Ia Savavali ma le Amio Saʻo

“A e peitaʻi aʻu nei, ou te savali ma laʻu amio saʻo.”—SALAMO 26:11.

1, 2. (a) Aiseā ua aofia ai le faamaoni o tagata i le finauga o le pule silisili ese a le Atua? (e) E faaalia faapefea e foafoaga atamamai o loo latou iai i le itu a le pule silisili ese o Ieova?

INA ua fouvale Satani i le faatoʻaga i Etena, na ia lāgā ai le finauga pe e iai i le Atua le aiā e pule ai i Ana foafoaga uma. I se taimi mulimuli ane, na ia finau mai ai e faapea, e faatoʻā auauna tagata i le Atua pe afai e maua ai so latou lelei. (Iopu 1:9-11; 2:4) O lea la, ua aofia i le finauga e faatatau i le pule silisili ese a Ieova le faamaoni o le tagata.

² E ui e lē faalagolago le pule silisili ese a le Atua i le faamaoni o ana foafoaga, e mafai e tagata ma atalii faaleagaga o le Atua ona faaalia le itu latou te tutū ai i le finauga. E faapefea? E ala i le filifili pe mulimuli i le ala amio saʻo pe leai. O lea la, o le faamaoni o se tasi, o le faavae autū lea o le faamasinoina o ia.

3. (a) O le ā na mananaʻo Iopu ma Tavita iā Ieova ina ia suʻesuʻe ma faamasinoina? (e) O ā fesili ua lāgā e faatatau i le amio saʻo?

³ Na faapea mai ma le mautinoa Iopu: “Ia fuatia aʻu e [Ieova] i le fua faatautau tusa, ia silafia ai e le Atua ua sao laʻu amio.” (Iopu 31:6) Na tatalo le tupu Isaraelu anamua o Tavita iā Ieova ina ia suʻesuʻe lana amio saʻo: “Ieova e, ia e faamasino iā te aʻu; auā o aʻu nei ua ou savali ma laʻu amio saʻo; ou te faatuatua foʻi iā Ieova; e lē mapeva oʻu vae.” (Salamo 26:1) E tāua foʻi iā i tatou ona savavali ma le amio saʻo! Peitaʻi, o le ā le amio saʻo, ma o le ā e uiga i ai le faia faapea? O le ā o le a fesoasoani iā i tatou e tumau ai i lea ala?

“O Aʻu Nei ua Ou Savali ma Laʻu Amio Saʻo”

4. O le ā le uiga o le amio saʻo?

⁴ E aofia ai i le amio saʻo le faamaoni lē mataʻuleagaina, le amiotonu ma le lē ponā. Ae peitaʻi, o le amio saʻo e sili atu mea e aofia ai na i lo le faia o le mea saʻo. E matuā saʻo le amio a le tagata ma auauna atu i le Atua ma lona loto atoa. Na fesiligia e Satani faanaunauga o Iopu ina ua ia fai atu i le Atua: “A e peitaʻi ia e aapa atu lou aao, ma e tago atu i ivi [o Iopu] ma ona aano, pe na te lē faifai ai ea iā te oe i ou lava luma?” (Iopu 2:5) E ese mai i gaoioiga talafeagai, e manaʻomia foʻi uunaʻiga saʻo o le loto.

5. O le ā ua faaalia ai e lē manaʻomia ona tatou lelei atoatoa ina ia tatou amio saʻo ai?

⁵ Ae peitaʻi, o le tumau i le amio saʻo e lē manaʻomia ai le lelei atoatoa. Na lē lelei atoatoa le tupu o Tavita ma sa faia ni sesē matuiā i lona soifuaga. Peitaʻi, ua taʻua i le Tusi Paia e faatatau iā te ia o se tagata e savali ma le “loto saʻo.” (1 Tupu 9:4) Aiseā? Talu ai sa alofa Tavita iā Ieova. Na auauna ma lona loto atoa i le Atua. Na lotomalie o ia e faailoa ana mea sesē, talia aʻoaʻiga ma faasaʻo ona ala. O le mea moni, e iloa le amio saʻo o Tavita i le tuutoina ma le loto atoa ma le alofa mo lona Atua o Ieova.—Teuteronome 6:5, 6.

6, 7. O le ā e aofia ai i le savavali ma le amio saʻo?

