TALU ai ua leva ona faaaogā le taʻu “anetikeriso” e faamatala ai mea uma e oo lava i tupu ma ata tifaga, e talafeagai la ona fesili e faapea: O ai anetikeriso? Pe e iai se tāua o lenei faaupuga iā i tatou i aso nei? E faalima ona taʻua i le Tusi Paia le upu anetikeriso. E mautinoa la o le Tusi Paia e tatau ona saʻili i ai po o ai tonu lava e faasino i ai anetikeriso.

E pau le tagata na ia faaaogāina le upu “anetikeriso” i le Tusi Paia, o le aposetolo o Ioane. Ua faapefea ona ia faamatala le anetikeriso? I le uluaʻi tusi o loo taʻua ai lona igoa, ua taʻua ai e faapea: “Le fanau e, o le itula mulimuli lenei, ma e pei lava ona outou faalogo e oo mai le anetikeriso, e oo lava i le taimi nei ua toʻatele anetikeriso; o le mea lea ua tatou iloa ai o le itula mulimuli lenei. Na latou ō ese mai iā i tatou, auā e lē o i latou o ni o tatou tagata; . . . O ai ea le tagata pepelo pe afai e lē o le tagata lea ua tetee i le mea moni, o Iesu o le Keriso lea? O le anetikeriso lenei, o lē e tetee i le Tamā ma le Alo.”​—1 Ioane 2:18, 19, 22.

O le ā e tatou te aʻoaʻoina mai i nei upu? Na faapea mai Ioane e “toʻatele anetikeriso.” Ua taʻu mai ai, o anetikeriso e lē o se tagata e toʻatasi, ae o se vaega o tagata. E faasalalau e tagata po o faalapotopotoga ua faia aʻe i anetikeriso ia tala pepelo, teena le manatu e faapea o Iesu o le Keriso po o le Mesia, ma taumafai e mimilo sesē le faiā a le Atua ma lona Alo o Iesu Keriso. Ua faapea mai i latou ua faia aʻe ai anetikeriso, o i latou o Keriso po o sui o Keriso. Peitaʻi, talu ai “na latou ō ese mai iā i tatou,” ua latou vavaeese ai mai aʻoaʻoga moni a le Tusi Paia. E lē gata i lea, sa iai lenei vaega o tagata i le taimi na tusia ai e Ioane lana tusi, i le “itula mulimuli,” atonu i le faaiʻuga o taimi o le ʻauaposetolo.

O ā nisi mea na taʻua e Ioane e faatatau i anetikeriso? Na lapataʻi mai o ia e faatatau i perofeta pepelo: “O upu uma mai i agaga o loo taʻutino mai e faapea na afio mai Iesu Keriso o se tagata, e mai i le Atua, a o upu uma mai i agaga e lē taʻutino na afio mai Keriso o se tagata, e lē mai i le Atua. O upu foʻi nei mai i le agaga o le anetikeriso, ia na outou faalogo o le a oo mai, ma ua iai nei i le lalolagi.” (1 Ioane 4:2, 3) Sa toe faamamafa mai foʻi e Ioane i lana tusi lona lua lenei lava manatu e faapea: “E toʻatele tagata taufaasesē ua ō atu i le lalolagi, o ē e latou te leʻi taʻutino atu na afio mai Iesu Keriso o se tagata. O le taufaasesē lea ma le anetikeriso.” (2 Ioane 7) E manino mai la sa malamalama lelei Ioane, o anetikeriso o i latou uma e faasalalauina atu ma le loto i ai aʻoaʻoga pepelo faalelotu e faatatau iā Iesu Keriso ma ana aʻoaʻoga.

A o leʻi taitai ona tusi Ioane e faatatau i na tagata lotu taufaasesē, sa lapataʻia e Iesu ona soo: “Ia mataala pea i perofeta pepelo, o ē e ō mai iā te outou i ofu mamoe, a o totonu o luko feʻai lava i latou.” (Mataio 7:15) Sa lapataʻia foʻi e le aposetolo o Paulo  Kerisiano i Tesalonia: “Aua neʻi faasesēina outou e se tasi i se togafiti, auā e lē oo mai lenā aso [aso o Ieova] seʻia muamua ona oo mai le fouvalega, ma faaalia mai le tagata o le amioleaga, o le atalii lea o le faaumatiaga.”​—2 Tesalonia 2:3.

