Sa ou Miti i se Olaga Taʻutaʻua

Ua Faamatalaina e Zoya Dimitrova

Na ou maua le olaga na ou miti i ai i le 15 o oʻu tausaga, o le galue lea ma se ʻaufaafiafia e faia faaaliga faapitoa (circus). Ae na tupu se faalavelave matuiā iā Setema 4, 1970. I se tasi o a matou faaaliga, a o tā laʻu fiti maualuga i le ʻea, na ou misia lima o laʻu paga sa tatau ona puʻeina aʻu ma faafuaseʻi ai loa ona ou paʻū i le eleele.

NA OU fanau iā Tesema 16, 1952, ma na matou nonofo ma oʻu mātua ma loʻu uso matua i Sofia, i Bulgaria. Sa avea Bulgaria ma atunuu Komunisi i lenā taimi, ma e ui lava sa faataga lotu ae e leʻi fiafia i ai le malo. E leʻi talitonu le toʻatele i le Atua, ae o ē na talitonu, e latou te leʻi fia faailoa atu i isi. E ui lava sa iai le tapuaʻiga a lo matou aiga, ae ou te leʻi ola aʻe i se lotu pe manatu foʻi i le Atua.

A o ou laʻitiiti, na iloa ai loʻu fiafia i so o se ituaiga o taaloga, aemaise lava le tāfiti. O le 13 o oʻu tausaga na sau ai se tamāloa i la matou aʻoga, e suʻe se teineitiiti e mafai ona toleni mo faaaliga faapitoa. Na filifilia aʻu e laʻu faiaʻoga o taaloga. Sa ou fiafia lava e tiʻetiʻe i le taavale manaia a le pule, a o faimalaga atu i le mea e faia ai faatalanoaga ma faataʻitaʻiga. Oka loʻu fiafia ina ua filifilia aʻu. Na amata i inā ona ou toleni ma faamalositino mo le silia i le lua tausaga. Na māeʻa aʻu toleniga i le 15 o oʻu tausaga, ma amata loa ona matou faimalaga ma le ʻau faifaaaliga. Ina ua soo Bulgaria, ona matou faasolo atu lea i atunuu sa avea muamua ma vaega o le Iuni faa-Sovieti, faapea Algeria, Hagakeri, ma le atunuu na taʻua muamua o Yugoslavia.

E tolu tausaga o oʻu fiafia pea i lea olaga. Na tupu le faalavelave lea e taʻua i le amataga a o fai la matou faaaliga i Titov, lea na taʻua muamua o Veles i Maketonia. Sa tā laʻu fiti maualuga ina ua togi faataaviʻoviʻo aʻu i le ʻea e laʻu paga a o tautau i se isi suigi e ū i lalo lona ulu, ma sauni e puʻe oʻu lima pe a ou paʻū ifo i lalo. Na ou misia lima o laʻu paga, ma ona ua motu le maea e taofia aʻu, na ou paʻū ai loa mai le maualuga e 20 futu (6 mita). Na ave faatopetope aʻu i le falemaʻi, ma na iloa ai ua gaui ni oʻu ivi ʻasoʻaso, o loʻu lima, ma loʻu ivitū. Ou te leʻi iloa ni mea mo ni nai aso, ma ou te leʻi manatua foʻi le mea na tupu. Ina ua ou feoloolo, na ou iloa ai ua pē loʻu tino e amata mai i loʻu puimanava e oo i oʻu tamatamaʻivae. O loʻu talavou sa ou talitonu ai, e iai lava se togafitiga po o se taotoga e mafai ona ou toe savali ai, ma atonu ou te toe foʻi i laʻu galuega.

Na faia oʻu togafitiga i falemaʻi faapitoa mo le lua ma le ʻafa tausaga, ma le faamoemoe o le a ou toe malosi. Na iʻu ina ou iloa, ua siliga se faamoemoe. O lea la, ua mou atu  laʻu miti sa iai ma e ese le olaga lea ua ou ola ai, auā ua ou faaaogāina se nofoa faataavalevale.

Amata se Olaga Fou

Sa ou lagona le mafatia ona o le suiga ua oo i loʻu olaga. E faigatā tele le olaga ua ou iai ma ua mou atu loʻu faamoemoe. I le 1977 na asia ai aʻu e se alii talavou e igoa iā Stoyan. Sa ou valaaulia o ia i totonu ina ua ou iloa, o ia o se tuagane o se tasi sa ma galulue faatasi. A o ma talatalanoa, sa fesili mai e faatatau i loʻu faamoemoe pe ou te toe malosi. O loʻu lē fiafia i loʻu olaga sa ou tali atu ai, e lē toe aogā ni togafitiga. Ina ua fai mai o ia e na o le Atua e mafai ona fesoasoani mai iā te aʻu, sa ou tali atu ma le lototigā: “Afai e iai se Atua, aiseā la ua ou faapea ai?”

