I LE tele o tausaga ua mavae, sa lāgā ai i le nusipepa a Korea The Chosun Ilbo se fesili faatupu manatu e faapea: “Pe na Alu i Seoli le ʻTamaʻitaʻi Amiolelei o Shim Cheong,’ o Lē e Leʻi Aʻoaʻoina e Uiga iā Iesu?”

E toʻatele e leʻi fiafia i lenei fesili, ona i talafatu a Korea, o “Shim Cheong” o se tamaʻitaʻi agaalofa na ia tausia faapelepele lona tamā tauaso. E tele tausaga o viiviia e tagata lenei tamaʻitaʻi, ma ua avea o ia o se faaaʻoaʻoga lelei mo tamaʻitaʻi uma i Korea.

Na tetee le toʻatele ma manatu e lē talafeagai le susunuina o se tagata faapena i seoli, ona e leʻi papatisoina o ia e avea ma Kerisiano. E lē gata i lea, o le tala iā Shim Cheong e mai i le tele o tausaga ua mavae, a o leʻi faalogo tagata o lona nuu iā Iesu Keriso.

Na taʻua i le nusipepa, sa fesiligia se tasi o faifeʻau po o susunu i seoli i latou ua maliliu ae e leʻi aʻoaʻoina e uiga iā Iesu. Ae na tali le faifeʻau: “O le mea lenā e tatou te lē iloa. Atonu lava e iai se Sauniuniga a le Atua [mo tagata faapena].”

Ua faapea mai le lomifefiloi The New Catholic Encyclopedia: “E tāua le papatiso ina ia maua ai le faaolataga. E pei ona taʻua e Iesu, e faatoʻā mafai ona ulu atu se tasi i le Malo o le Atua pe a toe fanau mai i le vai ma le agaga (Ioane 3.5).” O le māfuaaga lea ua faapea mai ai nisi, o so o se tasi e maliu ae e leʻi papatisoina, e susunu o ia i seoli pe e faapuapuagatia foʻi i se isi auala.

Peitaʻi, e toʻatele e faapea mai e valea lenā manatu. E faitau miliona tagata ua maliliu ae e latou te leʻi mauaina le Tusi Paia. Pe e tatau la ona faapuapuagatia i latou e faavavau? O le ā le manatu o le Tusi Paia i lea mataupu?

Ua taʻua manino i le Tusi Paia e lē faagaloina e le Atua tagata e leʻi iloa lona finagalo. Ua faamaonia lenā manatu i le Galuega 17:30: “Sa faapalepale le Atua i lo latou valea.” O le ā la se faamoemoe o loo i le Tusi Paia, mo i latou ua maliliu ae e latou te leʻi iloa le Atua?

E maua le tali i le fetalaiga a Iesu i le pagota na tautau i ona autafa. Na faapea atu le pagota iā Iesu: “Ia e manatua mai aʻu pe a e oo i lou malo.” O lea na fetalai atu ai Iesu iā te ia: “E moni ou te fai atu iā te oe i le asō, o le a ta faatasi ma oe i le Parataiso.”​—Luka 23:39-43.

Pe na folafola e Iesu i le pagota o le a alu aʻe o ia i le lagi? E leai, auā e leʻi “toe fanau mai” i le vai ma le agaga le pagota, ae o se tasi lenā o agavaa tāua e mafai ai e se tasi ona ulu atu i le Malo o le lagi. (Ioane 3:3-6) Nai lo lea, na folafola atu e Iesu iā te ia le ola e faavavau i le Parataiso. Talu ai o le pagota o se Iutaia, atonu la na malamalama o ia i le Parataiso i le lalolagi po o le faatoʻaga o Etena, lea e faamatala i le Tusi Paia. (Kenese 2:8) O le folafolaga a Iesu na faamautinoa atu ai i le pagota e mafai ona toetū mai i le Parataiso, pe a toe faafouina le lalolagi.

