O Ieova na te “Tauia Mai o Ē Matuā Saʻili iā te Ia”

“E tatau i lē alu atu i le Atua ona talitonu o loo soifua o ia, o ia foʻi na te tauia mai o ē matuā saʻili iā te ia.”—EPERU 11:6.

1, 2. Aiseā e ono tauivi ai isi auauna a Ieova ma faalogona faalētonu?

E FAAPENEI le faamatalaga a Barbara: * “Ua toetoe 30 tausaga o avea aʻu ma Molimau a Ieova ae, ou te lagonaina lava le lē onomea ona taʻua aʻu o se tasi o i latou. E ui lava sa ou paeonia ma e tele ni oʻu faaeaga sa maua, ae sa faigatā ona ou manatu ua tatau ai le taʻua o aʻu o se molimau.” E faapena foʻi lagona o Keith. Ua ia faamatala mai: “I nisi taimi, sa ou lagona ai e lē tatau lenei faaeaga iā te aʻu talu ai, e tele māfuaaga e ao ai ona fiafia auauna a Ieova ae sa ou lē fiafia. Ona o lea tulaga sa ou lagona ai le nofosala, ma atili leaga ai oʻu faalogona.”

² Na faapena foʻi ona tauivi le toʻatele o auauna faamaonia a Ieova i aso ua mavae ma aso nei i lagona faapena. Pe sa faapena ou lagona i nisi taimi? Atonu ua faigatā ona e onosaia le tele o faafitauli, ae foliga mai o loo olioli pea isi uso talitonu, o loo manuia ma fiafia. O le iʻuga, e te ono lagona ai e te lē o maua le finagalo malie o Ieova, pe e lē tatau ona ia manatu mai iā te oe. Aua lava neʻi e vave faia se filifiliga faapena. Ua faamautinoa mai e le Tusi Paia iā i tatou: “Auā e lē taʻufaatauvaa [Ieova], e lē ʻinoʻino foʻi o ia i le puapuaga o lē ua puapuagaina; e lē liliu ese foʻi e ia ona fofoga iā te ia; na tagi atu  o ia iā te ia, ona faafofoga mai ai lea o ia.” (Salamo 22:24) Ua faaalia i na upu faavaloaga e uiga i le Mesia, e lē gata e faafofoga mai Ieova i ona tagata faamaoni ae na te tauia foʻi i latou.

3. Aiseā e oo ai iā i tatou omiga mai lenei faiga o mea?

³ E oo i tagata uma lava e lē na o tagata o Ieova, faafitauli mai lenei faiga o mea. O loo tatou ola i se lalolagi ua pulea e le fili sili o Ieova, o Satani le Tiapolo. (2 Korinito 4:4; 1 Ioane 5:19) Ua avea auauna a Ieova ma taulaʻiga autū a Satani, ma e lē puipuia faavavega e Ieova i latou. (Iopu 1:7-12; Faaaliga 2:10) O lea la, e ao ai ona tatou “onosai i le puapuaga” ma “finafinau i le tatalo” seʻia oo i le taimi atofaina a le Atua mo le iʻuga, ma ia mautinoa e silasila alofa mai Ieova iā i tatou. (Roma 12:12) E lē tatau ona tatou manatu, ua lē alofa mai Ieova le Atua ona o nei mau faafitauli ua oo mai!

Faaaʻoaʻoga Anamua o le Onosai

4. Aumai ni faaaʻoaʻoga o auauna faamaoni a Ieova o ē na onosaia tulaga faigatā.

⁴ O le toʻatele o auauna a Ieova i aso anamua, sa onosai i tulaga faigatā. O se faaaʻoaʻoga, o Hana, sa “tigā lona loto” talu ai ua leai sana tama ma sa ia manatu ua tutusa lea ma le faagaloina o ia e le Atua. (1 Samuelu 1:9-11) Ina ua tulituliloa Elia e le masiofo o Iesepela e fasioti o ia, na fefe o ia ma tatalo iā Ieova: “Ieova e, soia; ia e ave ese loʻu ola, auā e lē sili ona lelei o aʻu i oʻu tamā.” (1 Tupu 19:4) E lē gata i lea, na taʻua e Paulo lona loto mafatia ona o lona tino augavale: “Pe a ou loto atu i le lelei e fai, ua iā te aʻu le leaga.” Na ia toe faaopoopo mai: “Auē o aʻu le tagata malaia!”—Roma 7:21-24.

