Aʻoaʻoga a le Tusi Paia

Aiseā ua Lē Taofia ai e le Atua Mea Leaga ma Mafatiaga?

Ua lāgā i lenei mataupu nisi o fesili atonu na e taumānatu i ai, ma tali mai i le Tusi Paia. E fiafia Molimau a Ieova e talatalanoa ma oe e faatatau i nei tali.

1. Na faapefea ona amata mai le leaga?

Na amata ona iai le leaga i le lalolagi ina ua faia e Satani le uluaʻi pepelo. E leʻi leaga Satani i le taimi na foafoaina ai o ia. Sa avea o ia o se agelu e lelei atoatoa, ae e “leʻi tumau lava o ia i le upu moni.” (Ioane 8:44) Na tuʻinanau o ia i le tapuaʻiga e na o le Atua e tatau i ai. Na ia ʻolegia ma faasesēina Eva i le amataga ina ia usitaʻi atu iā te ia ae lē o le Atua. Na ʻau atu Atamu i le lē usitaʻi o Eva i le Atua. O le filifiliga a Atamu na iʻu ai i mafatiaga ma le oti.​—Faitau le Kenese 3:1-6, 17-19.

Na uunaʻia e Satani Eva e aua le usiusitaʻi i le Atua, ma ua la foua ai Lana pule silisili ese. O le toʻatele o tagata ua aufaatasi ma Satani i le teena o le Atua o ia o le Pule. O lea la, o Satani le “pule o le lalolagi.”​—Faitau le Ioane 14:30; Faaaliga 12:9.

2. Pe sa ponā le foafoaga a le Atua?

Sa mafai lelei e tagata ma agelu na foafoaina e le Atua ona usitaʻia faatulagaga a le Atua. (Teuteronome 32:4, 5) Ua tuu mai iā i tatou le saʻolotoga e filifili ai e fai le lelei po o le leaga, ma ua maua ai le avanoa e faaali atu ai lo tatou alofa i le Atua.​—Faitau le Iakopo 1:13-15; 1 Ioane 5:3.

3. Aiseā ua lē taofia ai e le Atua mafatiaga?

O loo onosaʻi mai pea Ieova i ē e tetee i lana pule silisili ese, ina ia faaalia ai, e lē taulau pulega a tagata pe a aunoa ma ia. Ua manino mai lea tulaga e tusa ma le talafaasolopito o tagata i le 6,000 tausaga ua mavae. E lē o mafai e pulega faaletagata ona aveesea taua, solitulafono, le lē faamasinotonu, ma faamaʻi.​—Ieremia 10:23; faitau le Failauga 7:29; 8:9; Roma 9:17.

Peitaʻi, e maua aogā e i latou e taliaina le Atua e avea ma o latou Pule. (Isaia 48:17, 18) Ua lē o toe umi ona faaumatia lea e Ieova o faigāmalo uma faaletagata. E na o ē e usiusitaʻi i le pulega a le Atua e tumau pea i lenei lalolagi.​—Isaia 2:3, 4; 11:9; faitau le Tanielu 2:44.

  4. O le ā le avanoa ua tatou maua ona o le onosaʻi pea o le Atua?

Na finau atu Satani, e leai se isi e fia usitaʻi ma faamaoni iā Ieova. O le onosaʻi pea o le Atua, ua mafai ai ona tatou filifili pe mananaʻo i Lana pule po o pulega a tagata, ma ua faaalia lea i le auala e tatou te ola ai.​—Faitau le Iopu 1:8-11; Faataoto 27:11.

5. E faapefea ona tatou filifili e avea le Atua ma Pule?

E ala i le saʻili ma faatino le tapuaʻiga moni lea e faavae i lana Afioga, le Tusi Paia. (Ioane 4:23) E tatou te ʻalofia foʻi faiga faapolotiki ma taua, e pei ona sa faia e Iesu.​—Faitau le Ioane 17:14.

E faaaogā e Satani lona mana e uunaʻia ai amioga ma faiga lē mamā. O le ʻalofia o nei faiga, e teena ma ulagia ai i tatou e nisi o o tatou aiga ma uō. (1 Peteru 4:3, 4) Ua iā i tatou la se filifiliga. Po o le a tatou aufaatasi ea ma ē e alolofa i le Atua? Po o le a tatou usitaʻia ana tulafono atamai ma alofa? Pe a tatou faia faapea, ua tatou faamaonia ai le pepelo a Satani e faapea, e leai se isi e usitaʻi i le Atua.​—Faitau le 1 Korinito 6:9, 10; 15:33.

[Ata i le itulau 17]

Mo nisi faamatalaga, tagaʻi i le mataupu e 11 o lenei tusi, O ā Aʻoaʻoga Moni a le Tusi Paia?, ua lomia e Molimau a Ieova.

[Ata i le itulau 16]

Na faia e Atamu se filifiliga leaga

[Ata i le itulau 17]

O a tatou filifiliga e iloa ai pe e tatou te mananaʻo e avea le Atua ma o tatou Pule