Aiseā ua Faataga ai e le Atua le Amioleaga?

O LOO tatou vaaia pea le faateteleina o mea leaga, aemaise lava i mafatiaga ua oo i tagata i lenei lalolagi. I taua, ua fasiotia ai e lē gata i fitafita ae faapea foʻi ma tagata lautele. Ua taatele foʻi le amioleaga ma faiga sauā i so o se mea. Atonu foʻi ua e aafia i ni faiga faailoga tagata po o faiga lē tonu. Pe afai e te tomānatu i nei mea ua tatou vaaia ma aafia ai, e mautinoa o le a e fesili ifo, ‘Aiseā ua faataga ai e le Atua le amioleaga?’

E toʻatele foʻi isi sa fesili faapena. Pe tusa ma le 3,600 tausaga ua mavae, na fesili ai le auauna faamaoni a le Atua o Iopu e faapea, “Se ā le mea ua ola mai ai o ē amio leaga?” (Iopu 21:7) Na fesili foʻi le perofeta o Ieremia, i le pe tusa ma le 2,600 tausaga ua mavae, i se fesili faapena i lona faapea mai, “Se ā ea le mea ua manuia ai le ala o tagata amio leaga, ua saogalemu i latou uma o ē matuā faaʻoleʻole?” (Ieremia 12:1) Na malamalama lelei Iopu ma Ieremia i le tulaga o Ieova, o ia o se Atua amiotonu. Peitaʻi, e leʻi mautonu i laʻua i le māfuaaga ua faateleina ai pea le amioleaga. Atonu o loo e lē mautonu foʻi i lenā mea.

O nisi tagata, ua tuuaʻia le Atua i mea leaga ma mafatiaga ua oo iā i latou. Ua taumānatu nisi e faapea: ‘Afai e malosi, e amiotonu ma alofa le Atua, aiseā la ua lē mafai ai ona ia faamutaina mea leaga ma mafatiaga? Aiseā ua ia faataga ai pea le amioleaga e oo mai i aso nei?’ O le a taliina i le mataupu o sosoo mai, nei fesili ma isi foʻi fesili tāua.

[Ata i le itulau 3]

AP Photo/Adam Butler