Ua Fesili Mai le ʻAufaitau . . .

Faamata e lagona le fiu e ola e faavavau i le Parataiso?

▪ Ua taʻua i le Tusi Paia lo tatou faamoemoe e ola e faavavau i le Parataiso i le lalolagi. (Salamo 37:29; Luka 23:43) Faamata e tatou te fiu e ola e faavavau i se olaga e lelei atoatoa?

E tāua tele lea fesili. Ua iloa e tagata suʻesuʻe, e lagona e tagata le popole ma le mafatia, po o le faia o se mea e afāina ai lona ola, pe a lagona le fiu. O le lagona lenā e iai i le tagata pe afai e leai se uiga o lona olaga. Faamata e lagona le fiu e i latou o le a ola ai i le Parataiso i aso taʻitasi?

Muamua lava, ia manatua, o lē ua folafolaina mai le ola e faavavau, o Ieova le Atua lē e ana le Tusi Paia. (Ioane 3:16; 2 Timoteo 3:16) O lona uiga autū, o le alofa. (1 Ioane 4:8) E alofa mai lava o ia iā i tatou ma o mea lelei uma ua tatou maua, e mai iā te ia.​—Iakopo 1:17.

Ua silafia e Lē na faia i tatou, e tatou te fiafia pe a faia galuega e aogā. (Salamo 139:14-16; Failauga 3:12) I le Parataiso, o le a lē toe iai se lagona ua pei i tatou o ni masini. Ae o le a aogā a tatou galuega iā i tatou ma ē e pele iā i tatou. (Isaia 65:22-24) Pe faamata e te lagona le fiu i le olaga pe afai o e faia se galuega e te fiafia ai, ma faaaogā i ai ou tomai?

Peitaʻi, e lē faatagaina e Ieova so o se isi e ola ai i le Parataiso, ae e na o ē e mulimuli i lona Alo o Iesu e maua lana meaalofa o le ola e faavavau. (Ioane 17:3) A o iai Iesu i le lalolagi, na fiafia lava o ia e fai le finagalo o lona Tamā. Na ia aʻoaʻoina ona soo e ala i upu ma faaaʻoaʻoga, e sili le fiafia e maua i le foaʻi i lo o le talia. (Galuega 20:35) Pe a toe avea le lalolagi ma Parataiso, o le a ola tagata uma e tusa ma poloaʻiga silisili e lua, o le alofa i le Atua ma le alofa i tagata. (Mataio 22:36-40) Seʻi manatu la i le manaia o le galulue ma tagata e fiafia i a latou galuega, ma e lē manatu faapito ae e alolofa iā te oe! Pe faamata e te fiu i tagata faapena?

O ā isi mea o le a iai i le Parataiso? E tatou te aʻoaʻoina se mea fou i aso uma e uiga i Lē na faia i tatou. Ua tele mea ofoofogia ua iloa e tagata suʻesuʻe e faatatau i foafoaga a Ieova. (Roma 1:20) Ae ui i lea, e itiiti lava se mea ua tatou iloa ai e faatatau i ana foafoaga. I le faitau afe o tausaga ua mavae, na toe manatunatu ai le tagata faamaoni o Iopu i foafoaga a Ieova, ma faapea mai: “O ni vaega itiiti nei o ana galuega, e itiiti foʻi mea ua tatou faalogo ai iā te ia! Ae peitaʻi, o ai ea e mafai ona malamalama i lona faititili malosi?” O loo moni pea na upu i aso nei.​—Iopu 26:14.

E tusa lava pe tatou te ola e faavavau, e lē mafai ona tatou iloa mea uma e uiga iā Ieova le Atua ma ana galuega. Ua taʻua i le Tusi Paia, ua tuu e le Atua i o tatou loto le faanaunauga e ola e faavavau. Peitaʻi, “e lē mailoa e le tagata galuega ua faia e le Atua mai le amataga e oo i le gataaga.” (Failauga 3:10, 11, O le Tusi Paia Samoa​—Lomiga 1884) Faamata e iai se taimi o le a e fiu ai e aʻoaʻo mea fou e uiga i Lē na faia oe?

E oo lava i le taimi nei, e seāseā lagona le fiu e i latou o loo pisi e faia galuega lelei mo isi, ma faamamaluina ai le Atua. E mautinoa, afai e tatou te pisi pea e faia galuega faapea, o le a lē taitai ona lagona le fiu, e tusa lava pe tatou te ola e faavavau.

[Ata i le itulau 27]

Lalolagi: Image Science and Analysis Laboratory, NASA-Johnson Space Center; Aniva: The Hubble Heritage Team (AURA/​STScI/​NASA)