⁶ E lē faapea e faatoʻa amio saʻo le tagata i taimi e fai ai lana tapuaʻiga. E aofia ai taimi uma o o tatou olaga. Sa “savali” ma le amio saʻo Tavita. O le upu “savali” e faatatau atu i “laasaga o lou olaga i aso faisoo.” (The New Interpreter’s Bible) Na pese le faisalamo e faatatau iā i latou “ua sao lo latou ala”: “Amuia i latou o ē tausi i tulafono [a le Atua], o ē saʻiliʻili iā te ia ma le loto atoa; e lē faia foʻi e i latou se mea leaga; e savavali i latou i ona ala.” (Salamo 119:1-3) E manaʻomia ona tatou saʻili pea ina ia faia le finagalo o le Atua ma savavali i ona ala.

 ⁷ O le savali ma le amio saʻo e manaʻomia ai le tuutoina faamaoni i le Atua, e tusa lava po o tulaga faigatā. E faamaonia lo tatou amio saʻo pe afai tatou te onosaia puapuaga, tumau e ui i tulaga faigatā pe teena faaosoosoga mai le lalolagi amioleaga. Tatou te ‘faafiafia ai le finagalo o Ieova’ ma mautali ai o ia i lē faifai iā te ia. (Faataoto 27:11) O lea la, e mafai ona tatou faia se faaiʻuga e pei o Iopu: “Seʻia oo lava i loʻu oti ou te lē faateʻaina lava laʻu amio saʻo.” (Iopu 27:5) Ua faasino mai e le Salamo 26 le mea o le a fesoasoani iā i tatou ina ia savavali ai ma le amio saʻo.

“Ia E Faamamā i Oʻu Manatu ma Loʻu Loto”

8. O le ā e te aʻoaʻoina mai le olega a Tavita ina ia suʻesuʻe e Ieova ona manatu ma lona loto?

⁸ Na tatalo Tavita: “Ieova e, ia e suʻesuʻe iā te aʻu, ma tofotofo iā te aʻu; ia e faamamā i oʻu manatu ma loʻu loto.” (Salamo 26:2) I inei, o loo faasino atu i o tatou manatu loloto ma faalogona. O le loto o manatu loloto ia o se tasi—o ona faanaunauga, faalogona ma le mafaufau. Ina ua ole atu Tavita iā Ieova ina ia suʻesuʻe mai o ia, na ia tatalo ina ia saʻiliʻili ma iloilo māeʻaeʻa ona manatu ma faalogona.

9. Faapefea ona faamamā e Ieova o tatou manatu ma loto?

⁹ Na ole atu Tavita ina ia faamamā ona manatu ma lona loto. E faapefea ona faamamā e Ieova o tatou tagata i totonu? Na pese Tavita: “Ou te faamanū atu iā Ieova, o lē faatonu mai iā te aʻu; o le pō foʻi e aʻoaʻo mai ai iā te aʻu o loʻu mafaufau.” (Salamo 16:7) O le ā le uiga? O lona uiga, na pāʻia le loto o Tavita i fautuaga mai le Atua, ma na faasaʻo ai ona mafaufauga loloto ma faalogona. E mafai foʻi ona tupu le tulaga lava lea iā i tatou pe afai tatou te talisapaia fautuaga ua maua i le Tusi Paia, o ona sui, ma lana faalapotopotoga ma ia tumau pea i totonu iā i tatou. Ia tatalo e lē aunoa iā Ieova e faamamā i tatou ina ia fesoasoani e savavali ma le amio saʻo.

“O Loo i Oʻu Luma Lou Alofa”

10. O le ā na fesoasoani iā Tavita e savali ai i le upu moni a le Atua?

¹⁰ Na faaauau mai Tavita: “O loo i oʻu luma lou alofa; ua ou savali foʻi i le mea moni mai iā te oe.” (Salamo 26:3) Na iloa lelei e Tavita gaoioiga alofa a le Atua ma sa ia talisapaia ma mafaufau loloto i ai. Na pese Tavita: “Loʻu agaga e, ia e faamanū atu iā Ieova, aua foʻi neʻi galo se mea e tasi o ana mea alofa.” O le manatuaina o “mea alofa” a le Atua, na faapea mai ai Tavita: “E faia e Ieova mea tonu, ma faamasinoga mo ē ua sauāina  uma lava. Na ia faailoa ona ala iā Mose, o ana galuega i le fanauga a Isaraelu.” (Salamo 103:2, 6, 7) Atonu na mafaufau Tavita i le sauāina o Isaraelu e Aikupito i aso o Mose. Afai o le tulaga lenā, o le manatunatu i fetalaiga a Ieova iā Mose e uiga i Ona ala o le faasaʻolotoina, atonu na uunaʻia ai le loto o Tavita ma faalaeiauina lona faanaunauga e savali i le upu moni a le Atua.

