Ua Ou Iloa Nei le Atua o Loo Ou Tapuaʻi i Ai

Faamatalaina e Marieta Manuel Bacudio

Na asiasi mai se faievagelia Penetekoso, o sē na manatu e iai sona mana e fai ai faamālōlōga. Sa ou matapogia ma “ulufia i le agaga,” ma maua le mana e fai ai faamālōlōga ina ua paʻi mai o ia iā te aʻu. Na faapefea ona ou oo i lenā mea na tupu, ma o le ā se aafiaga i loʻu olaga? Muamua lava, seʻi ou faamatala loʻu talaaga.

SA OU fanau iā Tesema 10, 1968, i Ilocos Norte, i Filipaina, ma ou te lona fitu i la matou fanauga e toʻasefulu. Sa matou ola aʻe o ni Katoliko e pei o le toʻatele o tagata Filipaina. Na faauu aʻu i le aʻoga maualuga i le 1986, ma na ou faanaunau e avea ma teine tausimaʻi. Peitaʻi, e leʻi taunuu lenā faanaunauga ona sa ou maua i se maʻi tigāina ma na toetoe a ou oti ai. O loʻu mafatia tele na ou augani atu ai i le Atua e fesoasoani mai, ma o le a ou auauna iā te ia i loʻu olaga atoa pe a ou malosi.

Ina ua ou toe malosi, sa ou manatua laʻu tautoga na fai i le Atua, ma ou auai ai loa i le aʻoga Tusi Paia a le Penetekoso iā Iuni i le 1991. O se tasi o vala o le aʻoga, e aofia ai le mauaina o “le meaalofa foaʻifua o le agaga paia,” e pei o le mana e faia ai faamālōlōga, lea sa ou naunau i ai. Na aʻoaʻoina i le aʻoga, e pau le auala e maua ai lenā meaalofa, o le anapogi ma faia o tatalo. Ina ia faafoliga atu ua ou maua lenā meaalofa, na ou faalogologo ai i le tatalo a se isi teineitiiti o laʻu vasega ae e na te leʻi iloa mai aʻu, ma ina ua lata ina uma lana tatalo, sa ou toe foʻi vave loa i le mea sa ou tootuli ai. Mulimuli ane, sa ou taʻu atu iā te ia mea uma lava sa ia talosaga atu ai, ma na talitonu o ia ua ou maua le “meaalofa foaʻifua”!

Sa tele ni aʻu fesili a o ou iai i le aʻoga. O se faataʻitaʻiga, o loo taʻua i le Mataio 6:9 le “Tamā” ma lona “suafa.” Sa ou fesili e faapea: “O ai le Tamā lea na taʻua e Iesu?” ma “O ai lona suafa lea e tatau ona faapaiaina?” E masani lava ona lē manino tali e aumai e oʻu faiaʻoga, ma latou te faapea mai o le Tolutasi o se misitelio lilo. Ae e ui ina ou lē malamalama, ae sa faaauau pea ona ou aʻoga e avea ma faifeʻau.

Iloaina Molimau a Ieova

Sa aʻoaʻoina aʻu i le aʻoga Tusi Paia, o Molimau a Ieova o le lotu pito i sesē lea ma o anetikeriso. Sa matuā ou ʻinoʻino lava i lenei lotu.

I le tausaga lona lua o laʻu aʻoga ina ua oo i le tuuaga, sa ou alu ai e asi oʻu mātua ma na asiasi atu foʻi loʻu uso matua o Carmen. O le taimi lenā ua papatisoina o ia o se Molimau a Ieova ma avea o se tagata talaʻi faataimi atoa. Ina ua taumafai e aʻoaʻo aʻu e uiga i le Atua, na ou faapea atu ma le ita: “Ua leva na ou iloa le Atua lea ou te tapuaʻi i ai,” ona ou tulei ese lea o ia ma lē toe fia tautala atu i ai.

 Ina ua ou toe foʻi i le aʻoga, sa lafo mai e Carmen le polosiua Pe Ao ona E Talitonu i le Tolutasi? * O loʻu ita tele iā te ia na vave ai lava ona ou tago numinumi le polosiua ma togi i le afi.

Agaʻigaʻi i Luma o se Faifeʻau

A o faaauau ona ou iai i le aʻoga Tusi Paia, sa ou fiafia ina ua mafai ona ou faaliliuina nisi e avea ma tagata Penetekoso, aemaise lava loʻu tinā ma loʻu tuagane.

Na ou faauu mai i le aʻoga Tusi Paia i a Mati 1994. E pei ona taʻua i le amataga, o le taimi lenā na asiasi mai ai se tagata faievagelia, ma na mananaʻo uma le ʻaufaauu ina ia iai faatasi ma ia, ona sa matou talitonu e iai sona mana e faia ai ni faamālōlōga. A o matou iai ma ia i le pulelaa, sa matou patipati ma osooso a o tāina pese e se ʻau fāʻili, ma o so o se tasi e paʻi i ai o ia e paʻū i lalo ma “ulufia i le agaga paia.” * Sa ou paʻu foʻi i lalo ma matapogia ina ua ia paʻi mai. Sa ou lagona le fefe ina ua ou toe teʻi i luga, ae sa ou fiafia foʻi ona ua ou maua le mana e faia ai faamālōlōga.