O le mea moni, ua folafola mai i le Tusi Paia o le a “toetutū mai tagata amiotonu ma tagata amiolētonu.” (Galuega 24:15) O ē “amiolētonu” o i latou ia e leʻi ola i tapulaa a le Atua ona latou te leʻi malamalama i lona finagalo. O le a toe faatūina mai e Iesu le pagota “amiolētonu,” faapea le faitau miliona pe piliona o tagata ua maliliu ae e leʻi aʻoaʻoina e uiga i le Atua. O lea, o le a aʻoaʻoina i latou i le Parataiso i le lalolagi e tusa ai o le finagalo o le Atua, ma maua ai le avanoa e faamaonia ai lo latou alolofa i le Atua, e ala i le usitaʻia o ana poloaʻiga.

Po o le a faamasinoina “tagata amiolētonu” e tusa ai o a latou gaoioiga na fai a o leʻi maliliu? E leai. Ua faapea mai le Roma 6:7: “O lē ua oti ua magalo o ia mai i lana agasala.” O le maliliu o ē amiolētonu ua totogiina ai a latou agasala. O lea, o le a faamasinoina i latou e tusa ai o a latou gaoioiga e fai pe a uma ona toe faatutū mai, ae e lē tusa ma gaoioiga sa latou faia a o leʻi maliliu. O ā aogā o le a maua e i latou nei?

Pe a toetutū mai tagata amiolētonu, o le a latou maua le avanoa e aʻoaʻoina ai tulafono a le Atua, ia o le a faaalia mai pe a tatalaina tusi tāʻai faafaatusa. O le a faamasinoina la i latou “e tusa ma a latou galuega,” pe na usiusitaʻi i tulafono a le Atua pe leai. (Faaaliga 20:12, 13) O le toʻatele o i latou o ē amiolētonu o le taimi muamua lenā o le a latou aʻoaʻoina ai le finagalo o le Atua, ma latou maua ai le ola e faavavau i le lalolagi.

Ua fesoasoani lenei aʻoaʻoga a le Tusi Paia i le toʻatele ina ia toe faatuatua ai i le Atua. O se tasi o i latou na o Yeong Sug, o se Katoliko mapolotu, ma e toʻatele tagata o lona aiga na avea ma patele. Na manaʻo Yeong e avea o ia ma taupousa, ma na alu ai loa ma nofo i se nofoaga e toleni ai taupousa. Peitaʻi, na mulimuli ane ia tuua lenā nofoaga ona sa lē fiafia i mea sa tutupu i inā, ma le aʻoaʻoga e faapea e susunu tagata i seoli. Na manatu o ia e lē alofa lenā faiga ma e lē amiotonu.

Na faailoa atu e se Molimau a Ieova iā Yeong Sug le manatu lenei mai i le Tusi Paia: “O ē ua ola ua latou iloa e oti i latou; a o ē ua oti, latou te lē iloa se mea, ua lē toe maua foʻi e i latou se totogi.” (Failauga 9:5) Na fesoasoani se Molimau a Ieova iā te ia e malamalama e lē o susunuina ona tuaʻā i se afi. Nai lo lea, o loo momoe i latou i tuugamau, e faatali ai le taimi o le toetū.

O le iloaina e toʻatele tagata e leʻi faalogo i le upu moni o loo i le Tusi Paia, na utagia ai e Yeong Sug le fetalaiga a Iesu o loo i le Mataio 24:14: “O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga.” Ua auai nei o ia i le talaʻia o le tala lelei, ma faailoa atu i isi le faamoemoe matagofie o loo taʻua i le Tusi Paia.

Ua faapea mai le Tusi Paia: “E lē faailogaina tagata e le Atua, ae o lē e mataʻu iā te ia i nuu uma lava, ma fai le amiotonu, e talia e ia.” (Galuega 10:34, 35) O le faamasinoga tonu lea e tatou te faatalitalia mai i se Atua e ʻfiafia i le amiotonu ma le faamasinogatonu.’​—Salamo 33:5.