Pe e Tatau Ona Aʻoaʻoina Fanau i le Atua?

“Ua lava ma totoe lotu tatou te feitagaʻi ai, ae e lē lava e tatou te fealofani ai.”—TUSITALA PERETANIA, O JONATHAN SWIFT.

NA TAʻUA lenā manatu e Swift i le senituri lona 18, ma ua ioe i ai le toʻatele i aso nei. O le mea moni, e talitonu nisi e lē tatau i mātua ona aʻoaʻo a latou fanau e uiga i le Atua. E latou te manatu e lē o maua e tamaiti e ola aʻe i aiga lolotu se saʻolotoga e filifili ai.

O le ā sou manatu? O lē fea o faamatalaga nei e lelei ma aogā?

● E tatau ona faasā mātua e aua le aʻoaʻoina fanau e uiga i le Atua.

● E tatau ona faatali mātua seʻi matutua le fanau ona faatoʻā talanoa lea i ai i mataupu faalelotu.

● E ao i mātua ona aʻoaʻo o latou talitonuga e uiga i le Atua, i a latou fanau a o lāiti. A o faasolo ina matutua le fanau, e tatau ona faalaeiauina i latou e mātua, ina ia fefulifulisaʻi i latou lava i lenei mataupu.

● E tatau ona faamalosia le fanau e mulimuli i le tapuaʻiga a mātua, e aunoa ma le fesiligia pe e moni.

Pe e Leaga Lotu mo le Fanau?

E leai se matua alofa e manaʻo e oo se mea leaga i lana tama ona o ia. Ae pe e lagolagoina e mea ua iloa mai i suʻesuʻega, le manatu o ē e lē mananaʻo e aʻoaʻo le fanau e uiga i le Atua? Mo le tele o tausaga, ua iloilo ai e le ʻausuʻesuʻe aafiaga e oo i fanau, ona o talitonuga faalelotu o mātua. O le ā le mea ua iloa mai ai?

Ua iloa e le ʻausuʻesuʻe, nai lo o le iai o ni aafiaga leaga, e iai aogā o lotu i le fanau a o tuputupu aʻe. Na taʻua i se lipoti i le mekasini Social Science Research * i le 2008 e faapea: “Ua faaalia i suʻesuʻega ua faamalosia le mafutaga a mātua ma fanau ona o lotu.” Ua taʻua atili: “O le lotu ma le iloaina o le Atua, o vaega tāua ia o le olaga o alo ma fanau, ma e manaʻomia i faiā faaleaiga.” Seʻi mātau, e talitutusa nei suʻesuʻega ma le fetalaiga a Iesu: “E fiafia o ē e naunau i mea faaleagaga.”—Mataio 5:3.

Ae faapefea le manatu, e seʻiloga lava ua matutua le fanau ona faatoʻā aʻoaʻoina lea e faatatau i le Atua ma le lotu? Ua lē amanaʻia e lenā manatu le mea moni lenei: Ua pei le mafaufau o le tamaitiiti o se pakete e leai se mea o iai, ae o le a faatumuina. Ua iai la i mātua le filifiliga, pe e faatumu le mafaufau ma le loto o lana tama i taʻiala tau amio ma aʻoaʻoga moni, po o le faatumu i le mau manatu sesē ma le lē aogā mai i fafo atu o lona aiga.

O le ā le Auala e Faia Ai?

Ua faamaonia mai i le talafaasolopito, o lotu ua māfua ai le feitagaʻi ma le feʻainaʻi. E faapefea la i mātua ona ʻalofia le tulaga e pei ona taʻua e Jonathan Swift? O ā aʻoaʻoga e ao ona aʻoaʻoina ai a latou fanau ina ia alolofa ai i isi?

E iloa le auala e faia ai faapea, e ala mai i tali o fesili nei e tolu: (1) O ā mea e ao ona aʻoaʻoina e fanau? (2) O ai e tatau ona aʻoaʻoina i latou? (3) O ā auala e sili ona aogā e aʻoaʻoina ai i latou?

[Faaopoopoga i lalo]