I LE 1765, na faateʻia ai James Bruce mai Sikotilani, o se tagata suʻesuʻe sogasogā, ina ua ia vaaia se vaega o le faitotoʻa tele o le manumalo a Roma o loo tanumia i le toafa i Algeria. Peitaʻi e na te leʻi iloa o loo tū o ia i luga o toega o le aai aupito i telē o Roma na fausia i Aferika i Mātū, o le aai o Thamugadi, lea ua taʻua nei o Timgad.

I le 1881, i le silia ma le 100 tausaga mulimuli ane, na amata eli ai e tagata suʻesuʻe mai Falani toega o mea o Timgad. Na latou faapea mai, e ui e tū lenei aai i se laufanua e lafulafuā, ae sa tamaoaiga ma na sologa lelei olaga o i latou na aumau ai. O le ā na uunaʻia ai tagata Roma e fausia se aai tamaoaiga i lenā vaipanoa? O ā lesona e tatou te aʻoaʻoina mai i lenā aai anamua ma ona tagata?

Ina ua faalautele atu le pulega a Roma i Aferika i Mātū i le senituri muamua T.L.M., na latou fetaiaʻi ma ni teteega malolosi mai i tagata maumausolo o lenā vaipanoa. O lea, o le a faapefea ona maua se leleiga a Roma ma na tagata? Muamua, na fausia e fitafita mai le Third Augustan Legion ni togālauapi malupuipuia ma ni nofoaga mo fitafita, i atumauga o le vaipanoa ua taʻua nei o Algeria i mātū. Mulimuli ane, ona latou fausia lea o le aai o Timgad, ae e ese le fuafuaga na latou faia ai faapea.

O le māfuaaga faaletulafono na fausia ai e Roma le aai o Timgad, e mo fitafita ua litaea. Peitaʻi na latou natia le fuafuaga autū o le fausia o lenā aai, ina ia faaitiitia ai osofaʻiga a tagata o lenā vaipanoa. Na taulau le fuafuaga a Roma. O le olaga sologa lelei i Timgad, na tosina atu ai tagata o lenā vaipanoa ona na faatau atu i ai a latou oloa. Na mananaʻo le toʻatele e nonofo i Timgad, peitaʻi e na o tagatānuu Roma sa mafai ona nonofo ai. O lea na lotomalilie ai le toʻatele e auauna i le ʻautau a Roma mo le 25 tausaga, ina ia avea ai i latou ma o latou atalii, ma tagatānuu o Roma.

E leʻi faamalieina nisi o tagata Aferika i le tau ina avea ma tagatānuu o Roma, ae na mananaʻo foʻi i ni tulaga aloaʻia i Timgad ma isi aai na pulea e Roma. Sa matuā taulau le fuafuaga faalilolilo a Roma e faatosina mai tagata o lenā vaipanoa, auā i le na o le 50 tausaga talu ona faavae Timgad, ae ua faatumulia i tagata Aferika i Mātū.

Na faapefea ona vave taulau tagata Roma i le faatosinaina atu o tagata o lenā vaipanoa? Sa latou  faatāua le aiā tutusa a tagatānuu, o se taʻiala na aʻoaʻo e Cicero, o se alii tāua o Roma. Sa vaevae tutusa fanua i fitafita Roma ua litaea ma tagata Aferika ua avea ma tagatānuu o Roma. Na vaevaeina lelei fanua, e taʻi 65 futu (20 mita) faatafafā le tetelē o poloka, ae e iai auala vaiti na va ai fanua. O na fuafuaga maopoopo sa tosina atu ai tagata i Timgad.

I le pei o le tele o isi aai o Roma, e masani ona feiloaʻi tagata i nofoaga e pisi ai fefaatauaʻiga, ina ia faalogologo i tala fou pe fai ai taaloga. E mautinoa na moomoo atu tagata mai i lenā vaipanoa maugā, e fia savalivali i lalo o faapaologa o fale o Timgad i se aso mugālā, pe faamālū i le tele o ona fale taʻele tetele e aunoa ma se totogi. Atonu foʻi na latou mafaufau maʻimau pe ana latou nofonofo i autafa o se vai, ma talatalanoa ai ma uō. O na mea uma sa pei o ni miti iā i latou.

Sa tosina atu foʻi tagata i le nofoaga telē taalaelae e fai ai faaaliga. E silia i le 3,500 tagata e ofi i lenā nofoaga, ma sa faatumulia i le ʻau matamata pisapisaō o Timgad ma taulaga taulalata ane. Na faatino e tagata i inā ni tala e atagia atu ai faafiafiaga lē mamā ma sauā, ia na fiafia i ai tagata Roma.

