“UA POʻIA lava aʻu i le tele o maʻi,” o le faamatalaga lea a Ernst, o sē ua silia i le 70 ona tausaga. * Po o lou tulaga lenā? Pe afai ua faasolo ina e matua, ua faasolo ina faalētonu lou soifua mālōlōina ma mou atu lou malosi, atonu e te malamalama lelei i le faamatalaga o loo i le Failauga e 12, fuaiupu 1 e faatatau i le tulaga matua lea e taʻua o “aso e malaia ai.” Peitaʻi, e lē o le gataaga lenā. E mafai lava ona e maua se olaga faamalieina, e ala i le auauna i le Atua ma le fiafia.

Uso e ma tuafāfine matutua peleina, e lē na o outou ua tupu ai lenā tulaga. O luʻi foʻi na sa feagai ma auauna matutua a Ieova i le taimi o le Tusi Paia. O se faaaʻoaʻoga, sa faalētonu le vaai a Isaako, Iakopo ma Akia. (Kene. 27:1; 48:10; 1 Tu. 14:4) Sa lagona foʻi e Sara ʻua loomatua’ o ia. (Kene. 18:11, 12) Sa lagona e le tupu o Tavita ua ʻlē māfanafana o ia.’ (1 Tu. 1:1) Sa lē toe fiafia Pasili le tagata mauʻoa i le susua o taumafataga ma leo o musika. (2 Samu. 19:32-35) Sa feagai foʻi Aperaamo ma Naomi ma le maliliu o a laʻua paaga faaipoipo.—Kene. 23:1, 2; Ruta 1:3, 12.

O le ā na fesoasoani iā i latou uma e tumau faamaoni ai iā Ieova ma faatumau lo latou olioli? E ui i le tulaga matua o Aperaamo, ae o lona talitonu i folafolaga a le Atua, ʻna malosi tele ai o ia i le faatuatua.’ (Roma 4:19, 20) E tatau foʻi ona malosi lo tatou faatuatua. E mafai ona maua lenā faatuatua e tusa po o le ā lo tatou matutua, o tomai ma o tatou tulaga. O se faaaʻoaʻoga, e ui ina vaivai, tauaso, ma faataotolia le augātama o Iakopo, ae sa malosi lona faatuatua i folafolaga a le Atua. (Kene. 48:1-4, 10; Epe. 11:21) I aso nei, o loo mafatia foʻi Ines, ua 93 ona tausaga ona o le vaivai o maso o le tino ae na ia faapea mai: “O aso taʻitasi ou te lagona ai le tauia o aʻu e Ieova. Ou te mafaufau i le Parataiso i aso uma, ma ua aumaia ai iā te aʻu le faamoemoe.” Maʻeu ni faalogona mautinoa!

E faamalosia lo tatou faatuatua e ala i le tatalo, suʻesuʻe le Tusi Paia, ma auai i sauniga. Sa faatolu ona tatalo le perofeta matua o Tanielu i le aso, ma suʻesuʻe pea le Afioga a le Atua. (Tani. 6:10; 9:2) E faapena le loomatua ua maliu lana tane o Ana, sa “iai pea o ia i le malumalu.” (Luka 2:36, 37) I so o se taimi e te auai ai i sauniga, ma faia ni ou sao i le tele e mafai ai, e mafai ona faafouina ai oe ma i latou o loo auai. E fiafia Ieova i au tatalo, e tusa pe e itiiti mea e mafai ona e faia.—Faata. 15:8.

O le toʻatele o ē faamaoni e naunau e auai i sauniga, peitaʻi ua matuā faigatā ona faia faapea, po ua lē mafai foʻi. O le ā la e tatau ona fai? Ia faaaogā lelei so o se fesoasoani e mafai ona e mauaina. O le toʻatele ua lē mafai ona auai i sauniga ua mafai ona faalogologo i sauniga e ala i le telefoni. E ui ua faalētonu le vaai a Inge lea ua 79 ona tausaga, ae sauniuni lava mo sauniga e faaaogā ai kopi ua faalapopoʻa mataʻitusi ua saunia e se tasi o uso i le faapotopotoga.

Atonu ua tele atu ou taimi avanoa. Aiseā e lē faaaogā ai lou taimi e faalogologo ai i le faitauina o le Tusi Paia ma lomiga ua uma ona puʻeina, o lauga ma tala faalogologo? Atonu e mafai foʻi ona e tausolomua e vili atu i isi ou uso talitonu e faasoa i ai se meaalofa faaleagaga, ma olioli ai i le “fefaalaeiauaʻi.”—Roma 1:11, 12.

Ua faapea mai Christa lea ua silia i le 80 ona tausaga, “E ese loʻu faanoanoa ona o mea ua lē mafai ona ou toe faia.” E faapefea ona faatumauina le olioli o ē ua matutua? Ua faapea mai Peteru o lē ua 75 ona tausaga: “E ala i le iai o se vaaiga saʻo. Ia aua  neʻi mafaufau pea i mea ua lē mafai ona e toe faia, ae ia olioli i mea o loo mafai ona e faia.”

Pe e mafai ona e mafaufau i nisi o auala e mafai ona e molimau atu ai? Ua lē mafai ona toe auai Heidi i le galuega mai i lea fale i lea fale e pei ona masani ai. Ua silia i le 80 ona tausaga, ae ua ia aʻoaʻoina le auala e tusia ai tusi i le komepiuta. O nisi tagata talaʻi matutua ua latou amataina ni talanoaga faale-Tusi Paia a o nofonofo i paka po o nofoaga faatali pasi. Pe afai ua e nofo i fale e tausia ai tagata matutua, o lenā ua iai lau lava oganuu, o tagata o loo tausia oe po o isi tagata o loo outou nonofo faatasi.

A o faasolo ina matua le tupu o Tavita, sa ia naunau e faaauiluma le tapuaʻiga moni. Sa ia faia foaʻi ma fesoasoani e faamaopoopo le fausiaina o le malumalu. (1 No. 28:11–29:5) I se tulaga talitutusa, e mafai ona faia sou sao e lagolago ai le galuega o le Malo i le lalolagi aoao. Aiseā e te lē fesoasoani ai i paeonia po o isi tagata talaʻi maelega i lau faapotopotoga e ala i upu faalaeiau, o se meaalofa laʻitiiti, po o se ʻaiga māmā foʻi? E mafai foʻi ona faaaofia i au tatalo talavou ma o latou aiga, o i latou i le auaunaga faataimi atoa, o ē o loo mamaʻi, ma i latou o loo feagai ma le tele o tiute tauave.

E matuā tāua outou ma la outou auaunaga. E lē faagaloina e lo tatou Tamā i le lagi tagata peleina ua matutua. (Sala. 71:9) E alofa ma faatāua outou e Ieova. Ua lata mai le taimi o le a lē toe iai ni aso e malaia ai e tusa po o le ā lo tatou matutua. Nai lo o lea, o le a toe faaatoatoaina lo outou malosi ma maua le soifua mālōlōina atoatoa, ma auauna ai i lo tatou Atua alofa o Ieova seʻia oo i le faavavau.