O LE tausaga lenei e atoa ai le 100 tausaga talu ona faaali le “Photo-Drama of Creation,” o se ata na atiaʻe ai le faatuatua i le Tusi Paia, o le Afioga lea a le Atua. I lenā vaitaimi sa taatele ai le talitonuga o le evolusione, faitioga e faatatau i le Tusi Paia, ma fesiligia le moni o le Tusi Paia, lea sa faavaatuʻia ai le faatuatua o le toʻatele. O lea na faalauiloa ai i le “Photo-Drama,” o Ieova o Lē na Foafoaina mea.

Na faaauau ona saʻilia e Charles T. Russell, o lē na taʻimua i Tagata Aʻoga o le Tusi Paia, ni auala e vave ma sili ona aogā e faasalalau atu ai upu moni o le Tusi Paia. E silia i le 30 tausaga o faaaogā e Tagata Aʻoga o le Tusi Paia lomiga, peitaʻi i lenā taimi, na latou iloaina ai o ata tifaga o se auala fou e mafai ona latou faaaogāina.

I vaitausaga o le 1890, na amata ai ona faalauiloa i le lautele ata tifaga e leai se leo. I le 1903, na faaalia ai se ata lotu i se falesā i le aai o Niu Ioka. E leʻi leva ona amata faatutū pisinisi fai ata tifaga, ae amata loa ona fuafuaina e Russell i le 1912, le faia o le “Photo Drama.” Na ia iloa e ese mai i lomiga, o lenei auala o fesootaʻiga o se isi lea auala e mafai ona faalauiloa atu ai upu moni o le Tusi Paia.

E valu itula e faaalia ai le “Photo-Drama” i ona vaega e fā. E 96 lauga pupuu faale-Tusi Paia sa faamatalaina ma puʻeina i records, sa faaaogā ai le leo o se tagata sa lauiloa lona leo i lenā vaitaimi. Sa faaaogā ai foʻi musika sa lauiloa i lenā taimi i le tele o vaaiga. Sa aʻoaʻoina foʻi tagata i le faaaogāina o masini e faaali ai le “Photo-Drama.” E latou te tāina musika ma lauga ua uma ona puʻeina i records i se laau pese ina ia tutusa ma vaaiga taʻitasi o le ata, ae na iai foʻi ma ata gaoioi o loo toe faaāta mai ai tala faale-Tusi Paia.

O le tele o slides ma ata e gaoioi na faatauina mai i pisinisi e fai ai ata tifaga. Na valivali e ni tagata tusiata tomai mai i Philadephia, Niu Ioka, Pale ma Lonetona ni ata slides ma ata e gaoioi. E tele foʻi ata valivali sa faia e nisi o le Matagaluega Tusiata i le Peteli, ma toe sui foʻi ni slides na faaleagaina. Sa  puʻeina foʻi ata o sui o le aiga Peteli i Yonkers i Niu Ioka, a o latou faatinoina le tala iā Aperaamo ma Isaako, ma le agelu o loo taofia Aperaamo mai i le faia o le taulaga i lona atalii.​—Kene. 22:9-12.

Na taʻua e se aumea a Russell, o lenei auala o fesootaʻiga, “o le a naunau ai le faitau afe o tagata i le Tusi Paia, e sili atu i lo o se isi lava auala na faaaogā i taimi ua mavae e faalautele atu ai le tapuaʻiga.” Pe na talisapaia e taʻitaʻi lotu lenā metotia fou, ina ia fafaga ai le toʻatele o tagata o loo oge faaleagaga? E leʻi taliaina e le toʻatele o taʻitaʻi lotu le “Photo-Drama.” Na oo lava ina faaaogā e nisi togafiti eseese e taofia ai le lautele mai i le matamata i ai. I se tasi o fale na faaali ai le ata, na faatonu ai e taʻitaʻi lotu se tasi e tapē le eletise.

E ui i lea, sa lolofi atu tagata i fale tifaga e matamata i le “Photo-Drama” e aunoa ma se totogi. E silia i le 80 aai i le Iunaite Setete na faaali ai le “Photo-Drama” i aso taʻitasi. Sa maofa le toʻatele ina ua vāai ʻi se ata e iai le leo’ mo le uluaʻi taimi. Na latou matamata i se ata o loo faaali mai ai le faasologa o se mea o loo tupu, e pei o se fugālaau o loo faasolo ina mātala, ma se fuāmoa ua amata ona fofoa. O lo latou malamalamaga faasaienitisi sa iai, sa faamatilatila ai le mataʻina o le atamai o Ieova. E pei ona taʻua i le amataga, na manatu se tasi o tagata matamata e pei lava o loo tū mai i ona luma le uso o Russell pe a ia matamata i le ata, a o faatomua mai e Russell le “Photo-Drama.”

Na faamatalaina e Tim Dirks, o se tusitala ma o se tagata e suʻesuʻeina talafaasolopito o ata tifaga e faapea, o le “Photo-Drama” o le “ata muamua lea o loo faaalia ai ata e gaoioi ma slides, ma e tutusa lelei le leo ma le taimi e faaali ai ata e gaoioi ma slides.” Na faaaogā muamua e nisi ata tifaga a o leʻi faia le “Photo-Drama” nisi o nei metotia, peitaʻi e latou te leʻi faaaogā uma nei metotia i se ata tifaga, aemaise se ata faale-Tusi Paia. Pe a faatusatusa i isi ata na faaalia muamua, e sili atu ona toʻatele tagata na matamata i le “Photo-Drama,” lea e pe ā ma le iva miliona tagata mai i Amerika i Mātū, Europa, Ausetalia ma Niu Sila, na matamata ai a o faagasolo le uluaʻi tausaga.

O le uluaʻi faaaliga o le “Photo-Drama” na faia iā Ianuari 11, 1914 i Niu Ioka. Ina ua mavae le fitu masina ae gāpā loa le Taua Muamua o le Lalolagi. Peitaʻi, sa faaauau ona faapotopoto le toʻatele o tagata i le lalolagi aoao e matamata i le “Photo-Drama,” lea sa faalaeiauina ai i latou mai i vaaiga mataʻina e faatatau i faamanuiaga o le a aumaia e le Malo. O le 1914 sa avea ai le “Photo-Drama” ma ata mataʻina.