Fesili Mai le ʻAufaitau

E ui sa faatonuina tagata Iutaia e aua le aai i se mea e “faafefeteina” i le Paseka, ae aiseā na faaaogā ai e Iesu le uaina, o se mea ua faamafuina, pe faafefeteina, i le faavaeina o le Faamanatuga o lona maliu?—Esoto 12:20; Luka 22:7, 8, 14-20.

O le faamanatuina o le Paseka, o se faamanatuga lea o le ō ese o le fanauga a Isaraelu mai Aikupito, ma na faavaeina i le 1513 T.L.M. Na faapea mai Ieova i le tuuina mai o faatonuga o le faamanatuga: “Aua neʻi outou aai sina areto e faafefeteina; ia outou aai areto e lē faafefeteina i mea uma tou te nonofo ai.” (Esoto 12:11, 20) O nei faasāsāga mai le Atua e faasino patino atu i le ituaiga o areto lea e ʻaina i le Paseka. E leʻi taʻua ai se uaina.

O le māfuaaga autū mo lenei faasāsāga i mea faafefete ona sa faatopetope le ō ese o tagata Isaraelu mai Aikupito. Ua faapea mai le Esoto 12:34: “Ona ave ai lea e le nuu o a latou palugāfalaoa, a o leʻi faafefeteina, atoa ma a latou mea e palu ai falaoa ua afīfī i o latou ofu i luga i o latou ua.” O le lē iai o se mea e faafefeteina i faamanatuga o le Paseka, o le a faamanatu ai i augātupulaga o i le lumanaʻi lenei mea tāua.

A o faagasolo taimi e masani ona faaāta e mea faafefete le agasala po o amioga leaga. Mo se faaaʻoaʻoga, na fesili le aposetolo o Paulo e faatatau i se tagata amio lē mamā sa iai i totonu o le faapotopotoga Kerisiano: “Tou te lē iloa ea o se mea faafefete itiiti, e faafefeteina ai le palugāfalaoa uma lava?” Ona ia faapea mai lea: “O le mea lea ia outou faateʻa ese ai le mea faafefete tuai, ina ia avea outou ma paluga fou, ona ua leai o se mea faafefete iā te outou; auā foʻi o Keriso la tatou paseka ua fasia mo i tatou. O lenei, aua tatou te faia le tausamiga ma le mea faafefete tuai, o le loto leaga ma le amio leaga; a ia faia ma le mea e lē faafefeteina, o le loto lelei ma le faamaoni.” (1 Korinito 5:6-8) Ua na o le areto lē faafefete e talafeagai ona faatusa i ai le tino tagata lē agasala o Iesu.—Eperu 7:26.

O le faaaogāina o le uaina i le faamanatuina o le Paseka o se mea na faaopoopo mulimuli e tagata Iutaia. Atonu na latou faaopoopo ina ua latou toe foʻi mai i le faaaunuua i Papelonia. E lē o i le Tusi Paia se faasāsāga o lenei faaopoopoga, ma sa talafeagai ona faaaogā e Iesu le uaina i le taumafataga i le Paseka. E ese le auala na faamafuina, pe faafefeteina, ai le uaina i aso anamuā mai le auala e faafefete ai le areto. I le palugāfalaoa, e manaʻomia ona tuu i ai se fefete. O uaina e fai mai vine e lē manaʻomia se fefete. O loo i totonu o le vine mea e manaʻomia e faamafu ai. E leʻi maua se uaina lē faamafuina i le Paseka, auā sa umi le va o le taimi o le seleselega, ma le taimi o le Paseka.

O lea la, o le faaaogāina e Iesu o le uaina e avea ma faailoga o le Faamanatuga e lē o feteenaʻi ma faatonuga o le Paseka e faatatau i le mea faafefete. So o se uaina mūmū e leʻi faasuamalieina ma leʻi faaopoopo i ai nisi mea, e talafeagai ona fai ma faailoga o le “toto tāua” o Keriso.—1 Peteru 1:19.