Aperaamo—O se Tagata Lotomaulalo

O loo nofo ma le fiafia Aperaamo i le paolo o lona faleʻie, i se aso matuā vevela. A o vaavaai atu i le tafatafāilagi, na ia iloa atu ai ni tamāloloa se toʻatolu o loo asiasi mai i lo latou nuu. * E leʻi faatalatū o ia, ae na tamoʻe atu ma faafeiloaʻi tagata asiasi, ma pulunaunau atu e ō mai e fai sina mālōlōga ma se taumafataga. Na ia ofo atu iā i latou “sina mea tausami,” ae na ia saunia se taumafataga tele, o falaoa ua faatoʻā uma ona tao, pata, le suāsusu, ma aano o manu. O le laulauina e Aperaamo o lenei taumafataga i tagata asiasi, e lē gata ina faaalia ai lona agaga talimālō, ae ua faaalia ai foʻi lona lotomaulalo.—Kenese 18:1-8.

O LE Ā LE LOTOMAULALO? O le lotomaulalo, o le lē faamaualuga ma le lē fia sili. O se tagata lotomaulalo, e na te iloa e sili isi tagata uma iā te ia i so o se mea. (Filipi 2:3) E faalogologo lelei o ia i manatu ma fautuaga mai i isi, ma e lotomalie e faia galuega faatauvaa mo i latou.

NA FAAPEFEA ONA FAAALIA E APERAAMO LE LOTOMAULALO? Na auauna ma le fiafia Aperaamo i isi. E pei ona taʻua i le amataga, ina ua iloa atu e Aperaamo tagata asiasi e toʻatolu, sa vave ona ia alu atu ma saunia mea e latou te manaʻomia. E ui na vave ona saunia e Sara se taumafataga, ae mātau po o ai na tausolomua i le faia o le tele o gaoioiga: Ua tamoʻe atu Aperaamo e faafeiloaʻi i tagata asiasi, ona ia ofoina atu lea o se taumafataga mo i latou, na tamoʻe atu o ia i le lafu ma filifili mai se manu e fasi, ma na ia laulau atu meaʻai mo ē na asiasi mai. Na lotomalie o ia e faia nei galuega uma sa tatau ona faia e ana auauna, ma e leʻi manatu e lē tatau ona ia faia nei galuega faatauvaa.

Sa faalogo o ia i fautuaga a i latou sa i lana  vaavaaiga. E lē tele ni faamatalaga i le Tusi Paia e uiga i talanoaga a Aperaamo ma Sara. Peitaʻi, e faalua ona tatou faitau iai, na faalogo ma talia e Aperaamo fautuaga a Sara. (Kenese 16:2; 21:8-14) I se tasi o na mea na tupu, na matuā “tigā Aperaamo” i le fautuaga. Ae na talia e Aperaamo ma le lotomaulalo, ina ua fetalai mai Ieova iā te ia e lelei le fautuaga a Sara.

O Ā NI LESONA MO I TATOU? Afai e tatou te lotomaulalo moni lava, e tatou te fiafia la e auauna i isi ma fai mea uma mo lo latou lelei.

E faaalia foʻi lo tatou lotomaulalo, i le auala e tali atu ai i fautuaga a isi. Nai lo o le teena o le manatu ona tatou te leʻi mafaufau muamua i ai, atonu e atamai lo tatou talia o fautuaga mai i isi. (Faataoto 15:22) O le faaalia o le magafagafa o le a maua ai aogā, aemaise lava iā i latou o loo i tulaga pule. Sa faapea mai Ioane o sē e gafa ma le vaaia o se ʻaufaigaluega: “Ua ou iloa o se ovasia lelei, e na te faatagaina tagata faigaluega e faaali mai o latou manatu.” Na ia toe faapea mai: “E manaʻomia e se ovasia le lotomaulalo e iloa ai, atonu e sili atu le lelei o le auala e faia ai e isi mea nai lo o ia. Auā e oo lava i le ovasia—e lē lelei uma ni ona manatu.”

E tatou te maua le finagalo malie o Ieova, pe a tatou faataʻitaʻi i le faaaʻoaʻoga a Aperaamo e ala i le faalogologo lelei i fautuaga a isi, ma faatino ni galuega faatauvaa mo i latou. Auā o le mea moni, “e tetee le Atua i ē e faamaualuluga, ae e foaʻi mai e ia le agalelei faifua i ē e lotomaulalo.”—1 Peteru 5:5.

[Faaopoopoga i lalo]