Le Faaleagaga Moni—E Faapefea Ona E Maua?

NA TUSI Paulo: “Auā o le loto i la le tino o le oti lea; a o le loto i la le Agaga o le ola lea ma le manuia.” (Roma 8:6) Na taʻua e le aposetolo i na upu, o le avea ma se tagata faaleagaga, e lē na o se filifiliga po o se faalogona ua iai. O le mea moni, o se mataupu e iʻu i le ola po o le oti. O le ā la e uiga i ai le mauaina e se tagata faaleagaga o le ‘ola ma le manuia’? E tusa ai o le Tusi Paia, e olioli lea tagata i le manuia po o le filemu i le taimi nei—mo ia lava ma i le la faiā ma le Atua—ae o le a tauia i le ola e faavavau i le lumanaʻi. (Roma 6:23; Filipi 4:7) E lētioa fetalai Iesu: “Amuia i latou e manatu mamafa i o latou manaʻoga faaleagaga”!—Mataio 5:3, NW.

O lou faitauina o lenei mekasini, e faaalia ai e te naunau i mea faaleagaga, ma o se gaoioiga atamai lea. Peitaʻi, e ono eseese taofi e tusa ai o lenei mataupu, e te ono tomānatu ai la: ‘O le ā le faaleagaga moni? E faapefea ona maua e se tasi?’

“Le Finagalo o Keriso”

E lē gata na taʻua e Paulo le tāua ma aogā o le avea ma sē e mafaufau faaleagaga, ae na ia taʻua foʻi le tele o mea e uiga i le faaleagaga moni. I Kerisiano i le aai anamua o Korinito, na faamatala e Paulo le eseesega o se tagata faaletino, e usiusitai i tuʻinanauga o le tino, ma se tagata faaleagaga, e faatāua mea faaleagaga. Na tusi Paulo: “E lē talia e le tagata faaletino o mea a le Agaga o le Atua, auā o mea valea ia iā te ia.” I le isi itu, na faamatala e Paulo o le tagata faaleagaga, e na te maua “le finagalo o Keriso.”—1 Korinito 2:14-16.

E uiga atu “le finagalo o Keriso” i le ‘gatasitasi o le loto e tusa ma le finagalo o Keriso Iesu.’ (Roma 15:5; Filipi 2:5) I se isi faaupuga, o le tagata faaleagaga e mafaufau e pei o Iesu ma mulimuli i Ona tulagāaao. (1 Peteru 2:21; 4:1) O le tele e mafaufau ai se tasi e pei o Keriso, o le malosi foʻi lenā o lona faaleagaga ma lata ai i lona mauaina o le ‘ola ma le manuia.’—Roma 13:14.

E Faapefea Ona Iloa “le Finagalo o Keriso”?

Ae ina ia maua le finagalo o Keriso, e ao i se tasi ona iloa muamua lenā finagalo. O le uluaʻi laasaga la e ati aʻe ai le faaleagaga, o le iloa o le auala e mafaufau ai Iesu. Ae faapefea ona e iloa le finagalo o se tasi na soifua i le lalolagi i le 2,000 tausaga ua mavae? O se faaaʻoaʻoga, na faapefea ona e silafia tagata taʻutaʻua o lou atunuu? Atonu e ala i le faitau o faamatalaga e faatatau iā i latou. I se tulaga tutusa, o le faitauina o le talafaasolopito tusitusia o Iesu, o se ala tāua lea e iloa ai le finagalo o Keriso.—Ioane 17:3.

I le tulaga o Iesu, e fā talafaasolopito tāua, o tala a Evagelia na tusia e Mataio, Mareko, Luka, ma Ioane. O le faitau lelei i nei tala, e fesoasoani e te malamalama ai i le finagalo o Iesu, o ona faalogona loloto, ma le uunaʻiga o ana gaoioiga. Pe a e faaalu se taimi e manatunatu loloto ai i mea na e faitau ai e uiga iā Iesu, o le a e silafia ai le ituaiga tagata sa iai o ia. E tusa po ua e faapea mai o oe o se soo o Keriso, ae e fesoasoani lenei faitauga ma le manatunatu loloto e te ‘tuputupu ai i le alofa tunoa ma le poto a lo tatou Alii, o lo tatou Faaola o Iesu Keriso.’—2 Peteru 3:18.

O le iloa o lenā tulaga, seʻi o tatou iloilo ai nisi o fuaitau i tusi o Evagelia e iloa ai, po o le  ā se mea na māfua ai ona avea Iesu ma tagata faaleagaga. Ona fesili ifo lea iā te oe pe faapefea ona e faaaʻoaʻo i le faaaʻoaʻoga na ia faataatia.—Ioane 13:15.

