“Ou te Faatasi ma Outou”

“E toʻatele e saʻiliʻili solo ma o le a faatuputeleina le poto saʻo.”—TANI. 12:4.

O LE Ā LAU TALI?

O ā auala ua faailoa atu ai “le poto saʻo” i aso nei?

Na faapefea ona ʻfaatoʻateleina’ i latou e taliaina le upu moni?

O ā auala ua “faatuputeleina” ai le poto saʻo?

1, 2. (a) E faapefea ona tatou iloa o loo faatasi Iesu ma ona soo i le taimi nei, faapea foʻi le lumanaʻi? (e) E tusa ai o le Tanielu 12:4, o le ā e iʻu i ai pe afai e suʻesuʻeina ma le māeʻaeʻa le Tusi Paia?

SEʻI faaāta i lou mafaufau o loo e iai i le Parataiso. E te ala fiafia mai i taeao taʻitasi, ma e toʻafilemu lou mafaufau. O le a toe foʻi lou tino i se tulaga lelei, ma e te lē lagonaina se tigā pe maua foʻi i ni maʻi. E te lagona le malosi, e fai fiafia au galuega, e toʻatele au uō, ma e leai ma se mea e te popole ai. O faamanuiaga na o le a e olioli ai i le pulega a le Malo o le Atua. O le a faamanuiaina e Keriso Iesu, le Tupu tofia o lenā malo ona tagatānuu, ma aʻoaʻoina i latou i le poto e uiga iā Ieova.

² A o faia e auauna faamaoni so latou sao i lenā galuega tauaʻoaʻoga, o le a faatasi Ieova ma i latou. Ua faitau senituri o fesoasoani le Atua ma lona Alo i Ana auauna faamaoni, i le aʻoaʻoina o isi. O lea, a o leʻi afio Iesu i le lagi, na ia faamautinoa atu i ona soo faamaoni o le a ia faatasi ma i latou. (Faitau le Mataio 28:19, 20.) Ina ia faamalosia lo tatou faatuatua i lenā faamautinoaga, seʻi o tatou iloiloina se valoaga na tusia i le silia ma le 2,500 tausaga ua mavae. E tusa ai ma “le taimi o le iʻuga,” na tusi le perofeta o Tanielu e faapea: “E toʻatele e saʻiliʻili solo ma o le a faatuputeleina le poto saʻo.” (Tani. 12:4) O le upu Eperu o loo faaliliuina “saʻiliʻili solo,” o lona uiga o se iloiloga māeʻaeʻa. Ua faaalia i le valoaga, o ē e suʻesuʻeina ma le māeʻaeʻa le Tusi Paia, o le a faamanuiaina i le poto saʻo ma o le a taliaina foʻi e le toʻatele. E lē gata i lea, o le a faatuputeleina ma faasalalauina atu, ma aʻoaʻoina e le toʻatele. A o tatou iloiloina pe na faapefea ona faataunuuina lenei valoaga, o le a tatou iloa ai o loo faatasi Iesu ma ona  soo i aso nei, ma o le a faataunuuina e Ieova mea uma na ia folafola mai.

UA FAAILOA MAI “LE POTO SAʻO”

3. O le ā na tupu i “le poto saʻo” ina ua mavae le maliliu o le ʻauaposetolo?

³ Ina ua mavae le maliliu o le ʻauaposetolo, na aliaʻe mai aʻoaʻoga e feteenaʻi ma le upu moni, ma sosolo atu ai e pei o se afi. O lea i senituri mulimuli ane, na natia “le poto saʻo” e oo lava iā i latou na faapea mai o Kerisiano. (Galu. 20:28-30; 2 Tesa. 2:1-3) E ui lava ina faapea mai taʻitaʻi lotu e latou te talitonu i le Tusi Paia, ae o le mea moni o loo latou aʻoaʻoina talapepelo—“aʻoaʻoga a temoni” lea e lē faamamaluina ai le Atua. (1 Timo. 4:1) E lē iloa e le toʻatele le upu moni e faatatau i le Atua, auā ua aʻoaʻoina i latou, o le Atua o le Tolutasi, e ola pea le agaga pe a oti, ma e faapuapuagatiaina nisi o agaga i le afi e faavavau.

