O le ā le Mea a le Atua o Fai?

“Ieova e, aiseā ea ua e tūtū mamao ai? Aiseā ua e lafi ai i taimi o o matou puapuaga?” *—SALAMO 10:1.

O LE vaai atu i tala fou, ua iloa ai ua tatou ola i ‘taimi o puapuaga.’ Pe a oo mai mala i le aiga, ma aafia i tatou ona o solitulafono, faalavelave faafuaseʻi po o le maliu o sē e pele, tatou te ono fesili ai, Po o silafia e le Atua? Po o manatu mai o ia? Po o soifua o ia?

Ae peitaʻi, pe na e iloa e mafai ona sesē o tatou manatu i mea o loo faia e le Atua? Seʻi faapea ua lē fiafia se tamaitiiti ona ua alu lona tamā e faigaluega. Ua misia e le tamaitiiti lona tamā ma talotalo ai ia sau i le fale. Ua manatu le tamaitiiti ua tuulafoaʻiina o ia. I le aso atoa e fesili ai pea, “O fea loʻu tamā?”

E faigofie ona tatou iloa le sesē o le manatu o lenā tamaitiiti. Auā o le taimi lenā o loo faigaluega lona tamā ina ia maua mea e tausi ai le aiga. Pe e lē faapena foʻi ona sesē o tatou manatu pe a tatou alalaga atu, “O fea ea le Atua”?

O loo moomoo nisi ina ia avea le Atua o se faaoosala, ma o lana galuega autū o le faaoo vave o faasalaga i ē fai mea sesē. Ua manatu nisi i le Atua e pei o se Tamā o le Kirisimasi i le lagi, o lana matafaioi o le foaʻi mai o meaalofa, e pei o se galuega, se toʻalua pe e manumalo foʻi i le loto.

Ua faapea mai nei manatu, afai e lē vave aumaia e le Atua le faasalaga, pe aumaia mea o tatou talosaga atu ai, atonu la e lē o manatu alofa mai i o tatou mafatiaga, ma e na te lē o silafia o tatou manaʻoga. Ae e matuā mamao na manatu ma le mea moni! O loo galue Ieova le Atua i le taimi nei e saunia mea mo tagata uma, e ui e lē o le auala lenā o loo talosaga atu ai le toʻatele.

O le ā la le mea a le Atua o fai? Ina ia tali lenā fesili, seʻi o tatou toe vāai i le amataga o le talafaasolopito o le tagata, ina ua matuā faaleagaina le mafutaga a tagata ma le Atua. Ae e mafai ona toe faaleleia.

Āuga Leaga o le Agasala

Seʻi faapea o se fale ua leva ona leaga. Ua gau ifo le taualuga, paʻuʻū ese faitotoʻa mai i faamau ma ua faaleaga e tagata le tino o le fale. Sa manaia lenei fale i le taimi muamua, ae ua lē o toe faapena. Ona o le telē o le faaleagaina, e lē faigofie ai ona toe faaleleia, ma e umi se taimi e faia ai.

Seʻi manatu i le faaleagaina na oo i tagata  pe ā ma le 6,000 tausaga ua mavae, ina ua faasesēina e Satani Atamu ma Eva e fouvale i le Atua. A o leʻi tupu lenā mea, sa olioli le uluaʻi ulugalii i le ola mālōlōina atoatoa ma le faamoemoe e ola e faavavau faatasi ma tupulaga o loo mulimuli mai. (Kenese 1:28) Ae peitaʻi ina ua agasala i laʻua, na pei ai lava ua faaleaga e Atamu ma Eva le fanau uma a tagata e leʻi fananau mai.

Aua neʻi manatu mamā i āuga leaga o lenā fouvalega. Ua taʻua i le Tusi Paia: “[Ua] oo mai o le agasala i le lalolagi ona o le tagata e toʻatasi [Atamu], o le oti foʻi ona o le agasala.” (Roma 5:12) E lē gata i le aumaia o le oti, a ua faaleaga foʻi e le agasala la tatou mafutaga ma Lē na faia i tatou, ma ua afāina ai o tatou tino, mafaufau ma faalogona. O le iʻuga, ua pei ai o tatou tulaga o le fale lea ua faaleagaina. Ua aotele mai e le tagata amiotonu o Iopu lo tatou tulaga, ina ua ia faapea mai e uiga i le tagata, “ua puupuu aso ma ua tumu i le atuatuvale.”—Iopu 14:1.

