Ua Fesili Mai le ʻAufaitau . . .

Po o le a faaumatia le lalolagi i le 2012?

▪ “O le a lolofi atu le toʻatele o tagata i se aai i Falani, ona o le manatu e faapea o le a vaaia ai se faaaliga . . . E latou te talitonu o le a oo mai le iʻuga o le lalolagi iā Tesema 21, 2012, o le iʻuga o se faataamilosaga e 5,125 tausaga le umi, i le kalena anamua a tagata Maya.”—BBC News.

E ui ua valoia e taʻitaʻi lotu, ma i latou ua faapea mai o saienitisi, ma isi tagata vavalo o le senituri lona 21 le oo mai o le iʻuga o le lalolagi, ae e mautinoa lava e tumau pea le lalolagi mo se taimi umi. Ioe, o le a lē faaumatiaina le lalolagi i le 2012. O le mea moni, e lē gata o le a iai pea le lalolagi i lenā tausaga, ae e faapena foʻi tausaga o mulimuli mai.

Ua faapea mai le Tusi Paia: “E mavae atu le tasi tupulaga ae e sau le isi tupulaga; a o le lalolagi e tumau lea e faavavau.” (Failauga 1:4) Ia mātau foʻi le uiga o le manatu o loo taʻua i le Isaia 45:18: “O le fetalaiga lenei a Ieova, . . . o le Mataisau o Lē na faia le lalolagi, o Ia o Lē na faatumauina, na ia lē foafoaina fua ae na ia faia ina ia ʻainā: ʻO aʻu o Ieova, e leai se isi.’”

Pe e faaaluina e se tamā alofa le tele o itula e faia ai se meataalo e fiafia ai lona alo, ae mulimuli ane toe faaleagaina e le tamā lava ia? E lē o se gaoioiga alofa lenā mea. I se tulaga tutusa, na faia faapitoa foʻi e le Atua le lalolagi ina ia nonofo fiafia ai tagata. Na fetalai atu le Atua i le uluaʻi ulugalii, o Atamu ma Eva: “Ia fanafanau ma ia matuā faatoʻateleina, ia tumu ai le lalolagi ma ia galueaʻiina. Mulimuli ane, ua silasila atu le Atua i mea uma na ia faia, tagaʻi foʻi! ua matuā lelei lava.” (Kenese 1:27, 28, 31) E leʻi suia le finagalo o le Atua mo le lalolagi, ma e na te lē tuua le lalolagi ina ia faaumatiaina. Na fetalai Ieova e tusa ai ma ana folafolaga uma: “E lē foʻi fua mai iā te aʻu, ae e faia le mea ou te fiafia i ai, e taulau foʻi e tusa ma le mea na ou auina atu ai.”—Isaia 55:11.

Peitaʻi, e finagalo Ieova ina ia “faafanoina . . . i latou o loo faaleagaina le laueleele.” (Faaaliga 11:18) O loo taʻua lenei folafolaga i lana Afioga: “O ē e amio saʻo e latou te mau i le lalolagi, ma o ē e lē ponā e faatotoeina i le lalolagi. Ae e faaumatia o ē e amioleaga mai i le lalolagi; e liaʻieseina foʻi o ē e amio faapiʻopiʻo.”—Faataoto 2:21, 22.

O afea e tupu ai lenei mea? E lē mailoa e se tagata. Na fetalai Iesu: “E lē iloa e se tasi lea aso ma le itula, e oo lava i agelu i le lagi, po o le Atalii, ae ua na o le Tamā lava.” (Mareko 13:32) E lē o taumafai Molimau a Ieova e valoia le taimi e faaumatia ai e le Atua tagata amioleaga. E ui lava o loo latou nofouta i “le faailoga” o le iʻuga, ma talitonu o loo ola le fanau a tagata i le vaitaimi o loo taʻua i le Tusi Paia “o aso e gata ai,” ae e latou te lē iloa le taimi e oo mai ai “le iʻuga.” (Mareko 13:4-8, 33; 2 Timoteo 3:1) Ua latou tuu atu lenā faaiʻuga i lo latou Tamā i le lagi ma lona Alo.

I le taimi nei, o loo faaaluina e Molimau a Ieova o latou taimi i le talaʻia o le tala lelei o le Malo o le Atua, le malo i le lagi lea o le a pulea ma suia le lalolagi e avea ma se parataiso e filemu, lea o le a “fai . . . mo ē e amiotonu, e nonofo ai pea i latou e oo i le faavavau.”—Salamo 37:29.

[Ē Ana le Ata i le itulau 10]

Image Science and Analysis Laboratory, NASA-Johnson Space Center