4. I tausaga e amata mai le 1870, na faapefea i se vaega o Kerisiano ona amata a latou saʻiliʻiliga mo “le poto saʻo”?

⁴ Peitaʻi, i tausaga e amata mai le 1870, na feiloaʻi ai se vaega toʻaitiiti o Kerisiano i Pennsylvania i le Iunaite Setete o Amerika, ina ia suʻesuʻeina faatasi ma le filigā le Tusi Paia, ma saʻili mo “le poto saʻo.” (2 Timo. 3:1) Na taʻua i latou o Tagata Aʻoga o le Tusi Paia. E lē faatatauina iā i latou nei le fetalaiga a Iesu e uiga i “tagata popoto ma ē e atamamai,” lea sa tatau ona natia mai ai le poto saʻo. (Mata. 11:25) O i latou o ni tagata lotomaulalo, o ē naunau moni e faia le finagalo o le Atua. Na latou faitauina, talanoaina, manatunatu loloto, ma suʻesuʻeina ma le māeʻaeʻa le Tusi Paia faatasi ma le tatalo. Na latou faatusatusa mau o le Tusi Paia, ma iloiloina tusitusiga a isi tagata e faatatau i aʻoaʻoga a le Tusi Paia. Na faasolosolo lava ona malamalama Tagata Aʻoga o le Tusi Paia i upu moni, ua faitau senituri o natia.

5. O le ā sa faaautū atu i ai le faasologa o sāvali na taʻua o le The Old Theology?

⁵ Sa matuā fiafia Tagata Aʻoga o le Tusi Paia i mea sa latou aʻoaʻoina. Peitaʻi, e latou te leʻi faamaualuluga ai ona o lenā poto faatoʻā latou maua; pe manatu foʻi o se mea fou ua latou folafolaina atu. (1 Kori. 8:1) O lea na latou lomia ai se faasologa o sāvali e taʻua o le The Old Theology. O le sini, ia faamasani le ʻaufaitau i upu moni o le Tusi Paia. O le sāvali muamua na “fesoasoani i le suʻesuʻeina o le Tusi Paia, ina ia aveesea atoatoa uputuu a tagata,” ma talia aʻoaʻoga moni a Iesu ma le ʻauaposetolo.—The Old Theology, No. 1, April 1889, p. 32.

6, 7. (a) O ā upu moni ua mafai ona tatou malamalama i ai talu mai le 1870? (e) O ā upu moni e sili ona e fiafia i ai ua e aʻoaʻoina?

⁶ Talu mai le 1870 na tatou aʻoaʻoina ai le tele o upu moni tautele. * Ua lē na o se aʻoaʻoga, ae o ni upu moni e faafiafiaina ma faasaʻolotoina ai, e aogā moni i o tatou olaga, ma faatumulia ai i tatou i le olioli ma le faamoemoe. E fesoasoani iā i tatou ina ia iloa lelei Ieova, o ona uiga alofa, ma ana fuafuaga. Ua faamanino mai ai le matafaioi a Iesu, le māfuaaga na afio mai ai i le lalolagi ma le māfuaaga na maliu ai, faapea lona tulaga i le taimi nei. Ua faaalia i nei upu moni tautele le māfuaaga ua lē taofia ai e le Atua le amioleaga, le pogai ua tatou feoti ai, le auala e tatau ona tatou tatalo ai, ma e faapefea ona tatou maua le fiafia moni.

