Na Faatāua e se Uluaʻi Lomitusi le Tusi Paia

UA FAITAU afe tausaga o le talafaasolopito o tusi ma tusi tāʻai na tusia. Peitaʻi e leʻi leva talu ona lomia tusi. Na lomia uluaʻi tusi i Saina i le 868 T.A., e faaaogā ai poloka laau ua vaneina ai mataʻitusi. E tusa o le 1455, na fauina ai e Johannes Gutenberg i Siamani se masini lomitusi ma lomia ai le uluaʻi Tusi Paia i le gagana Latina.

 Ae i tausaga mulimuli ane, na matuā olaola ai le tufatufaina atu o Tusi Paia ma isi tusi ona ua tele fale lomitusi. O le nofoaga autū na lomia ai tusi i Siamani, o Nuremberg, ma o se alii na ola aʻe i lenā aai, o Anton Koberger, atonu o ia le tagata muamua i le lalolagi na tele ina lomia ma faasalalau atu le Tusi Paia.

E tatau ona faafetaia e tagata uma ē na muaʻi lomia le Tusi Paia, e pei o Anton Koberger. O lea la, seʻi o tatou uaʻi atu nei iā Koberger ma lana galuega.

“Sa Sili Ona Tāua iā te Ia le Tusi Paia”

Na tatalaina e Koberger le uluaʻi fale lomitusi i Nuremberg i le 1470. I le taimi o le sologa lelei o lana kamupani, e 24 masini lomitusi na faaaogāina i le taimi e tasi, e 100 tagata lomitusi, tufuga, ma isi tagata na faafaigaluegaina i Basel, Strasbourg, Lyon, ma isi aai o Europa. Sa lomia foʻi e Koberger tusitusiga faa-Latina anamua ma le tele o lomiga faasaienisi o lenā vaitaimi. A o faagasolo lana galuega, e 236 lomiga eseese sa ia lomia. O nisi lomiga e faitau selau itulau ma e lolomi faasolosolo i masini lomitusi e faagaoioi i lima.

O le lelei o le auala na lolomi ai tusi a Koberger, na lauiloa ai i le matagofie ma manino i le faitau. Na tusi Alfred Börckel, o se alii tusitala o talafaasolopito: “E tausisi lava Koberger i le faaaogāina o mataʻitusi e manino ma olaola tetele. E leʻi faatagaina ona faaaogā mataʻitusi e lē manino lelei pe a lolomi.” E lē gata i lea, o le tele lava o lomiga ma Tusi Paia a Koberger e iai ata manino na faia mai i mamanu o laau na vaneina.

Na tusi Oscar Hase, o le tusitala o le olaga o Koberger e faapea, mai i le amataga seʻia oo i le iʻuga o le galuega a Koberger, “e manino mai, sa sili ona tāua iā te ia le Tusi Paia.” Sa taumafai malosi Koberger ma ana aumea ia maua kopi e sili ona faatuatuaina o le Tusi Paia. E mautinoa e leʻi faigofie lenei mea, ona o le tele o manusikulipi anamua sa faapelepele i ai isi monaseri, ma e seāseā mafai ona ave i nisi e kopiina, ae afai foʻi e ave, e mo na o sina taimi.

Tusi Paia Faa-Latina ma le Faa-Siamani

E 15 lolomiga eseese o le Tusi Paia faa-Latina (Biblia Latina) sa faia e Koberger, e iai le uluaʻi lomiga lea na maua i le 1475. O nisi lomiga o loo aofia ai ata o le vaa o Noa, Tulafono e Sefulu, ma le malumalu o Solomona. I le 1483, e tusa ma le 1,500 Tusi Paia Siamani (Biblia Germanica) na lomia e Koberger, o se aofaʻiga e leʻi faapea ona iai muamua. O lenei Tusi Paia e silia i le 100 ata na faia mai i mamanu na vaneina i laau, ina ia faaoso ai le naunau o le ʻaufaitau, faamanino ai nei mataupu, ma faamanatu atu ai tala masani o le Tusi Paia i ē e lē mafai ona faitau i ai. Na faataʻitaʻi i lenei faiga, ē na mulimuli ane tusia ata o le Tusi Paia, aemaise lava i Tusi Paia Siamani.

I le 1483, na taatele ai le Tusi Paia Siamani a Koberger, ma e na o le pau lenā o le lomiga Siamani na mafai ona ia lomia. E ui lava sa fetuunaʻi ma le faaeteete e ana faatonu faaupuga ina ia ōgatusa ma le Vulgate, o le Tusi Paia Latina e fiafia i ai le lotu, ae sa faavae lana lomiga i le faaliliuga a le ʻau Ualetenese, * lea na faasāina i senituri lona 14. I le tausaga na sosoo ai, na taumafai ai Pope Innocent VIII e tafiesea le ʻau Ualetenese. Sa teena pea e le lotu le Tusi Paia sa lomia i le gagana masani a tagata. Iā Mati 22, 1485, na taʻua ai e Berthold, o le Epikopo sili o Mainz i Siamani, o se solitulafono le faaliliuina o le Tusi Paia i le gagana Siamani. Iā Ianuari 4 o le tausaga na sosoo ai, na toe faamalosia ai e Berthold lenā tulafono. I na taimi fesouaʻiina, e leʻi toe taumafai ai lava Koberger e lolomi le Tusi Paia i le faa-Siamani.

E ui i lea, e leʻi faalēaogāina le tautigā o Anton Koberger. Sa taʻimua o ia i le faaaogāina o le faiga fou o le lomia o tusi, ina ia maua le tele o tusi eseese i Europa e taugofie. O lea, sa aogā le galuega a Koberger e maua ai e tagata lautele le Tusi Paia.

[Faaopoopoga i lalo]

[Ata i le itulau 26]

Mai i le agavale i le taumatau: Tanielu i le lua o leona; mataʻitusi matatetele lanu auro; mataʻitusi manino ma olaola tetele

[Ata i le itulau 26]

Koberger

[Ata i le itulau 26]

O vala eseese o Tusi Paia Latina ma Siamani a Koberger, ua faaalia ai teuteu mananaia ma faamatalaga e uiga i le Kenese 1:1

[Ē Ana le Ata i le itulau 26]

Ata uma o le Tusi Paia: Courtesy American Bible Society Library; Koberger: Mit freundlicher Genehmigung der Linotype GmbH