E LĒ ioe i latou e lagolagoina lotu tuufaatasi i le manatu o loo taʻua i luga. Na faapea mai Eboo Patel lea sa faavaeina le Interfaith Youth Core: “Seʻi taʻu mai iā te aʻu se tapuaʻiga e lē popole i le faaalia o uiga agalelei . . . , pulea lelei o le siʻosiʻomaga . . . , ma le faaalia o le agaga talimālō.”

Ua galulue faatasi le tele o lotu e pei o le lotu Puta, Katoliko, Porotesano, Hinitū ma le lotu Musalimi e faaitiitia le mativa, amanaʻia aiā tatau a tagata, taumafai e taofia le tataoina o pomu i le eleele, ma le puipuia o le siʻosiʻomaga. Ua faia e lotu tuufaatasi taumafaiga ina ia tasi ai lo latou malamalamaga ma lo latou sini. E faamanatuina le tuufaatasia o i latou e ala i le tutu o molīgaʻo, faia o faafiafiaga, musika, tatalo ma isi mea faapena.

Po o le tuufaatasia o lotu o le auala lea e foʻia ai le feeseeseaʻi? Po o le auala lea a le Atua e aumaia ai le filemu i le lalolagi?

Ua faapea mai se tasi o faalapotopotoga pito telē o lotu tuufaatasi, lea o loo iai le silia ma le 200 tapuaʻiga eseese mai i atunuu e 76: O se tasi o a latou sini, “ia tuufaatasia le tele o lotu ma taumafai e galulue faatasi.” Peitaʻi, e mālie i le faalogo ae faigatā ona faatino. O se faataʻitaʻiga, e tusa ai ma manatu o i latou na tuufaatasia lenā faalapotopotoga, na faaeteete le auala na faaupu ai la latou manulauti neʻi feteenaʻi ma isi talitonuga o loo auai. Aiseā? O se tasi o māfuaaga, e feeseeseaʻi o latou manatu pe e faaaofia le Atua i lenā manulauti pe leai. O lea, na ʻalofia ai loa so o se faamatalaga e taʻua ai le Atua.

Pe afai la ua aveesea le Atua mai lenā manulauti, o le ā le matafaioi a lotu o loo fai? O le ā le eseesega o lotu tuufaatasi mai isi faalapotopotoga, ma tagata taʻitoʻatasi lea e fesoasoani atu i isi? O le māfuaaga lea ua faapea mai ai lenei faalapotopotoga o lotu tuufaatasi, e lē o i latou o se lotu ae o se “faalapotopotoga e galulue faatasi e atiaʻe le nofo lelei.”

Sa faapea mai se taʻitaʻi o le Lotu Puta na taulamua i le lagolagoina o lotu tuufaatasi: “O lotu autū uma, e tasi le feʻau o loo latou momoliina atu, o le faaalia o le alofa, agalelei ma le faamagalo atu.” Sa ia faapea atili mai: “O le mea sili a o le tatou faatatauina o nei uiga i o tatou olaga i aso taʻitasi.”

 E moni, e tāua ona tatou faaalia na uiga lelei auā na taʻua e Iesu se tulafono e sili ona tāua tau amio e faapea: “O lenei, o mea uma tou te mananaʻo e faia mai e tagata iā te outou, ia faapea lava ona outou faia iā i latou.” (Mataio 7:12) Peitaʻi, pe na o le faia o le mea lelei e iloa ai le lotu moni?

I aso o le aposetolo o Paulo, e toʻatele i latou sa faapea mai o loo auauna i le Atua. O lea na ia faapea mai ai: “Ua ou molimau iā i latou, ua latou maelega i le Atua; ae e lē tusa ai ma le poto saʻo.” Aiseā? “Ona o lo latou lē iloaina o le amiotonu a le Atua a ua latou saʻili e faatū la latou lava amiotonu.” (Roma 10:2, 3) O lea, e leai se aogā o lo latou maelega ma lo latou faatuatua, ona e leʻi iai so latou poto saʻo i mea na finagalo i ai le Atua.​—Mataio 7:21-23.

