Aua Neʻi Tuulafoaʻia Ou Uso Talitonu

UA TAʻUA e Iakopo ma lana avā o Peata: * “E sefulu tausaga o ma tosina i le ʻoa o lenei lalolagi, ma sa feoloolo lo ma tamaoaiga. E ui na ma ola aʻe i le upu moni, ae na ma tafetafea ese ma na leai so ma malosi e toe foʻi ai i le upu moni.”

Ua taʻua foʻi e le uso o Mareko: “Ona o fesuiaʻiga i tulaga tau i le va fealoaʻi ma faigāmalo i Polani, na lē maua ai saʻu galuega tumau. Sa ou matuā lotovaivai. Na ou popole e amata saʻu pisinisi ona e leai soʻu tomai i mea tau pisinisi. Ae na fai lava laʻu pisinisi ma manatu o le a aogā e tausia lelei ai loʻu aiga, e aunoa ma se aafiaga lē lelei i loʻu itu faaleagaga. Peitaʻi na ou iloa mulimuli ane e lē saʻo loʻu manatu.”

Talu ai o loo faaauau pea ona siitia le tau o le soifuaga ma faateteleina le leai o ni galuega, ua popolevale ai nisi ma iʻu ina faia ni faaiʻuga sesē. O nisi uso ua manatu e faigaluega ovataimi, maua se isi galuega faaopoopo, pe amata ni a latou lava pisinisi e ui e leai se tomai. Ua latou manatu o le a aogā tupe faasili i le aiga, ma o le a lē afāina ai faaleagaga. Peitaʻi, ona o tulaga lē mailoa  ma le fesuisuiaʻi o le tamaoaiga, e mafai ona iʻu ai i ni aafiaga leaga i le itu faaleagaga. O le iʻuga, ua maileia ai nisi i le matapeʻapeʻa ma faamuamua le saʻilia o meafaitino i lo le auaunaga iā Ieova.—Fai. 9:11, 12.

O nisi uso ma tuafāfine ua pupū i le saʻilia o mea a lenei lalolagi, ma ua leai se taimi mo a latou lava suʻesuʻega, sauniga po o le talaʻiga. E mautinoa o le lafoaʻia o nei masaniga, ua aafia ai lo latou itu faaleagaga ma le faiā ma Ieova. E latou te ono lafoaʻia foʻi se isi faiā tāua, o le mafutaga lea ma ‘ē e latou te aiga i le faatuatua.’ (Kala. 6:10) O nisi ua faasolosolo mālie ona tuua le ʻauuso Kerisiano. Seʻi iloilo totoʻa lenei mataupu.

Lo Tatou Tiute i Uso Talitonu

Talu ai o i tatou o uso ma tuafāfine, e tele la auala e faaalia ai le alofa o le tasi i le isi. (Roma 13:8) Atonu o loo e vaaia i lau faapotopotoga ‘ē ua mafatia ua alalaga mai mo se fesoasoani.’ (Iopu 29:12) O nisi e lē o maua mea e manaʻomia i le itu faaletino. O lea na faamanatu mai ai e Ioane le mea e ao ona fai. “O sē ua tele ana meafaitino i lenei lalolagi ma ua vaai atu i lona uso ua lē tagolima o ia, a ua lē faaalia e ia le alofa faapelepele iā te ia, pe faapefea la ona tumau iā te ia le alofa o le Atua?”—1 Ioa. 3:17.

Atonu sa e tali atu i na manaʻoga ma fesoasoani atu i isi. Ae e lē na o le itu faaletino e tatou te alolofa ai i le ʻauuso. O nisi e manaʻomia se fesoasoani ona ua tuua toʻatasi pe lotovaivai. Latou te ono lagona le lē aogā, mafatia i se maʻi tugā po ua maliu se tasi e pele iā i latou. E mafai ona tatou faalaeiauina i latou, i le faalogologo atu ma talanoa ma i latou, ma fesoasoani i ai i le itu tau faalogona ma le faaleagaga. (1 Tesa. 5:14) O le iʻuga, e masani ona faamalosia ai le fusi o le alofa ma o tatou uso.

Talu ai ua avea toeaina ma leoleo mamoe faaleagaga, e latou te fiafia tele la e faalogologo atu ma le agalelei, malamalama ma avatu fautuaga alofa mai le Afioga a le Atua. (Galu. 20:28) O lea ua faaaʻoaʻo ai ovasia i le aposetolo o Paulo, o lē na “alofa māfana” i uso ma tuafāfine faaleagaga.—1 Tesa. 2:7, 8.

Peitaʻi, pe a alu ese se Kerisiano mai i le lafu, ua ia lafoaʻia lona tiute i ona uso talitonu. E mafai foʻi ona aafia ovasia i le faaosoosoga o le pupū atu i le saʻilia o mea faitino. E faapefea pe a lolo atu se Kerisiano i lenā faaosoosoga?

