Na ou ola aʻe i se nuu maotua o Galicia, i mātū i sisifo o Sepania, ma sa iai sa matou tamaʻi faatoʻaga. Ou te lona fā i la matou fanauga e toʻavalu, ma na fiafia tele lo matou aiga. I aso na, o se mea masani i aiga Sepania le auai o se tasi o a latou tamaitiiti i nofoaga e toleni ai e avea ma patele po o se taupousa. E toʻatolu i matou mai la matou fanauga na ō atu i na nofoaga.

O le 13 o oʻu tausaga na ou alu ai i Madrid i le nofoaga na toleni ai aʻu e avea ma taupousa, lea na iai foʻi loʻu uso. E tele tulafono, faasāsāaga, ma tatalo e faia i lenā nofoaga. O taeao uma e matou te ō ai i le falesā e manatunatu loloto ai, e ui lava sa matuā ou lē iloa po o ā mea ou te manatunatu i ai. A uma lenā ona usu lea o pese lotu ma fai le Misasā i le faa-Latina, lea e augapiu ma se mea ou te malamalama ai, ma na ou manatu ai e lē o latalata mai le Atua. E na o le ʻafa itula na faataga e taupousa e matou te talanoa ai pe a uma meaʻai. E oo foʻi pe a ma fetaui ma loʻu uso, e pau lava le ma tala e fai: “Si oʻu alofa Maria ua sili ona paia.” Pagā le eseese ma le tulaga fiafia o lo matou aiga. Na ou lagona le tuua toʻatasi, ma o le tele o taimi ou te tagi ai.

E ui ou te leʻi lagona le vavalalata i le Atua, ae na avea lava aʻu ma taupousa i le 17 o oʻu tausaga, ona o le mea lenā sa faatalitalia mai iā te aʻu. E leʻi umi ae ou lē mautonu pe moni na tofia aʻu e le Atua. Na faapea mai taupousa, o i latou e masalosalo e susunu i Seoli. Peitaʻi na iai pea oʻu masalosaloga. Na ou iloa e leʻi faaesea e Iesu o ia lava, ae na pisi e aʻoaʻo isi ma fesoasoani iā i latou. (Mataio 4:23-25) O le 20 o oʻu tausaga na ou lē toe manaʻo ai e avea aʻu ma taupousa. Na faateʻia aʻu ina ua faapea mai lē na faauluulu i ai taupousa, e sili pe a ou tuua le nofoaga pe afai o loo faaluafesasi pea loʻu mafaufau. Atonu na musu le taupousa ina neʻi lē mautonu foʻi isi ona o aʻu. O lea na ou tuua ai loa lenā nofoaga.

E leʻi feita oʻu mātua ina ua ou toe foʻi atu i lo matou aiga. Peitaʻi, ona e lē tele ni galuega i lo matou nuu, o lea na ou siitia  ai i Siamani i le isi oʻu tuagane. Sa auai loʻu tuagane i se vaega faa-Komunisi o tagata Sepania i Siamani. Na ou fiafia e faatasitasi ma i latou na, o ē na lagolagoina aiā tatau a tagata faigaluega ma fafine. O lea na ou auai ai i le vaega faa-Komunisi, ma mulimuli ane ou faaipoipo i se tasi mai i lenā vaega. Na ou manatu sa ou faia se mea aogā, i le tufatufaina atu o lomiga ma auai i solo tetee a le ʻau Komunisi.

Peitaʻi na ou toe lagona le lē mautonu, ona e leʻi savavali tagata Komunisi e ōgatusa ma mea na latou talaʻia. Na atili ona ou lē fiafia ina ua susunu e ni talavou Komunisi, le ofisa o le konesula o Sepania i Frankfurt i le 1971. Na latou faia lenā mea ona sa lē fiafia i pulega faatautalatasi i Sepania. Ae na ou manatu e leʻi fetaui le auala na faaleo ai lo latou lē fiafia.

Ina ua fanau laʻu ulumatua, na ou fai loa i laʻu tane o le a ou lē toe auai i meafai a le ʻau Komunisi. Sa ou lagona le tuua toʻatasi, ona sa leai ma nisi o aʻu uō mai i le ʻau Komunisi, na ō mai e asi i maʻua ma si aʻu tama. Na ou tomānatu pe e iai se fuafuaga o le olaga, ma pe na aogā foʻi aʻu taumafaiga e faaleleia le tulaga o mea.

I le 1976, na asiasi mai ai i lo matou fale se ulugalii Molimau a Ieova, ma na ou taliaina ni a la lomiga faale-Tusi Paia. Ina ua toe asiasi mai, na ou tuʻi fesili i laʻua e uiga i aiā tatau, le pogai o mafatiaga, ma le lē faamasinotonu. Na faateʻia aʻu ona na la taliina uma aʻu fesili mai i le Tusi Paia. O lea na ou malie ai loa e fai sa matou talanoaga faale-Tusi Paia.

Na pau le mea na ou fiafia ai o mea sa ou aʻoaʻoina. Peitaʻi, na telē se suiga ina ua ma auai ma laʻu tane i sauniga a Molimau i la latou Maota mo Sauniga. O le taimi lenā ua toʻalua le ma fanau. E masani ona ō mai Molimau a Ieova ma matou ō faatasi i sauniga, ma e latou te vaavaaia la ma fanau i taimi o sauniga. O i inā na ou lagona ai loʻu māfana atu i Molimau a Ieova.

Peitaʻi, na tumau pea ona ou lē mautonu. Na ou manaʻo ou te toe alu e asi loʻu aiga i Sepania, ma na iai se uso o loʻu tamā na avea o se patele na taumafai e taofia aʻu mai i le suʻesuʻeina o le Tusi Paia. Peitaʻi, sa telē le fesoasoani na ou maua mai i Molimau i Sepania. Na latou taliina aʻu fesili mai i le Tusi Paia, e pei foʻi o Molimau i Siamani. O lea, na ou filifili ai e toe faaauau laʻu suʻesuʻega faale-Tusi Paia pe a ou toe foʻi i Siamani. E ui e leʻi toe faia le suʻesuʻega faale-Tusi Paia a laʻu tane, ae na ou tumau pea i laʻu filifiliga, ma na ou papatiso ai loa e avea ma Molimau a Ieova i le 1978.

O le iloa lelei o upu moni o le Tusi Paia ua ou maua ai ni taʻiala manino ma se fuafuaga moni o loʻu olaga. O se faataʻitaʻiga, o loo faalaeiauina avā i le 1 Peteru 3:1-4, ina ia “gauaʻi atu” i a latou tane atoa “ma le matuā faaaloalo,” ma ia atiaʻe le “agaga agamalu ma le filemu, o le mea tautele lava lea i le silafaga a le Atua.” O na taʻiala ua fesoasoani iā te aʻu ina ia faataunuu loʻu tiute tauave o se avā ma o se tinā.

Ua 35 nei tausaga talu ona avea aʻu ma Molimau a Ieova. Ou te fiafia ona o loo avea pea aʻu o se vaega o le aiga o le Atua. E toʻalima laʻu fanau, ma e toʻafā o loo matou auauna faatasi iā Ieova le Atua.