O le toʻatele o tagata e lē fia talanoa e faatatau i le oti. Peitaʻi, e iai lava le taimi o le a tatou aafia ai i āuga matuitui ma tigā o le oti.

E leai se mea e mafai ona sauniunia ai i tatou i faalogona e oo mai, pe a maliu se tasi e pele iā i tatou. E ono maliu faafuaseʻi se tasi i se faalavelave, a o nisi e maliliu ona o se gasegase na faataotolia ai. Ae po o le ā lava le tulaga, e lē mafai ona tatou ʻalofia tigā e oo mai ona o le oti.

Na faapea mai Antonio, o lē na maliu lona tamā i se faalavelave tau taavale: “E pei ua loka e se tasi lou fale ma aveese le ki ma ua lē mafai ona e toe foʻi i ai. E pau le mea o loo totoe o manatunatuga i le mafutaga na iai. E ui lava ina faigatā ona talia le mea moni ua tupu ma e foliga mai e lē tonu, ae e leai se mea e mafai ona e faia.”

O faalogona foʻi na o Dorothy e 47 ona tausaga ae maliu lana tane. Na ia faia taumafaiga uma e saʻili le māfuaaga ua maliu ai le tagata. Na ia aʻoaʻoina tamaiti i le aʻoga Aso Sa e faapea, o le oti e lē o le iʻuga lea o mea uma. Ae o le mea moni, e na te lē o malamalama i le mea e tupu i le tagata pe a oti. Na ia fesili atu i la latou faifeʻau: “O le ā e tupu iā i tatou pe a tatou feoti?” Na tali mai le faifeʻau: “E leai se tasi o i tatou e iloa le tali o lenā fesili, e pau le mea e fai o lo tatou faatalitali ma vaai po o le ā le mea o le a tupu.”

Po o iā i tatou lenā lagona lē mautinoa o le “faatalitali ma vaai po o le ā le mea o le a tupu”? Pe e iai se isi auala e faamautinoa ai o le oti e lē o le iʻuga lea o mea uma?