E Mafai e le Tusi Paia Ona Suia Olaga

NA FAAPEFEA i se tamaʻitaʻi sa lē naunau i le Atua ma matuā lelei lana galuega, ona maua se fuafuaga o lona olaga? O le ā sa aʻoaʻoina e se tauleʻaleʻa Katoliko e uiga i le maliu, na ala ai ona suia ona manatu? O le ā na uunaʻia ai se alii sa lē mautonu i le olaga, e avea ma faifeʻau Kerisiano? Faitau i a latou tala.

“E Tele Tausaga o Ou Tuufesili, ʻAiseā ua Tatou iai i Inei?’”—ROSALIND JOHN

TAUSAGA FANAU: 1963

ATUNUU: PERETANIA

TALAAGA: MAUA SE GALUEGA E SILI ONA LELEI

OLAGA SA IAI: Sa ou fanau i Croydon i Lonetona i Saute, ma ou te lona ono i la matou fanauga e toʻaiva. E tupuga mai oʻu mātua i le motu o St. Vincent i le Karipiane, ma sa auai loʻu tinā i le lotu Metotisi. Ou te leʻi fia iloa le Atua, ae sa ou matuā naunau e maua le atamai. O le tele o tuuaga o laʻu aʻoga ou te faaalu e nofonofo ai i autafa o se vaituloto ma faitau tusi ai.

I nai tausaga talu ona uma aʻu aʻoga, sa ou manaʻo ai e fesoasoani i tagata matitiva, ma ē e lē o maua se puipuiga. Sa amata ona ou faigaluega e fesoasoani i tagata e maumausolo i auala tetele, ma ē e lē atoatoa le malosi o le tino ma le mafaufau, ona sosoo lea ma le aveina o aʻu mataupu tau soifua mālōlōina i le iunivesite. Ina ua faauu aʻu, sa ou maua ni galuega e sili ona lelei ma le tele o meafaitino. Talu ai sa ou galue tutoʻatasi ma suʻesuʻe i auala o loo ola ai tagata, e na o laʻu komepiuta feaveaʻi ma le Initaneti mea na ou manaʻomia. Ou te malaga i isi atunuu mo ni vaiaso, nofo i faletalimālō e sili ona lelei, faaaogā latou fale faamalositino ina ia lelei ai pea loʻu soifua mālōlōina, ma tafao i nofoaga matagofie. Sa ou manatu ua ou maua mea uma, ae e leʻi muta ai loʻu alofa i tagata mafatia.

SUIA E LE TUSI PAIA LOʻU OLAGA: E tele tausaga o ou tuufesili, ʻAiseā ua tatou iai i inei?’, ma ʻO le ā le fuafuaga o le olaga?’ Ae ou te leʻi saʻili atu lava i le Tusi Paia mo ni tali. Peitaʻi i le 1999, na asiasi mai ai loʻu uso laʻitiiti o Margaret ma sana uō teine. O i laʻua o ni Molimau a Ieova, ma o le naunau mai o lana uō na ou malie ai e ma te suʻesuʻe i le Tusi Paia. Ae sa tuai ona ou agaʻigaʻi i luma ona na alu le tele o loʻu taimi i laʻu galuega ma loʻu olaga.

O le tau māfanafana i le 2002 na ou siitia ai i saute i sisifo o Egelani, ma o i inā sa ave ai nisi o aʻu mataupu e suʻe ai le isi aʻu tikeri maualuga. Na amata ona ou auai e lē aunoa i sauniga a Molimau a Ieova ma laʻu tama tama. E ui sa ou fiafia i aʻoga maualuluga, ae o loʻu suʻesuʻe i le Tusi Paia na ou malamalama lelei ai i faafitauli o le olaga ma lona vaifofō.  Ina ua ou faitau i le Mataio 6:24, na ou iloa ai e lē mafai ona ou auauna i ni matai se toʻalua, auā a lē o le Atua, o ʻoa. Na ou iloa sa tatau ona ou faia se filifiliga i mea e tatau ona faamuamua i loʻu olaga.

I le 2001, sa masani ona ou auai i se vaega o Molimau a Ieova na suʻesuʻeina le tusi Is There a Creator Who Cares About You? * O i inā na ou talitonu ai e na o Ieova, o Lē na foafoaina mea uma, o loo iai le vaifofō mo faafitauli o tagata. Peitaʻi sa ou ʻinoʻino ina ua aʻoaʻoina i le iunivesite, o le fuafuaga o le olaga e lē aofia ai le talitonu i Lē na faia mea uma. Ina ua mavae le lua masina, sa ou tuua loa le iunivesite ma filifili e mafuta vavalalata atu i le Atua.

