Ua Fesili Mai le ʻAufaitau

Po o se Faasalaga Mai le Atua Mala Faalenatura?

E lē faaaogā e le Atua ia mala faalenatura e faasala ai tagata. E na te leʻi faia muamua, ma o le a ia lē faia lava. Aiseā? Auā o loo faapea mai le Tusi Paia i le 1 Ioane 4:8, “o le Atua o le alofa lava ia.”

E uunaʻia e le alofa ia gaoioiga uma a le Atua. E lē faatigā le alofa i ē lē sala, auā o loo faapea mai le Tusi Paia “e lē agaleaga le alofa i lona tuaoi.” (Roma 13:10) O loo faapea mai le Tusi Paia i le Iopu 34:12: “E moni lava e lē amioleaga le Atua.”

O le mea moni, na valoia mai e le Tusi Paia ia mala i o tatou aso, e pei o “mafuiʻe tetele.” (Luka 21:11) Ae e lē tuuaʻia Ieova i mea ua faaleagaina ai, e pei foʻi ona lē tuuaʻia le tagata vāaitau, ona o mea na faaleagaina e se afā na ia faailoaina mai. Afai e lē o le Atua le pogai o mafatiaga ua oo i tagata ona o mala faalenatura, o ai e pogai mai ai?

O loo faailoa mai e le Tusi Paia, “o le lalolagi atoa o loo nofo toʻilalo i le pule a lē o loo leaga,” o Satani le Tiapolo. (1 Ioane 5:19) Na avea o ia ma fasioti tagata ina ua ia fouvale i le amataga seʻia oo mai i o tatou aso. (Ioane 8:44) E manatu faatauvaa Satani i ola o tagata. E uunaʻia o ia i lona manatu tau o ia lava, ma e lē o se mea e maofa ai lona fafauina aʻe o se lalolagi e tumu i le manatu faapito. E lē manatu mamafa lenei lalolagi i le faileagaina o tagata, ma ua oo ai ina nonofo tagata i vaipanoa e tele ai lamatiaga, o nofoaga e ono aafia i mala e māfua ona o tagata, faapea mala faalenatura. (Efeso 2:2; 1 Ioane 2:16) O lea la, e tatau foʻi ona tuuaʻia tagata manaʻo tele, mo nisi o mala o loo tutupu. (Failauga 8:9) I le ā le itū?

O se mea e maofa ai ona o le tele o nei mala e māfua ona o tagata. Seʻi tagaʻi i faaaʻoaʻoga nei, le afā ma lologa na aafia ai tagata o le taulaga o New Orleans i le Iunaite Setete, po o fale na tanumia ina ua solo le palapala mai mauga o Venezuela. Ua tutupu nei mea ma isi faalavelave, ona o vala masani o le tau e pei o le matagi ma le timu, ma ua faaleagaina ai le tele o mea ona o le lē amanaʻia o le siʻosiʻomaga e tagata, o le faatalapelo ona fausia ma fuafuaina o fale, lē amanaʻiaina o lapataʻiga, ma faalētonu o na pulega.

Seʻi tagaʻi i se mala i vaitaimi o le Tusi Paia. I vaitaimi o Iesu, na solo ai se olo ma feoti ai tagata e toʻa 18. (Luka 13:4) Atonu na tupu lenei faalavelave ona o le sesē o tagata, po o “le tausaga [taimi] ma le mea e tupu ai,” ae lē o se faamasinoga a le Atua.—Failauga 9:11.

Pe na māfua ea ni mala faalenatura ona o le aao o le Atua? Ioe, ae lē pei o mala faalenatura ma mala e māfua mai ona o tagata, ona e filifili e le Atua i latou e faaumatia, na iai le māfuaaga na tupu ai, ma e seāseā tupu. O ni faaaʻoaʻoga se lua, o le lolo i le lalolagi aoao i vaitaimi o le augātamā o Noa, ma le faaumatiaga o aai o Sotoma ma Komoro i le vaitaimi o Lota. (Kenese 6:7-9, 13; 18:20-32; 19:24) O faamasinoga na a le Atua na aveesea ai tagata amioleaga lē salamō, ae faasaoina i latou o ē amiotonu i le silafaga a le Atua.

E lē gata i lea, e iā Ieova le tomai, le faanaunauga, ma le malosi e faaiʻu ai mafatiaga uma, ma saʻoloto mai ai i aafiaga o mala faalenatura. Na valoia mai e le Salamo 72:12 e faatatau i le Tupu tofia a le Atua, o Iesu Keriso, e faapea: “E laveaʻi e ia o lē mativa i lona alaga mai; atoa ma lē ua puapuagatia, ma lē ua leai sona fesoasoani.”