1, 2. (a) O ā talafaatusa na faamatala atu e Iesu i ana aumea vavalalata? (Tagaʻi i le ata i luga aʻe o le matua.) (e) O le ā e manaʻomia ona tatou iloa e faatatau i le talafaatusa i mamoe ma ʻoti?

SA TALANOA atu Iesu i ana aumea vavalalata o Peteru, Aneterea, Iakopo ma Ioane. Sa latou faalogo a o ia faamatala atu iā i latou talafaatusa e faatatau i le pologa faamaoni ma le faautauta, o taupou e toʻasefulu faatasi ai ma taleni. Na faaiʻu e Iesu le talanoaga i se isi talafaatusa. Na ia faamatalaina le taimi o le a faamasino ai e le “Atalii o le tagata” “atunuu uma.” O lenei talafaatusa na faaosofia ai le naunau fia iloa o le ʻausoo. Sa uaʻi atu Iesu i ni vaega se lua, o le isi vaega o mamoe a o le isi o ʻoti. Ae na ia faamatilatila le tāua o le vaega lona tolu, lea na ia taʻua o “uso” o le “tupu.”​—Faitau le Mataio 25:31-46.

² Ua loa tausaga o naunau tagata o Ieova i lenei talafaatusa, auā na fetalai Iesu i mea o le a tutupu i tagata. Na ia faailoa mai le māfuaaga e maua ai e isi le ola e faavavau, ae maua e isi le faaumatiaga e faavavau. E faalagolago o tatou ola i le malamalama ma gaoioi e ōgatusa ma upu moni na faailoa mai e Iesu. O lea, e tāua ai ona tatou fesili: Ua faapefea ona faasolosolo ona fetuunaʻi e Ieova lo tatou malamalamaga i lenei talafaatusa?  Aiseā e tatou te faapea atu ai o lenei talafaatusa ua faamatilatila mai ai le tāua o le galuega talaʻi? O ai ua tuuina mai i ai le faatinoina o le galuega talaʻi? Aiseā e tāua ai i le taimi lenei ona tatou faamaoni i le “tupu” ma i latou ua taʻua o ona “uso”?

3, 4. (a) O ā vala tāua o le talafaatusa i mamoe ma ʻoti e tatau ona tatou malamalama i ai? (e) Na faapefea ona faamatalaina lenei talafaatusa i le Zion’s Watch Tower o le 1881?

³ Ina ia tatou maua le malamalamaga saʻo i le talafaatusa i mamoe maʻoti, e manaʻomia ona tatou malamalama muamua i vala tāua nei: o ai e faasino atu ai i latou o loo taʻua i le tala, o le taimi e faia ai le faamasinoga, ma le māfuaaga e faavasega ai isi o ni mamoe, a o nisi o ʻoti.

⁴ I le 1881 na taʻua ai i le Zion’s Watch Tower o le “Atalii o le tagata” po o le “tupu” e faasino iā Iesu. Na malamalama uluaʻi Tagata Aʻoga o le Tusi Paia i le faaupuga “uso” o loo taʻua i le faaliliuga a le King James Version, e faasino atu iā i latou o le a pule faatasi ma Keriso, faapea le fanau a tagata pe a latou maua le tulaga lelei atoatoa i le lalolagi. Na latou manatu o le tuueseeseina o mamoe ma ʻoti e faia a o faagasolo le Pulega a Keriso i le Afe Tausaga. Na latou manatu foʻi e māfua ona faavasegaina tagata o ni mamoe ona o lo latou tausia o le tulafono a le Atua o le faaalia o le alofa.

5. Na faapefea ona fetuunaʻi lo tatou malamalamaga i vaitausaga o le 1920?

⁵ I le amataga o vaitausaga o le 1920, na fesoasoani ai Ieova i ona tagata e toe fetuunaʻi lo tatou malamalamaga i lenei talafaatusa. I le Watch Tower o Oketopa 15, 1923, na faailoa mai ai o Iesu le “Atalii o le tagata.” Peitaʻi, na aumaia ai foʻi māfuaaga faale-Tusi Paia na faailoa mai ai o uso o Keriso e faasino atu iā i latou o le a latou pule faatasi i le lagi, ma na faamatalaina mamoe o i latou ia o le a ola i le lalolagi i lalo o le pulega a le Malo o Keriso. O le ā le taimi e tuueseese ai mamoe ma ʻoti? Na taʻua i lenā mataupu o le a pule mai Keriso ma ona uso i le lagi a o faagasolo le Pulega i le Meleniuma, e lē mafai la ona agaleaga pe e fesoasoani le vaega i le lalolagi iā i latou. O lea la, e tuueseeseina mamoe ma ʻoti a o leʻi amataina le Pulega i le Meleniuma. Na taʻua i lenā mataupu o le māfuaaga e faamasinoina ai se tasi o se mamoe, ona o lona iloaina o Iesu o lona Alii, ma e talitonu e mafai e le Malo ona faaleleia mea uma.

