Aʻoaʻoga a le Tusi Paia

O Ai le Atua?

O loo talanoaina i lenei mataupu ni fesili atonu sa e fia maua i ai ni tali, ma o loo faaalia ai mau o le Tusi Paia e maua ai. E fiafia Molimau a Ieova e tou te talanoa i nei tali.

1. O ai le Atua?

O le Atua moni, o ia o Lē na faia mea uma lava. Ua taʻua o ia i le Tusi Paia o le “Tupu o le vavau,” o lona uiga e leai sona amataga, e leai lava sona gataaga. (Faaaliga 15:3) Ona o le Atua o le Puna o le ola, e tatau la ona tatou tapuaʻi atu tau lava o ia.—Faitau le Faaaliga 4:11.

2. E faapeʻī le Atua?

E leai se tasi ua vaai i le Atua auā o le Agaga o ia, o lona uiga e sili atu ona maualuga o ia i foafoaga faitino o loo ola i le lalolagi. (Ioane 1:18; 4:24) Ua faaalia uiga o le Atua i mea na ia faia. O se faaaʻoaʻoga, pe a tatou mātauina le auala ua faia ai laau ma le matalasi o o latou fua ma fugālaau eseese, ua tatou iloa ai le alofa ma le atamai o le Atua. O le telē o le vateatea, ua taʻu mai ai le mana o le Atua.—Faitau le Roma 1:20.

E tatou te aʻoaʻoina mai i le Tusi Paia le tele o isi mea e faatatau i uiga o le Atua. O se faaaʻoaʻoga, ua taʻu mai ai mea e fiafia i ai le Atua ma mea e lē fiafia i ai, le auala e feagai ai o ia ma tagata, ma ona uiga faaalia i tulaga eseese.—Faitau le Salamo 103:7-10.

3. Pe e iai se suafa o le Atua?

Na fetalai Iesu: “Lo matou Tamā e o i le lagi, ia faapaiaina lou suafa.” (Mataio 6:9) E ui ina tele faalagiga o le Atua, ae tasi lava lona suafa. E tofu le gagana ma le auala e faaleo ai. I le faa-Peretania e masani ona faaleo, “Jehovah,” a o “Ieova” i le faa-Samoa.—Faitau le Salamo 83:18.

Ua aveesea le suafa o le Atua mai i le tele o Tusi Paia, ae suia i le upu Alii po o le Atua. Ae ina ua tusia le Tusi Paia, sa iai le suafa o le Atua e tusa ma le 7,000 taimi. Sa faalauiloa e Iesu le suafa o le Atua i lona faaaogāina pe a faamatala le Afioga a le Atua i tagata. Sa fesoasoani o ia i tagata ina ia iloa le Atua.—Faitau le Ioane 17:26.

 4. Po o manatu alofa mai Ieova iā i tatou?

O loo faaalia le naunau mai o Ieova e ala i le faafofoga mai i a tatou tatalo. (Salamo 65:2) Talu ai ua tele mafatiaga, po o lona uiga, e lē o manatu mai le Atua iā i tatou? Ua fai mai nisi o loo tofotofoina i tatou e le Atua i mafatiaga, ae e lē saʻo lea manatu. Ua faapea mai le Tusi Paia: “E mamao lava i le Atua moni ona faia o se mea leaga.”—Iopu 34:10; faitau le Iakopo 1:13.

Ua faamamaluina e le Atua le tagata i le tuuina i ai o le filifiliga saʻoloto. Pe e tatou te lē talisapaia ea lo tatou saʻolotoga e filifili ai e auauna i le Atua? (Iosua 24:15) Ua tele mafatiaga ona ua filifili tagata e faia mea leaga i isi. E tigā le finagalo o Ieova i le silasila mai i na faiga lē tonu.—Faitau le Kenese 6:5, 6.

Ua toeitiiti ona faaaogā lea e Ieova Iesu e soloiesea mafatiaga ma ē o faapogaia. Ae e iai māfuaaga lelei ua faataga ai e Ieova mafatiaga mo sina taimi. O le a talanoaina i se isi lesona le pogai ua faataga ai e le Atua mafatiaga.—Faitau le Isaia 11:4.

5. O le ā le mea o finagalo le Atua e tatou te faia?

Na faia i tatou e Ieova ina ia tatou iloa ma alolofa iā te ia. E finagalo o ia ia tatou iloa le upu moni e uiga iā te ia. (1 Timoteo 2:4) Pe a tatou suʻesuʻe le Tusi Paia, ona mafai ai lea ona avea le Atua ma a tatou Uō.—Faitau le Faataoto 2:4, 5.

E tatau ona sili atu ona tatou alolofa iā Ieova nai lo o se isi, auā o ia na foaʻi maia le ola. E faaalia lo tatou alofa i le Atua i le tatalo atu iā te ia, ma faia lona finagalo. (Faataoto 15:8) Ua talosaga mai Ieova iā i tatou ina ia faia isi ma le alofa.—Faitau le Mareko 12:29, 30; 1 Ioane 5:3.

Mo nisi faamatalaga, tagaʻi i le mataupu 1 o lenei tusi, O ā Aʻoaʻoga Moni a le Tusi Paia? ua lomia e Molimau a Ieova.

[Ata i le itulau 17]

Pe e iai se māfuaaga lelei ua faataga ai mafatiaga mo sina taimi?