Sa galue muamua Stoyan o se tasi e faafiafia i faaaliga faapitoa i Amerika ae ua avea nei o ia ma Molimau a Ieova. Sa ia faamatala mai ma le agalelei le lumanaʻi matagofie o loo taʻua i le Tusi Paia. E ese loʻu fiafia ina ua ou iloa, e lē o toe umi ae avea loa le lalolagi ma parataiso. Na matuā ootia loʻu loto i le folafolaga “e lē toe iai se oti, po o se faanoanoa, po o se tagiauē, e lē toe iai foʻi se tigā.” (Faaaliga 21:4) E ese loʻu naunau e toe fia maua loʻu malosi. Na ou taliaina loa le faia o aʻu lesona faale-Tusi Paia ma na amata ai i inā se olaga fou mo aʻu. Ua ou maua se faamoemoe matagofie.

Sa ou faatali ma le naunau mo aʻu lesona i vaiaso taʻitasi. Sa faia muamua e Stoyan aʻu lesona ona faia lea e Totka, o se tamaʻitaʻi Molimau a Ieova agalelei. O lana fesoasoani mai na vave ai ona ou malamalama i le Tusi Paia, ma tuuina atu loʻu ola iā Ieova le Atua. I lenā taimi sa leai se isi i Sofia na agavaa e faia loʻu papatisoga. O lea, na ou faatali ai mo le asiasi mai o se alii Molimau a Ieova mai Maketonia. Iā Setema 11, 1978, e tusa lea ma le tausaga talu ona faia aʻu lesona, na papatisoina ai aʻu i se tapu tāʻele i loʻu fale. Na ou olioli ma lagona ua aogā loʻu olaga, ina ua ou papatiso o se Molimau a Ieova.

Sa pei o se afi mumū i loʻu loto aʻoaʻoga moni a le Tusi Paia. Sa ou talanoa i ē uma na asiasi mai i loʻu fale i loʻu faamoemoe ua iai. Peitaʻi e leʻi talitonu tagata iā te aʻu, ona atonu na manatu ua leaga loʻu mafaufau i le faalavelave na tupu iā te aʻu.

O se Agasala Matuiā

O le taimi lea o loo faasā le talaʻiga a Molimau a Ieova i Bulgaria, ma e lē toʻatele ni Molimau na iai. Sa leai ni sauniga a Molimau a Ieova na mafai ona ou auai i ai, ma e seāseā foʻi ona matou feiloaʻi ma ē e tutusa o matou talitonuga. Ona o lea, atoa ai ma loʻu  lē mataala i le faauō ma ē e lē ola e tusa ma taʻiala o le Tusi Paia, na iʻu ai i loʻu faia o se agasala matuiā.

Na matuā fasia aʻu e loʻu lotofuatiaifo, ma ou lagona le tigā tele ona ua ou agasala i le Atua. O loʻu māsiasi ma le mafatia, na ou tatalo faatauanau ai mo le faamagaloga a Ieova. Ae na toe faamalosia loʻu tulaga faaleagaga ma le olioli e auauna iā Ieova, ona o le fesoasoani mai ma le alolofa o toeaina Kerisiano. Maʻeu le manaia o le auauna iā Ieova ma se lotofuatiaifo mamā, faapea le aufaatasi ma lana faalapotopotoga mamā!

Fiafia e ui i Faigatā

O le faalavelave na tupu iā te aʻu i le 40 tausaga talu ai na faamutaina ai laʻu miti e faafiafia ma faimalaga, ae o lea ua iʻu i le na o se nofoa faataavalevale. Peitaʻi ou te lē o toe tepa i tua ma le faanoanoa i le manatu ua lē aogā loʻu olaga. Na fesoasoani aʻoaʻoga moni o le Tusi Paia ou te iloa ai, e itiiti le aogā o se olaga o le faafiafia i faaaliga, ma e lē maua ai se fiafia tumau. Ua ou vaaia le faanoanoa o olaga o nisi sa matou galulue faatasi, o ē na faaauau pea i le faia o faaaliga. Peitaʻi, ua ou maua le ʻoa e sili ona tāua, o le iai lea o se mafutaga māfana ma Ieova le Atua o Lē na faia aʻu. Ua sili atu le fiafia lea ua ou mauaina, i lo o le taimi sa ou faafiafia ai i faaaliga.