11. O le ā e mafai ona fesoasoani iā i tatou e savavali ai ma le amio saʻo?

¹¹ O le suʻesuʻeina e lē aunoa o le Afioga a le Atua ma mafaufau loloto i mea ua tatou aʻoaʻoina mai ai, o le a fesoasoani e savavali ai ma le amio saʻo. O se faaaʻoaʻoga, o le manatuaina o Iosefa ina ua sola ese mai faaosoosoga lē mamā a le avā a Potifara, e mautinoa e faalaeiauina ai foʻi i tatou e sosola ese mai faaosoosoga faapena i mea tatou te faigaluega ai, i aʻoga po o so o se mea lava. (Kenese 39:7-12) Ae faapefea pe afai e faaosoosoina i tatou i ni avanoa e manuia ai faaletino po o tulaga maualuluga ma le taʻutaʻua i le lalolagi? Ua iā i tatou le faaaʻoaʻoga a Mose o lē na teena le ʻoa o Aikupito. (Eperu 11:24-26) E lē taumatea o le a fesoasoani le manatuaina o le tumau o Iopu i le faamalosia o a tatou taumafaiga e tumau ma le faamaoni iā Ieova e ui i maʻi ma faigatā. (Iakopo 5:11) Ae faapefea pe afai o le a sauāina i tatou? O le manatuaina o le mea na tupu iā Tanielu i le lua o leona o le a tatou lototetele ai!—Tanielu 6:16-22.

“Ou te Leʻi Nofo Faatasi ma Tagata Ulavavale”

12, 13. O ā ituaiga o aumea e ao ona tatou ʻalofia?

¹² Na faapea mai Tavita i le isi vala na faamalosia ai lona amio saʻo: “Ou te leʻi nofo faatasi ma tagata ulavavale; ou te leʻi alu faatasi ma tagata pepelo. Ua ou ʻinoʻino i le faapotopotoga o ē fai mea leaga; ou te lē nofo foʻi faatasi ma tagata amio leaga.” (Salamo 26:4, 5) E leʻi nofo faatasi Tavita ma tagata ulavavale. Na ʻinoʻino o ia i aumea leaga.

¹³ Ae faapefea i tatou? Pe tatou te teena ea le nonofo faatasi ma tagata ulavavale e ala i polokalame o televise, vitiō, tifaga, Initineti po o isi mea? Pe tatou te ʻaloese mai iā i latou o ē natia o latou tulaga moni? O nisi i le aʻoga po o mea e faigaluega ai e ono faafoliga mai iā i tatou o ni uō, ae o loo iai ni māfuaaga faaʻoleʻole. Pe tatou te mananaʻo ea e atiina aʻe se faiā māfana ma i latou e lē savavali i ala o le upu moni a le Atua? E ui latou te faapea mai e faamaoni, ae e ono natia e i latou ua fulitua mai i le upu moni o latou  faanaunauga ina ia aveesea i tatou mai le auauna atu iā Ieova. Ae faapefea pe afai e iai nisi i le faapotopotoga Kerisiano e ola i ni olaga uiga lua? Ua latou natia foʻi o latou tulaga moni. O Jayson, o loo galue nei o se auauna o le faiva, sa iai ni ana uō faapena i le taimi a o talavou. Ua ia faapea mai e faatatau iā i latou: “I se tasi aso na faapea mai ai se tasi o i latou iā te aʻu: ‘E lē afāina le mea o tatou faia i le taimi nei, auā pe a oo mai le faiga fou, o le a tatou feoti. O lea la e ao ona faia mea uma nei auā a oo mai lea taimi tatou te lē toe iloa se mea.’ Na avea lenā faamatalaga ma māfuaaga na ou mataala ai. Ou te lē fia oti pe a oo mai le faiga fou.” Na taofia ma le poto e Jayson le aumea atu iā i latou na. Na lapataʻi mai Paulo: “Aua neʻi faasesēina outou, ‘O le feoaʻi ma ē amio leaga e leaga ai amio lelei.’” (1 Korinito 15:33) Maʻeu le tāua o lo tatou ʻalofia o aumea leaga!

‘Ou te Taʻutaʻu Atu Ou Vavega Uma Lava’

14, 15. E faapefea ona tatou ‘faataamilomilo i le fata faitaulaga o Ieova’?

