O LOO faamatalaina i le Tusi Paia le tele o tulaga e saeia ai e se tagata ona ofu. Atonu e ese i le faalogo a tagata i aso nei lenā manatu. Peitaʻi, o se gaoioiga na faia e tagata Iutaia e faailoa ai lo latou matuā mafatia, māsiasi, ita pe faavauvau.

O se faaaʻoaʻoga, na ʻsaeia e Reupena ona ofu’ ina ua lē taulau lana fuafuaga e laveaʻi lona uso o Iosefa, ona ua faatau atu e ona uso e fai ma pologa. Sa ʻsaei e Iakopo ona ofu,’ ina ua manatu ua ʻaina e manufeʻai lona atalii o Iosefa. (Kene. 37:18-35) Na ʻsaei e Iopu lona ofu’ ina ua taʻu atu i ai ua maliliu uma lana fanau. (Iopu 1:18-20) Na tulaʻi se avefeʻau “ua saeia ona ofu,” i luma o le Ositaulaga Sili o Eli, e faamatala atu le faatoʻilaloina o tagata Isaraelu i le taua, le fasiotia o atalii e toʻalua o Eli, ma le faoa o le atolaau o le feagaiga. (1 Samu. 4:12-17) Ina ua faalogo Iosia i le Tulafono na faitauina i ona luma, “ona ia saeia loa lea o ona ofu,” ina ua ia iloa mea sesē na faia e ona tagata.​—2 Tu. 22:8-13.

I le faamasinoga o Iesu, na ʻsaeia ai e le Ositaulaga Sili o Kaiafa ona ofu tele,’ ona na sesē lona manatu e faapea ua upuleaga Iesu i le Atua. (Mata. 26:59-66) E tusa ai o le tū masani a taʻitaʻi lotu Iutaia, e tatau ona saeia ofu o so o se tasi e faalogo ua upuleagaina le suafa o le Atua. O se isi manatu faa-Iutaia na iai ina ua mavae le faaumatiaga o le malumalu i Ierusalema, e faapea “e lē manaʻomia ona saeia ofu o so se tasi na faalogo ua upuleagaina le Suafa o le Atua, ina neʻi masaesae uma ona ofu.”

E leʻi tāua i le silafaga a le Atua le saeia e se tasi o ona ofu, seʻi vaganā na mafatia moni lenā tagata. O lea, na fetalai ai Ieova i ona tagata, ʻia saeia o latou loto, ae lē o o latou ofu, ma ia toe foʻi mai iā te ia.’​—Ioe. 2:13.