 ⁷ Ua tatou malamalama nei i le uiga o valoaga sa “punitia” mo le faitau afe o tausaga, lea ua faataunuuina i le taimi o le iʻuga. (Tani. 12:9) O le tele o nei valoaga o loo i tusi o Evagelia ma le tusi o Faaaliga. Ua fesoasoani mai Ieova iā i tatou ina ia malamalama i mea ua tutupu i le lagi, e lē mafai ona tatou vaaia, e pei o le nofotupu o Iesu, o le taua i le lagi, ma le lafoina mai o Satani i le lalolagi. (Faaa. 12:7-12) Ua faamalamalama mai foʻi e le Atua iā i tatou le uiga o mea o loo tatou vaaia, e pei o taua, mafuiʻe, faamaʻi ma oge. Ae lē gata i lea, o le māfuaaga ua faia ai e tagata mea leaga, ma ua atili ai ona leaga nei aso “e sili ona faigatā.”—2 Timo. 3:1-5; Luka 21:10, 11.

8. O ai ua faailoa mai iā i tatou le upu moni?

⁸ E faigofie ona tatou malamalama i le fetalaiga a Iesu i ona soo: “E fiafia o ē ua vāai o latou mata i mea ua outou vāai i ai. Auā ou te fai atu iā te outou, e toʻatele perofeta ma tupu na fia vāai i mea ua outou vaavaai i ai, ae e leʻi mafai ona vāai i ai i latou. E fia faalogo foʻi i latou i mea ua outou faalogo i ai, ae e latou te leʻi lagonaina.” (Luka 10:23, 24) E tatou te avatu le viiga iā Ieova, ona ua tatou “vāai” ma “faalogo,” o lona uiga, ua tatou malamalama i le upu moni. E tatou te lotofaafetai foʻi ona o le auina mai o “le fesoasoani,” le agaga paia, ina ia tatou malamalama atoatoa ai i le upu moni. (Faitau le Ioane 16:7, 13.) Tau ina ia tatou faatāuaina pea le poto saʻo, ma tufa atu i isi ma le lē manatu faapito!

UA TALIAINA E LE ʻTOʻATELE LE POTO SAʻO’

9. O le ā le valaaulia na aumaia i le Watch Tower o Aperila 1881?

⁹ I le Watch Tower o Aperila 1881, na iai se mataupu na faamatuaina “Manaʻomia ni Tagata Talaʻi se Toʻa 1,000.” Na valaaulia ai i latou e mafai ona faaaluina le tele o lo latou taimi i le galuega talaʻi, ina ia avea ma paeonia. Na talosagaina i latou ina ia ō atu e saʻili ē e alolofa i le Atua ae e lē o iloa le poto saʻo, ina ia mafai ona aʻoaʻoina i latou e faatatau i le Atua ma le Tusi Paia.

10. Na faapefea ona tali atu tagata i le valaaulia mo ni tagata talaʻi faataimi atoa?

¹⁰ O lenā valaaulia na faailoa mai ai, sa malamalama Tagata Aʻoga o le Tusi Paia, e tatau i Kerisiano moni ona talaʻia le tala lelei. Peitaʻi sa lē mautinoa pe mafai ona maua ni tagata talaʻi se toʻa 1,000, talu ai e lē toʻatele nisi sa auai i sauniga a Tagata Aʻoga o le Tusi Paia i na taimi. Ae na vave ona tali atu le toʻatele i le valaaulia, pe a māeʻa ona faitauina se sāvali po o se mekasini, ma malamalama ai i le upu moni. O se faaaʻoaʻoga, i le 1882, ina ua māeʻa ona faitauina e se tagata mai Lonetona se lomiga o le Watch Tower, ma se tamaʻitusi na lomia e Tagata Aʻoga o le Tusi Paia, ona ia faapea mai lea: “Faamolemole ia faailoa mai iā te aʻu le auala ma mea e tatau ona ou talaʻia, ina ia mafai ai ona faataunuuina le galuega mamalu a le Atua o loo ia finagalo e fai.”

11, 12. (a) O le ā le sini e tutusa ai i tatou ma paeonia i aso ua mavae? (e) Na faapefea ona faavaeina “vasega,” po o faapotopotoga?