5. (a) Na faapefea ona tauia Hana, Elia ma Paulo? (e) Pe afai ua lē mautonu o tatou faalogona, o le ā le faamāfanafanaga tatou te maua mai le Afioga a le Atua?

⁵ O le mea moni, ua tatou iloa na tumau Hana, Elia ma Paulo i le auaunaga iā Ieova, ma sa Ia tauia i latou uma. (1 Samuelu 1:20; 2:21; 1 Tupu 19:5-18; 2 Timoteo 4:8) Peitaʻi, na latou onosaia le tele o faalogona eseese e aofia ai le faavauvau, atuatuvale ma le fefe. O lea la, e lē o se mea fou pe afai e lē mautonu o tatou faalogona i nisi taimi. Peitaʻi, o le ā e te fai pe a faapogaia oe e popolega o le olaga e taumānatu ai po o silasila alofa moni mai Ieova iā te oe? E te maua faamāfanafanaga mai le Afioga a le Atua. O se faaaʻoaʻoga, i le mataupu ua mavae atu, na tatou talanoaina ai fetalaiga a Iesu e faapea, e faitaulia e Ieova “o outou lauulu.” (Mataio 10:30) Ua faaalia e na upu faamalosiau, o loo manatu mamafa mai Ieova i ana auauna uma. Manatua foʻi le tala faatusa a Iesu i manu iti. Pe afai e silafia e Ieova se tasi o na manu iti o paʻū i le eleele, pe e lē silasila mai o ia i o outou tulaga pagatia?

6. E faapefea ona avea le Tusi Paia ma puna o faamāfanafanaga iā i latou o ē tauivi ma faalogona lē mautonu?

⁶ Pe e talafeagai le manatu, e tāua i tatou o tagata lē lelei atoatoa i le silasila a Lē na faia i tatou, o Ieova le Atua? Ioe, o le mea moni, ua taʻua i le tele o mau o le Tusi Paia lenei manatu. O le mafaufau loloto i nei mau, tatou te faaleo atu ai upu a le faisalamo: “O le tele o manatunatu i loʻu loto ua fiafia ai loʻu agaga ona o faamāfanafanaga mai iā te oe.” (Salamo 94:19) Seʻi o tatou talanoaina nisi o nei faamatalaga faamāfanafanaloto mai le Tusi Paia. O le a fesoasoani iā i tatou e atili malamalama ai, o loo faatāuaina i tatou e le Atua ma na te tauia i tatou a o faaauau ona faia lona finagalo.

O le “Oloa Tāua” a Ieova

7. O le ā le valoaga e faalaeiauina ai na avatu e Ieova e ala iā Malaki i lea nuu leaga?

⁷ Sa matuā leaga tele tulaga o tagata Iutaia i le senituri lona lima T.L.M. Na taliaina e ositaulaga manu mamaʻi ma ofoina atu e fai  ai taulaga i le fatafaitaulaga a Ieova. Na faailoga tagata le ʻaufaamasino. Na taatele le fai togafiti faataulāitu, pepelo, faiga faapiʻopiʻo ma le mulilua. (Malaki 1:8; 2:9; 3:5) Na faia e Malaki se valoaga sa faateʻia ai lenā nuu leaga ma le piʻopiʻo. Sa finagalo Ieova e faafoʻisia ona tagata i se tulaga lelei pe a mavae atu se taimi. Tatou te faitau ai e faapea: “E fai foʻi i latou maʻu oloa tāua, ua fetalai mai ai Ieova o ʻau, i le aso ua ou tofia; ou te alofa foʻi iā te i latou, e pei ona alofa o le tagata i lona atalii ua auauna iā te ia.”—Malaki 3:17.

8. Aiseā e maua ai foʻi e le motu o tagata e toʻatele faalaeiauga mai le Malaki 3:17?

⁸ O le valoaga a Malaki e iai lona faataunuuga i aso nei, e fesootaʻi atu i Kerisiano faauuina, o ē faia aʻe ai le nuu faaleagaga o le 144,000. O lenā nuu, o le “oloa tāua” a Ieova po o le “nuu na faatauina mai” e ia. (1 Peteru 2:9) E faamalosiau foʻi le valoaga a Malaki i le “motu o tagata e toʻatele,” o ē “o loo tutū . . . i luma o le nofoālii ma luma o le Tamaʻi Mamoe, ua oofu i latou i ofu sisina.” (Faaaliga 7:4, 9) Ua avea i latou faatasi ma ē faauuina ma lafu e tasi, i le taʻitaʻiga a le leoleo mamoe e toʻatasi o Iesu Keriso.—Ioane 10:16.

