MATAUPU AUTŪ | PE E MAFAI ONA TOETUTŪ MAI Ē UA MALILIU?
O le ā e Tupu pe a Mavae le Oti?
“Sa ou manatu e tolu nofoaga e mafai ona alu i ai se tagata pe a oti: o le lagi, afi i seoli, po o pulekatolio. Sa ou iloa ou te lē alu i le lagi auā ou te leʻi lelei tele, pe ou te alu foʻi i le afi i seoli ona ou te leʻi leaga tele. Peitaʻi ou te leʻi manino lelei e faatatau i le pulekatolio. Ou te leʻi faitau lava i nei manatu i le Tusi Paia, ae e na o tala a tagata na ou faalogo i ai.”—Lionel.
“Sa aʻoaʻoina aʻu o tagata lelei uma e ō i le lagi pe a feoti. Peitaʻi ou te leʻi talitonu i ai. Sa ou manatu o le oti o le iʻuga lea o mea uma, ma e leai se lumanaʻi mo ē ua maliliu.”—Fernando.
Pe sa e taumānatu e faapea: ʻO le ā moni lava le mea e tupu pe a oti se tasi? Po o puapuagatia i se isi nofoaga ē e pele iā i tatou ua maliliu? Po o le a tatou toe vāai iā i latou? E faapefea ona tatou mautinoa?’ Ia iloilo le mea moni o loo aʻoaʻo mai i le Tusi Paia. Muamua, seʻi o tatou iloilo le faamatalaga a le Tusi Paia e faatatau i le tulaga o ē ua maliliu. Pe a uma, ona tatou iloilo lea o le faamoemoe o loo taʻu mai ai.
O le ā le tulaga o ē ua maliliu?
LE TALI A LE TUSI PAIA: “O ē ua ola ua latou iloa e oti i latou; a o ē ua oti, latou te lē iloa se mea, ua lē toe maua foʻi e i latou se totogi, auā ua faagalogaloina mea uma e manatua ai i latou. O mea uma ua e iloa e faia e ou lima, inā faia ia ma lou malosi, auā e leai se galuega, po o ni fuafuaga, po o le poto, po o le atamai i le Tuugamau o loo e alu atu i ai.” *—Failauga 9:5, 10.
Pe a faafaigofie, o le Tuugamau o le nofoaga lea e ō i ai tagata pe a maliliu. O se nofoaga po o se tulaga faafaatusa e lē toe iloa ai se mea pe fai ai se gaoioiga. O le ā le manatu sa iai i le tane faatuatua o Iopu e faatatau i le Tuugamau? Sa aveesea uma ana meatotino ma maliliu lana fanau i le aso e tasi, ma sa taia lona tino atoa i se maʻi papala leaga. Sa ōle atu o ia i le Atua: “E! ia e natia aʻu i le Tuugamau [“i seoli,” Douay Version a le Katoliko], ia e faaliloina ai aʻu.” (Iopu 1:13-19; 2:7; 14:13) E manino mai, e leʻi manatu Iopu o le Tuugamau o se nofoaga e matuā faapuapuagatia ai tagata i le afi, ae o se nofoaga e mapu ai.
O le isi auala e tatou te malamalama ai e faatatau i le tulaga o ē ua maliliu, o le iloilo lea o tala faagaeeina o loo i le Tusi Paia, e faatatau i tagata e toʻavalu na toe faatutūina mai i le oti.—Tagaʻi i le pusa “ Toetū e Valu o Loo Faamatala i le Tusi Paia.”
E leai se tasi o lenei toʻavalu na faapea mai sa iai i se nofoaga e olioli ai, po o se nofoaga e faapuapuagatia ai. Pe afai sa ō atu i latou i se tasi o nei nofoaga ina ua maliliu, semanū e latou te faamatala atu i tagata pe faamauina foʻi i le Tusi Paia faagaeeina ina ia faitau i ai tagata uma. E lē o taʻua i le Tusi Paia ni tala faapea, ma e leai ni faamatalaga a nei tagata e toʻavalu e faatatau i lenei mataupu. Aiseā? Talu ai e latou te leʻi iloa se mea, e pei lava sa latou momoe gase. O nisi taimi e faaaogā i le Tusi Paia le moe e faamatala ai le oti. O se faaaʻoaʻoga, ua taʻua e faapea sa ʻmomoe i le oti’ tane faatuatua o Tavita ma Setefano.—Galuega 7:60, fpl; 13:36.
O le ā la le faamoemoe mo ē ua maliliu? Pe e mafai ona latou toetutū mai?
^ pala. 7 I le Tusi Paia o le Faaliliuga a le Lalolagi Fou, o loo faaaogā ai le upu “Tuugamau” e faamatala ai le upu Eperu mo le “Seoli” (Sheol) ma le upu Eleni mo le “Heitisi” (Hades). O loo faaaogā i nisi faaliliuga o le Tusi Paia le upu “hele” (hell), peitaʻi e lē faale-Tusi Paia le manatu e faatatau i se nofoaga e faapuapuagatia ai ē ua maliliu.
E te Ono Fiafia Foʻi
LE OLOMATAMATA
Pe e moni na toe faatutū e Iesu tagata na feoti?
O le ā ua faamaonia mai i le toe faatūtū mai o ē na feoti e Iesu e faatatau i le toetū i le lumanaʻi?
