E leai se mau o le Tusi Paia o faapea mai ai e lē tatau ona susunuina le tino maliu o se tagata.

O loo iai tala faale-Tusi Paia e faatatau i tagata na susunuina o latou tino oti po o ponaivi. (Iosua 7:25; 2 No. 34:4, 5) O lenā faiga atonu e faaalia ai, e leʻi talafeagai ona maua e na tagata se falelauasiga aloaʻia. Peitaʻi, e lē faapea o taimi uma e susunu ai tino oti o tagata, ona faapea ai e lē tāua na tagata.

E faamaonia lenā manatu i le tala e uiga i le maliu o le tupu o Saulo ma ona atalii e toʻatolu, lea na fasiotia i le taua ma le ʻau a Filisitia. O se tasi o ona atalii o Ionatana, o le uō lelei a Tavita ma o sē sa lagolagosua ma le faamaoni iā Tavita. Ina ua logotala tagata Isaraelu lototetele sa nonofo i Iapese-kiliata e faatatau i le mea na tupu, ona latou saʻili lea o tino oti o Saulo ma ona atalii. Sa latou susunuina na tino oti, ona tanumia lea o o latou ponaivi. Mulimuli ane, na viiviia e Tavita na tagata Isaraelu ona o le gaoioiga na latou faia.​—1 Samu. 31:2, 8-13; 2 Samu. 2:4-6.

O loo taʻua i le Tusi Paia le faamoemoe o le toetū mo ē ua maliliu, lea o le a toe faafoʻisia ai e le Atua le ola o le tagata. E tusa pe susunuina le tino oti o se tagata pe e leai, ae e faigofie ona toe faafoʻisia e Ieova le ola o se tagata i se tino fou. Na faatonu e le tupu o Nepukanesa le susunuina o talavou Eperu faamaoni e toʻatolu i le ogaumu aasa. Peitaʻi, sa lē manaʻomia ona latou atuatuvale ai e faapea, o le a lē mafai e le Atua ona toe faatutūina mai i latou. (Tani. 3:16-18) E faapena foʻi le tulaga na fesagaʻia ma auauna faamaoni a Ieova, ia na fasiotia ma susunuina o latou tino i nofoaga o faasalaga a le ʻau Nasi. E toʻatele auauna faamaoni a le Atua na feoti i ni auala eseese, e pei ina ua pāpā ni pomu, ma e leai se vaega o o latou tino na totoe. E ui i lea, e mautinoa o le a toe faatutūina uma mai i latou.​—Faaa. 20:13.

E lē tau manaʻomia ona aoaoina mai e Ieova vaega o le tino oti o se tagata, ina ia mafai ai ona toe faatūina mai lenā tagata. E faaalia lenā pe a toe faatūina e le Atua Kerisiano faauuina e ola i le lagi. I le pei o Iesu o lē “na toe faaola mai i le agaga,” o le a toe faatutūina mai Kerisiano faauuina i tino agaga. Peitaʻi, o le a tumau pea o latou manatu ma faalogona, ma latou manatua pea mea na tutupu iā i latou a o soifua i le lalolagi. E lē faatutūina i latou i le lagi i tino faaletino sa iai.​—1 Pete. 3:18; 1 Kori. 15:42-53; 1 Ioa. 3:2.

O lo tatou faamoemoe i le toetū, e faavae i le faatuatua e faapea e mafai, ma e naunau Ieova e faataunuu ana folafolaga, e tusa po o le ā le mea e tupu i le tino oti o se tagata. (Galu. 24:15) E tatou te lē malamalama atoatoa i le auala na toe faatūina faavavega ai e le Atua tagata i aso ua mavae, po o le auala o le a ia faia ai foʻi faapea i le lumanaʻi. Peitaʻi, e tatou te maufaatuatuaina Ieova. Ua ia saunia “se faamaoniga” e ala i le toe faatūina mai o Iesu.​—Galu. 17:31; Luka 24:2, 3.

E ao i Kerisiano ona tilofaʻia ma le faaeteete aiāiga faaletulafono, le vaaiga masani ma manatu o tagata i o latou vaipanoa, e faatatau i le mea e fai i tino oti o tagata. (2 Kori. 6:3, 4) O lea, o le susunuina o le tino maliu o se tagata pe e leai, o le filifiliga lenā a le tagata lava ia po o lona aiga.