¹¹ E oo ane i le 1885, pe ā ma le 300 Tagata Aʻoga o le Tusi Paia ua auai i le galuega talaʻi faataimi atoa. E tutusa lava o tatou sini ma i latou, o le faia lea o tagata ma soo o Iesu Keriso, peitaʻi, e ese le auala o loo tatou faaaogāina. I aso nei, e tatou te suʻesuʻeina le Tusi Paia ma tagata taʻitoʻatasi, ona valaaulia lea o tagata suʻesuʻe ina ia auai mai  i sauniga. I aso ua mavae, e suʻesuʻe paeonia ma se vaega o tagata na latou tufaina i ai tusi, ona valaaulia lea o i latou e potopoto faatasi, ma faavaeina ai “vasega,” po o faapotopotoga.

¹² O se faataʻitaʻiga i le 1907, na ō atu ai ni paeonia i se tasi aai, e saʻilia i latou ua iai kopi o le Studies in the Scriptures. Na taʻua i le Watch Tower: “Na faapotopoto ē na faaalia le fiafia mo se faatasiga i se tasi o fale. I se tasi Aso Sa, na lauga ai se paeonia mo le aso atoa e faatatau i le fuafuaga a le Atua mo tagata. I le Aso Sa na sosoo ai, na ia faalaeiauina i latou ia faia e lē aunoa sauniga.” I le 1911, na toe faia ai e uso ni fetuutuunaʻiga i le auala e faapotopoto ai tagata fiafia. E lima sefulu valu uso femalagaaʻi na faia lauga lautele, i le Iunaite Setete ma Kanata. E latou te faamauina igoa ma mea e nonofo ai tagata fiafia na faalogologo i lauga lautele, ona faia lea o fuafuaga ina ia faapotopoto faatasi i fale o aiga, e amata ai ni “vasega” fou. E oo ane i le 1914, ua 1,200 faapotopotoga o Tagata Aʻoga o le Tusi Paia i le lalolagi aoao.

13. Aiseā e mataʻina ai le galuega talaʻi i aso nei?

¹³ I aso nei, ua pe a ma le 109,400 faapotopotoga i le lalolagi aoao, ma pe tusa ma le 895,800 uso ma tuafāfine o loo auauna o ni paeonia. Ua toetoe valu miliona tagata ua taliaina “le poto saʻo,” ma faatatauina i o latou olaga. (Faitau le Isaia 60:22.) * E mataʻina lea tulaga, talu ai na valoia e Iesu o le a ʻinosia ona soo e tagata uma,’ ona o lona suafa. Na ia faapea atili mai, o le a sauāina, faafalepuipuiina, ma fasiotia i latou. (Luka 21:12-17) E ui lava i teteega mai iā Satani, ana temoni, ma tagata, ae o loo faaauau pea ona faia lo latou tofiga, ma maua le olioli i le taulau manuia i le faia o tagata ma soo. I aso nei, o loo latou talaʻi i le “lalolagi atoa,” mai i atunuu vevela e oo atu i atunuu malūlū, i atumauga, toafa, aai, ma nofoaga maotua. (Mata. 24:14) Pe ana lē seanoa le lagolagosua a Ieova, semanū e lē mafai ona faataunuuina lenei tofiga.

UA “FAATUPUTELEINA LE POTO SAʻO”

