E IAI tagata e lē afāina iā i latou le lolo atu i faaosoosoga. Peitaʻi, o nisi tagata e manatu i faaosoosoga o se fili ma e maumauaʻi lava e teena. O le ā sou manatu? Pe e tatau ona e lolo atu i faaosoosoga?

O le lolo atu i isi faaosoosoga, e pei o faaosoosoga e iʻu atu i le faia o feusuaʻiga lē mamā, e mafai ona tatou mafatia ai i ni iʻuga ogaoga. O loo lapataʻi mai le Tusi Paia: “O so o se tasi e mulilua . . . ua leai sona mafaufau; o lē na te faia lea mea, ua faaumatia e ia lona lava ola.”​—Faataoto 6:32, 33.

E faapefea ona e tali atu pe a e fesagaʻia faaosoosoga? Ua faapea mai le Tusi Paia: “O le finagalo lenei o le Atua ina ia faapaiaina outou, ia faamamao mai i le faia o le faitaaga, ma ia taʻitasi outou ona iloa pulea o lona lava tino ina ia paia ma mamalu.” (1 Tesalonia 4:3, 4) E faapefea ona e maua le malosi e tetee atu ai? Mātau laasaga nei e tolu.

O le matamata i ata matagā e mapuna aʻe ai faalogona lē talafeagai. E tusa ai o le sootaga o o tatou mata ma faalogona, na lapataʻi mai Iesu: “Ai se tasi e vaavaai pea i se fafine ma manaʻonaʻo i ai, ua uma ona mulilua ma ia i lona loto.” Na faailoa manino mai e Iesu e faapea: “O lenei, afai e te tausuai ona o lou mata taumatau, ia sali ese ma lafoaʻi.” (Mataio 5:28, 29) O le uiga o lenā manatu, e tatau ona tatou maumauaʻi ia aua neʻi vaai atu o tatou mata i mea lē aogā e pei o ata matagā.

O se faataʻitaʻiga, pe a faafuaseʻi ona e vaai atu i aloiafi mai i se uelo, pe e faaauau ona e matamata pea i ai? E leai. O le a vave ona e liliuese ina ia puipuia ou mata. I se tulaga talitutusa, e tatau ona vave liliuese o tatou mata, pe a faafuaseʻi ona vaai atu i ni ata matagā i le initaneti, se tusi, pe vaaitino foʻi i ai. Ia aua lava neʻi faaleagaina o tatou mafaufau. Na faapea mai Juan o lē na fiafia i ata  matagā: “Pe a ou vaai i se fafine aulelei, ou te naunau lava ou te vaavaai atu pea iā te ia. O lea ou te taumafai ai e liliuese oʻu mata ma ou faapea ifo ʻTatalo iā Ieova! Ua tatau nei loa ona ou tatalo!’ Pe a uma ona ou tatalo, ona mou atu lea o na faanaunauga leaga.”​—Mataio 6:9, 13; 1 Korinito 10:13.

Mātau foʻi le faamatalaga a le tagata faamaoni o Iopu e faapea: “Ua ou osia le feagaiga ma oʻu mata. E faapefea la ona ou manaʻonaʻo i se taupou?” (Iopu 31:1) Aiseā e lē faia ai sau faaiʻuga faapena?

Faataʻitaʻi le mea lenei: Pe a faafuaseʻi ona e vaai i se ata po o se vaaiga matagā, ia vave ona liliuese ou mata. Ia faaaʻoaʻo i se tasi o tusitala o le Tusi Paia o lē na tatalo: “Ia e liliuese oʻu mata mai i le vaai atu i mea e lē aogā.”​—Salamo 119:37.

O lo tatou tulaga agasala e tele ai ina tatou tauivi ma tuʻinanauga sesē. Ua faapea mai le Tusi Paia: “Ua faaosoosoina tagata taʻitoʻatasi ona ua tosina ma maileia i ona lava tuʻinanau. Auā a tō le tuʻinanau, ona fanau mai ai lea o le agasala.” (Iakopo 1:14, 15) E faapefea ona e ʻalofia le maileia i se tulaga e faaleagaina ai?

