Pe Mafai Ona E Sau i Maketonia?

I LE taulaga o Teroa i Asia Itiiti, na maua ai e le aposetolo o Paulo se faaaliga. Ua ʻaiʻoi mai se tagata Maketonia iā te ia: “Ia e sau i Maketonia e fesoasoani mai iā i matou.” O le taimi lava na vaaia ai e Paulo le faaaliga, na latou manatu ai ma lana ʻaumalaga “ua faatonuina i [latou] e le Atua e talaʻi atu le tala lelei” i tagata Maketonia. O le ā le iʻuga? I le taulaga o Filipi i Maketonia, na avea ai Litia ma lona aiga ma tagata talitonu. Na mulimuli ane avea nisi i lenā itumalo o Roma o Maketonia, ma tagata talitonu.—Galu. 16:9-15.

O loo mātauina foʻi se agaga maelega faapena, i Molimau a Ieova i aso nei. Ua lotomalilie le toʻatele e siitia atu i vaipanoa o loo manaʻomia tele ai tagata talaʻi o le Malo. O se faaaʻoaʻoga, na manaʻo Lisa e avea le faiva ma taulaʻiga o lona olaga. Na siitia atu o ia i Kenya mai Kanata. Na siitia atu foʻi Trevor ma lana avā o Emily, i Malawi mai Kanata, o lo la sini, ia faalautele atu le la faiva. Na manatu Paul ma Maggie mai Egelani, o lo la litaea o se avanoa lelei lea e faateleina ai lo la taimi i le auaunaga iā Ieova, ma siitia atu ai loa i Aferika i Sasaʻe. Po o iā te oe se agaga faataulaga? Pe e te manatu e siitia atu faapena? Pe afai e mafai, o ā mataupu silisili ma fautuaga aogā e fesoasoani iā te oe e taulau ai?

Ia Iloilo Lou Tulaga

O se tasi o mea e manaʻomia ona iloilo, o māfuaaga e fai ai. Na fetalai Iesu e faapea o le poloaʻiga sili, o le: “Alofa atu iā Ieova lou Atua ma lou loto atoa, ma lou ola atoa, ma lou mafaufau atoa.” E ao ona māfua ona auauna i se oganuu ese, ona o le alofa i le Atua ma se faanaunauga  ia faataunuu le poloaʻiga o le faia o tagata ma soo. Na fetalai atili Iesu: “E faapena foʻi le poloaʻiga lona lua, ‘Ia e alofa atu i lou tuaoi e pei o oe lava iā te oe.’” O le alofa i tuaoi, e faaalia i se faanaunauga moni e fesoasoani i tagata. (Mata. 22:36-39; 28:19, 20) O le auauna i se atunuu ese e masani ona aofia ai le tele o galuega ma se agaga faataulaga. E lē na o se malaga atu i se oganuu ese e ese mea e tutupu ai. E ao ona uunaʻia oe i le alofa. E taaofaʻi le manatu e Remco ma Suzanne mai Netherlands, o loo auauna nei i Namibia, “O le māfuaaga o lo ma tumau pea i inei, ona o le alofa.”

Ua faamatala e Willie, o se ovasia o le matagaluega i Namibia e faapea: “O i latou o loo tumau i se oganuu ese, e leʻi ō mai ma se manatu e tausia i latou e uso i inā. Na latou ō mai ma le manatu e galulue soosootauʻau ma le ʻauuso, ma fesoasoani iā i latou i le galuega talaʻi.”

Pe a uma ona iloiloina le māfuaaga e te fia siitia ai, ona fesili ifo lea iā te oe lava: ʻO le ā se tomai o loo iā te aʻu e mafai ona aogā i se oganuu ese? Po o aʻu o se faifeʻau e uigā i laʻu faiva? O ā gagana e mafai ona ou tautala ai? Pe ou te lotomalie e aʻo se gagana fou?’ Ia fai se talanoaga lelei ma lou aiga. Talanoa le mataupu ma toeaina o lau faapotopotoga. Ma ia mautinoa e tuu atu le mataupu iā Ieova i le tatalo. O le faia o sea iloiloga ma le faamaoni o oe lava, e fesoasoani iā te oe e iloa ai pe e te mafai moni ona alu, faatasi ai ma se faanaunauga e auauna i se oganuu ese.—Tagaʻi i le pusa  “Ia E Iloa Oe Lava.”