Ae pe na tuulafoaʻi e le Atua le fanau a tagata ina ua agasala Atamu ma Eva? E leai! E mai lava i lenā taimi e oo mai nei, o loo galue pea lo tatou Tamā i le lagi ona o le fanau a tagata. Ina ia talisapaia atili le mea ua ia faia mo i tatou, seʻi manatu i laasaga e tolu e faia e toe faaleleia ai se fale, ma auala e fesootaʻi atu ai i mea ua faia e le Atua e toe faaleleia ai le tulaga o tagata.

1 Pe a uma ona iloilo le tulaga faaleagaina o se fale, e tatau i lē e ona le fale ona filifili pe toe faafou, pe talepe i lalo.

Ina ua uma le fouvalega i Etena, ona faasilasila mai loa lea e Ieova le Atua lona finagalo e toe faaleleia le tulaga o tagata. Na fetalai atu o ia iā Satani, o lē na faapogaia le fouvalega: “Ou te faatupuina le feitagaʻi i le va o oe ma le fafine, ma i le va o lau fanau ma lana fanau. O le a ia tuʻimomomoina oe i le ulu, ae o le a e tuʻimomomoina o ia i le mulivae.”—Kenese 3:15.

O lea, na folafola mai ai e Ieova o le a faaumatia e ia lē na faapogaia le fouvalega i Etena. (Roma 16:20; Faaaliga 12:9) Na valoia foʻi e Ieova, o le a iai se “fanau” i le lumanaʻi e laveaʻiina tagata mai i le agasala. * (1 Ioane 3:8) O na folafolaga ua faamaonia ai se upu moni tāua: O le a toe faaleleia e le Atua mea na ia faia, ae e lē faaumatia. Ae e umi se taimi e manaʻomia ina ia toe faaleleia ai le tulaga o tagata.

2 Ua saunia e se tusiata se ata e faamanino mai ai mea o le a faia i le galuega toe faaleleia.

Na avatu e Ieova le Atua i le nuu o Isaraelu ni tulafono, ma fuafua se malumalu e latou te tapuaʻi atu ai iā te ia. Ua taʻua i le Tusi Paia: “O mea na, o le ata o mea o loo i le lumanaʻi.” (Kolose  2:17) I le pei o le ata o se fale, ua faaata mai e na mea ni mea e sili atu.

O se faaaʻoaʻoga, na avatu e tagata Isaraelu taulaga i manu ina ia faamagalo ai agasala. (Levitiko 17:11) O lenā faiga na faaatagia mai ai se taulaga e sili atu o le a faia i senituri mulimuli ane, o se taulaga o le a togiolaina ai le fanau a tagata. * O le ata o le faleʻie paia ma le malumalu lea na tapuaʻi ai tagata Isaraelu, na faaatagia ai laasaga e faia e le Mesia i le lumanaʻi, mai i lona maliu faataulaga e oo i lona afio aʻe i le lagi.—Tagaʻi i le siata i le itulau e 7.

3 O le tufuga e filifilia, o le a mulimuli i le ata ma fai le galuega o le toe faaleleia.

O Iesu o le Mesia folafolaina, o lē o le a mulimuli i le ata na faataatia mai i taulaga a tagata Isaraelu, ma foaʻi mai lona ola e togiola ai tagata. O lea, na taʻua ai e Ioane le Papatiso Iesu “o le Tamaʻi Mamoe a le Atua, o lē e na te aveeseina le agasala a le lalolagi.” (Ioane 1:29) Na talia ma le lotomalie e Iesu le tofiga. Na fetalai o ia: “Na ou sau mai i le lagi e fai le finagalo o lē na auina mai aʻu, ae e lē o loʻu loto.”—Ioane 6:38.

O le finagalo o le Atua mo Iesu, e aofia ai e lē na o le “foaʻi atu [o] lona ola e fai ma togiola e sui aʻi tagata e toʻatele,” ae e osia ai foʻi se feagaiga ma ona soo mo se Malo. (Mataio 20:28; Luka 22:29, 30) O lenā Malo o le a faataunuu ai e le Atua lona finagalo mo tagata. Ua taʻua le feʻau o le Malo o le Atua, o le “tala lelei,” auā ua faamatala mai ai ua faavaeina e le Atua se malo i le lagi, o le a pulea mataupufai a le lalolagi!—Mataio 24:14; Tanielu 2:44. *

Faaauau le Galuega Toe Faalelei

A o leʻi afio i le lagi, na faatonu e Iesu ona soo: “Ia . . . fai tagata o nuu uma lava ma soo, ma papatiso atu iā i latou i le suafa o le Tamā, ma le Atalii, ma le agaga paia . . . Faauta! ou te faatasi ma outou i aso uma lava seʻia oo i le taufaaiʻuiʻuga o le faiga o mea a le lalolagi.”—Mataio 28:19, 20.

