Pe e Iai Moni se Tiapolo?

O LE ā sou manatu i le Tiapolo? Pe e iai moni lava o ia, ma pe mafai ona ia faaosoosoina isi e faia mea leaga, pe e na o se faaataga o mea leaga? Pe e tatau ona tatou fefefe i ai, pe manatu māmā faapea e na o se talitonuga faanuupō, po o se tasi foʻi o taʻua i ni tala o le vavau? Pe e faasino atu le upu “tiapolo” i se malosiaga e faaleaga ai mea i le lagi ma le lalolagi? Po o se fuaitau e faasino atu i uiga leaga o loo i tagata, e pei ona manatu i ai le toʻatele o faifeʻau i aso nei?

E lē o se mea e ofo ai i le eseese o manatu o tagata e uiga i le Tiapolo. Seʻi manatu foʻi i le faigatā ona iloa o se tasi, o lē e poto e faafoliga ese mai aemaise lava pe a ia maumauaʻi e nātia ona uiga moni! Ua faamatalaina faapena le Tiapolo i le Tusi Paia. I le faasino atu iā Satani, ua faapea mai le mau: “O Satani lava, ua liua o ia e ia ma agelu o le malamalama.” (2 Korinito 11:14) Talu ai e leaga le Tiapolo, ua ia faafoliga ai o ia lava e lelei ina ia faasesēina ai isi. Afai foʻi na te faapogaia tagata e talitonu e lē o iai moni o ia, o le a taulau manuia la ana fuafuaga.

O lea la, o ai moni lava le Tiapolo? O anafea ma na faapefea ona iai o ia? E faapefea ona ia taaʻina tagata i aso nei? O ā ni mea tatou te faia e tetee atu ai i na taaʻiga? O loo iai i le Tusi Paia le talaaga saʻo o le Tiapolo mai lava i lona amataga, ma ni tali moni i nei fesili.

[Ata i le itulau 3]

E matuā faigatā ona iloa lelei se tasi o lē o loo maumauaʻi e nātia ona uiga moni!