9. Aiseā ua avea ai tagata o Ieova ma “oloa tāua” iā te ia?

⁹ O le ā le silasila a Ieova iā i latou o loo auauna iā te ia? E pei ona taʻua i le Malaki 3:17, o loo ia silasila iā i latou e pei o se tamā alofa i lona atalii. Ua ia faamatalaina ona tagata i ni faaupuga matagofie—o “oloa tāua.” Ua faaliliu e isi faaliliuga lenā fuaitau “o oʻu lava tagata,” “o aʻu oloa e aupito sili ona tāua,” ma “o aʻu maa tāua.” Aiseā ua silasila ai Ieova iā i latou o auauna iā te ia e tāua? O se tasi o māfuaaga, ona o ia o se Atua e finagalo talisapaia. (Eperu 6:10) E mafuta vavalalata atu o ia ma silasila iā i latou o auauna iā te ia e tāua tele.

10. E faapefea ona puipuia e Ieova ona tagata?

¹⁰ Pe e mafai ona e manatunatu i le tāua o se mea totino ua e vaai i ai o se oloa tāua? Pe e te taumafai ea e puipuimalu lenā mea totino? E faapena foʻi ona faia e Ieova i lana “oloa tāua.” E moni, na te lē puipuia ona tagata mai puapuaga ma mea lē lelei e tutupu o le olaga. (Failauga 9:11) Peitaʻi, e mafai ma o le a puipuia e Ieova ana auauna faamaoni i le itu faaleagaga. E na te avatu iā i latou le malosi latou te manaʻomia e onosaia ai so o se tulaga faigatā. (1 Korinito 10:13) O lea, na taʻu atu e Mose i tagata o le Atua, o Isaraelu anamua: “Ia outou faamalolosi, ma outou loto tetele; . . . auā o Ieova lou Atua, lua te ō faatasi ma ia; na te lē tuuna oe, na te lē lafoaʻi iā te oe.” (Teuteronome 31:6) E tauia e Ieova ona tagata. O i latou o lana “oloa tāua.”

O Ieova “na te Tauia”

11, 12. E faapefea i le talisapaia o le tulaga o Ieova o ia na te tauia i tatou, ona fesoasoani e tauivi ma faalogona masalosalo?

¹¹ O se isi faamaoniga o le faatāuaina e Ieova o ana auauna, e na te tauia i latou. Na ia fetalai i tagata Isaraelu: “Ia outou tofotofo mai ai iā te aʻu i lenei mea, ua fetalai mai ai Ieova o ʻau; pe ou te lē toina pupuni o le lagi mo outou, ma sasaa atu le manuia mo outou, ina seʻia silisili ona tele.” (Malaki 3:10) O le mea moni, o le a tauia e Ieova ana auauna i le ola e faavavau. (Ioane 5:24; Faaaliga  21:4) Ua faaalia i lenei taui le tele o le alofa ma le agalelei o Ieova. Ua faaalia ai foʻi lona matuā faatāuaina o i latou o loo auauna iā te ia. O le iloa o Ieova o Lē na te tauia ma le agalelei i tatou, e fesoasoani lea e tauivi ai ma so o se masalosaloga e uiga i le silafaga a le Atua iā i tatou. Ua faalaeiauina i tatou e Ieova e manatu iā te ia o Lē na te tauia i tatou! Na tusi Paulo: “E tatau i lē alu atu i le Atua ona talitonu o loo soifua o ia, o ia foʻi na te tauia mai o ē matuā saʻili iā te ia.”—Eperu 11:6.

¹² E moni, tatou te auauna iā Ieova ona o le alofa iā te ia, ae e lē ona ua ia folafola mai na te tauia i tatou. Ae o se mea talafeagai lo tatou manatua pea o le faamoemoe i se taui. (Kolose 3:23, 24) O le finagalo o Ieova e na te tauia i latou e saʻili ma le faamaoni iā te ia talu ai, o lona alofa ma lona faatāuaina o i latou.