O le mau sa uunaʻia ai aʻu e suia loʻu olaga, o le Faataoto 3:5, 6: “Ia e faatuatua iā Ieova ma lou lotoatoa, ae aua le faalagolago i lou lava malamalama. Ia e manatua o ia i ou ala uma, ona ia faasaʻoina lea o ou ala.” O le iloaina o lo tatou Atua alofa, o se taui lea e sili atu nai lo o le tele o le tamaoaiga po o se tikeri maualuga. O le tele o loʻu aʻoaʻoina o mea e uiga i le taulaga togiola a Iesu ma le fuafuaga a Ieova mo le lalolagi, na ou manaʻo ai e tuuina atu loʻu ola i Lē na faia i tatou. Sa ou papatiso iā Aperila 2003, ma na faasolosolo mālie ona faafaigofie loʻu olaga.

AOGĀ IĀ TE AʻU: E tautele la ma faauōga ma Ieova. O loʻu iloaina o ia ua ou maua ai le olioli ma le filemu o le mafaufau, aemaise le fiafia ona o le faifaimea faatasi ma ona tagata tapuaʻi moni.

Na faaauau ona faamalieina loʻu galala mo le poto e ala i mea sa aʻoaʻoina mai i le Tusi Paia faapea sauniga faa-Kerisiano. O le faasoaina atu o oʻu talitonuga i isi, o le galuega sili lea ua ou faia e fesoasoani ai i tagata e maua se olaga lelei i le taimi nei, ma se faamoemoe pupula i le lumanaʻi i le lalolagi fou. Sa avea aʻu ma faifeʻau talaʻi faataimi atoa talu mai Iuni 2008, ma ua sili atu loʻu fiafia ma le faamalieina nai lo se isi lava taimi. Ou te matuā faafetaia Ieova ona ua ou maua le fuafuaga moni o le olaga.

“Sa Matuā Ou Aafia Lava i le Maliu o si Aʻu Uō.”—ROMAN IRNESBERGER

TAUSAGA FANAU: 1973

ATUNUU: OSETERIA

TALAAGA: TAALO I TAALOGA FAITUPE

OLAGA SA IAI: Sa ou ola aʻe i le aai laʻitiiti o Braunau, i Oseteria, o se vaipanoa e tamaoaiga ma e lē tele ni solitulafono. Sa auai lo matou aiga i le lotu Katoliko, ma na ou ola aʻe ai foʻi.

Na iai se mea na tupu a o ou laʻitiiti na matuā ou aafia ai lava. I le 1984 a o 11 oʻu tausaga, sa ma taaalo ai ma se  tasi o aʻu uō mamae, ma o le aso lava lenā i le aoauli, na maliu ai o ia ona o se faalavelave tau taavale. Sa matuā ou aafia lava i le maliu o si aʻu uō, ma e tele tausaga o ou taumānatu po o le ā e tupu iā i tatou pe a tatou feoti.

Sa ou galue o se fai eletise ina ua uma aʻu aʻoga. E ui sa fai ma aʻu masani le taalo i taaloga faitupe ma faaalu ai le tele o tupe, ae sa leai ni oʻu faafitauli tautupe. Sa tele foʻi loʻu taimi e alu i taaloga ma ou fiafia ai i musika malomaloā, ma e masani ona ou alu i fale kalapu ou te siva ma patī ai. Na oo ina ou faia feusuaʻiga lē mamā ina ia ou fiafia ai, ae sa ou lagona pea le faanoanoa.

SUIA E LE TUSI PAIA LOʻU OLAGA: I le 1995, na asiasi mai ai se Molimau a Ieova matua i loʻu fale ma tuu mai se tusi o loo talanoaina ai le tali a le Tusi Paia e uiga i le fesili, O le ā e tupu pe a feoti? Sa ou aveina le tusi ona sa ou mafatia pea i le maliu o si aʻu uō, ma e lē gata sa ou faitau i le mataupu e uiga i le oti, ae o le tusi atoa.

O mea na ou faitau ai, sa taliina ai laʻu fesili e uiga i le oti, ma e tele isi mea sa ou aʻoaʻoina. I le avea ma Katoliko, sa faamuamua i laʻu talitonuga Iesu. Peitaʻi, o laʻu suʻesuʻega i le Tusi Paia na ou maua ai se faauōga ma le Tamā o Iesu, o Ieova le Atua. Na matuā ou fiafia ina ua ou iloa o Ieova o se Atua e faaleuō ma e lē nanāina ni mea, ae e na te faailoa manino mai o ia i ē o loo saʻili atu iā te ia. (Mataio 7:7-11) Na ou iloa ai e iai faalogona o Ieova ma e na te faataunuu ana folafolaga. O lenā mea na ou matuā fiafia ai i valoaga o le Tusi Paia, ma uunaʻia ai aʻu e iloilo pe na faapefea ona faataunuuina. O mea sa ou aʻoaʻoina na faamalosia ai loʻu faatuatua.

