Na faateʻia ni paeonia se toʻalua na faaulufale i se aiga i Kenya, ina ua la vaaia se tamāloa tino laʻitiiti o loo taoto i lona moega. E pupuu ona lima faapea lona tino, mai i le fatafata agaʻi i le puimanava. Na tali mai ma le fiafia le tamāloa, a o latou fetufaaʻi i le folafolaga a le Atua, ʻo le a osooso lē ua pipili e pei o le ʻaila.’​—Isa. 35:6.

Na iloa e nei paeonia na fanau mai lava Onesmus, ma le maʻi o le osteogenesis imperfecta, po o le faigofie ona faaleagaina o ona ponaivi. Ua toeitiiti atoa le 40 ona tausaga i le taimi nei. O lenei maʻi, e leai se vaifofō po o se togafiti. O lea, na manatu ai Onesmus o le a ia lagonaina pea le tigā ma nofo pea i lona nofoa faataavalevale.

Na talia e Onesmus se suʻesuʻega faale-Tusi Paia. Peitaʻi, e leʻi manaʻo lona tinā e auai o ia i sauniga, ona sa ia manatu e ono afāina ai o ia ma faaopoopo ai nisi tigā. O lea, na puʻeina ai e uso sauniga, ona ave lea e faalogologo ai Onesmus i le fale. Na filifili Onesmus e auai i sauniga e ui i lamatiaga, ina ua māeʻa le lima masina o fai lana suʻesuʻega.

Pe na faaopoopo nisi tigā iā Onesmus ona o le auai i sauniga? Na ia faapea mai: “Na foliga mai na faaitiitia tigā a o oʻu auai i sauniga.” Na ia manatu, o lona iloaina o le faamoemoe sa avea ma mea na toʻafilemu ai. Na mātauina e lona tinā le suiga i ona uiga, ma ia talia ai se suʻesuʻega faale-Tusi Paia. Na taʻua e lona tinā: “O le auauna i le Atua na avea ma vaifofō iā te ia.”

E leʻi umi ae avea Onesmus ma tagata talaʻi e leʻi papatiso. Mulimuli ane, na papatiso o ia ma ua avea nei o se auauna o le faiva. E ui e lē mafai ona savali ma e tasi lona lima o loo faaaogā, ae ua naunau o ia e faia le mea sili i le auaunaga iā Ieova. Sa manaʻo o ia e paeonia lagolago, ae sa faigatā ona sa ia iloa o le a ia faalagolago i isi e tuleia lona nofoa faataavalevale. Na ia faailoa atu i uso lona popolega, ma na fiafia uso e fesoasoani iā te ia ina ia mafai ai ona paeonia lagolago.

Na ia lagona foʻi le popole, ina ua ia manaʻo e paeonia sauatoa. Peitaʻi i se tasi taimi, na faalaeiauina ai o ia i le iloiloina o le mau o le aso, lea na ia faitau ai i le Salamo 34:8 e faapea: “Inā outou tofotofo ia ma iloa ai e lelei Ieova.” Ina ua uma ona manatunatu loloto i ai, ona ia filifili loa lea e paeonia sauatoa. E fā aso o le vaiaso e talaʻi ai o ia, ma o loo agaʻigaʻi i luma faaleagaga nisi o ana tagata aʻoga. I le 2010, na ia auai ai i le Aʻoga mo le Auaunaga Paeonia. Maʻeu lona fiafia ina ua ia iloaina, o lē na faia le aʻoga paeonia o se tasi o uso e toʻalua na muaʻi asiasi iā te ia!

Ua maliliu mātua o Onesmus, ae o loo tausia e uso ma tuafāfine ona manaʻoga i aso taʻitasi. Ua ia matuā talisapaia faamanuiaga uma ua ia mauaina, ma tulimataʻia le aso “e lē fai mai [ai] foʻi se tasi ua nofo ai: ʻOu te maʻi.’”​—Isa. 33:24.