13. Aiseā ua avea ai le sauniuniga o le togiola o se faamaoniga sili lea o le alofa o Ieova mo i tatou?

¹³ O le faamaoniga sili e iloa ai e mafai ona tāua tagata i le silafaga a Ieova, o le sauniuniga lea o le togiola. Na tusi Ioane: “Auā ua faapea lava ona alofa mai o le Atua i le lalolagi, ua ia au mai ai lona Atalii e toʻatasi, ina ia lē fano se tasi e faatuatua iā te ia, a ia maua e ia le ola faavavau.” (Ioane 3:16) E feteenaʻi le sauniuniga o le taulaga a Iesu Keriso ma le manatu tatou te lē aogā ma e lē mafai ona alofagia i tatou e Ieova. O le mea moni, afai na foaʻi e Ieova le soifua o lona Alo e toʻatasi mo i tatou, e mautinoa e matuā alofa o ia iā i tatou.

14. O le ā le manatu o Paulo i le togiola?

¹⁴ O lea, pe afai e tau mapuna aʻe iā te oe ni faalogona ua e lē aogā, ia manatunatu i le togiola. Ioe, ia manatu i ai o se meaalofa lea a Ieova iā te oe. O le mea lenā na faia e Paulo. Seʻi manatu i ana upu: “Auē o aʻu le tagata malaia!” Peitaʻi na ia toe faapea mai: “Ou te faafetai lava i le Atua, auā o Iesu Keriso lo tatou Alii,” o “lē na alofa mai iā te aʻu, ma foaʻiina mai o ia e ia mo aʻu.” (Roma 7:24, 25; Kalatia 2:20) O le taʻua o lenei faaupuga, e lē faapea ai ua loto faamaualuga Paulo. Na ia matuā mautinoa, e faatāuaina o ia e Ieova. E pei o Paulo, e ao foʻi ona e manatu i le togiola o se meaalofa a le Atua iā te oe. E lē gata o Ieova o le faaola sili ae na te tauia foʻi ma le agalelei i tatou.

Ia Faaeteete i “Togafiti” a Satani

15-17. (a) E faapefea ona faaaogā e Satani faalogona lē lelei? (e) O le ā le faalaeiauga tatou te maua mai le mea na tupu iā Iopu?

¹⁵ Peitaʻi, atonu e lē faigofie ona e talitonu e faatatauina moni iā te oe faamāfanafanaga o loo i le Afioga a le Atua. E te ono manatu o le taui o le ola e faavavau i le lalolagi fou a le Atua, o se mea e mafai foʻi ona maua e isi peitaʻi e lē onomea ona e mauaina. Pe afai o lou lagona lenā, o le ā le mea e ao ona e faia?

¹⁶ E lē mafesiligia ua e masani i le timaʻiga a Paulo i tagata Efeso: “Ia oofu outou i ofutau atoatoa mai le Atua, ina ia outou mafaia ona tetee atu i togafiti a le tiapolo.” (Efeso 6:11) Pe a tatou mafaufau i togafiti a Satani, e vave lava ona oso mai i o tatou mafaufau mea e pei o le pupū i meafaitino ma amioga lē mamā ma e saʻo foʻi na manatu. O nei tofotofoga ua maileia ai tagata o le Atua e lē gata i aso ua mavae ae i aso nei foʻi. Ae peitaʻi, aua neʻi galo o le isi togafiti a Satani, o le taumafai e faatalitonu tagata e lē o alofagia i latou e Ieova le Atua.

¹⁷ E atamai Satani i le faaaogāina o na lagona ina ia faaliliu ese ai tagata mai le Atua. Manatua upu a Pilitati iā Iopu: “O lenei, pe faapefea ona taʻuamiotonuina le tagata i luma o le Atua? pe faapefea foʻi ona mamā o ia ua fanau mai i le fafine? Faauta, o le masina ua lē pupula lea; o fetu foʻi ua lē mamā ia i lana silafaga. E atili ai ona faapea le tagata ua se tuga ia, ma le fanauga a tagata  ua se ilo ia.” (Iopu 25:4-6; Ioane 8:44) Pe e mafai ona e manatunatu i le faavaivailoto o na upu? O lea la, ia aua lava neʻi faavaivaia oe e Satani. E lē gata i lea, ia iloa mailei a Satani ina ia mafai ai ona e lototele ma malosi e finafinau e fai le mea tonu. (2 Korinito 2:11) E ui lava na faasaʻoina Iopu, ae na tauia e Ieova lona tumau e ala i le toe faaluaina o ana mea uma na leiloloa.—Iopu 42:10.