E leʻi umi ae ou iloa e na o Molimau a Ieova o loo naunau moni e fesoasoani i tagata e aʻoaʻo le Tusi Paia. Sa faaaogā laʻu Tusi Paia Katoliko e suʻe ai mau o loo taʻua i a latou lomiga, ma o le tele o loʻu suʻesuʻe i na mea na ou iloa ai ua ou maua le upu moni.

O laʻu suʻesuʻega i le Tusi Paia na ou iloa ai e faatalitalia aʻu e Ieova ina ia ola e tusa ai ma ana tapulaa. Na ou iloa mai i le Efeso 4:22-24, sa tatau ona tō ese le “tagata tuai,” lea e aofia ai aʻu “amioga sa faia muamua,” ae ofu i le “tagata fou na foafoaina e tusa ma le finagalo o le Atua.” O lea na ou lafoaʻi ai loʻu olaga lē mamā faapea le taalo i taaloga faitupe, ona na uunaʻia ai le uiga matapeʻapeʻa. (1 Korinito 6:9, 10) Ina ia faia ni suiga i loʻu olaga, ua ou iloa e tatau ona tuua aʻu uō sa iai, ae saʻili nisi uō fou e tutusa a matou tapulaa.

E leʻi faigofie ona faia na suiga, ae na ou auai i sauniga a Molimau a Ieova ma maua ai ni aʻu uō fou. Sa ou iloiloina totoʻa foʻi le Tusi Paia, ma o na mea na suia ai musika ou te fiafia i ai, o oʻu sini i le olaga, ma teuteu oʻu foliga vaaia. O le 1995 na ou papatiso ai e avea ma Molimau a Ieova.

AOGĀ IĀ TE AʻU: Ua ou iloa nei le auala e tatau ona ou manatu ai i tupe ma meafaitino. Sa masani ona ou maitaita, ae o lea ua  mafai ona pulea loʻu ita, ma ou te lē o toe soona popolevale e uiga i le lumanaʻi.

Ua ou fiafia e avea aʻu o se vaega o tagata o loo tapuaʻi iā Ieova i le lalolagi aoao. O nisi o i latou nei sa feagai ma faigatā ae na auauna pea ma le faamaoni i le Atua. Ua ou fiafia foʻi e faaalu uma loʻu malosi ma loʻu taimi e auauna ai iā Ieova ma faia mea lelei mo isi, nai lo o le faamalie o oʻu lava tuʻinanauga.

“Ua Maua Nei se Fuafuaga o Loʻu Olaga.”—IAN KING

TAUSAGA: 1963

ATUNUU: EGELANI

TALAAGA: LĒ MAUTONU I LE OLAGA

OLAGA SA IAI: Sa ou fanau i Egelani, ae pe tusa o le fitu o oʻu tausaga na matou siitia ai i Ausetalia. Sa matou nonofo i le Gold Coast, o se nofoaga e masani ona asia e turisi i Kuiniselani, Ausetalia. E ui lava e lē maumea lo matou aiga, ae sa maua lava mea sa matou manaʻomia.

E ui sa lelei le tausia aʻe o aʻu, ae sa ou lagona le lē fiafia ma le lē mautonu i le olaga. O loʻu tamā o se tagata e inu tele i le ʻava malosi, ma ou te leʻi alofa i ai ona o lenā masaniga, aemaise le auala e na te faileagaina ai loʻu tinā. Mulimuli ane, na faatoʻā ou malamalama i le māfuaaga ua faapena ai ona uiga, ona o mea sa tutupu iā te ia a o avea o se fitafita i Malaya.

Sa amata ona ou inu seʻia tau i le ua a o ou iai i aʻoga maualuluga, ma o le 16 o oʻu tausaga na ou tuua ai le aʻoga ae auai i le fuāvaa tau o le sami. Na amata ona ou faaaogāina fualaau faasāina ma avea ma aʻu masaniga le ulaula. Sa avea le ʻava malosi ma oʻu toomaga, ma o aso uma ou te inu ai seʻia tau i le ua.

O le 20 ma ona tupu o oʻu tausaga na amata ai ona ou fesiligia pe e iai se Atua. Sa ou faapea ifo: ʻPe afai e iai moni se Atua, aiseā la ua ia lē taofia ai puapuaga o tagata ma le oti?’ Sa ou tusia foʻi ni solo e tuuaʻia ai le Atua mo mea leaga uma o loo tutupu i le lalolagi.