¹⁴ Na faaauau mai Tavita: “Ou te fafano oʻu lima e fai ma faailoga ua ou lē sala; ona ou faataamilomilo ai lea i lou fata faitaulaga, Ieova e.” Aiseā? “Ina ia lagona atu le leo o le viiga, ma ia taʻutaʻu atu ou vavega uma lava.” (Salamo 26:6, 7) Na tumau Tavita i le mamā tau amio ina ia tapuaʻi ai iā Ieova ma faaalia ua na o Ia e auauna atu i ai.

¹⁵ O mea uma na fesootaʻi atu i le tapuaʻiga moni i le fale fetafaʻi ma mulimuli ane i le malumalu, sa avea ma “faaaʻoaʻo ma le ata o mea faalelagi.” (Eperu 8:5; 9:23) Ua faaata e le fata faitaulaga le finagalo o Ieova i le taliaina o le taulaga a Iesu Keriso mo le togiolaina o tagata. (Eperu 10:5-10) E tatou te fafano o tatou lima e fai ma faailoga ua tatou lē sala ma ‘faataamilomilo i le fata faitaulaga o Ieova’ e ala i le faatuatua i lenā taulaga.—Ioane 3:16-18.

16. E faapefea ona tatou maua aogā mai le faalauiloa atu i isi o galuega mamana a le Atua?

¹⁶ Pe a mafaufau i mea uma ua mafaia e le togiola, pe lē faagaeetia ai ea i tatou e matuā talisapaia Ieova ma lona Alo e toʻatasi? O lea la, talu ai lo tatou loto faafetai, seʻi o tatou faailoa atu i isi vavega po o galuega mamana a le Atua—mai le foafoaina o le uluaʻi tagata i le faatoʻaga o Etena seʻia oo atu i le toe faafoʻisia o mea uma i le lalolagi fou a le Atua. (Kenese 2:7; Galuega 3:21) E mautinoa lava o le talaʻiga o le Malo ma le faia o soo, o se puipuiga faaleagaga mo i tatou! (Mataio 24:14; 28:19, 20) O le pisi i le talaʻiga e fesoasoani e manino ai la tatou vaai i le faamoemoe i le lumanaʻi, e malosi ai le faatuatua i folafolaga a le Atua, ma faaauau ai lo tatou alofa mo Ieova ma tagata.

“Ou te Fiafia i le Mea e Tū ai Lou Maota”

17, 18. O le ā e ao ona tatou manatu i ai i sauniga faa-Kerisiano?

¹⁷ Sa avea le fale fetafaʻi ma fata faitaulaga e fai ai taulaga ma nofoaga autū o le tapuaʻiga iā Ieova i Isaraelu. Na tatalo Tavita e faaalia lona fiafia i lenā nofoaga: “Ieova e, ou te fiafia i le mea e tū ai lou maota, o le mea foʻi e afio ai lou mamalu.”—Salamo 26:8.

¹⁸ Pe tatou te fiafia e faatasitasi i nofoaga e tatou te aʻoaʻoina ai mea e faatatau iā Ieova? Ua avea Maota uma o le Malo ma latou polokalame faifai pea o faatonuga faaleagaga, ma nofoaga autū o le tapuaʻiga i vaipanoa eseese. E lē gata i lea, e faia foʻi a tatou tauaofiaga faaletausaga, fonotaga matagaluega ma aso faapitoa o fonotaga. E talanoaina ai “tulafono” a Ieova i sauniga na. Afai tatou te “naunau i ai” o le a tatou naunau foʻi e auai i sauniga ma uaʻi atu i ai. (Salamo 119:167) E matuā faafouina le auai ma uso talitonu o ē naunau i lo tatou lelei ma fesoasoani iā i tatou ia tumau i le tausia o se ala faamaoni!—Eperu 10:24, 25.

 ‘Aua Neʻi e Faatasia Loʻu Ola ma Tagata Agasala’

19. O ā agasala e leʻi manaʻo Tavita e nofo sala ai?

¹⁹ Talu ai na matuā mataala Tavita i āuga o le fulitua ese mai le savali i le upu moni a le Atua, na ia ole atu ai: “Aua neʻi e faatasia aʻu ma tagata agasala, ma loʻu ola neʻi faatasia ma tagata ua totolima. O loo i o latou lima amio leaga, ua tutumu foʻi o latou lima taumatau i mea alofa.” (Salamo 26:9, 10) E leʻi manaʻo Tavita e miomiō ma tagata agasala, o ē na amio leaga pe na maua mea alofa i se auala sesē.

20, 21. O le ā e mafai ona taʻitaʻiina ai tatou e savavali i ala o ē e lē auauna i le Atua?