Lofitūina i Popolega o le Olaga

O le tauivi e tausia manaʻoga faaletino o o tatou aiga, e masani ona iʻu ai i popolega  ma lē faatāua ai mea faaleagaga. (Mata. 13:22) Ua faapea mai Mareko lea na muaʻi taʻua: “Ina ua gau laʻu pisinisi, na ou maua se galuega e lelei le totogi i se isi atunuu. Na ou alu mo na o le tolu masina, toe faaopoopo le isi tolu masina ma faaauau ai lava faapea, ae e na o sina taimi puupuu e asiasi ai i le aiga. Na matuā mafatia faalogona o si aʻu avā lē talitonu i lenei mea.”

E lē na o le aiga na mafatia ai. Ua taʻua atili e Mareko: “E lē gata e faigaluega mo ni itula uumi i le vevela, ae sa faigaluega foʻi ma tagata lē mafaufau o ē na faaaogā sesē isi tagata. Sa pei i latou o tagata solitulafono. Sa ou lagona le mafatia ma le sauāina. Talu ai ua leai se taimi e tausia ai aʻu lava, na ou lē mautonu ai pe mafai ona ou tausia isi.”

O iʻuga faanoanoa o filifiliga a Mareko, e tatau ona uunaʻia ai i tatou e mafaufau muamua a o leʻi faia se faaiʻuga. E ui lava e foliga mai o le a faaleleia le tulaga tau tupe pe a siitia i se isi atunuu, ae o le a faapogaia ai isi faafitauli. O se faaaʻoaʻoga, o le ā e tupu i le itu faaleagaga ma tau faalogona o o tatou aiga? Po o le a motusia ai la tatou mafutaga ma le faapotopotoga? Po o le a lē toe faia ai lo tatou faaeaga o le auauna atu i uso talitonu?—1 Timo. 3:2-5.

Ae e lē tau manaʻomia ona alu se tagata i se isi atunuu ina ia faaalu uma ai lona taimi i galuega totogi. Manatu iā Iakopo ma Peata. Ua taʻua e Iakopo: “Na lelei lava le amataga. Ina ua faatoʻā uma ona ma faaipoipo, na amata se ma tamaʻi pisinisi e faatau ai meaʻai. Ona ua ola le pisinisi, o lea na toe faatelē ai. Ae ona o le pisi tele na ma misia ai sauniga. E leʻi umi ae tuu laʻu paeonia ma lē toe auauna o le faiva. Ona o le fiafia ua tele tupe ua maua, na tatala ai se ma faleoloa telē ma faia se paaga faapisinisi ma se tagata lē talitonu. E leʻi umi ae ou malaga i isi atunuu ina ia sainia ni konekarate e faitau miliona tupe e maua mai ai. Sa seāseā ona ou iai i le fale, ma na aafia la matou mafutaga ma laʻu avā ma loʻu afafine. Ua taulau manuia le pisinisi ae ua matou momoe ai faaleagaga. Ona ua lē toe aufaatasi ma le faapotopotoga, e matou te leʻi toe mafaufau ai foʻi i le ʻauuso.”

O le ā ua aʻoaʻoina mai i inei? E mafai ona maileia se Kerisiano i le faanaunauga ia maua se olaga manuia faaletino, ae iʻu ai ina lē toe popole i le upu moni ma leiloa ai “lona ofu tele,” po o lona tulaga o se Kerisiano. (Faaa. 16:15) O lenā mea e iʻu ai ina motusia la tatou fesootaʻiga ma le ʻauuso, o ē sa tatou fesoasoani muamua i ai.

Ia Fai se Iloiloga Faamaoni

Atonu e tatou te mafaufau, ‘E lē tupu lenā mea iā te aʻu.’ Peitaʻi, e ao iā i tatou uma ona iloilo totoʻa po o le ā le tele o mea e tatou te manaʻomia. Na tusi Paulo: “Tatou te leʻi aumaia lava se mea i le lalolagi, ma e lē mafai foʻi ona tatou aveese ai o se mea. O lea, afai ua iai ni a tatou meaʻai, o mea e oofu ai, ma mea e nonofo ai, ia tatou lotomalilie i nei mea.” (1 Timo. 6:7, 8) E eseese tulaga tau i le soifuaga i lea atunuu ma lea atunuu. E manatu se tagata e nofo i se atunuu tamaoaiga e lē tele ni ana mea o maua, ae a maua e se tasi o se isi atunuu e manatu ua mauʻoa o ia.