Sa fetalai Iesu “e fiafia o ē e faatupuina le filemu.” (Mataio 5:9) Sa ola Iesu e tusa ma mea na ia talaʻia, e ala i le uunaʻia o tagata e tausia le filemu ma talaʻi atu le feʻau o le filemu i so o se tagata, e tusa po o ā o latou talitonuga. (Mataio 26:52) O i latou na tali ane sa autasia i le fusi e atoatoa o le alofa. (Kolose 3:14) Peitaʻi, po o le sini autū o Iesu o le atiina aʻe o se faiā i le va o tagata eseese, ina ia maua ai le filemu? Pe na faifaimea faatasi o ia ma isi lotu?

Sa matuā tetee taʻitaʻi lotu Faresaio ma taʻitaʻi lotu Satukaio iā Iesu, ma na iʻu lava ina latou mananaʻo e fasiotia o ia. Na faapefea ona ia tali atu? Sa ia faatonuina ona aposetolo: “Tuu ai pea i latou. Auā o i latou o taʻitaʻi tauaso.” (Mataio 15:14) Sa teena e Iesu le faifaimea faatasi ma le ʻau Faresaio ma le ʻau Satukaio.

Mulimuli ane, sa faavae se faapotopotoga Kerisiano i Korinito i Eleni, o se aai na lauiloa i faiga faapolotiki ma tele ai tapuaʻiga eseese. O le ā le auala sa tatau ona ola aʻe ai Kerisiano i lenā siʻomaga? Na tusi atu le aposetolo o Paulo iā i latou: “Ia aua neʻi amo faalēgatasi ma ē e lē talitonu.” Aiseā? Sa taʻu atu e Paulo le māfuaaga: “E faapefea foʻi ona ōgatasi o Keriso ma Pelialo? E faapefea ona tofusia le tagata faamaoni ma lē ua lē talitonu?” Ona ia avatu lea o le lapataʻiga: “O le mea lea, ia ō ese ai mai iā i latou, ma ia outou vavaeese.”​—2 Korinito 6:14, 15, 17.

Ua manino mai, e teena e le Tusi Paia lotu tuufaatasi. Peitaʻi e te ono taumānatu, ʻE faapefea la ona maua le autasi moni?’

O le International Space Station o se satelite o loo faataamilo i le lalolagi, ma o le iʻuga o se galuega na galulue soosootauʻau ai atunuu e 15. Pe na mafai ona faataunuuina lenei galuega pe ana lē ioe faatasi nei atunuu i le ata faataatia?

I se faaeseesega, e lē o faapena le auala o loo faagaoioi ai lotu tuufaatasi i aso nei. E ui o loo latou faia taumafaiga ina ia faaalia le faaaloalo ma le autasi, ae e lē o ioe faatasi i se auala e atiaʻe ai le faatuatua. O le iʻuga, o loo eseese pea o latou manatu i tapulaa tau amio ma talitonuga.

O loo iai i le Tusi Paia tapulaa a le Atua e pei o se ata ua faataatia, lea e mafai ona atiaʻe ai o tatou olaga. O i latou e taliaina na tapulaa, ua galulue faatasi ma le filemu e ui i le eseese o lanu ma tapuaʻiga sa iai. Na folafola mai e le Atua: “Ou te tuuina atu ai i nuu le gagana mamā, ina ia latou valaau uma lava i le suafa o Ieova, ma latou auauna soosootauʻau ai iā te ia.” O le iʻuga, e maua le autasi ona o le “gagana mamā,” ma o le auala lea e finagalo le Atua e tapuaʻi atu ai.​—Sefanaia 3:9; Isaia 2:2-4.

E valaaulia oe e Molimau a Ieova i o latou Maota mo Sauniga, e te vaai ai i le filemu ma le autasi o o latou tagata tapuaʻi.​—Salamo 133:1.