Pe a ou toe mafaufau i taimi a o oʻu laʻitiiti, ou te manatua taimi fiafia a o matou nonofo ma oʻu mātua i se nuu maotua i le itu i saute o Falani. Na faia e loʻu tamā se tāupega mo aʻu, ma na ou fiafia ou te tamoʻe solo i le togālaau. I le 1966, na asiasi mai ai ni Molimau a Ieova i lo matou fale, ma faia ai ni talanoaga uumi faale-Tusi Paia ma loʻu tamā. Ina ua mavae masina e fitu, na filifili ai loa o ia e avea o se Molimau a Ieova, ma e leʻi umi ae faia foʻi faapea e loʻu tinā. Na la tausia aʻe aʻu i se siʻomaga filemu ma fiafia.

E leʻi umi ona matou toe foʻi i Sepania i le atunuu o oʻu mātua, ae amata ona ou faalogoina le maʻiniʻini o oʻu lima ma le tigā o oʻu tapuvae. Ina ua mavae le lua tausaga o o matou saʻilia le fesoasoani a le tele o fomaʻi, na faapea mai ai ma le faanoanoa se fomaʻi faapitoa o sooga o ponaivi: “Ua tuai.” Na amata ona tagi loʻu tinā. Na pau lava faaupuga na ou faalogoina i totonu o lenā potu, o ni faaupuga uigaese e pei o le autoimmune chronic illness ma le juvenile polyarthritis. * E ui lava e na o le sefulu oʻu tausaga i lenā taimi, ae na oʻu iloaina le lē logolelei o le tala na maua i lenā aso.

Na fautua mai le fomaʻi e saʻili se fesoasoani i se nofoaga e faia ai togafitiga faafomaʻi mo tamaiti. Ina ua ou taunuu atu i inā, na ou lagona le popole ma le fefe i foliga o le fale. Sa faasāsā naʻuā tulafono, ma na ʻoti e taupousa loʻu lauulu ma faaofu aʻu i ofu totoso. Na ou tagi ma mafaufau, ʻE faapefea ona ou ola umi i lenei nofoaga?’

Sa aʻoaʻoina aʻu e oʻu mātua ina ia auauna iā Ieova. O le māfuaaga lea na ou musu ai e faia saʻu vaega i faiga faalotu a le Katoliko. Peitaʻi, e leʻi faigofie ona malamalama taupousa i oʻu talitonuga. O lea, na ou ōle atu ai iā Ieova e aua neʻi tuulafoaʻia aʻu. E leʻi umi ae ou lagonaina le māfanafana  ona o lana puipuiga, e pei o le opo mai a se tamā alofa.

E na o Aso Toonaʻi e faataga ai ona asia aʻu e oʻu mātua mo sina taimi puupuu. E la te aumaia lomiga faale-Tusi Paia ou te faitau ai, ina ia faamalosia ai pea loʻu faatuatua. Na faataga e taupousa aʻu lomiga ma laʻu Tusi Paia, lea na ou faitauina i aso taʻitasi, e ui na faasā ona iai ni tusi a tamaiti. Ou te talatalanoa foʻi i isi teineiti e faatatau i loʻu faamoemoe o le ola e faavavau i se lalolagi parataiso, lea o le a lē toe iai se tasi e toe maʻi. (Faaaliga 21:3, 4) O le tele o taimi ou te lagona ai le faanoanoa ma le tuua toʻatasi. Peitaʻi, ou te lagona pea le fiafia ona o loo faaauau ona faamalosia loʻu faatuatua iā Ieova.

Na ou toe foʻi i lo matou aiga ina ua mavae masina e ono. E ui e leʻi toe foʻi i se lelei loʻu maʻi, ae sa ou fiafia ona ua ou toe faatasi ma oʻu mātua. Na faateteleina le leaga ma le tigā o oʻu ponaivi. Ina ua avea aʻu o se talavou, sa ou lagona lava le vaivai. Ae i le 14 o oʻu tausaga, na ou papatiso ai ma na ou maumauaʻi e auauna i loʻu Tamā i le lagi i le mea e gata ai loʻu malosi. Peitaʻi, na iai taimi na ou tuuaʻia ai le Atua, ma ou tatalo ai: “Aiseā ua ou oo ai i lenei tulaga? Faamolemole toe faafoʻisia mai loʻu malosi. Pe e te lē o silasila mai i oʻu mafatiaga?”

Sa faigatā mo aʻu le taimi a o oʻu talavou. E leʻi mafai ona ou maua se olaga fiafia ma le malosi e pei o aʻu uō. Sa tatau ona ou talia le mea moni, e lē toe foʻi i se lelei loʻu maʻi, ma na ou lagona ai le lē aogā ma le matamuli e talanoa i tagata. Peitaʻi, sa lagolagoina aʻu e loʻu aiga ma aʻu uō. Ou te manatua se tasi o aʻu uō mamae o Alicia, e 20 tausaga e matua ai iā te aʻu. Na fesoasoani mai iā te aʻu e aua ou te soona popole i oʻu faafitauli, ae taulaʻi atu e fesoasoani i isi.

