O lenei faamalamalamaga na faavae mai i mea moni o loo i le tusi o Faaaliga, o loo taʻua ai Satani o loo ia taʻitaʻia le osofaʻia o tagata o le Atua i le lalolagi aoao. (Faaa. 12:1-17) O lea, sa manatu ai o Koku o se igoa faavaloaga o Satani.

Peitaʻi, o lenā malamalamaga ua lāgā ai ni fesili tāua. Aiseā? Seʻi manatu i le mea lenei: Ina ua faasino atu i le taimi o le a faatoʻilaloina ai Koku, na fetalai Ieova e faatatau iā Koku: “Ou te tuuina atu oe e fai ma meaʻai a manulele taufeʻai, o manufelelei eseese uma, ma manufeʻai o le fanua.” (Eseki. 39:4) Na faaopoopo mai Ieova e faapea: ʻO lea aso foʻi, o le a ou avatu iā Koku se nofoaga i inā, o se fanuatanu i Isaraelu. O i inā o le a latou tanu ai Koku ma ana ʻau uma.’ (Eseki. 39:11) E faapefea i se foafoaga agaga ona ʻaina e ʻmanufelelei ma manufeʻai o le fanua’? E faapefea ona iai se “fanuatanu” o Satani i luga o le lalolagi? O loo taʻua patino i le Tusi Paia o le a lafo Satani i le tō e lē gata mo le 1,000 tausaga, ae e lē ʻaina e manu pe tanumia.​—Faaa. 20:1, 2.

Ua taʻu mai iā i tatou, i le iʻuga o le 1,000 tausaga, o le a toe tatala mai ai Satani mai i le tō e lē gata “ona alu atu lea o ia ma faasesē i nuu i itu e fā o le lalolagi, o Koku ma Makoku, e faapotopoto iā i latou i le taua.” (Faaa. 20:8) E faapefea ona faasesē e Satani Koku pe afai o ia foʻi o Koku? O lea, e lē o faasino atu “Koku” iā Satani i le valoaga a Esekielu faapea le tusi o Faaaliga.

O ai la Koku o Makoku? Ina ia tali lenā fesili, e manaʻomia ona tatou iloiloina ni mau, e faamanino mai ai po o ai e osofaʻia tagata o le Atua. O loo talanoa le Tusi Paia e lē gata o le osofaʻia e Koku o Makoku o tagata o le Atua, ae faapea foʻi le osofaʻiga a le “tupu o le itu i mātū” ma “tupu o le lalolagi.” (Eseki. 38:2, 10-13; Tani. 11:40, 44, 45; Faaa. 17:14; 19:19) Pe e eseese nei osofaʻiga? E foliga mai e leai. E mautinoa o loo faasino atu le Tusi Paia i se osofaʻiga se tasi ae eseese ona taʻu. Aiseā ua tatou faia ai lea faaiʻuga? Talu ai ua faamatala mai e le Tusi Paia iā i tatou o le a aufaatasi atunuu uma o le lalolagi i le osofaʻiga mulimuli,  lea o le a taʻitaʻia atu ai i le taua iā Amaketo.​—Faaa. 16: 14, 16.

Pe a tatou faatusatusa faamatalaga o loo i mau e faatatau i le osofaʻiga mulimuli i tagata o le Atua, e manino mai o le taʻu o Koku o Makoku e lē o faasino atu iā Satani, ae o le tuufaatasiga o atunuu uma. Po o le a taʻitaʻia e le “tupu o le itu i mātū” faafaatusa, le tuufaatasiga o atunuu? E tatou te lē o mautinoa. Peitaʻi, e foliga mai e talafeagai lenā manatu pe a fua i fetalaiga a Ieova e faatatau iā Koku: “O le a e sau mai i lou nofoaga, mai i vaega mamao o le itu i mātū, o oe ma le toʻatele o tagata faatasi ma oe, o loo tiʻetiʻe i latou uma i solofanua, o se faapotopotoga e toʻatele, o se ʻautau e toʻatele lava.”​—Eseki. 38:6, 15.

I se tulaga talitutusa, na faamatala mai e le perofeta o Tanielu lea na soifua i le vaitaimi o Esekielu le mea o le a oo i le tupu o mātū: “O le a iai ni lipoti e faaatuatuvale ai o ia, e mai i le mea e oso aʻe ai le lā ma e mai i le itu i mātū, ona alu atu lea o ia ma le lotoa tele ina ia tuʻimomomo ma faaumatia le toʻatele. E na te faatūina ona faleʻie e pei o ni maota i le va o le sami telē ma le mauga Matagofie ma le paia; ma e oo o ia i lona lava iʻuga, ae leai foʻi se tasi e fesoasoani iā te ia.” (Tani. 11:44, 45) E talitutusa lenā, ma mea sa taʻua i le tusi o Esekielu e faatatau i gaoioiga a Koku.​—Eseki. 38:8-12, 16.

O le ā o le a tupu ona o le osofaʻiga mulimuli lenei? Ua faapea mai Tanielu: “O lea taimi, o le a tulaʻi ai [iā Amaketo] Mikaele [po o Iesu Keriso], o le perenise sili o lē o loo tulaʻi [talu mai le 1914] ona o tagata o lou nuu. E oo mai foʻi le taimi o puapuaga [po o le puapuaga tele] e leʻi faapea ona tupu talu ona iai se nuu e oo atu i lea taimi. O lea taimi o le a sao tagata o lou nuu, o i latou uma ua iloa o loo tusia i le tusi.” (Tani. 12:1) O lea gaoioiga o le a faia e le sui o le Atua o Iesu, lea o loo faamatalaina i le Faaaliga 19:11-21.

Ae o ai o loo faasino atu i ai “Koku ma Makoku” i le Faaaliga 20:8? I le tofotofoga faaiʻu i le iʻuga o le 1,000 tausaga, o i latou uma lava e tetee iā Ieova, o le a pei o latou uiga o ni ē fasioti tagata e pei o ʻKoku o Makoku,’ po o atunuu e osofaʻia tagata o le Atua a o leʻi gāpā Amaketo. O le a tutusa le iʻuga o nei vaega e lua, o le faaumatia lea e faavavau. (Faaa. 19:20, 21; 20:9) E talafeagai la ona faapea atu, o i latou uma lava e tetee i le iʻuga o le 1,000 tausaga, o le a taʻua o “Koku ma Makoku.”

Ona o i tatou o tagata aʻoga o le Tusi Paia, e tatou te naunau e iloa po o ai o le a avea ma “tupu o le itu i mātū.” E tusa po o ai o le a taʻitaʻia lenei tuufaatasiga o atunuu, ae o mea nei e lua ua tatou mautinoa i ai: (1) O le a faatoʻilalo ma faaumatia Koku o Makoku ma ana ʻau, ma lona (2) O le a faasaoina e lo tatou tupu tofia o Iesu Keriso tagata o le Atua, ma taʻitaʻi atu i latou i le lalolagi fou filemu ma le saogalemu moni.​—Faaa. 7:14-17.