²⁰ Ua lofitūina le lalolagi i aso nei i faiga lē mamā. Ua faaauiluma e televise, mekasini ma tifaga ia “amioga leaga”—amioga lē pulea; tafaovale solo; ma le faaua maaa. (Kalatia 5:19) Ua oo ina lolo atu nisi i ata matagā lea ua masani ona taʻitaʻia atu i amioga lē mamā. Ua faigofie lava ona aafia talavou i na taaʻiga. I nisi atunuu, o le tuutala o se aganuu, ma ua uunaʻia ai talavou e manatu e ao ona latou faia faapea. Ua malolosi tele faalogona o le alofa i le toʻatele o talavou ae e laiti tele ina ia mafai ona faaipoipo. Ina ia faamalie tuʻinanauga faaleituaiga ua faagaee i totonu o i latou, ua oo ina aafia ai i amioga lē mamā ma faia le faitaaga.

²¹ E lē sao mai ai foʻi tagata matutua i aafiaga leaga. O faiga pisinisi lē faamaoni ma faanaunauga e faia ni filifiliga e faavae i le manatu faapito, o faamaoniga na o le leai o se faamaoni. O le savavali i ala o le lalolagi e faamamao ai tatou mai iā Ieova. Ia tatou “ʻinoʻino i le leaga, a e loto atu i le lelei,” ma faaauau ona savavali ma le amio saʻo.—Amosa 5:15.

“Ia E Laveaʻi iā te Aʻu, ma ia E Alofa Mai iā te Aʻu”

22-24. (a) O le ā le faalaeiauga ua e maua mai i upu faaiʻu a le Salamo 26? (e) O le ā le mailei o le a talanoaina i le mataupu e sosoo mai?

²² Na faaiʻu e Tavita lana faamatalaga i le Atua i le faapea atu: “A e peitaʻi aʻu nei, ou te  savali ma laʻu amio saʻo; ia e laveaʻi iā te aʻu, ma ia e alofa mai iā te aʻu. Ua tū oʻu vae i le mea laugatasi; ou te faamanū atu iā Ieova i totonu o faapotopotoga.” (Salamo 26:11, 12) O le faanaunauga o Tavita ina ia tausia lona faamaoni e fesootaʻi atu i lana olega mo se laveaʻiga. Maʻeu le faalaeiauina ai! E ui i o tatou tulaga agasala, ae o le a fesoasoani mai Ieova pe afai tatou te faanaunau e savavali ma le amio saʻo.

²³ Ia faaalia i vala uma o le olaga e tatou te faaaloalo i le Atua ma talisapaia lona silisili ese. E mafai e i tatou uma lava ona ole atu iā Ieova i le tatalo ina ia suʻesuʻe ma faamamā o tatou manatu loloto ma faalogona. E mafai ona tatou manatua lana upu moni e ala i le filigā e suʻesuʻe lana Afioga. O lea la, seʻi o tatou ʻalofia aumea leaga ae faamanū atu iā Ieova i totonu o le faapotopotoga. Seʻi o tatou maelega e auai i le talaʻiga ma faia soo, ma ia aua lava neʻi faaleagaina e le lalolagi la tatou faiā tautele ma le Atua. A o tatou faia le mea sili e savavali ai ma le amio saʻo, tatou te mautinoa o le a finagalo malie mai Ieova iā i tatou.

²⁴ Talu ai e ao ona tatou tausia le amio saʻo i vala uma o le olaga, e manaʻomia ai la le mataala i mailei mataʻutia—le soona faaaogāina o le ʻava malosi. O le a talanoaina i le mataupu o sosoo mai.

Pe E te Manatua?

• Aiseā ua talafeagai ai ona faamasinoina foafoaga atamamai e faavae i lo latou faamaoni?

• O le ā le uiga o le amio saʻo, ma o le ā e aofia ai?

• O le ā o le a fesoasoani iā i tatou e savavali ai ma le amio saʻo?

• Ina ia tausia le amio saʻo, o ā lamatiaga e ao ona tatou mataala ma ʻalofia?

[Fesili mo le Suʻesuʻega]

[Ata i le itulau 14]

Pe e te ole atu e lē aunoa iā Ieova e suʻesuʻe ou manatu loloto?

[Ata i le itulau 14]

Pe o e manatua gaoioiga agalelei a Ieova iā te oe?

[Ata i le itulau 15]

O lo tatou tausia o le faamaoni i tulaga faigatā e faafiafia ai le finagalo o Ieova

[Ata i le itulau 17]

Po o e maua aogā i sauniuniga a Ieova e fesoasoani iā te oe e savali ai ma le amio saʻo?