Na sili atu ona tugā loʻu maʻi ina ua 18 oʻu tausaga. E oo foʻi i le auai i sauniga, ou te lagona ai lava le vaivai. Peitaʻi, sa ou faaaogā oʻu “taimi avanoa” e suʻesuʻe ai ma le māeʻaeʻa le Tusi Paia. Na fesoasoani le tusi o Iopu ma le Salamo iā te aʻu e malamalama ai, o loo taulaʻi faapitoa mai Ieova le Atua i le tausia o i tatou i le itu faaleagaga, nai lo o le itu faaletino i le taimi nei. O aʻu tatalo e lē aunoa, na ou maua ai “le mana lea e sili atu i le malosi o tagata,” ma “le filemu mai i le Atua, e silisili i mea uma lava e manatu i ai.”​—2 Korinito 4:7; Filipi 4:6, 7.

I le 22 o oʻu tausaga, na feaveaʻi ai aʻu i le nofoa faataavalevale. Na ou popole neʻi manatu tagata iā te aʻu, ua na o se teine maʻi o loo fealuaʻi i se nofoa faataavalevale. Peitaʻi, na avea le nofoa faataavalevale o se faamanuiaga, ona sa ou lē toe ola faalagolago ai i isi. O lea na faapea mai ai se tasi o aʻu uō o Isabel, e fai soʻu sini e faaalu le 60 itula e ma te galulue ai i le talaʻiga mo se masina.

I le taimi muamua, na ou manatu e lē fetaui lenā fuafuaga, ae ona o le fesoasoani a Ieova ma le lagolagosua a loʻu aiga ma aʻu uō, na mafai ai ona ou ausia lenā tulaga. Na vave ona uma atu lenā masina pisi, ma sa ou manumalo i loʻu lagona popole ma le matamuli. O loʻu fiafia tele i laʻu auaunaga na ou filifili ai ou te paeonia sauatoa i le 1996, lea na ou faaalu ai le 90 itula i masina taʻitasi i le galuega talaʻi. O se tasi lenā o filifiliga sili ona lelei sa ou faia, ma sa atili ai ona ou vavalalata atu i le Atua, ma faamalosia ai aʻu i le itu faaletino. O le auai i le talaʻiga, na mafai ai ona ou faailoa atu i le toʻatele oʻu talitonuga, ma fesoasoani i nisi o i latou e avea ma uō a le Atua.

I le vaitau māfanafana i le 2001, na ou manuʻa tigāina ai i se faalavelave tau taavale, ma gaui uma ai oʻu vae. A o oʻu tigāina i le falemaʻi, na ou tatalo faatauanau iā Ieova i se leo lemū e faapea: “Faamolemole Ieova, aua e te tuulafoaʻia aʻu!” E leʻi umi ae fesili mai se tasi mafine na taoto i le moega i oʻu autafa, “O oe o se Molimau a Ieova?” E leʻi iai soʻu malosi e tali atu ai, ae na o le lue atu o loʻu ulu. Na ia faapea mai: “Ou te iloa outou! E masani ona ou faitau i tou mekasini.” Na faamāfanafanaina aʻu i na upu, auā sa mafai ona ou avatu se molimau e ui sa ou tigāina. O se matuā faaeaga lenā mo aʻu!

Sa ou filifili e faaauau ona ou toe talaʻi ina ua amata ona ou toe malosi. E feaveaʻi solo aʻu e loʻu  tinā i le falemaʻi i loʻu nofoa faataavalevale ona sa faasimā uma oʻu vae. I aso taʻitasi, e ma te asiasi atu ai i nisi o tagata mamaʻi, fesili po o ā mai i latou, ma tuu ni lomiga faale-Tusi Paia mo i latou. E ui lava na ou lagona le vaivai mai i na asiasiga, ae na foaʻi mai pea e Ieova le malosi na ou manaʻomia.

I nai tausaga ua mavae, na faateteleina ai le tugā o loʻu maʻi, ma sa atili ai ona ou mafatia ina ua maliu si oʻu tamā. Peitaʻi, sa ou taumafai pea ia saʻo laʻu vaai i le tulaga o mea. E faapefea? Pe a fetaui ma loʻu malosi, ou te taumafai e faifaimea faatasi ma aʻu uō ma tauaiga, ina ia faaitiitia ai loʻu soona popole i oʻu faafitauli. Pe a na o aʻu, ou te faitauina ma suʻesuʻe le Tusi Paia, pe faaaogā foʻi le telefoni e talaʻi atu ai i isi.

Ou te taumafai foʻi e talisapaia mea e masani ona manatu faatauvaa i ai, e pei o le paʻi mālū mai o le savili ma le manogi o fugālaau. E aogā foʻi le fai ma talitaliē. I se tasi aso a o ma talaʻi ma se tasi o aʻu uō, na ma mālōlō ai i se matiʻe e fai ni ana faamaumauga. Na faafuaseʻi ona see loʻu nofoa faataavalevale, ma agaʻi saʻo atu i se taavale o loo paka mai i le isi itu. Na faateʻia i maʻua, ae na ma taliē ona e leai se isi o i maʻua na afāina.

E tele mea e lē mafai ona ou faia, ma ou te tulimataʻia le taimi o le a mafai ai ona ou faia. E masani ona faaāta i loʻu mafaufau, o loo oʻu savalivali solo ma ou fiafia i le lalolagi fou, lea ua folafola mai e le Atua. (2 Peteru 3:13) Ou te teuloto upu a le tupu o Tavita: “Ia faamoemoe atu iā Ieova; ia lototele ma ia faamalosia lou loto.” (Salamo 27:14) E ui lava o loo faasolo ina mou atu loʻu malosi faaletino, ae o loo faamalosia pea aʻu e Ieova. E leʻi avea loʻu maʻi ma mea ou te vaivai ai.