Le Faaleagaga ma “le Fua o le Agaga”

Na taʻua e le tusitala o le Evagelia a Luka, na liligi ifo le agaga paia o le Atua iā Iesu i lona papatisoga, ma na “tumu [Iesu] i le Agaga Paia.” (Luka 3:21, 22; 4:1) Na faamamafa e Iesu i ona soo le tāua o le taʻitaʻia e le agaga paia o le Atua, po o le “Agaga o le Atua,” o lona mana galue. (Kenese 1:2; Luka 11:9-13) Aiseā e tāua tele ai? Auā e iai i le agaga o le Atua le malosi e faaliliuina ai mafaufauga o se tasi ina ia amata ona aliali mai ai le finagalo o Keriso. (Roma 12:1, 2) E faatupu e le agaga paia i se tagata uiga e pei o le ‘alofa, olioli, filemu, onosai, mataalofa, agalelei, faamaoni, agamalu, ma le amio mamā pe pulea lelei o ia lava.’ O nei uiga lea ua taʻua i le Tusi Paia o “fua o le Agaga,” e iloa ai se tagata e faaleagaga moni. (Kalatia 5:22, 23) I nisi faaupuga, o le tagata e mafaufau faaleagaga, e taʻitaʻia e le agaga o le Atua.

Na faaalia e Iesu fua o le agaga a o fai lana faiva. Na faamaonia patino uiga e pei o le alofa, mataalofa, ma le agalelei i le auala na ia feutagaʻi ai ma ē na manatu i ai e faatauvaa. (Mataio 9:36) O se faaaʻoaʻoga, seʻi mātau se mea na tupu lea na faamatala e le aposetolo o Ioane. E tatou te faitau i ai: “Ua maliu ane [Iesu], ua silafia le tagata ua tauaso talu ina fanau mai.” Na iloa foʻi e soo o Iesu le tamāloa, ae na manatu i ai o sē e agasala. Na latou fesili: “Po o ai ea na agasala, po o ia nei, po o ona mātua?” Na iloa foʻi e ona tuaoi lenei tamāloa, ae na latou manatu o sē e ʻaisi. Na latou faapea mai: “E lē o ia ea lenei sa nofo ma ōle atu i mea?” Ae na silasila Iesu i le tamāloa tauaso o se tasi sa manaʻomia le fesoasoani. Na ia fetalai atu i le tamāloa ma faamālōlōina o ia.—Ioane 9:1-8.

O le ā se mea ua taʻu atu e lenei tala iā te oe e uiga i le finagalo o Keriso? Muamua, e leʻi faatuatuanaʻi e Iesu ē faatauvaa ae na ia feutagaʻi ma le alofa ma i latou. Lona lua, na ia tausolomua e fesoasoani i isi. Po o e mulimuli i lenei faaaʻoaʻoga na faataatia e Iesu? Po o e manatu i tagata e pei ona silasila i ai Iesu, e avatu iā i latou le fesoasoani manaʻomia e faaleleia ai o latou olaga ma avatu ai le faamoemoe o le lumanaʻi? Pe mātele ina e fiafia na o ē e lauiloa ae lē amanaʻia ai ē faatauvaa? Pe a e manatu i tagata e pei o Iesu, ua e faaaʻoaʻo la i lana faaaʻoaʻoga.—Salamo 72:12-14.

Le Faaleagaga ma le Tatalo

Ua faailoa mai e tala a Evagelia e faapea, sa masani ona tatalo Iesu i le Atua. (Mareko 1:35; Luka 5:16; 22:41) A o faia le faiva a Iesu i le lalolagi, na ia  faataatia ese le taimi e tatalo ai. Na tusi le soo o Mataio: “Ua tuuina atu e [Iesu] le motu o tagata ia ō, ona maliu aʻe lea ua na o ia i le mauga e tatalo.” (Mataio 14:23) Na maua e Iesu le malosi mai na taimi paganoa na fesootaʻi ai i lona Tamā i le lagi. (Mataio 26:36-44) I aso nei, e saʻili e tagata e mafaufau faaleagaga, avanoa faapena e talanoa ai i le Atua, i le iloa e faamalosia ai la latou faiā ma Lē na Faia mea, ma fesoasoani ia latou maua ai le finagalo e pei o Keriso.

E iai taimi na masani ona tatalo faaumiumi ai Iesu. (Ioane 17:1-26) O se faaaʻoaʻoga, a o leʻi filifilia e Iesu tane e 12 e avea ma ona aposetolo, “ua maliu aʻe ai o ia i le mauga e tatalo; ua aoina lana tatalo i le Atua.” (Luka 6:12) E ui e lē tau manaʻomia ona tatalo i le pō atoa, ae e mulimuli ē e mafaufau faaleagaga i le faaaʻoaʻoga a Iesu. A o leʻi faia ni filifiliga tetele ma tāua i le olaga, latou te faaalu le taimi tele e tatalo ai i le Atua, ma saʻili i le taʻitaʻiga a le agaga paia, e faia ai filifiliga ia e faaleleia atili ai lo latou itu faaleagaga.