6. Na faapefea ona fetuunaʻi lo tatou malamalamaga i vaitausaga o le 1990?

⁶ O lenā fetuunaʻiga o le malamalamaga, na manatu ai tagata o Ieova e faamasinoina tagata taʻitoʻatasi o ni mamoe po o ni ʻoti a o faagasolo le taufaaiʻuiʻuga o lenei faiga o mea, e fua i le auala e latou te tali mai ai i le feʻau o le Malo. Peitaʻi, na fetuunaʻi lo tatou malamalamaga i le ogatotonu o vaitausaga o le 1990. E lua mataupu na aumaia i Le Olomatamata o Oketopa 15, 1995, na aumaia ai ni vala e talitutusa ai fetalaiga a Iesu o loo faamauina i le Mataio 24:29-31 (faitau) ma le Mataio 25:31, 32. (Faitau.) * O le iʻuga, na taʻua ai: ʻO le tuuina atu o le faamasinoga o mamoe ma oti e tupu i le lumanaʻi.’ I le ā le taimi? “O le a faia pe a mavae le pa mai o ʻle puapuaga tele’ lea o loo taʻua i le Mataio 24:29, 30,  ma ua ʻoo mai le Atalii o le tagata i lona mamalu.’ . . . Pe a oo loa ina faaiʻuina le faiga aoao amioleaga o mea, ona faia loa lea e Iesu le faamasinoga, ma tuuina mai le sala faafaamasinoga.”

7. O le ā le malamalamaga manino ua tatou mauaina i le taimi lenei?

⁷ I aso nei, ua tatou maua se malamalamaga manino i le talafaatusa i mamoe ma ʻoti. O ai e faasino atu i ai le “Atalii o le tagata” po o le tupu? E faasino atu iā Iesu. O “oʻu uso” e faasino atu i tane ma fafine ua faauuina i le agaga, lea o le a pule ma Keriso i le lagi. (Roma 8:16, 17) O “mamoe” ma “ʻoti” e faaāta ai tagata taʻitoʻatasi mai i atunuu uma, ma e lē faauuina i latou i le agaga paia. Ae o le ā le taimi e faia ai le faamasinoga? O le a faia lenei faamasinoga a o lata ina māeʻa le puapuaga tele lea ua lata mai. O le ā le māfuaaga e faamasino ai tagata o ni mamoe ma ʻoti? E fua i le auala e latou te feutagaʻi ai ma uso faauuina o Keriso o loo totoe i le lalolagi. A o lata mai le iʻuga o lenei faiga o mea, maʻeu lo tatou fiafia i le auala ua faasolosolo ona faasusulu mai ai e Ieova le malamalama i lenei talafaatusa, ma isi talafaatusa o loo faamauina i le Mataio mataupu e 24 ma le 25.

8, 9. Aiseā ua taʻua ai mamoe o “ē e amiotonu”?

⁸ I le talafaatusa i mamoe ma ʻoti, e leʻi taʻua patino e Iesu le galuega talaʻi. Aiseā la ua tatou faapea atu ai, ua faamatilatila i lenei talafaatusa le galuega talaʻi?

⁹ Muamua, e faaaogā e Iesu talafaatusa e aʻoaʻo atu ai. O lea, e leʻi fetalai Iesu i le vaevaeina o ni mamoe ma ni ʻoti moni. I se tulaga talitutusa, e leʻi fetalai o ia o le a faamasinoina tagata o ni mamoe ona o lo latou fafagaina, tausia, faaofuina, ma asiasi i ona uso i le falepuipui i se tulaga faaletino. Nai lo o lea, na ia faaāta mai ai uiga e faaalia e nei mamoe faafaatusa i ona uso. Na ia taʻua mamoe o “ē e amiotonu” ona e latou te iloa o loo iai le vaega faauuina o uso o Keriso o loo totoe i le lalolagi, ma ua latou lagolagoina atoatoa ma le faamaoni le ʻaufaauuina a o faagasolo aso e gata ai.​—Mata. 10:40-42; 25:40, 46; 2 Timo. 3:1-5.