E lē gata i lea, ua ou fiafia e vaai atu, e toʻatele ua malamalama i aʻoaʻoga moni a le Tusi Paia, ma ua papatisoina ma auauna iā Ieova lo tatou Atua alofa. E toʻaitiiti se vaega o Molimau a Ieova na iai i Bulgaria i le taimi na amata ai aʻu lesona i le 1977. E oo lava foʻi i le taimi muamua na lesitalaina ai Molimau a Ieova i le 1991 ina ua paʻū le faigāmalo a Komunisi, e na o le selau Molimau i le atunuu atoa. Maʻeu le olioli i le vaai atu ua faateleina le ʻautalaʻi o le Malo i aso nei, e toeitiiti atoa le 1,800!

O loo tele galuega e ao ona faia i Bulgaria, ona e toʻatele o loo fia malamalama i le Afioga a le Atua. E mātauina lea tulaga i le aofaʻiga tele e 3,914 mo le Faamanatuga o le  maliu o Keriso i le 2010. Ou te lagona le faagaeetia ona o le faamaoniga lea o le faamanuia a Ieova i si amatamataga faatauvaa i Bulgaria. Ua ou vaaia le avea o “lē e faatauvaa ma se atunuu malosi” e pei ona valoia i le Isaia 60:22.

O se isi mea mataʻina ma fiafia o loʻu olaga, o le mauaina lea O le Tusi Paia o le Faaliliuga a le Lalolagi Fou i le gagana Bulgaria. Na faalauiloaina i le Tauaofiaga Itumalo iā Aokuso 2009 i Sofia, lea sa faamatuaina “Ia Faaauau Ona Mataala!” O se miti ua taunuu le mauaina o lenei Tusi Paia i laʻu gagana. E lē taumatea o le a aogā i le toʻatele i Bulgaria ina ia malamalama ai i aʻoaʻoga moni a le Tusi Paia.

E ui ina itiiti mea ou te mafaia i le talaʻia o le tala lelei o le Malo o le Atua, ae ou te fiafia tele e faailoa atu aʻoaʻoga a le Tusi Paia i oʻu tuaoi ma isi e asiasi mai i loʻu fale. I se tasi aso, a o savali ane loʻu tuaoi na ou valaau i ai mai i loʻu poletito. Sa ia talia laʻu valaaulia ma ina ua uma ona ou taʻu atu iā te ia ni manatu faalaeiau mai i le Tusi Paia, sa ia talia loa se lesona faale-Tusi Paia. Sa ou fiafia lava ina ua papatisoina o ia ma avea o soʻu uso faaleagaga. Na ou maua le faaeaga e fesoasoani ai i ni fafine se toʻafā ina ia papatisoina ma auauna iā Ieova.

O loʻu fiafiaga sili e maua mai lea i le auai e lē aunoa i sauniga a Molimau a Ieova, ma le silia i le selau o uso ma tuafāfine o ē ua avea ma oʻu aiga. Ua avea o se luʻi mo aʻu le auai i sauniga ona e lē maua i lo matou atunuu auala o femalagaaʻiga mo tagata e iai manaʻoga faapitoa ma ē matutua. Peitaʻi ou te matuā talisapaia le fesoasoani a se alii Molimau talavou. I sauniga taʻitasi, e na te sii aʻu mai i loʻu fale i le taavale, ma toe sii i totonu o le Maota mo Sauniga, ma e toe fai faapena pe a foʻi i le fale. Ou te faafetaia Ieova ona ua ou aufaatasi ma se aiga faaleagaga e alolofa.

Pe a toe tepa i tua, ou te iloa ai le matuā suia o loʻu olaga mai i le mea na ou miti i ai a o ou talavou. Ua ou maua le fiafiaga sili i le auaunaga iā Ieova ma se lumanaʻi matagofie. E pele iā te aʻu le folafolaga a Ieova e faapea i le lalolagi ua avea ma parataiso, “o le a osooso ai lē ua pipili e pei o le ʻaila.” (Isaia 35:6) Ou te tepa taulaʻi atu ma le mautinoa i le aso o le a ou lē toe manaʻomia ai loʻu nofoa faataavalevale, ona ua faafoʻisia loʻu malosi e pei ona iai a o talavou.

[Faamatalaga faaopoopo i le itulau 30]

ʻO loʻu fiafiaga sili e maua mai lea i le auai pea i sauniga a Molimau a Ieova’

[Faamatalaga faaopoopo i le itulau 31]

ʻO se mea mataʻina i loʻu olaga o le mauaina lea O le Tusi Paia o le Faaliliuga a le Lalolagi Fou i le gagana Bulgaria’

[Ata i le itulau 29]

O le 15 o oʻu tausaga na ou faafiafia ai i faaaliga