E leʻi leva ona uma lenā mea, ae ou faamālōlōina se tamaitiiti sa matuā fiva lava, ma a o ou tatalo, sa faafuaseʻi ona afu o ia ma teʻa ai loa ma lona fiva. Sa ou lagona ua mafai nei ona faataunuu laʻu tautoga i le Atua. Peitaʻi sa tumau pea ona ou lagona o loo iai se isi mea ou te manaʻomia. Sa ou talitonu aʻiaʻi e toʻatasi le Atua, ae ou te leʻi iloa po o ai moni lava o ia, ma sa iai foʻi ni oʻu masalosaloga i le tele o aʻoaʻoga a le lotu.

Suia Oʻu Manatu

Na faateteleina loʻu ʻinoʻino i Molimau a Ieova, ma ou te susunuina so o sa latou lomiga ou te mauaina. Na faateʻia aʻu ina ua lē toe fia sau loʻu tinā i la matou lotu, ae ua suʻesuʻe o ia ma Carmen, ma na atili ai ona ou ʻinoʻino i loʻu uso.

Sa ou maua se lomiga o le Ala Mai! i le fale o loʻu tinā, ae nai lo o le susunuina, sa ou matamata i nisi o itulau ona o loʻu fia iloa o mea o loo ia faitau i ai. Na tau laʻu vaai i se mataupu e uiga i se tasi o tagata na maumauaʻi i talitonuga a le matou lotu. Peitaʻi, ina ua ia faitau i lomiga a Molimau a Ieova, na ia iloa ai e lē faale-Tusi Paia le manatu e uiga i le Tolutasi, afi i seoli, ma le ola pea o le agaga pe a oti le tagata. Sa matuā pāʻia loʻu loto, ona o mea foʻi ia na ou fia malamalama ai. Talu mai lenā taimi, na ou naunau ai lava ia iloa upu moni o le Tusi Paia.

Na amata ona ou faitau i lomiga a Molimau, ina ua uma ona ou faitau i se isi Ala Mai! e uiga i se tagata na pulea e le ʻava malosi ma fualaau faasāina, ae na suia lona olaga ina ua suʻesuʻe i le Tusi Paia. Sa ou iloa o Ieova le suafa o le  Atua ina ua ou faitau i le polosiua The Divine Name That Will Endure Forever *, ma na matuā ou fiafia ina ua ou aʻoaʻoina le upu moni e uiga i le Atua moni e toʻatasi!—Teuteronome 4:39; Ieremia 10:10.

Na faaauau ona ou faitauina faalilolilo na lomiga ma iloa ai isi upu moni o le Tusi Paia. O se faaaʻoaʻoga, sa aʻoaʻoina aʻu i le aʻoga a le Penetekoso o Iesu o le Atua, ae o lea ua ou iloa mai i le Tusi Paia, o ia o “le Alo o le Atua soifua.”—Mataio 16:15, 16.

Suia Loʻu Loto

Na faateʻia Carmen ina ua ma toe fetaui ae ou talosaga atu i ai mo le polosiua The Divine Name That Will Endure Forever, ma isi lomiga. Sa ou faaaluina le tele o tausaga i le aʻoga Tusi Paia ae e leʻi aʻoaʻoina ai aʻu i le upu moni, ma sa faatauasoina ai aʻu. Ae o lea ua matuā ou fiafia lava ona o upu moni ia ua ou aʻoaʻoina mai i le Tusi Paia. Na ou iloa ai le moni o le fetalaiga a Iesu: “E iloa e outou le upu moni, e tuusaʻoloto foʻi outou e le upu moni.” (Ioane 8:32) Ua amata ona suia e nei upu moni loʻu olaga.

Na fai si umi o ou manatu e mafai ona ou auauna faalilolilo iā Ieova ma avea pea ma faifeʻau, ae na ou iloa mulimuli ane ua lē mafai ona ou toe aʻoaʻoina atu le tele o aʻoaʻoga a le lotu. Sa ou popole po o le a faapefea ona tausia oʻu manaʻoga pe a lē toe avea aʻu ma faifeʻau. E mautinoa o se luma mo le lotu pe a avea se tasi o a latou faifeʻau ma Molimau a Ieova! O lea na faaauau ai pea ona avea aʻu ma faifeʻau, ae sa ou ʻalofia le aʻoaʻoina atu o aʻoaʻoga sesē a le lotu.