14. Ua faapefea ona faalauiloa atu i le lautele “le poto saʻo,” e ala i lomiga?

¹⁴ Ua faatuputeleina “le poto saʻo” ona o le toʻatele o ē ua folafolaina atu le tala lelei, faapea foʻi lomiga, e pei o tusi ma mekasini. Iā Iulai 1879, na lomia ai e Tagata Aʻoga o le Tusi Paia le uluaʻi lomiga o le Watchtower, lea sa faaigoaina o le Zion’s Watch Tower and Herald of Christ’s Presence. E 6,000 kopi sa lomia i le gagana faa-Peretania i se pisinisi  e lomia tusi. Sa filifilia Charles Taze Russell, a o lua sefulu fitu ona tausaga e avea ma faatonu, ae fesoasoani i ai isi uso taʻumatuaina e toʻalima, i le tusiaina o nisi o mataupu. Ua lomia nei Le Olomatamata i gagana e 195. Ua silia ma le 42,182,000 kopi mo lomiga taʻitasi ua tufatufaina atu i le lalolagi. O lenei foʻi lomiga ua sili atu lona tufatufaina i le lalolagi, nai lo o se isi lava mekasini. E sosoo atu ai ma lona soa o le Ala Mai!, lea ua tufatufaina atu ona kopi e 41,042,000 i gagana e 84. E lē gata i lea, e pe ā ma le 100 miliona tusi ma Tusi Paia e lomia i tausaga taʻitasi.

15. O le ā le auala o loo faatupe ai le lomiaina o a tatou lomiga?

¹⁵ O loo faatupeina lenei galuega tele i foaʻi tauofo. (Faitau le Mataio 10:8.) O lenā tulaga ua matuā maofa ai i latou o loo iai i pisinisi e lomiaina tusi, o ē malamalama i le tau o masini lomitusi, pepa, vaitusi, ma isi mea e manaʻomia. Na taʻua e se tasi uso e faatauina mea e manaʻomia mo fale lomitusi i Peteli: “E matuā maofa tagata faipisinisi pe a asiasi mai i a tatou fale lomitusi, ma iloa ai e mafai ona faatupeina e ala i foaʻi tauofo, le tele o lomiga ua lomiaina i nei masini ua maoaʻe lona faatōtōgaina i tomai faaonapōnei. E latou te maofa foʻi, ona o tagata o loo galulue i le Peteli, e talavou toe fiafia.”

O LE A FAATUMUINA LE LALOLAGI I LE POTO E FAATATAU I LE ATUA

16. O le ā le fuafuaga mo le faailoaina atu o “le poto saʻo”?

¹⁶ E iai se fuafuaga tāua ua faatuputeleina ai “le poto saʻo.” O le finagalo o le Atua, “ina ia faaolaina ituaiga uma o tagata, ma ia maua le poto saʻo i le upu moni.” (1 Timo. 2:3, 4) E finagalo Ieova ia iloa e tagata le upu moni, ia tapuaʻi atu iā te ia i le auala talafeagai, ma maua ai lana faamanuiaga. E ala i le galuega talaʻi, ua aoaoina ai e Ieova Kerisiano faamaoni ua faauuina i le agaga. Ua ia aoaoina mai foʻi ʻi atunuu uma, ma ituaiga, ma nuu, ma gagana, se motu o tagata e toʻatele,’ o ē e iai le faamoemoe o le ola e faavavau i le lalolagi.—Faaa. 7:9.

17. O le ā ua faamaonia mai i le faatuputeleina o le tapuaʻiga moni?

¹⁷ O le faatuputeleina o le tapuaʻiga moni mai i le 130 tausaga ua mavae, ua faamaonia ai o loo faatasi mai pea le Atua ma lana Tupu tofia, o Iesu Keriso, i Ana auauna i le lalolagi e ala i le taʻitaʻia, puipuia, faamaopoopo, ma aʻoaʻoina o i latou. O le faatuputupulaʻia foʻi o lo latou fuainumera, ua faamatilatila mai ai le faamautinoaga, o le a faataunuuina folafolaga a Ieova e faatatau i le lumanaʻi. “O le a tumu le lalolagi i le poto e uiga iā Ieova e pei ona ufitia o le ilititai i le suāsami.” (Isa. 11:9) Maʻeu le tele o faamanuiaga o le a mauaina e le fanau a tagata!

[Faaopoopoga i lalo]

[Fesili mo le Suʻesuʻega]

[Ata i le itulau 6]

O uluaʻi Tagata Aʻoga o le Tusi Paia, e lotomaulalo ma naunau moni e faia le finagalo o le Atua

[Ata i le itulau 7]

E faatāuaina e Ieova au taumafaiga, i le faalauiloaina o “le poto saʻo”