10. E faapefea ona faaalia e mamoe le agalelei i uso o Keriso?

¹⁰ Lona lua, seʻi o tatou iloiloina fetalaiga a Iesu. O loo ia talanoa e faatatau i le faailoga o lona faatasi mai ma le taufaaiʻuiʻuga o lenei faiga o mea. (Mata. 24:3) I le amataga o lana lauga, na faailoa mai ai e Iesu o se tasi o vala mataʻina o le faailoga, o le talaʻiina atu o le tala lelei o le Malo i le “lalolagi atoa.” (Mata. 24:14) A o leʻi talanoa o ia e faatatau i mamoe ma ʻoti, na ia faamatalaina muamua le talafaatusa i taleni. E pei ona taʻua i le mataupu ua mavae, na faia e Iesu lenā talafaatusa e faamatilatila atu ai i ona “uso” po o le ʻaufaauuina, e tatau ona latou maelega i le galuega talaʻi. Peitaʻi, o le luʻi telē o loo fesagaʻia e le vaega toʻaitiiti o le ʻaufaauuina o loo totoe i le lalolagi a o faagasolo le faatasi mai o Iesu, o le talaʻi atu lea i “nuu uma” a o leʻi oo mai le iʻuga. O le talafaatusa i mamoe ma ʻoti e faailoa mai ai o le a maua e le ʻaufaauuina le fesoasoani. O lea, o se tasi o auala autū e faaalia ai e i latou o le a faamasinoina o ni mamoe le agalelei i uso o Keriso, o le lagolagoina lea o i latou i le galuega talaʻi. O le ā e aofia i le avatuina o lenā fesoasoani? Pe e na o le fesoasoani faaletino ma faamāfanafanaga e aofia ai, pe e manaʻomia se isi mea e sili atu?

11. O le ā le fesili ua lāgā, ma aiseā?

¹¹ I aso nei, o le toʻatele o le valu miliona o soo o Iesu e leʻi faauuina i le agaga paia. E latou te leʻi mauaina taleni na tuu atu e Iesu i ana pologa faauuina. (Mata. 25:14-18) O lea, ua lāgā ai le fesili: ʻPe e mafai ona faatatau atu le faatonuga ia talaʻi iā i latou e leʻi faauuina i le agaga paia? Ioe, o lea seʻi o tatou iloiloina nisi o māfuaaga ua tatou tali atu ai faapea.

12. O le ā e tatou te aʻoaʻoina mai i upu a Iesu o loo i le Mataio 28:19, 20?

¹² Na faatonu e Iesu ona soo uma ina ia talaʻi. Ina ua toe faatūina mai Iesu, sa ia faatonuina ona soo ina ia faia isi ma soo, ma ia aʻoaʻo i latou ina malamalama “i mea uma” na ia faatonu mai. Sa aofia ai i na faatonuga le tofiga ina ia talaʻi atu. (Faitau le Mataio 28:19, 20.) O lea e tatau i soo uma o Keriso ona talaʻi atu, e tusa pe e faamoemoe e pule mai i le lagi pe e ola i le lalolagi.​—Galu. 10:42.

13. O le ā ua faailoa mai i le vaaiga na iloa e Ioane, ma aiseā?

¹³ Ua faailoa mai i le tusi o Faaaliga o le a faia e le ʻaufaauuina ma isi le galuega talaʻi. Na tuuina atu e Iesu iā Ioane se faaaliga e faatatau i le “tamaʻitaʻi faaipoipo,” le 144,000 o tagata faauuina o le a pule mai ma Keriso i le lagi, o loo latou valaauliaina tagata ina ia “ave fua le vai o le ola.” (Faaa. 14:1, 3; 22:17) O lenā vai faafaatusa, ua faaāta mai ai sauniuniga a Ieova ina ia toe faafoʻisia ai tagata mai i le agasala ma le oti e ala i le taulaga togiola a Iesu. (Mata. 20:28; Ioa. 3:16; 1 Ioa. 4:9, 10) O le togiola o le vaega autū o le feʻau o loo tatou talaʻia, ma o loo taʻimua le ʻaufaauuina e fesoasoani i tagata e aʻoaʻo e faatatau i le togiola ma maua ai aogā. (1 Kori. 1:23) Peitaʻi e tusa ai ma le faaaliga, na iloa atu e Ioane isi tagata,  e lē aofia ai i le vasega o le tamaʻitaʻi faaipoipo. Ua faatonuina foʻi i latou ina ia faapea atu, “Inā sau ia!” Ua latou usiusitaʻi ma valaaulia isi ina ia ave le vai o le ola. O lenei vaega lona lua e latou te maua le faamoemoe e ola i le lalolagi. O lea, o lenei vaaiga e faailoa mai ai o i latou uma e taliaina le valaaulia “inā sau ia,” o lo latou tiute tauave le talaʻi atu i isi.