O le toe faaleleia la o le tulaga o tagata, e lē faaiʻuina i le maliu o Iesu. E faaauau pea seʻia oo i le “taufaaiʻuiʻuga o le faiga o mea a le lalolagi”—le taimi o le a pulea ai e le Malo o le Atua lo tatou lalolagi. Ua oo mai lenā taimi. Ua tatou iloa lenei mea, ona ua faataunuuina nei le faailoga na valoia e Iesu e faatatau i le “taufaaiʻuiʻuga o le faiga o mea a le lalolagi.” *—Mataio 24:3-14; Luka 21:7-11; 2 Timoteo 3:1-5.

I aso nei, ua usiusitaʻi Molimau a Ieova i atunuu e 236, i le faatonuga a Iesu ia talaʻi le tala lelei o le Malo o le Atua. O le mekasini o loo e faitauina, ua fuafua ina ia fesoasoani iā te oe e iloa atili ai mea e uiga i lenā Malo ma mea o le a faataunuuina ai. I le itulau e 2 o lomiga taʻitasi o Le Olomatamata, e te faitau ai i le faamatalaga lenei: “O lenei mekasini . . . o loo faailoa mai ai . . . faamāfanafanaga o le a aumaia e le Malo o le Atua, o se pulega lea ua faavaeina i le lagi, ma ua toeitiiti ona faaiʻuina lea o amioga leaga ma avea le lalolagi ma parataiso. Ua uunaʻia e lenei mekasini tagata ia faatuatua iā Iesu Keriso, o lē na maliu ina ia tatou maua ai le ola e faavavau, ma o le Tupu o lenā Malo.”

Ioe, atonu o loo e faalogo pea i le taimi nei i osofaʻiga a tagata faatupu faalavelave po o mala faalenatura, po ua oo foʻi se mala iā te oe. Ae o le suʻesuʻeina o le Tusi Paia, o le a e talitonu ai e lē o tuulafoaʻia e le Atua tagata. Auā foʻi, “e lē o mamao o ia mai iā i tatou taʻitoʻatasi.” (Galuega 17:27) Ma o le a taunuu lana folafolaga e toe faaleleia mea na faaleagaina e o tatou uluaʻi mātua.—Isaia 55:11.

[Faaopoopoga i lalo]

 [Siata/Ata i le itulau 7]

(Tagaʻi i le lomiga mo le ata atoa)

‘⁠Le Ata o le Mea Moni’—Mea ua Faaata e le Faleʻie Paia

LE FATA FAITAULAGA

Ua finagalo malie le Atua e talia le taulaga a Iesu.—EPERU 13:10-12.

LE OSITAULAGA SILI

Iesu.—EPERU 9:11.

1 I le Aso o le Togisala, na ofo atu ai e le ositaulaga sili se taulaga mo agasala a le nuu.—LEVITIKO 16:15, 29-31.

1 Iā Nisani 14, 33 T.A., na faataulaga ai e Iesu lona soifua mo i tatou.—EPERU 10:5-10; 1 IOANE 2:1, 2.

LE MEA PAIA

Le tulaga o Iesu ina ua faauuina e le agaga.—MATAIO 3:16, 17; ROMA 8:14-17; EPERU 5:4-6.

ʻIE PUIPUI

O le tino tagata o Iesu, o le papuipui lea ua vavae ai le olaga faalelalolagi mai le olaga faalelagi. 1 KORINITO 15:44, 50; EPERU 6:19, 20; 10:19, 20.

2 Na ulu atu ai le ositaulaga sili i le isi itu o le ʻie puipui e vavae ai le Mea Paia mai i le Mea e Sili Ona Paia.

2 Ina ua toetū mai o ia, na ‘ulu atu Iesu i le isi itu o le ʻie puipui,’ i lona afio aʻe i le lagi “ina ia tulaʻi . . . o ia i luma o le Atua mo i tatou.”—EPERU 9:24-28.

LE MEA E SILI ONA PAIA

Lagi.—EPERU 9:24.

3 A o iai i le Mea e Sili Ona Paia, na sausau e le ositaulaga sili le toto o taulaga i luma o le atolaau o le feagaiga.—LEVITIKO 16:12-14.

3 O le tuuina atu o le tāua o lona toto masaa, na saunia ai e Iesu se togisala moni mo a tatou agasala.—EPERU 9:12, 24; 1 PETERU 3:21, 22.