E Matagofie Foafoaga a Ieova

“Ieova e, ua Matuā Tele Au Galuega”

PE TATOU te nonofo i se nuu i tua po o se aai, e maualuga i luga o mauga pe e maulalo e latalata i le sami, ae o loo siʻomia lava i tatou i foafoaga matuā matagofie a Ieova. Ua fetaui ai la ona faaatagia i le 2004 Calendar of Jehovah’s Witnesses vala o galuega ofoofogia a Ieova le Atua.

O tagata loto talisapaia, e latou te manatunatu mamafa pea i galuega a le Atua. O se faaaʻoaʻoga, seʻi manatu iā Solomona ma lona poto, ‘ua sili lava i le poto o tagata uma i sasae.’ Ua faapea mai le Tusi Paia: “Na tautala foʻi o ia i le uiga o laau e afua mai i le arasi o loo i Lepanona, e oo atu i le isopo ua tupu ae i le aupā; ua tautala foʻi o ia i le uiga o manu tataa, ma manu felelei, ma mea fetolofi, ma iʻa.” (1 Tupu 4:30, 33) Sa masani ona mafaufau le tupu o Tavita, le tamā o Solomona i galuega a le Atua. Na faagaeetia ai o ia e faailoa atu i Lē na Faia o ia e faapea: “Ieova e, ua matuā tele au galuega. Ua e faia ia mea uma i le poto; ua tumu le lalolagi i au oloa.”—Salamo 104:24. *

E lelei foʻi ona tatou mātauina ma suʻesuʻeina le foafoaga. O se faataʻitaʻiga, e lelei ona tatou “tetepa aʻe i luga” ma fesili: “Po o ai ea ua na faia nei mea?” Ioe, o Ieova le Atua, o lē ua “tele o lona malosi ma lona mana tele.”—Isaia 40:26.

Ua faapefea ona aafia i tatou i le mafaufau loloto i galuega o le foafoaga a Ieova? E tolu auala pe a itiiti mai. E mafai ona (1) faamanatu mai ai iā i tatou ina ia faapelepele i o tatou ola, (2) ua uunaʻia ai i tatou e fesoasoani atu i isi ina ia aʻoaʻo mai le foafoaga, ma lona (3) ua faamalosia ai i tatou ina ia saga iloa atili ma faaalia le lotofaafetai i Lē na Foafoaina i tatou.

E sili atu o tatou ola o ni tagata na i lo o manu “e lē o i ai se mafaufau,” ua mafai ai ona tatou mātauina ma faatāuaina mea ofoofogia o le foafoaga. (2 Peteru 2:12) E mafai e o tatou mata ona vaaia foliga matagofie ma le lafulemu o laufanua. E mafai e o tatou taliga ona faalogoina pesega mālie a manufelelei. O o tatou lagona, ua faamanatu mai ai iā i tatou le taimi ma nofoaga o mea, ua avea ma manatunatuga fiafia. E ui lava e lē lelei atoatoa o tatou olaga i le taimi nei, ae e matuā aogā lava!

E mafai ona olioli mātua i uiga masani o a latou fanau i le foafoaga. Le matuā fiafia o tamaiti e saʻili atigi figota i le matafaga, milimili se manu, ma aʻe i se laau! O le a mananaʻo mātua e fesoasoani i a latou fanau talavou e iloa le eseesega i le va o le foafoaga ma Lē na Foafoaina Mea. O le maofa ma le talisapaia ua atiaʻe e fanau mo foafoaga a Ieova, e mafai ona latou manatua pea a o faagasolo le olaga.—Salamo 111:2, 10.

O lo tatou lē magafagafa pe afai e tatou te viiviia le foafoaga ae lē talisapaia Lē na Foafoaina Mea. Ua fesoasoani le valoaga a Isaia e manatunatu  ai i lenei vala, i le faapea mai: “E te lē iloa ea? E te leʻi faalogo ai ea? O le Atua o le vavau, o Ieova o lē na faia tuluʻiga o le lalolagi, e lē vaivai o ia, e lē tigāina foʻi, e lē masuʻesuʻeina lona mafaufau.”—Isaia 40:28.

Ioe, ua faamaonia e galuega a Ieova le lē masuʻesuʻeina o lona atamai, le lē mafaatusalia o lona mana, ma lona alofa tele mo i tatou. Pe a tatou vaai i le matagofie o lo tatou siʻosiʻomaga ma mātauina uiga o Lē na faia na mea uma, seʻi uunaʻia ai i tatou e faaleo atu upu a Tavita e faapea: ‘Le Alii e, e leai lava se e tusa ma oe; e leai foʻi se galuega e tusa ma au galuega.’—Salamo 86:8.

Ua faamautinoaina i tatou e faapea, o le a faaauau pea ona maofa tagata usiusitai i galuega o le foafoaga a Ieova. E oo lava i le faavavau, o le a tatou maua pea avanoa e lē muta e saga aʻoaʻo atili ai e uiga iā Ieova. (Failauga 3:11) O le tele o lo tatou aʻoaʻo e uiga iā te ia, o le saga atili ai foʻi lea ona tatou alolofa i Lē na Foafoaina i tatou.

[Faamatalaga pito i lalo]

[Pusa i le itulau 9]

Viia Lē na Foafoaina Mea

Ua faailoa mai e le toʻatele o saienitisi lo latou talisapaia o le galuega a le Atua i le foafoaga. O nisi nei o ni nai faaaʻoaʻoga:

“O le tāua ma le fiafia i le mauaina o mea fou i aʻu suʻesuʻega faasaienisi, na ou faapea ifo ai iā te aʻu lava, ‘O! o le auala la lea na faia ai e le Atua lenei mea.’ O loʻu sini, ia ou malamalama i vala laiti o fuafuaga a le Atua.”—Henry Schaefer o se polofesa.

“E tusa ai ma le amataga o le Vateatea, i le pogai ua matuā telē ai, e tuu atu lava i le tagata faitau e faia lana faaiʻuga, ae e tusa ai ma lo matou malamalama, e lē mafai ona atoa a matou taumafaiga pe a aunoa ma le Atua.”—Edward Milne, tagata Peretania e suʻesuʻe i le vateatea.

“Ua matou iloa le tulaga aupito sili ua faamatalaina ai le natura i matematika, talu ai o le Atua na ia faia.”—Alexander Polyakov, tagata Rusia i mea tau matematika.

“I a matou suʻesuʻega o mea i le natura, ua matou talanoaina ai manatu o Lē na Foafoaina Mea, ma faamatalaina Lana faiga o mea ae lē o ni a matou.”—Louis Agassiz, tagata Amerika e suʻesuʻeina le ola o meaola.

[Ata i le itulau 8]

Gentoo penguins, Penisula i Anetatika

[Ata i le itulau 9]

Grand Teton National Park, Wyoming, Amerika

[Faamatalaga i Ata]

Jack Hoehn/Index Stock Photography