14. O le ā e aofia ai i le usitaʻi i le “tulafono a Keriso”?

¹⁴ O i latou uma e ola i le “tulafono a Keriso” e tatau ona talaʻi. (Kala. 6:2) E tutusa tapulaa a Ieova mo tagata uma. O se faaaʻoaʻoga, na ia faapea atu i tagata Isaraelu: “E tasi le tulafono mo tagatānuu ma tagata ese ua aumau iā te outou.” (Eso. 12:49; Levi. 24:22) E lē o toe ola Kerisiano i le Tulafono a Mose. Peitaʻi, e tusa po o i tatou o ni ē faauuina pe e leai, ae e tatou te tausia uma le “tulafono a Keriso.” O lenā tulafono e aofia ai aʻoaʻoga uma a Iesu. Ae o le vala e sili ona tāua i aʻoaʻoga uma a Iesu o le faaalia lea e ona soo o le alofa. (Ioa. 13:35; Iako. 2:8) O se tasi o auala autū e faaalia ai lo tatou alofa i le Atua, Keriso ma o tatou tuaoi, o le talaʻia lea o le tala lelei o le Malo.​—Ioa. 15:10; Galu. 1:8.

15. Aiseā e tatou te faapea atu ai e faatatau atu le faatonuga a Iesu i ona soo uma?

¹⁵ O fetalaiga a Iesu i se vaega toʻaitiiti e mafai ona faatatau i se vaega toʻatele. O se faaaʻoaʻoga, na osia e Iesu ma ona aposetolo e 11 le feagaiga mo se Malo, peitaʻi e faatatau atu lenā feagaiga i sui uma o le 144,000. (Luka 22:29, 30; Faaa. 5:10; 7:4-8) I se tulaga talitutusa, na faatonuina e Iesu se vaega toʻaitiiti o ona soo, o i latou na ia faaali ai ina ua mavae lona maliu, ina ia talaʻi. (Galu. 10:40-42; 1 Kori. 15:6) Peitaʻi, na iloa e ona soo faamaoni uma i le uluaʻi senituri e faatatau atu foʻi lenā faatonuga iā i latou, e ui e leʻi fetalai tuusaʻo atu Iesu iā i latou. (Galu. 8:4; 1 Pete. 1:8) I aso foʻi nei, e leʻi fetalai tuusaʻo mai Iesu i le toetoe valu miliona tagata talaʻi o le Malo o loo iai nei. Peitaʻi, ua latou iloa o lo latou tiute tauave le faatuatua iā Keriso ma faailoa atu lo latou faatuatua e ala i le galuega talaʻi.​—Iako. 2:18.

16-18. Ua faapefea ona lagolagoina e ē pei ni mamoe uso o Keriso, ma aiseā e tatau ai ona latou faia faapea i le taimi lenei?

¹⁶ O loo siitaua mai Satani i uso faauuina o Keriso o loo totoe i le lalolagi, ma ua atili ona faateteleina ana osofaʻiga ona ua ia iloa ua “puupuu lona taimi” o loo totoe. (Faaa. 12:9, 12, 17) E ui i le tauivi o le ʻaufaauuina e tutumau a o fesagaʻia na luʻi, ae o loo latou taʻimua pea i le galuega talaʻi tele o loo faia i le taimi lenei. E mautinoa o loo faatasi Iesu ma i latou, ma fesoasoani i a latou taumafaiga.​—Mata. 28:20.

¹⁷ Ua faatupulaʻia le toʻatele o i latou e pei o ni mamoe, ma e latou te manatu o se faaeaga le lagolagoina o uso o Keriso, e lē gata i le galuega talaʻi ae i isi foʻi vala. O se faaaʻoaʻoga, e latou te faia foaʻi tautupe e fesoasoani ai i le fausiaina o Maota mo Sauniga, Maota mo Fonotaga ma ofisa o lālā, ma o loo latou usiusitaʻi faamaoni foʻi i ē ua tofia e le “pologa faamaoni ma le faautauta” e taʻimua.​—Mata. 24:45-47; Epe. 13:17.

¹⁸ Ua toe o se aga ona faamatuu mai lea e agelu matagi o le puapuaga tele. O le a tupu lenā mea pe a māeʻa ona mauaina e uso uma o Keriso o loo totoe i le lalolagi lo latou faamaufaailoga faaiʻu. (Faaa. 7:1-3) O le a aoaoina le ʻaufaauuina i le lagi a o leʻi gāpā Amaketo. (Mata. 13:41-43) O lea, o le taimi lenei mo ē e faamoemoe e faamasinoina o ni mamoe e lagolago ai ma le faamaoni i uso o Keriso.