Po o le ā lava le tulaga o le atunuu o loo tatou iai, ia manatu i upu a Paulo: “O i latou o ē fia mauʻoa, e paʻuʻū i latou i le faaosoosoga ma le mailei, ma le tele o tuʻinanauga valea ma le tigā, ia e oo atu ai tagata i le faaumatiaga ma fano ai.” (1 Timo. 6:9) E natia se mailei ina ia lē iloa atu e se manu. Ua faia ina ia puʻea faafuaseʻi ai se manu. E faapefea ona tatou ʻalofia le maileia i ‘tuʻinanauga tigā’?

O le faatulaga o mea e sili ona tāua, e mafai ai ona tele lo tatou taimi mo le auaunaga iā Ieova, ma suʻesuʻega a le tagata lava ia.  O ia suʻesuʻega e aogā i se Kerisiano ia ‘matuā agavaa ai ma lava saunia’ e fesoasoani atu i isi.—2 Timo. 2:15; 3:17.

A o faagasolo tausaga, sa galulue toeaina alolofa ina ia faamalosia ma faalaeiau Iakopo, ma sa ia faia ni suiga tetele. Ua ia taʻua: “I se tasi talanoaga, na taʻua ai e toeaina le faaaʻoaʻoga i le Tusi Paia i se tauleʻaleʻa mauʻoa, sa fia ola e faavavau ae na lē manaʻo e lafoaʻi lona tamaoaiga. Ona latou faapea mai lea ma le faautauta, pe mafai ona faatatau lenei mataupu iā te aʻu. Sa matuā aogā lenā ou te iloa ai le mea e ao ona fai!”—Faata. 11:28; Mare. 10:17-22.

Sa toe iloilo ma le faamaoni e Iakopo lona tulaga, ma filifili e motusia lana fesootaʻiga ma pisinisi tetele. E leʻi atoa se lua tausaga ae ua toe malolosi faaleagaga ma lona aiga. O loo ia auauna nei i ona uso o se toeaina. Ua taʻua e Iakopo: “Pe a pupū tele uso i faiga faapisinisi ma faatalalē ai i lo latou itu faaleagaga, ou te faaaogā le mea na tupu iā te aʻu e faataʻitaʻi ai le lē atamai o le amo faalēgatasi ma ē lē talitonu. E lē faigofie ona teena avanoa e mauʻoa ai, ma ʻalo ese mai i faiga lē faamaoni.”—2 Kori. 6:14.

Na iloa foʻi e Mareko sa ia faia se faaiʻuga sesē. E ui na aogā se galuega e lelei le totogi i se isi atunuu i le tulaga tau tupe o lona aiga, ae na faalētonu le la faiā ma le Atua ma ona uso. Ae na toe suia mea e faamuamua i lona olaga. “I tausaga ua mavae, sa pei aʻu o Paruka anamua o lē na ‘saʻilia pea mea tetele mo ia.’ Peitaʻi na sasaa atu loʻu loto iā Ieova ma faailoa atu i ai oʻu popolega, ma ua ou lagona ua ou toe malosi faaleagaga.” (Iere. 45:1-5) Ua aapa atu nei Mareko mo le “galuega lelei” o se ovasia i le faapotopotoga.—1 Timo. 3:1.

Ua lapataʻi mai Mareko i ē e mafaufau e malaga atu i isi atunuu e saʻili ai se galuega e lelei le totogi: “E faigofie tele ona paʻuʻū i mailei a lenei lalolagi amioleaga, pe a siitia i se isi atunuu. O le lē iloa tautala i le gagana a lea atunuu e faigatā ai ona fesootaʻi ma isi. E te ono foʻi mai i le aiga ma ni tupe se tele, ae ua tele foʻi ni ou manuʻaga faaleagaga e umi se taimi e tau togafitia ai.”

Pe a faapaleni galuega totogi ma le tiute i o tatou uso, o le a tatou faafiafia ai Ieova. E mafai foʻi ona tatou faia se faaaʻoaʻoga lelei e ono uunaʻia ai isi e faia se faaiʻuga atamai. E manaʻomia e i latou o ē ua lofitūina le lagolagosua, alofa ma le faaaʻoaʻoga lelei a uso ma tuafāfine. E mafai e toeaina ma isi e matutua faaleagaga, ona fesoasoani i uso talitonu ia tumau pea ona paleni ma ʻalofia le pupū atu i popolega o le olaga.—Epe. 13:7.

Ioe, seʻi aua lava neʻi tuulafoaʻia o tatou uso talitonu ona o le pupū atu i a tatou galuega totogi. (Fili. 1:10) Nai lo lea, seʻi o tatou “mauʻoa i le silafaga a le Atua,” a o faamuamua mea e fesootaʻi atu i le Malo.—Luka 12:21.

[Faamatalaga faaopoopo]

[Ata i le itulau 21]

Po o faalavelavea lou auai i sauniga ona o lau galuega totogi?

[Ata i le itulau 23]

Pe e te faatāua avanoa e fesoasoani atu ai i ou uso ma tuafāfine faaleagaga?