Ina ua ma toe feiloaʻi ma Carmen, sa ia faalaeiau aʻu e auai i se sauniga a Molimau a Ieova. Talu ai e masani ona ou alu i le ofisa autū a le matou lotu i le aai o Laoag, o lea sa ou suʻeina faalilolilo ai le Maota mo Sauniga a Molimau. O i inā sa ma feiloaʻi ai ma se tamaʻitaʻi talaʻi faataimi atoa e igoa iā Alma Preciosa Villarin, ae e masani ona valaau o ia iā “Precious.” E ui lava sa ou lē mautonu pea i Molimau, ae sa ou talia lava le avanoa e suʻesuʻe ai le Tusi Paia ma Precious.

I le pei o loʻu uso, sa matuā onosaʻi Precious a o ia aʻoaʻoina aʻu i upu moni o le Tusi Paia. Sa fesoasoani mai pea o ia ina ia ou malamalama i le Tusi Paia e ui o nisi taimi ou te lē fiafia ma finau ma ia, mateletele atu, ma maumauaʻi i nisi o mea na aʻoaʻoina ai aʻu. Na matuā pāʻia loʻu loto ona o le lotomaulalo, agamalu, ma le naunau moni mai o  Precious ma isi Molimau. O le mea lenā na uunaʻia ai aʻu e tapuaʻi iā Ieova.

I a Iulai 1995, na ou iloa ai ua tatau ona lē toe avea aʻu ma faifeʻau. Aiseā? I le Faaaliga 18:4 o loo talanoa faavaloaga ai e uiga i lotu sesē e faapea: “Loʻu nuu e, ia outou ō ese mai iā te ia, pe afai tou te lē mananaʻo e tofusia i ana agasala, ma lē mananaʻo e aafia i ona mala.” Ae o le a faapefea nei ona tausia oʻu manaʻoga? Na ou aʻoaʻoina mai i le Eperu 13:5, pe afai e tatou te faia le finagalo o Ieova, ua folafola mai e ia: “Ou te lē tuua lava oe, ma ou te lē tuulafoaʻia lava oe.”

E ui lava sa matuā tetee mai loʻu tamā ma loʻu tuagane a o toe lua vaiaso oo i loʻu papatisoga e avea ma Molimau a Ieova, ae sa ou maua pea le lototele e susunu ai mea uma sa ou faaaogāina a o ou faifeʻau. Ina ua uma ona faia faapea, na ou iloa ai ua lē toe iai iā te aʻu ni mana faapitoa, ma ua mou atu foʻi oʻu lagona e pei o loo taomia aʻu i lalo e se mea pe a ou moe. Ou te leʻi toe vaaia foʻi le ataata mai o se mea i loʻu faamalama. Na ou aʻoaʻoina mai i laʻu suʻesuʻega o le Tusi Paia e faapea, e lē mai i le Atua so o se mea e manatu i ai i aso nei o se meaalofa, e pei o le mana e faia ai faamālōlōga, ae e mai i agaga leaga. Ua ou fiafia ua ou saʻoloto mai i a latou faiga, e pei foʻi o le teine auauna lea sa faasaʻoloto e Paulo ma Panapa mai i se “temoni e vavalo.”—Galuega 16:16-18.

Maʻeu se fiafiaga ina ua ma papatiso faatasi ma loʻu tinā i a Setema 1996 e avea ma Molimau a Ieova! Ina ua uma ona ou papatiso, sa ou auauna loa o se tagata talaʻi faataimi atoa a Molimau a Ieova, ma auauna ai ma le olioli i lenā faaeaga mo le tele o tausaga.

Ua ou faaipoipo nei iā Silver, ma o loo ma galulue faatasi e aʻoaʻoina la ma tama teine i upu moni o le Tusi Paia, ma ua auauna foʻi nisi o oʻu uso iā Ieova. E ui lava ou te faanoanoa ona o le tele o tausaga ou te leʻi iloa lelei ai le Atua, ae ua ou matuā fiafia ona o lea ua ou iloa nei le Atua o loo ou tapuaʻi i ai.

[Faaopoopoga i lalo]

[Ata i le itulau 12]

[Ata i le itulau 13]

I loʻu faauuga o se faifeʻau

[Faamatalaga faaopoopo i le itulau 13]

Na ou faamālōlōina se tamaitiiti sa matuā fiva lava

[Ata i le itulau 14, 15]

Na ma suʻesuʻe ma Precious i le Tusi Paia

[Faamatalaga faaopoopo i le itulau 14]

Ua amata ona suia e nei upu moni loʻu olaga

[Ata i le itulau 15]

Ina ua ma papatiso ma loʻu tinā

[Ata i le itulau 15]

Avea o se tagata talaʻi faataimi atoa a Molimau a Ieova

[Ata i le itulau 15]

Faatasi ma laʻu tane, laʻu tama teine, ma isi oʻu tauaiga ua iai i le tapuaʻiga moni

[Faamatalaga faaopoopo i le itulau 15]

Na matuā ou fiafia ina ua ou aʻoaʻoina le upu moni e uiga i le Atua moni e toʻatasi!