi, ua oo iā te outou e fai ma tofotofoga iā te outou, peiseaʻī o se mea fou ua oo iā te outou; Afai e upuleagaina outou ona o le suafa o Keriso, amuia outou; auā o loo tumau iā te outou le Agaga o le mamalu, o le Agaga o le Atua.” (1 Peteru 4:12, 14) Ua tatou iloa mai mea tutupu, ua mafai ona tatou tumau i sauāga ona ua iā i tatou le agaga o Ieova ma ua faamalosia ai i tatou. O le lagolagosua a le agaga paia o le faamaoniga lenā o le faamanuiaga a Ieova ma e matuā faafiafiaina ai i tatou.—Salamo 5:12; Filipi 1:27-29.
14. O ā māfuaaga tatou te olioli ai i le sauāina ona o le amiotonu?
14 O le isi māfuaaga tatou te fiafia ai ona o sauāga ma teteega, e faamaonia ai o loo tatou ola o ni Kerisiano moni ma le amioatua. Na tusi Paulo: “O i latou uma foʻi o ē loto ina nonofo ma le amio Atua iā Keriso Iesu, e sauāina i latou.” (2 Timoteo 3:12) Ua matuā faafiafiaina i tatou i le manatu e faapea o le tumau i le faamaoni i tulaga faigatā, e avatu atili ai se tali i le luʻi a Satani, e ala ona auauna foafoaga uma a Ieova ona o le manatu faapito. (Iopu 1:9-11; 2:3, 4) E tatou te olioli ona ua fai so tatou sao e tusa lava pe itiiti, i le faalauiloaina o le pule silisili ese amiotonu a Ieova.—Faataoto 27:11.
Ia Olioli ma Fiafia i le Taui
15, 16. (a) O le ā le māfuaaga na aumaia e Iesu iā i tatou e “olioli ma fiafia” ai? (e) O le ā le taui ua teuina i le lagi mo Kerisiano faauuina, ma o le a faapefea ona faamanuiaina a latou aumea o “isi mamoe”?
15 Na toe aumaia e Iesu se māfuaaga faaopoopo mo le olioli i le faalumaina ma sauāina e pei o perofeta anamua. I le faaiʻuga o le māfuaaga lona iva, na ia fetalai: “Ia outou olioli ma fiafia lava; auā o i le lagi lo outou taui e tele.” (Mataio 5:12) Na tusi Paulo: “O le oti, o le totogi lea o le agasala; a o le ola faavavau, o le mea foaʻifuaina mai lea e le Atua, i lo tatou Alii o Keriso Iesu.” (Roma 6:23) Ioe, o le “taui” sili o le ola, e lē o se totogi ona o ni a tatou galuega. O se meaalofa foaʻi fua. Na fetalai Iesu o loo i le “lagi” le taui ona e mai iā Ieova.
16 Ua maua e ē faauuina le “pale o le ola,” o le ola e lē mafai ona oti faatasi ma Keriso i le lagi. (Iakopo 1:12, 17) O i latou e iai le faamoemoe i le lalolagi, o “isi mamoe” o loo tulimataʻia le ola e faavavau i le parataiso i le lalolagi. (Ioane 10:16; Faaaliga 21:3-5) Ua maua e nei vasega uma e lua, o ē faauuina ma “isi mamoe” lo latou “taui” ona o le “alofa tunoa o le Atua,” ae lē ona o a latou galuega, lea na uunaʻia ai Paulo e tusi: “Faafetai i le Atua i lana mea foaʻi fua e lē mafaamatalaina!”—2 Korinito 9:14, 15.
17. Aiseā tatou te fiafia ai pe a sauāina ma tatou osooso i se tulaga faafaatusa ona o lo latou “olioli ma fiafia”?
17 Na tusi Paulo o nisi o Kerisiano na matuā faileagaina e le emeperoa o Nero: “Ua tatou mitamita foʻi i puapuaga, ina ua tatou iloa o le puapuaga e tupu ai le onosai, o le onosai e tupu ai le mautinoa, o le mautinoa e tupu ai le faamoemoe; o le faamoemoe foʻi e lē mā ai.” Na ia faapea mai foʻi: “Ia olioli i le faamoemoe, ia onosai i le puapuaga, ia finafinau i le tatalo.” (Roma 5:3-5; 12:12) Pe o le tatou faamoemoe o le lagi po o le lalolagi, ae o lo tatou taui ona o le faamaoni i tofotofoga e sili atu na i lo se isi lava mea e tatau ona maua. O lo tatou olioli i le faamoemoe o le ola e faavavau o le auauna lea ma vivii i le Tamā alofa o Ieova, i le pulega a le Tupu o Iesu Keriso. E tatou te osooso i se tulaga faafaatusa ona o lo tatou “olioli ma fiafia.”
18. O le ā tatou te faatalitalia mai i malo a o latalata le iʻuga, ma o le ā o le a faia e Ieova?
18 I nisi atunuu, na sauāina ai Molimau a Ieova ma o loo faaauau pea ona faia faapea. Na lapataʻia e Iesu Kerisiano moni i lana valoaga i le faaiʻuga o le faiga o mea: “E inosia foʻi outou e nuu uma ona o loʻu igoa.” (Mataio 24:9) A o tatou i le siʻui o le iʻuga, o le a faapogaia e Satani malo e ʻinoʻino i tagata o Ieova. (Esekielu 38:10-12, 14-16) O le a avea ma faailoga o le taimi a Ieova e gaoioi ai loa. “Ou te faasilisiliina o aʻu e aʻu, ma ou faapaiaina o aʻu; e iloa foʻi aʻu i luma o nuu e tele, e iloa ai lava e i latou o aʻu lava o Ieova.” (Esekielu 38:23) O le a faapaiaina ai e Ieova lona suafa silisili ese ma faasaoina ona tagata mai sauāga. O lea la, “amuia le tagata o lē onosai.”—Iakopo 1:12.
19. A o faatalitali i le “aso” o Ieova o le ā e ao ona tatou fai?
19 A o matuā latalata mai lava le “aso” tele o Ieova, seʻi o tatou olioli ona ua “taʻuaogāina” i tatou ona o le suafa o Iesu. (2 Peteru 3:10-13; Galuega 5:41) E pei o uluaʻi Kerisiano, seʻi o tatou faaauau ona “aʻoaʻo atu, ma talaʻi atu i le malumalu, ma lea fale ma lea fale le tala lelei o Iesu le Keriso,” ma lona Malo a o faatalitali i le taui i le lalolagi fou amiotonu a Ieova.—Galuega 5:42; Iakopo 5:11.
O se Autaluga
• O le ā le uiga o le mafatia ona o le amiotonu?
• O le ā le aafiaga o sauāga i uluaʻi Kerisiano?
• Aiseā e faapea mai ai ua sauāina Molimau a Ieova e pei o perofeta anamua?
• Aiseā tatou te “olioli ma fiafia” ai pe a sauāina?
[Fesili mo le Suʻesuʻega]
[Ata i le itulau 16, 17]
“Amuia outou pe a latou upu leaga ma faasauā iā te outou”
[Faamatalaga i Ata]
Se vaega sa falepuipui: Chicago Herald-American