O lea, i le uluaʻi senituri, ua leva ona taumafai malosi perofeta pepelo ma ē ua liliuese mai i le upu moni ina ia faavaivaia le faapotopotoga Kerisiano. O i latou uma sa faasalalauina atu tala pepelo ma aʻoaʻoga sesē faalelotu e faatatau iā Iesu Keriso ma ana aʻoaʻoga, sa aofia ai i “anetikeriso” lea na taʻua e Ioane. E tatou te iloa le silafaga a Ieova iā i latou na auā na taʻua e Paulo i latou ʻo le atalii o le faaumatiaga.’

I aso foʻi nei, o loo faaauau ona tetee tagata ma faalapotopotoga ua faia aʻe ai anetikeriso, iā Keriso ma ana aʻoaʻoga. O loo latou faasalalau atu ma le loto i ai tala pepelo ma aʻoaʻoga sesē, ma le fuafuaga ina ia faafenumiaʻi le tulaga moni o le Tamā, o Ieova le Atua lea, ma Lona Alo o Iesu Keriso. Ua talafeagai ai la ona tatou mataala e tusa ai ma na aʻoaʻoga sesē faalotu. Seʻi o tatou iloilo ni faaaʻoaʻoga se lua.

Ua tele tausaga o faasalalau e lotu le aʻoaʻoga o le Tolutasi, lea e faapea mai o le Tamā ma le Alo e tasi i laʻua. O lea ua faasesēina ma natia ai e anetikeriso tulaga moni o Ieova le Atua ma Iesu Keriso. Ua taofia ai foʻi tagata faamaoni mai i le faia o mea o loo faalaeiau i latou e le Tusi Paia e fai, e pei o le faaaʻoaʻo atu iā Iesu Keriso ma mafuta vavalalata atu i le Atua.​—1 Korinito 11:1; Iakopo 4:8.

Ua faafenumiaʻi foʻi e lotu manatu o tagata e ala i le faaaogā o faaliliuga o le Tusi Paia lea ua aveesea ai le suafa o le Atua, o Ieova. Ua latou faia faapea e ui lava e pe ā ma le 7,000 taimi o loo aliaʻe mai ai le suafa o Ieova i uluaʻi tusitusiga o le Tusi Paia. O le iʻuga, ua atili ai ona natia le tulaga moni o le Atua.

E ui i lea, o le iloaina o le suafa o le Atua ua fesoasoani i le toʻatele o tagata tapuaʻi lotofaamaoni ina ia mafuta vavalalata atu ai i le Atua. O le mea lenā sa tupu iā Richard. Ua ia faapea mai e tusa ai ma se latou talanoaga ma se ulugalii Molimau a Ieova: “Sa la faaali mai iā te aʻu mai i le Tusi Paia le suafa o le Atua moni, o Ieova. Sa ou matuā fiafia ina ua ou iloa e iai le suafa o le Atua, o se mea ou te leʻi faalogo muamua lava i ai.” O i inā na amata ai ona ia faia suiga i lona olaga, ina ia ola e tusa ai ma tapulaa a le Tusi Paia ma faafiafia Ieova. Ua ia faapea mai: “O le iloaina o le suafa o le Atua, ua fesoasoani iā te aʻu e atiaʻe ai se faiā vavalalata ma ia.”

Ua tele tausaga o faapogisa e anetikeriso le faitau miliona o tagata i le itu faaleagaga. Peitaʻi, o le suʻesuʻeina o le Afioga a le Atua, ua mafai ai ona tatou iloa moni anetikeriso, ma saʻoloto ai mai i a latou faamatalaga pepelo ma aʻoaʻoga sesē faalotu.​—Ioane 17:17.