 Le Mea e Auauna Ai

I le faaaliga, sa valaaulia Paulo e alu i Maketonia. I aso nei, e lē o faaaogā e Ieova ni faaaliga e taʻitaʻia ai i tatou. Peitaʻi, e ala i lenei mekasini ma isi lomiga, ua iloa ai e tagata o le Atua le tele o oganuu o loo matuā manaʻomia ai ni tagata talaʻi. O lea, ia fai se lisi o na oganuu. Pe afai e te lē o i se tulaga e aʻoaʻoina se gagana fou pe nofo mau i se atunuu ese, mafaufau e auauna i le mea o loo mafai ona e tautala ai i le gagana autū a le atunuu. Ona iloilo lea o mea tāua e pei o mea e manaʻomia mo le visa, auala o feoaʻiga, le malu puipuia, le tau o le soifuaga, faapea ma le tau o le atunuu. E te ono talatalanoa atu iā i latou ua uma ona faia lea ituaiga o gaoioiga. Ia tatalo e faatatau i ia mataupu. Manatu iā Paulo ma ana aumea, na “faasāina i latou e le agaga paia ona talaʻi atu le upu i le itumalo o Asia.” E ui lava na latou taumafai e ō atu i Pitunia, ae “e leʻi faatagaina i latou e Iesu e ala i le agaga” e faia faapea. I se tulaga tutusa, e ono alu se taimi o tau mafaufau po o fea se oganuu e fetaui tonu ma oe.—Galu. 16:6-10.

Atonu o lea ua e iloa ni nai manatu talafeagai. Pe afai o loo e mafaufau e auauna i se atunuu ese, ia tusi atu i ofisa o Molimau a Ieova i atunuu o loo e mafaufau i ai. Ia taʻu atu lou talaaga i vala eseese o le auaunaga na e galue ai po o loo e galue ai i le taimi nei, faapea ma so o se fesili patino e te fia fai atu, e pei o le tau o le soifuaga, le ituaiga o fale e ono mafai ona e maua, tulaga i falemaʻi ma mea tau i le soifua mālōlōina, ma avanoa e mafai ona maua mo ni galuega totogi. Ona avatu lea o lau tusi po o tusi i le komiti o le auaunaga i lau faapotopotoga. O le a faaopoopo atu la latou tusi faamaonia ma auina tuusaʻo atu i ofisa o lālā ua e tusi atu i ai. O tali mai i na lālā o le a ono fesoasoani iā te oe e filifili ai le mea e sili ona e aogā ai.

Na mātau e Willie, e pei ona taʻua muamua e faapea: “O i latou o loo sologa lelei i la latou auaunaga, e latou te asiasi muamua atu i se atunuu ma vaai i vaipanoa e talafeagai ma maua ai lo latou fiafia. Na iloa e se tasi o ulugalii, e faigatā pe a la ō atu i se oganuu maotua. Ona la ō atu lea i se taulaga laʻitiiti lea sa iai se manaʻoga mo tagata talaʻi, ae o loo maua ai tulaga o le olaga e mafai ona maua ai pea lo la fiafia.”

Fesagaʻia Luʻia Fou

O le alu ese mai le aiga ae alu atu i se siʻomaga e matuā ese lava, e mautinoa e aumaia ai nisi o luʻi iā te oe. Ua faapea mai Lisa e pei ona taʻua muamua, “O lagona o le tuua toʻatasi e matuā faigatā lava.” O le ā na fesoasoani iā te ia? O le pipii atu pea i le faapotopotoga i le mea lea ua siitia atu i ai. Sa fai ma ona sini le iloa o igoa o tagata uma. Ina ia taulau lea sini, e vave taunuu o ia i sauniga ma faatuatuai ona alu pe a tuua, ina ia talanoa ma uso ma tuafāfine. Na galulue Lisa ma isi i le talaʻiga, valaaulia le toʻatele i lona fale, ma fai ni uō fou. Ua ia faapea  mai: “Ou te lē faanoanoa ona o faataulaga ua ou faia. Ua matuā faamanuia mai Ieova iā te aʻu.”

Ina ua uma ona tausia se fanau, na tuua e Paul ma Maggie lo la aiga sa nonofo ai mo le 30 tausaga. Na taʻua e Paul e faapea: “O le tuua o meatotino sa leʻi mafaufauina e faigofie. Ae o le mea sa sili ona lē faigofie o le tuua o le aiga, lea e sili atu ona leaga nai lo le mea na mafaufau i ai. Na ma matuā fetagisi lava i luga o le vaalele. E faigofie ona mafaufau, ʻE lē mafai ona ma faia lenei mea.’ Ae na ma faalagolago iā Ieova. O le iai o ni uō fou e te naunau atili ai e faaauau i le auaunaga.”

