Ia Aʻoaʻo Lau Fanau

Na Faalogo Raava i Tala

SEʻI faapea o loo tatou iai i le pe tusa ma le 3,500 tausaga ua mavae. O loo tatou iai i le aai o Ieriko, i le nuu o Kanana. O se tamaʻitaʻi e igoa iā Raava o loo nofo ai i le aai. Na fanau o ia ina ua mavae ona taʻitaʻiesea e Mose Isaraelu mai le nofo pologa i Aikupito, ma taʻitaʻia atu i latou i le Sami Ulaula i luga o le eleele mātūtū! E leai ni leitiō, televise po o ni Initaneti i lenā taimi, ae na iloa e Raava lenei vavega e ui lava e mamao le mea na tupu ai mai le vaipanoa na nofo ai. Pe e faapefea ona ia iloa?— *

E mautinoa na faamatala e tagata femalagaaʻi tala e faatatau i na vavega. A o ia tuputupu aʻe, sa manatua e Raava mea na faia e Ieova mo ona tagata. Ona ia faalogo lea i nisi tala mataʻina e faatatau i le nuu o Isaraelu. I le māeʻa o le 40 tausaga i le vao, ua latou ulu atu i Kanana, ma na fesoasoani le Atua iā i latou e faatoʻilalo ē na tetee ane. Ua iloa nei e Raava o loo tolauapi le nuu o Isaraelu i le isi itu o le Vaitafe o Ioritana mai i Ieriko!

I se tasi afiafi, na ō mai ai ni tagata ese se toʻalua iā Raava, ona e la te iloa e faigaluega o ia i se nofoaga e mafai ona nonofo ai tagata asiasi. O lea, sa ia ave ai i laʻua i totonu o le fale. I lenā po, sa faalogo ai le tupu o Ieriko ua iai ni tagata asiasi Isaraelu i totonu o Ieriko, ma ua ō atu i laʻua i le fale o loo faigaluega ai Raava. Ona aauina atu lea e le tupu o tagata avefeʻau iā Raava, ma fai atu e aumai i fafo tagata na ō atu iā te ia. O le ā le mea na iloa e Raava ma le gaoioiga na ia faia?—

A o leʻi taunuu atu avefeʻau a le tupu, ua iloa e Raava o tagata asiasi e mai i Isaraelu. Sa ia faalalafi i laʻua i luga o le fale, ae ua ia faapea atu i avefeʻau a le tupu: “Na ō mai tagata iā te aʻu . . . ua oo ina a punitia o le faitotoʻa, ina ua pōuliuli, ona ō atu ai lea o ia tagata.” Na uunaʻia e Raava i latou: ‘Ia tuliloa atu iā te i laʻua.’

O le ā sou manatu, aiseā na puipuia ai e Raava nei tagata asiasi?— Sa ia faamatala le māfuaaga ina ua ia taʻu atu iā i laʻua e faapea: “Ua ou iloa ua foaʻiina atu e Ieova le nuu iā te outou . . . Auā ua matou faalogo na faamateina e Ieova le suāsami o le sami Ulaula ona o outou, ina ua outou ō mai mai  Aikupito.” Na ia faalogo foʻi i isi manumalo na tuuina atu e le Atua iā Isaraelu i le faatoʻilaloina o latou fili.

E mautinoa sa fiafia le finagalo o Ieova ina ua puipuia e Raava tagata asiasi, e pei ona faailoa mai e le Tusi Paia i le Eperu 11:31. Sa Ia finagalo malie foʻi ina ua ʻaiʻoi atu Raava i tagata asiasi: ‘Seʻi oulua tautō mai iā te aʻu, auā ua ou agalelei atu iā te oulua, ma pe a faaumatia Ieriko, ia outou faaolaina loʻu tamā, ma loʻu tinā, ma oʻu tuagane, ma oʻu uso.’ Na tautō atu tagata asiasi o le a la faia lenā mea pe afai e usitaia e Raava faatonuga e la te avatua. Pe e te iloa o ā na faatonuga?—

Na faatonuina o ia e tagata asiasi, ‘Ia e nonoa lenei maea mūmū i le faamalama ma faapotopoto mai iā te oe i lou fale lou aiga uma. Pe a e faia lenei mea, o le a laveaʻia i latou uma.’ Na faia e Raava mea uma na fai atu ai tagata asiasi iā te ia. Pe e te iloa le mea na tupu?—

Na taunuu ane tagata Isaraelu i fafo o pa o Ieriko. E mo le ono aso, e faatasi i le aso ona latou savavali faataamilo i le aai ma le filemu. I le aso lona fitu, e faafitu ona latou savavali faataamilo i le aai ma feʻei leotetele. Ua soloia pa o le aai, seʻi vaganā ai le fale o loo tautau ai le maea mūmū i le faamalama! Na faasaoina Raava ma lona aiga.—Iosua 2:1-24; 6:1-5, 14, 15, 20-25.

O le ā e tatou te aʻoaʻoina mai i le mea na faia e Raava?— Ioe, e leʻi tau ina faalogo o ia i tala o mea na faia e le Atua e laveaʻi ai ona tagata, ae sa ia fesoasoani foʻi iā i latou ina ua ia maua le avanoa e faia ai. O le mea moni, na filifili Raava e auauna iā Ieova faatasi ma ona tagata! Po o le a e faia lenā mea?— E matou te faamoemoe o le a e faia faapea.

[Faaopoopoga i lalo]

[Fesili]

○ O ā tala tāua na faalogo i ai Raava a o laʻitiiti o ia?

○ O le ā le auala na ia feagai ai ma tagata asiasi Isaraelu, ma aiseā?

○ O le ā le tautoga na manaʻo Raava e fai mai e tagata asiasi?

○ E faapefea ona tatou iloa na fiafia Ieova iā Raava, ma e faapefea ona tatou faataʻitaʻi iā te ia?