Fesili Mai le ʻAufaitau

O le ā so tatou malamalamaga e faatatau i fuainumera i le lipoti o le tausaga faaleauaunaga?

O tausaga taʻitasi e tatou te tulimataʻia ai le lipoti o le auaunaga e lomia i le Tusi Tausaga. O se fiafiaga le iloa o mea ua faataunuuina e tagata o Ieova, i le galuega talaʻi o le Malo ma le aʻoaʻo atu i le lalolagi atoa. Ae ina ia matuā aogā le lipoti, e ao ona saʻo lo tatou malamalamaga e faatatau i faamaumauga o loo iai, ma se vaaiga paleni e faatatau i fuainumera. Seʻi manatu i ni nai faataʻitaʻiga.

Tausaga faaleauaunaga. E amata tau mai iā Setema seʻia oo atu iā Aokuso o le isi tausaga. O loo iai i le Tusi Tausaga le lipoti o le tausaga faaleauaunaga ua tuanaʻi. O lea la, o loo iai i le Tusi Tausaga o le 2011, le lipoti mo le tausaga faaleauaunaga e 2010, lea na amata mai iā Setema 1, 2009, e oo atu iā Aokuso 31, 2010.

Tumutumuga o le ʻautalaʻi ma le faatatauga o le ʻautalaʻi. E aofia ai i le “ʻAutalaʻi,” Molimau a Ieova ua uma ona papatiso, faapea i latou e leʻi papatiso a ua agavaa e avea ma tagata talaʻi o le Malo. O le “Tumutumuga o le ʻAutalaʻi,” o le numera aupito i maualuga lea na lipotia i se masina o le tausaga faaleauaunaga, ma e ono aofia ai lipoti na tuai ona aumai, ma e leʻi tuuina i le lipoti o le masina ua mavae atu. O lenei auala e ono faitau faalua ai nisi tagata talaʻi. Peitaʻi, e lē o aofia ai i le tumutumuga o le ʻautalaʻi, le numera o i latou na auai i le faiva a ua galo ona tuu atu a latou lipoti i le taimi faatulagaina. Ua faamatilatila mai ai i inei, e tāua tele i tagata talaʻi taʻitoʻatasi ona vave ave a latou lipoti o masina taʻitasi. O le “Faatatauga o le ʻAutalaʻi,” o le aofaʻiga masani lea o tagata e lipoti o latou taimi na auai ai i le faiva i masina taʻitasi.

Aofaʻiga o itula. E tusa ai ma le Tusi Tausaga o le 2011, e silia i le 1.6 piliona itula na faaalu e Molimau a Ieova i le faiva i le fanua. Peitaʻi o lenei aofaʻiga, e lē o tauina ai itula uma o loo faaalu i la tatou tapuaʻiga, auā e lē o aofia ai taimi ia e masani ona tatou faaalu i mea e pei o galuega faaleoleo mamoe, auai i sauniga, ma le faia o suʻesuʻega faale-Tusi Paia a le tagata lava ia ma manatunatu loloto i ai.

Tupe faaalu. I le tausaga faaleauaunaga o le 2010, na faaalu ai e Molimau a Ieova le silia i le $155 miliona, mo le tausia o paeonia faapito, misionare, ma ovasia femalagaaʻi i o latou tofiga i le auaunaga i le fanua. Peitaʻi, e lē o aofia ai i lenei aofaʻiga tupe e faaalu mo le lomiaina o lomiga faale-Tusi Paia; faapea tupe o loo faaalu e tausia ai le silia i le 20,000 o tagata o loo galulue tauofo i Peteli i le lalolagi atoa.

O ē na taumamafa i le faamanatuga. O le aofaʻi lea o tagata papatiso o ē na taumamafa i le areto ma le uaina i le Faamanatuga i le lalolagi aoao. Po o lenei aofaʻiga atoa ua taʻu mai ai le numera o ē faauuina o loo i le lalolagi? E leai. E tele vala o loo aofia ai—o talitonuga faalelotu na iai muamua, po o faalētonu tau i le mafaufau ma faalogona—atonu ua māfua ai ona sesē mafaufau o nisi e faapea ua latou maua le valaaulia faalelagi. E tatou te lē iloa la le aofaʻiga tonu o ē faauuina o loo iai i le lalolagi, ma e lē manaʻomia foʻi ona tatou iloa. E lē teuina e le Vaega Pule se lisi o igoa o tagata uma, e taumamafa i le areto ma le uaina i le Faamanatuga. *

O le mea ua tatou iloa, o le a iai i le lalolagi nisi o le ʻaufaauuina o le “pologa a lo tatou Atua,” i le taimi e tatala mai ai matagi o le faaumatiaga i le puapuaga tele. (Faaa. 7:1-3) Seʻia oo atu i lenā taimi, o le a taʻimua le ʻaufaauuina i se mea o loo faamaumauina lelei i la tatou lipoti o le tausaga faaleauaunaga—o le galuega talaʻi tele ma le aʻoaʻo atu i le talafaasolopito o le fanau a tagata.

[Faaopoopoga i lalo]