Na iai foʻi le vaega a lotu o Roma i le faatosinaina atu o tagata. Sa teuteuina fola ma puipui o fale tāʻele tetele i ata e faia mai i tioata ma maa felanulanuaʻi, na faamatala ai talafatu faapaupau e fesootaʻi atu i o latou talitonuga faalotu. Talu ai sa tāua le tāʻele i aso taʻitasi, e leʻi umi ae masani tagata i atua ma lotu o Roma. Na iloa le taulau o le fuafuaga a Roma, auā e oo lava i faatusa e fesootaʻi atu i ē ua maliliu, na vane faatasi ai ata o atua e toʻatolu o Roma ma lenā vaipanoa.

Ina ua faavaeina e le Emeperoa Roma o Trajan le aai o Timgad i le 100 T.A., sa uunaʻia e tagata Roma le gaosia o le suāuu olive, uaina ma oloa e maua mai i saito, i totonu o Aferika i mātū atoa. Na avea lenā vaipanoa ma nofoaga autū e maua ai saito, suāuu olive, ma uaina a Roma ma ona kolone. I le pei o isi kolone, sa malosi le tamaoaiga o Timgad i lalo o le pulega a Roma. Na faasolo ina faatupulaʻia le aofaʻi o tagata o Timgad, ma iʻu ai ina faalautele atu ona tuaoi.

E tele faamanuiaga na maua e tagata o le aai ma i latou e ana fanua mai i fefaatauaʻiga ma Roma, ae sa itiiti tupe na maua e le ʻaufaifaatoʻaga. O lea, i le senituri lona tolu T.A., na tetee ai le ʻaufaifaatoʻaga faasaga i faiga lē tonu i le vafealoaʻi o tagata, ma le maualuluga o lafoga. O nisi o i latou na lolotu i le Katoliko, na auai i se vaega e taʻua o le Donatist, o ē na faapea mai o ni Kerisiano ma na tetee i faiga lē tonu a le lotu Katoliko.​—Tagaʻi i le pusa “ O le Donatist​—E Lē o se ʻLotu Moni.’”

Ina ua mavae le tele o senituri o fetauaʻiga i le lotoifale ma osofaʻiga mai i isi atunuu, na mou atu ai loa taaʻiga malolosi a Roma na iai i Aferika i mātū. E oo ane i le senituri lona ono T.A., ua  susunu e tagata Arapi sa i Aferika i mātū le aai o Timgad, ma mou atu ai i le silia i le 1,000 tausaga.

Na maofa tagata suʻesuʻe na eliina toega o mea, ina ua latou tau i se faaupuga Latina na vaneina i se tasi o nofoaga i Timgad e faapea: “O le tuli manu, tāʻele, taaalo, ma le ʻata—o le saʻo lea o le olaga!” Na faapea mai se tusitala o talafaasolopito mai Falani, o lenā faaupuga “atonu e faaalia ai le lē naunau e faia se mea, ae ua manatu nisi e faapea o le ki lea mo le atamai.”

O le mea moni, na umi se taimi o ola tagata Roma i se olaga soonafai. Na taʻua e le aposetolo o Paulo, o se Kerisiano mai le uluaʻi senituri, sa manatu tagata i le olaga e faapea, ʻSeʻi o tatou aai ma inu auā o a taeao e tatou te feoti ai.’ E ui i le mapolotu o tagata Roma, ae sa ola tau lava o le asō, e aunoa ma le manatunatu i le fuafuaga ma le uiga moni o le olaga. Na lapataʻia e Paulo Kerisiano e faatatau i na tagata e faapea: “Aua neʻi faasesēina outou. O aumea leaga e faaleagaina ai mea lelei ua masani ai tagata.”​—1 Korinito 15:32, 33.

E ui ua pe ā ma le 1,500 tausaga talu ona lē toe iai Timgad ma ona tagata, ae e oo mai lava i aso nei, o loo taatele pea o latou manatu e uiga i le olaga. E talitonu nisi e saʻo le manatu o tagata Roma e faatatau i le olaga, e tusa lava po o ā āuga. Peitaʻi, e puupuu ae e moni upu o le Tusi Paia e faapea: “O loo suia le tulaga o mea a lenei lalolagi.” O lea ua timaʻia ai i tatou ia aua le faaaogāina atoatoa mea a le lalolagi.​—1 Korinito 7:31.

O toega o mea o Timgad, e iloa ai o faaupuga na vaneina i se tasi o ona nofoaga, e lē o le auala lea e maua ai le fiafia moni. Nai lo o lea, o le ki i le mauaina o le fiafia moni, o le utagia lea o le fautuaga a le Tusi Paia e faapea: “E mavae atu foʻi le lalolagi faapea ma ona tuʻinanauga, a o lē e faia le finagalo o le Atua e tumau e faavavau.”​—1 Ioane 2:17.