Pe a mapuna aʻe ni tuʻinanauga sesē, ia manatua e mafai ona e filifili i le auala e te tali atu ai. Ia maumauaʻi e teena le mafaufau pea i tuʻinanauga lē mamā. Na faapea mai Troy, o sē na avea le matamata i ata matagā ma ana vaisū: “Ou te taumafai e mafaufau i mea lelei nai lo o tuʻinanauga lē mamā. E leʻi faigofie. Sa tele ina ou lē taulau. Ae na mulimuli ane mafai ona ou pulea oʻu manatunatuga.” Na taʻua e le tamaʻitaʻi o Elsa sa tauivi ma faaosoosoga taufeusuaʻiga a o talavou: “O le tatalo ma le pisi i le auaunaga iā Ieova, na mafai ai ona ou teena manatunatuga sesē.”

Faataʻitaʻi le mea lenei: Pe a e tauivi ma manatunatuga lē mamā, ia vave lava ona taofi ma tatalo. Ia teena na manatunatuga e ala i le  mafaufau i “mea uma ua moni, o mea uma ua matuā tāua, o mea uma ua tonu, o mea uma ua mamā, o mea uma e faatupu ai le lotofiafia, o mea uma ua taʻuleleia, o amioga lelei uma lava ma mea e viia ai se tasi.”​—Filipi 4:8.

E faigofie ona tatou lolo i faaosoosoga, aemaise lava pe a tulaʻi mai ae o loo iai ni o tatou tuʻinanauga lē mamā, ma ua iai se avanoa e faia ai. (Faataoto 7:6-23) E faapefea ona e ʻalofia le lolo atu i faaosoosoga?

Ua apoapoaʻi mai le Tusi Paia: “O lē ua iai le utaga mamao e na te iloa atu le mala ma lafi ai, a o lē ua leai se poto masani e alu atu pea o ia ma malaia ai i āuga leaga.” (Faataoto 22:3) O lea, ia pulea ou ala ma ʻalofia so o se tulaga e te ono lolo atu ai i faaosoosoga. (Faataoto 7:25) Na faapea mai Filipe o lē na manumalo mai le matamata i ata matagā: “Na ou tuuina le komepiuta a le matou aiga i se nofoaga e faigofie ona iloa atu e isi, ma na faapolokalame foʻi ia aua neʻi toe iai ni ata matagā. E faatoʻā ou faaaogāina lava le initaneti, pe afai o loo matou faatasi ma nisi.” Na faapea mai foʻi Troy lea na taʻua i le amataga: “Na ou ʻalofia le matamata i ata tifaga tau feusuaʻiga, ma le faifaimea faatasi ma tagata e tausua i faiga lē mamā. Ou te leʻi manaʻo e tuu aʻu i se tulaga lamatia.”

Faataʻitaʻi le mea lenei: Ia iloilo ma le faamaoni ou vaivaiga ma ia ʻalofia tulaga e te ono lolo atu ai i faaosoosoga.​—Mataio 6:13.

Ae faapefea pe afai e te lolo atu pea i faaosoosoga e ui i le tele o taumafaiga malolosi? Aua e te lotovaivai pe fiu. Ua faapea mai le Tusi Paia: “E faafitu ona paʻū o lē e amiotonu ma o le a toe tulaʻi o ia.” (Faataoto 24:16) Ioe, ua faalaeiau mai lo tatou Tamā i le lagi ina ia tatou “toe tulaʻi.” Po o le a e talia lana fesoasoani? Ia aua lava le fiu e tatalo atu iā te ia. Ia atiaʻe lou faatuatua e ala i le suʻesuʻe o le Tusi Paia. E faamalosia lau faaiʻuga, pe afai e te auai pea i sauniga faa-Kerisiano. Ia teu i lou loto le folafolaga a le Atua: “Ou te faamalosi iā te oe. Ou te matuā fesoasoani iā te oe.”​—Isaia 41:10.

Ua faapea mai Cody lea na taʻua i le amataga o le mataupu: “E tele taumafaiga na ou faia ina ia tuua ai laʻu masaniga o le matamata i ata matagā. E tele taimi na ou lē taulau ai, ae o le fesoasoani a le Atua na ou manumalo ai.” Ua faapea mai foʻi Dylan na taʻua i le amataga: “Na faigofie lava ona ou lolo atu e faia feusuaʻiga ma le teine na ma faigaluega faatasi, ae na ou maumauaʻi ma ou fai atu iā te ia ʻE leai!’ E ese le manaia o le iai o se lotofuatiaifo mamā, aemaise le iloaina o loo oʻu faafiafiaina Ieova.”

Pe afai e te maumauaʻi ma teena faaosoosoga, e mautinoa foʻi la o le a e faafiafiaina le Atua!​—Faataoto 27:11.