Na filifili Greg ma Crystal e siitia atu i Namibia mai Kanata ona e la te tautatala i le gagana Peretania, o le gagana aloaʻia a le atunuu. Ae peitaʻi, mulimuli ane, na la iloa le tāua tele o le aʻoaʻoina o se gagana a se atunuu. “O nisi taimi na ma lotovaivai ai. Ae ina ua faatoʻā uma ona aʻoaʻoina le gagana, na ma malamalama ai i le aganuu. O aufaatasiga māfana ma uso na fesoasoani iā i maʻua e fetuunaʻi ai o ma olaga e fua i lo ma siʻomaga fou.”

O lenā uiga lotomaulalo ma lotomalie e mafai foʻi ona iai se aafiaga lelei i le ʻauuso. E manatua pea e Jenny aiga na siitia mai i Aialani, le mea lea sa ia ola aʻe ai. Ua fai mai a ia: “O i latou o ni ē e talimālō lelei. Na latou ō mai moni lava e auauna atu, ae lē ina ia auauna mai i ai tagata. Sa latou matuā maelega ma fiafia, ma o lea na ou taumafai ai foʻi e faia faapea.” O loo galulue nei Jenny ma lana tane o ni misionare i Gambia.

O le Faamanuia a Ieova e “Faatamaoaiga Aʻi”

Maʻeu le faatamaoaigaina ai i le mea na tupu iā Paulo i Maketonia! Pe tusa ma le sefulu tausaga mulimuli ane, na ia tusi atu ai i uso i Filipi e faapea: “Ou te faafetai pea i loʻu Atua ona o mea ua ou manatua iā te outou.”—Fili. 1:3.

E faapena lagona o Trevor ma Emily, o ē na galulue i Malawi a o leʻi valaaulia i le Aʻoga Faale-Tusi Paia o le Olomatamata o Kiliata. Na la faapea mai: “O nisi taimi e ma te taumānatu ai po o ma faia le mea saʻo, ae sa ma fiafia. Sa ma māfana le tasi i le isi, ma lagona le faamanuia a Ieova.” Na faapea mai Greg ma Crystal lea na muaʻi taʻua: “E leai se isi mea e mafai ona ma faia.”

O le mea moni, e lē o tagata uma e mafai ona ō e galulue i se isi atunuu. O nisi e sili atu ona lelei pe a siitia atu i se isi vaipanoa i totonu lava o lo latou atunuu, o loo tele ai le manaʻoga. O isi e mafai ona aapa atu mo sini e auauna i isi faapotopotoga e lata ane i o latou aiga. O le mea tāua ia faia mea uma e te mafaia e auauna ai iā Ieova. (Kolo. 3:23) O lea la, o le a moni ai upu faagaeeina nei iā te oe: “O le faamanuia a Ieova, o lea e faatamaoaiga aʻi; na te lē faaopoopo i ai se tigā.”—Faata. 10:22.

 [Pusa/Ata i le itulau 5]

Ia E Iloa Oe Lava

Ina ia iloilo oe lava pe mafai ona e auauna i se isi oganuu, ia iloilo fesili o loo mulimuli mai ma fuafua ma le faamaoni faatasi ai ma le tatalo, pe faamata o mafai ona e faia lenā tulaga. E mafai ona fesoasoani iā te oe faamatalaga mai i lomiga ua tuanaʻi o Le Olomatamata ina ia faia ai faapea.

• Po o aʻu o se tagata faaleagaga?—“Laasaga i le Mauaina o le Fiafia” (Oketopa 15, 1997, itulau e 6)

• Po o aʻu o se tagata talaʻi e taulau?—“How to Succeed in the Pioneer Ministry” (Me 15, 1989, itulau e 21)

• Pe mafai ona ou nofo ese mai le aiga ma uō?—“Onosaia o le Maʻi Manatu a o i le Auaunaga a le Atua” (Me 15, 1994, itulau e 28)

• Pe mafai ona ou aʻoaʻoina se gagana fou?—“Galulue ma se Faapotopotoga e Tautatala i se Isi Gagana” (Mati 15, 2006, itulau e 17)

• Pe a siitia, pe ou te gafatia le tulaga tau tupe?—“Pe Mafai Ona E Auauna i se Isi Atunuu?” (Oketopa 15, 1999, itulau e 23)

[Ata i le itulau 6]

O se uiga lotomaulalo ma lotomalie e mafai ona iai se aafiaga lelei i le ʻauuso

[Ata i le itulau 7]

O i latou na ō mai e auauna atu e taulau manuia