Na ou tuua le fuāvaa tau o le sami i le 23 o oʻu tausaga. E eseese galuega sa ou faigaluega ai, ma sa ou malaga i se isi atunuu mo se tausaga, ae na tumau pea ona ou lē fiafia. Sa leai soʻu faanaunauga e faataatitia ni sini pe e ausia se mea i loʻu olaga. Na leai se mea sa ou fiafia i ai. Sa leai se uiga o le mauaina o se fale, se galuega lelei, ma le siitia o le tulaga i le galuega. Na pau le mea sa ou maua ai le “faamāfanafanaga,” o le ʻava malosi ma le faalogologo i musika.

Ou te manatua le taimi tonu lava na ou matuā naunau ai ina ia iai se fuafuaga o loʻu olaga. A o ou iai i Polani, sa ou asiasi i se nofoaga mo faasalaga i Auschwitz. Sa ou faitau i tala e uiga i  na sauāga mataʻutia, ae na matuā aafia oʻu faalogona ina ua ou vaaitino i na sauāga i lenā nofoaga. Na ou lē malamalama i le māfuaaga ua matuā faasauā ai isi tagata i isi tagata. Ou te manatua loʻu savali solo i le nofoaga o faasalaga ma loimata ma ou tuufesili, ʻAiseā?’

SUIA E LE TUSI PAIA LOʻU OLAGA: Sa amata ona ou faitau i le Tusi Paia ina ia saʻilia tali o aʻu fesili, ina ou toe foʻi mai i Ausetalia i le 1993. E leʻi umi ae tuʻituʻi mai ni Molimau a Ieova ma valaaulia aʻu i la latou tauaofiaga e faia i se fale taalo e lata ane, ma sa ou filifili ou te auai i ai.

Sa ou iai muamua i lenā fale taalo i ni nai masina ua tuanaʻi e matamata i se taaloga, ae na matuā telē le eseesega ma lenei tauaofiaga. E ese le faaaloalo o tagata Molimau ma sa laʻei mamā, ma e amiolelei foʻi a latou fanau. Sa faateʻia foʻi aʻu i se mea sa ou vaai i ai i le mālōlōga i le aoauli. E faitau selau Molimau sa aai i le malae, ae ina ua toe foʻi i o latou nofoaga, ou te leʻi vaaia se lapisi se tasi i le malae. E sili atu i lenā, e foliga mai sa maua e nei tagata le lotomalie ma le filemu, o mea ia sa ou faanaunau lava i ai. Ou te leʻi manatuaina se lauga na faia i lenā aso, ae e lē galo iā te aʻu amio lelei a Molimau.

O le afiafi lenā sa ou mafaufau ai i se tasi o oʻu tausoga e faitau i le Tusi Paia ma suʻesuʻeina lotu eseese. I nai tausaga ua mavae, na ia taʻu mai ai iā te aʻu le fetalaiga a Iesu e faapea, e iloa le tapuaʻiga moni i ona fua. (Mataio 7:15-20) O lea sa ou mafaufau ai ou te taumafai e iloa po o le ā le māfuaaga ua ese ai Molimau. O le taimi muamua lenā sa ou lagona ai ua iai soʻu faamoemoe.

O le vaiaso na sosoo ai na toe asiasi mai ai Molimau na valaauliaina aʻu i le tauaofiaga. Sa ou talia la la ofo e la te faia saʻu suʻesuʻega faale-Tusi Paia, ma amata loa ona ou auai i a latou sauniga faa-Kerisiano.

Na suia atoatoa oʻu manatu e uiga i le Atua a o ou suʻesuʻeina le Tusi Paia. Na ou iloa ai e na te lē o faapogaia mea leaga ma mafatiaga, ma o loo tigā foʻi o ia i mea leaga o loo faia e tagata. (Kenese 6:6; Salamo 78:40, 41) Sa ou maumauaʻi e taumafai e aua le toe faatigā iā Ieova, ma na ou manaʻo e faafiafia lona finagalo. (Faataoto 27:11) Ou te leʻi toe inu tele, tuu laʻu ulaula, ma ou te leʻi toe faia amioga lē mamā. I a Mati 1994, na ou papatiso ai ma avea ai o se Molimau a Ieova.

AOGĀ IĀ TE AʻU: Ua ou maua nei le fiafia moni ma le lotomalie. Ou te lē o toe liliu atu i le ʻava malosi e foʻia ai oʻu faafitauli. Nai lo lea, ua ou aʻoaʻoina e tuu atu oʻu popolega iā Ieova.—Salamo 55:22.

Ua sefulu nei tausaga talu ona ou faaipoipo i se Molimau lalelei e suafa iā Karen, ma ua iai soʻu afafine fai e igoa iā Nella. Ua matou faaaluina le tele o le taimi i le galuega talaʻi, e fesoasoani ai i isi e aʻoaʻoina le upu moni e uiga i le Atua. Ua maua nei se fuafuaga o loʻu olaga.

[Faaopoopoga i lalo]