E Mafai E Le Tusi Paia Ona Suia Olaga

O LE ā na uunaʻia se tamaʻitaʻi talavou ina ia toe foʻi i ona talitonuga faalelotu sa ola aʻe ai a o laʻitiiti? Seʻi faitau i lana faamatalaga.

“Ua iai nei se uiga moni o loʻu olaga.”—LISA ANDRÉ

TAUSAGA FANAU: 1986

ATUNUU: LUXEMBOURG

TALAAGA: AFAFINE FAAMAUMAUʻOA

OLAGA SA IAI: Na ou ola aʻe i Bertrange, o se tamaʻi taulaga e mamā, saogalemu, ma tamaoaiga, lea e lata i le aai o Luxembourg. O aʻu le uii i le fanau e toʻalima. O oʻu mātua o ni Molimau a Ieova, ma na la taumafai malosi ina ia aʻoaʻo i matou ma oʻu tuagane ma oʻu uso i talitonuga faa-Kerisiano.

I le amatamataga o loʻu olaga talavou, na amata ai ona iai ni oʻu masalosaloga i mea o loo aʻoaʻoina e Molimau a Ieova. Ou te leʻi amanaʻia nei masalosaloga i le taimi muamua, ae na faasolosolo mālie lava ona vaivai loʻu faatuatua. Na faia e oʻu mātua taumafaiga uma e taʻitaʻia ai aʻu i le ala saʻo, ae ou te leʻi taliaina le la fesoasoani. E aunoa ma lo la iloaina, sa ou faifaimea faatasi ma talavou o ē e leai se faaaloalo mo le tulaga pule. Sa ou manaʻo i le saʻolotoga lea na foliga na maua mai i le ituaiga o olaga na latou ola ai. E tele ina faia a matou patī, faia feusuaʻiga lē mamā, ma faaaogāsesēina fualaau faasāina ma le ʻava malosi. Sa ou matuā fiafia e faatasitasi ma nei tagata, o ē na foliga mai na faamalieina manaʻoga uma o o latou olaga.

Ae o le faafitauli, ou te leʻi maua le fiafia moni. Sa leai se uiga o le olaga sa iai faatasi ma na tagata, ona e leai ma se isi na manatu mamafa i mea tāua o le olaga. Ae sa eseese o matou manatu, ona sa ou matuā lē fiafia lava i le faatupulaʻia o faiga lē tonu i le lalolagi. A o faagasolo taimi, na ou lagonaina le matuā lotovaivai.

SUIA E LE TUSI PAIA LOʻU OLAGA: Na ou lagonaina le matuā lotovaivai i le 17 o oʻu tausaga. I le iloaina o loʻu lē fiafia, na fesili mai ai loʻu tinā mo se isi avanoa e toe suʻesuʻeina ai le Tusi Paia. Na ia faalaeiauina aʻu ina ia saʻiliʻili i aʻoaʻoga o loo iai, ona ou filifili lava lea o aʻu pe e usitaʻia pe e leai. O na talanoaga tuusaʻo ma le māfana, na matuā suia atoatoa ai loʻu olaga. Na ou lotomalie ina ia faia laʻu suʻesuʻega i le Tusi Paia e loʻu uso matua o Caroline, ma lona toʻalua o Akif. Na faatoʻā avea Akif o se Molimau a Ieova ina ua avea ma tagata matua. Ona o le olaga o Akif sa iai, na ou lagona ai e mafai ona ou talanoa iā te ia i so o se mea, o se mea sa tāua iā te aʻu.

 Na ou iloaina o le olaga sa ou ola ai e lē talafeagai mo se Molimau, ae sa ou manatu o le mea ou te faia i loʻu olaga, o se mataupu lea e fitoitonu iā te aʻu. Peitaʻi, na ou iloa mai i laʻu suʻesuʻega i le Tusi Paia, e aafia faalogona o Ieova i aʻu amioga. (Salamo 78:40, 41; Faataoto 27:11) Na ou iloa foʻi o loo aafia ai ma faalogona o isi tagata.

A o ou saʻiliʻili atili i le Tusi Paia, na ou iloa ai o loo iai māfuaaga saʻo ma mautinoa e talitonu ai o le Afioga lea a le Atua. O se faataʻitaʻiga, na ou aʻoaʻoina le tele o valoaga o le Tusi Paia ua faataunuuina, lea e matuā saʻo aʻiaʻi. O mea na ou aʻoaʻoina na fesoasoani e foʻia ai oʻu masalosaloga sa iai.

Pe tusa o le tausaga talu ona faia laʻu suʻesuʻega, na matou asiasi ai ma oʻu mātua i loʻu tuagane matua, lea sa galue tauofo i le ofisa o le lālā o Molimau a Ieova i Siamani. Sa ou lagona le matuā faagaeetia i le vaaia o le fiafia o loʻu tuagane. O le ituaiga fiafia tonu lenā sa ou saʻilia! Na ou matuā fiafia foʻi i le vaaia o isi Molimau sa galulue tauofo ai i inā. Na matuā ese lava i latou mai i tagata sa matou auaufaatasi, o ē e lē faamaoni ma e fiafia e fai mea e lamatia ai o latou ola. Mulimuli ane, na ou faia se tatalo faatauanau mai i le loto iā Ieova, ma tautō atu e auauna mo ia i loʻu olaga atoa. I le 19 o oʻu tausaga, na faailogaina ai le tuuina atu o loʻu ola iā Ieova e ala i le papatisoga.

AOGĀ IĀ TE AʻU: O lea ua iai nei se uiga moni o loʻu olaga. Ua ou maua le olioli i le aʻoaʻoina o isi i le Tusi Paia, ma fesoasoani iā i latou ina ia aʻoaʻoina e uiga iā Ieova ma ana folafolaga mo le lumanaʻi. Ua aogā foʻi i lo matou aiga, ona e latou te lē o toe popole iā te aʻu.

Ou te malamalama lelei i mea sesē na ou faia i le taimi ua teʻa, ae ou te taumafai ina ia aua neʻi toe mafaufau i ai. Ou te taulaʻi i le faamagaloga a Ieova ma lona naunau alofa mai iā te aʻu. Ou te talitonu ma le lotoatoa i upu o loo i le Faataoto 10:22, lea e faapea mai: “O le faamanuiaga a Ieova, e faatamaoaiga ai ma e na te lē faaopoopo i ai se tigā.”

[Faamatalaga faaopoopo i le itulau 12]

“E tele ina faia a matou patī, faia feusuaʻiga lē mamā, ma faaaogāsesēina fualaau faasāina ma le ʻava malosi”

[Faamatalaga faaopoopo i le itulau 13]

“Ou te malamalama lelei i mea sesē na ou faia i le taimi ua teʻa, ae ou te taumafai ina ia aua neʻi toe mafaufau i ai”