O Ieova ‘ua Sili i o Tatou Loto’

18, 19. E faapefea ona “sili le Atua i o tatou lava loto,” ma o le ā le auala ua ia ‘silafia ai mea uma’?

¹⁸ E moni, e faigatā ona tineia nei lagona o le lotovaivai aemaise lava pe a mauaa i le loto. Ae ui i lea, e mafai e le agaga o Ieova ona auaumālie ona aveese “masalosaloga” i le loto lea ua feteenaʻi ma “le iloa o le Atua.” (2 Korinito 10:4, 5) Pe a foliga mai ua e lē gafatia na mafaufauga, ia manatunatu i upu a Ioane: “O le mea foʻi lea ua tatou iloa ai ua i le upu moni i tatou, e mautinoa foʻi o tatou loto i ona luma, auā pe afai e faasala o tatou loto iā i tatou, ua sili lava le Atua i o tatou loto, ua silafia foʻi e ia mea uma.”—1 Ioane 3:19, 20.

¹⁹ O le ā le uiga o le faaupuga, “ua sili lava le Atua i o tatou loto”? E taʻusalaina i tatou e o tatou loto i nisi taimi, aemaise lava pe afai ua iloa lelei lo tatou lē lelei atoatoa ma mea sesē o loo faia. Pe ona o o tatou talaaga, ua tele ai ina tatou manatu e lē aogā i tatou i le silafaga a Ieova. Ua faamautinoa mai e upu a Ioane, e sili Ieova i na mea uma! E lē matau masei ae na te silafia mea e mafai ona tatou faia. E na te silafia foʻi o tatou uunaʻiga ma faanaunauga. Na tusi Tavita: “Auā ua silafia lava e ia le mea na fai aʻi i tatou; ua manatu ia o le efuefu lava i tatou.” (Salamo 103:14) Ioe, e sili atu le silafia e Ieova o i tatou na i lo i tatou lava!

O le “Pale Matagofie” ma le “Pulou o le Tupu”

20. O le ā ua faaalia i le valoaga a Isaia i le toe faafoʻisiaga i le auala e silasila ai Ieova i ana auauna?

²⁰ Na avatu e Ieova i ona tagata i aso anamua le faamoemoe o le faafoʻisiaga e ala i le perofeta o Isaia. Na matuā talafeagai lenei faamāfanafanaga ma le faamautinoaga mo i latou ua lotovaivai a o faaaunuua i Papelonia! I le tepa taulaʻi atu i le taimi o le a toe foʻi atu ai i lo latou nuu, na fetalai Ieova: “E fai oe ma pale matagofie i le aao o Ieova, ma pulou o le tupu i le alofilima o lou Atua.” (Isaia 62:3) E ala i nei upu, na tuuina atu ai e Ieova le viiga ma le mamalu i ona tagata. O le mea foʻi lenā ua ia faia i lona nuu o Isaraelu faaleagaga i aso nei. E pei lava ua ia tuuina i latou i se mea maualuga ina ia vaavaai atu i ai tagata uma.

21. E faapefea ona e mautinoa o le a tauia oe e Ieova ona o lou tumau ma le faamaoni?

²¹ E ui lava ua faataunuu muamua lenei valoaga i le ʻaufaauuina, ae ua faaalia ai foʻi le mamalu ua tuuina atu e Ieova iā i latou uma o ē auauna iā te ia. O lea la, pe a aafia oe i ni lagona masalosalo, ia manatua e ui e te lē lelei atoatoa, ae e tāua oe e pei o se “pale matagofie” ma le “pulou o le tupu” iā Ieova. O lea la, ia faaauau ona faafiafia o ia e ala i le faia o lona finagalo. (Faataoto 27:11) O le faia faapea, e mafai ai ona e mautinoa, o Ieova na te tauia oe i lou tumau ma le faamaoni!

[Faamatalaga pito i lalo]

Pe E te Manatua?

• E faapefea ona avea i tatou ma “oloa tāua” a Ieova?

• Aiseā e tāua ai ona iloa o Ieova na te tauia i tatou?

• O ā “togafiti” a Satani e ao ona tatou leoleo faasaga i ai?

• O le ā le auala ua sili ai le Atua i “o tatou loto”?

[Fesili mo le Suʻesuʻega]

[Ata i le itulau 26]

Paulo

[Ata i le itulau 26]

Elia

[Ata i le itulau 26]

Hana

[Ata i le itulau 28]

O loo aofia i le Afioga a Ieova le tele o manatu faamāfanafanaloto