UA FAAPEA mai François, o se toeaina i se atunuu tau atiaʻe: “Na faafuaseʻi ona tulaʻi mai se fevesiaʻiga ina ua māeʻa se faigāpalota, ona o le lē fiafia o le itu na faiaʻina. O lenei mea na faamalosia ai le faitau afe o Molimau a Ieova ina ia tuua o latou fale. E leʻi lava meaʻai ma vailaau mo le soifua mālōlōina, ma sa matuā taugatā lava mea na totoe. Na tapunia faletupe ma na pepē uma masini tala tupe.”

Na vave gaoioi uso mai i le lālā, e tufatufa atu tupe ma mea manaʻomia e tausia ai uso ma tuafāfine na tuua o latou fale, ma faapotopoto i Maota mo Sauniga i vaega eseese o le atunuu. Na faia ni poloka i le auala, ae talu ai na iloa e itu e lua na tauvā i le palota le solitū o Molimau a Ieova, na faatagaina ai taavale a le lālā ina ia pāsia le isi itu auala.

Ua faapea mai François: “A o agaʻi atu i se Maota mo Sauniga, na tafana mai e tagata le taavale ae matou te leʻi afāina ai. Na vave ona faasolomuli le taavale ma faanatinati atu i le lālā, ina ua iloa atu se fitafita o loo tamoʻe mai ma se auupega. E faafetaia Ieova ona na matou feola uma. Na taunuu manuia i le aso na sosoo ai uso e 130 mai i lenā Maota mo Sauniga, i se nofoaga saogalemu. O nisi na faamautū i le lālā ma tausia ai o latou manaʻoga faaletino ma le faaleagaga, seʻia oo ina māeʻa le fevesiaʻiga.”

Na ia faapea atili mai: “Na maua e le lālā le tele o tusi mai uso i le atunuu, e faailoa mai ai lo latou lotofaafetai. Sa latou matuā faatuatuaina Ieova ona o le fesoasoani a uso iā i latou.”

Pe a tulaʻi mai mala faalenatura ma isi faalavelave, e lē lava le tau ina faapea atu i uso ma tuafāfine o loo mafatia, “ia māfanafana ma ia maoona.” (Iako. 2:15, 16) Nai lo lea, ia saʻilia avanoa e fesoasoani atu ai i o latou manaʻoga faaletino. I se tulaga talitutusa, ina ua maua se lapataʻiga i se oge i le uluaʻi senituri, “ona filifili ai lea o le ʻauuso e aauina atu se fesoasoani i uso o loo nonofo i Iutaia, e tusa ma le mea ua mafai e le tagata.”​—Galu. 11:28-30.

E tatou te naunau e fesoasoani i manaʻoga faaletino o isi, ona o i tatou o auauna a Ieova. Peitaʻi, e iai foʻi o latou manaʻoga faaleagaga. (Mata. 5:3) Ina ia iloa e tagata o latou manaʻoga faaleagaga ma le auala e faamalieina ai, na tuuina mai ai e Iesu le faatonuga ina ia faia isi ma soo. (Mata. 28:19, 20) E tatou te ofoina atu le tele o le taimi, malosi ma meafaitino ina ia faataunuu ai lenā tofiga. E faaaogā e le faalapotopotoga se vaegātupe o foaʻi tauofo, e fesoasoani ai i manaʻoga faaletino o isi. Peitaʻi, e tele ina faaaogā foaʻi e faaauiluma ai le galuega talaʻi ma manaʻoga o le Malo, e faailoa atu ai lo tatou alolofa i le Atua ma tuaoi.​—Mata. 22:37-39.

E mautinoa e i latou o loo lagolagosua i le galuega a Molimau a Ieova i le lalolagi aoao, o loo faaaogā tatau a latou foaʻi. Pe e mafai ona e fesoasoani i manaʻoga faaletino o le ʻauuso? Pe e te naunau e lagolagosua i le galuega o le faia ma soo? Pe afai o lea, “aua e te taofia se mea lelei mai i ē ua tatau i ai, pe a mafai ona e faia.”​—Faata. 3:27.