Na faaalia e Iesu ona lagona loloto i ana tatalo lea e ao ona faaaʻoaʻo ai i a tatou tatalo. Mātau le mea na faamauina e Luka, i le auala na tatalo ai Iesu i le pō a o leʻi maliu. “Ua puapuaga o ia, ua atili ai lana tatalo; o lona afu foʻi ua pei o ʻaluʻalu toto ua paʻū ifo i le eleele.” (Luka 22:44) Na muaʻi tatalo faatauanau Iesu, ae i le taimi lea ua ia fesagaʻia ai le tofotofoga sili ona faigatā i lona soifuaga i le lalolagi, sa matuā naunautaʻi lana tatalo ma na talia. (Eperu 5:7) E faaaʻoaʻo ē e mafaufau faaleagaga i le faaaʻoaʻoga a Iesu. Pe a fesagaʻia tofotofoga ogaoga, latou te ‘atili ai ona tatalo’ i le Atua mo le agaga paia, le taʻitaʻiga, ma le lagolagosua.

Talu ai sa avea Iesu o sē e tatalo soo, e lē o se mea la e ofo ai le fia faaaʻoaʻo foʻi o ona soo iā te ia. Na latou talosaga ai iā te ia: “Le Alii e, ia e aʻoaʻo mai iā te i matou i tatalo.” (Luka 11:1) I se tulaga tutusa i aso nei, o ē e faatāua moni mea faaleagaga ma mananaʻo e taʻitaʻia e le agaga paia o le Atua, e mulimuli i le faaaʻoaʻoga a Iesu i le auala e tatalo ai i le Atua. E fesootaʻi le faaleagaga moni ma le tatalo.

Faaleagaga ma le Talaʻia o le Tala Lelei

I le Evagelia a Mareko, e tatou te maua ai le tala lea na faamālōlō ai e Iesu le tele o tagata mamaʻi i le leva o le pō. I le taeaopō o le aso na sosoo ai a o tatalo na o ia, na ō atu ai ona aposetolo ma taʻu atu, o loo saʻili le tele o tagata iā te ia, atonu e fia faamālōlōina i latou. Ae na fetalai atu Iesu iā i latou: “Inā tatou ō atu ia i aai e latalata mai, ia ou talaʻi atu i ai le tala lelei.” Ona ia faamatala lea o le pogai: “Auā o le mea lea na ou sau ai.” (Mareko 1:32-38; Luka 4:43) E ui sa tāua iā Iesu le faamālōlōina o tagata, ae o lana galuega autū le talaʻia o le tala lelei o le Malo o le Atua.—Mareko 1:14, 15.

I aso nei, o le taʻuina atu i isi o le Malo o le Atua, o se faailoga lea e iloa ai i latou ua mauaina le finagalo o Keriso. Na avatu e Iesu le faatonuga i ē uma e fia avea ma ona soo: “O lenei, ia outou ō atu e fai nuu uma lava ma soo, . . . ia outou aʻoaʻo atu iā te i latou ia tausi i mea uma ua ou fai atu ai iā te outou.”  (Mataio 28:19, 20) Na valoʻia foʻi e Iesu: “E talaʻiina atu foʻi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:14) Talu ai ua faailoa mai i le Afioga a le Atua ua faataunuuina le talaʻiga i le malosi o le agaga paia, o le faia la o se sao uigā i lenā galuega, o se faailoga lea o le faaleagaga moni.—Galuega 1:8.

O le talaʻia o le feʻau o le Malo i tagata i le lalolagi aoao, e manaʻomia ai ni taumafaiga autasi a le faitau miliona o tagata. (Ioane 17:20, 21) E manaʻomia ona avea i latou e auai i lenei galuega o ni ē e mafaufau faaleagaga, ae ia maopoopo lelei foʻi i le lalolagi aoao. Pe e te mātauina tagata o loo mulimuli i tulagāaao o Keriso, ma talaʻia le tala lelei o le Malo i le lalolagi aoao?

Po o E Ausia Agavaa o se Tagata Faaleagaga?

E iai foʻi isi uiga e iloa ai se tagata e faaleagaga moni, ae e faapefea ona e iloa ua e ausia na agavaa ua uma ona iloiloina? Ina ia iloa, fesili ifo iā te oe: ‘Po o oʻu faitauina e lē aunoa le Afioga a le Atua, le Tusi Paia, ma mafaufau i mea na ou faitauina? Po o oʻu faaalia fua o le agaga i loʻu olaga? Po o aʻu o se tagata e toaʻga e tatalo? Po o oʻu manaʻo e aufaatasi ma tagata o loo talaʻia le tala lelei o le Malo o le Atua i le lalolagi aoao?’

O se iloiloga faamaoni o oe lava ia, e fesoasoani e te silafia ai le telē po o le moni o le itu faaleagaga o loo e iai. E matou te talosagaina oe e uia laasaga talafeagai i le taimi nei, ina ia e mauaina ai le ‘ola ma le manuia.’—Roma 8:6; Mataio 7:13, 14; 2 Peteru 1:5-11.

[Pusa/Ata i le itulau 7]

VALA E MĀTAULIA AI LE FAALEAGAGA

◆ Naunau i le Afioga a le Atua

◆ Faaalia fua o le agaga

◆ Tatalo e lē aunoa ma le faamaoni i le Atua

◆ Taʻu i isi le tala lelei o le Malo

[Ata i le itulau 5]

Ua fesoasoani mai le Tusi Paia e te iloa ai “le finagalo o Keriso”