O le suafa o le Atua ua tusia i konesane Eperu e fā יהוה, ma e pe ā ma le 7,000 taimi e faaaogā ai i Tusitusiga Paia Eperu. O na mataʻitusi e fā e taʻua o le Tetakalamatone, ua faaliliuina i lenei Tusi Paia o “Ieova.” O lenā suafa e tele atu taimi ua taʻua ai i le Tusi Paia nai lo o se isi lava igoa. E tele isi taʻu po o faalupega na faaaogā e ē na tusia le Tusi Paia mo le Atua e pei o “Lē e ona le malosi uma lava,” “le Silisili Ese,” ma “le Alii.” Peitaʻi, o le Tetakalamatone e na o le pau lea o le suafa totino na latou faaaogāina mo le Atua.

Na faatonuina e Ieova le Atua ē na tusia le Tusi Paia ina ia faaaogā lona suafa. O se faaaʻoaʻoga, na ia faagaeeina le perofeta o Ioelu e tusi: “E faaolaina foʻi i latou uma o ē e valaau i le suafa o Ieova.” (Ioelu 2:32) Na uunaʻia foʻi e le Atua se tasi o faisalamo e tusi: “Tau ina ia iloa e tagata o oe e ou le suafa o Ieova, e na o oe lava o Lē e Silisili Ese i le lalolagi uma.” (Salamo 83:18) O le mea moni, e pe tusa ma le 700 taimi o loo faaaogā ai le suafa o le Atua i le tusi o Salamo, o se tusi faafatusolo na tatau ona usuina ma lagi faatauloto e tagata o le Atua. Aiseā la ua lē maua ai le suafa o le Atua i le tele o faaliliuga o le Tusi Paia? Aiseā ua faaaogā ai i lenei faaliliuga le suafa o “Ieova”? O le ā le uiga o le suafa o le Atua o Ieova?

Aiseā ua lē maua ai le suafa o le Atua i le tele o faaliliuga o le Tusi Paia? E eseese māfuaaga. E manatu nisi e lē manaʻomia e le Atua e ona le malosi uma lava se suafa faapitoa e iloa ai o ia. E foliga mai ua aafia nisi i tū faa-Iutaia o le lē taʻua o le suafa o le Atua, ona o le fefefe neʻi faalumaina lenā suafa. E manatu nisi ona e lē mautinoa le auala tonu na faaleoina ai le suafa o le Atua, e sili ai la ona faaaogā taʻu e pei o “le Alii” po o “le Atua.” Peitaʻi, e lē talafeagai na manatu ona o māfuaaga o loo mulimuli mai:

• O i latou e finau mai e lē manaʻomia e le Atua e ona le malosi uma lava se suafa faapitoa, ua latou teena faamaoniga o le iai  o le suafa totino o le Atua i uluaʻi kopi o lana Afioga, e aofia ai kopi na faasaoina a o leʻi soifua le Keriso. E pei ona taʻua muamua, na faatonuina e le Atua le tusiaina o lona suafa i lana Afioga i le pe ā ma le 7,000 taimi. E manino mai la, e finagalo o ia ina ia tatou iloa lona suafa ma faaaogāina.

• O tagata faaliliu ua latou aveesea le suafa o le Atua ona o le faaaloalo i tū faa-Iutaia, e iai se manatu tāua ua latou lē amanaʻia. E ui na iai nisi tusiupu Iutaia na mumusu e taʻu le suafa o le Atua, ae e latou te leʻi aveesea lenā suafa mai i a latou kopi o le Tusi Paia. O loo iai foʻi le suafa o le Atua i le tele o vaega o tusi tāʻai anamua na maua i Qumran e lata i le Sami Mate. E atagia mai i faaliliuga a nisi tagata faaliliu o le Tusi Paia na iai le suafa o le Atua i uluaʻi tusitusiga e ala i lo latou suia i le taʻu “ALII,” ae tusia i mataʻitusi lapopoʻa. Ae o le fesili tāua la, Aiseā na faigofie ai i nei tagata faaliliu ona suia pe aveesea le suafa o le Atua mai i le Tusi Paia, ae e latou te iloa na iai i le Tusi Paia i le faitau afe o mau? O ai e latou te manatu na tuuina atu iā i latou le pule e faia ai na suiga? E tali lava e i latou na fesili.

• O i latou e faapea mai e lē tatau ona faaaogāina le suafa o le Atua ona e lē iloa tonu le auala e faaleo ai, o loo latou saʻoloto e faaaogā le suafa o Iesu. Peitaʻi, e matuā ese le auala na faaleo ai e soo o Iesu i le uluaʻi senituri lona suafa mai i le toʻatele o Kerisiano i aso nei. Atonu na faaleo e Kerisiano Iutaia le suafa o Iesu o Ye·shuʹa‛, ma na faaleo le faalupega “Keriso” o le Ma·shiʹach po o le “Mesia.” Na faaleo e Kerisiano e tautatala i le gagana Eleni le suafa o Iesu o I·e·sousʹ Khri·stosʹ, ae na faaleo e Kerisiano na tautatala i le gagana Latina o Ieʹsus Chriʹstus. E ala i le taʻitaʻiga a le agaga paia, na faamauina ai i le Tusi Paia le faaliliuga Eleni o le suafa o Iesu. E faaalia mai ai na faaaogā ma le atamai e Kerisiano i le uluaʻi senituri le faaleoga o le suafa o Iesu na taatele i la latou gagana. I se tulaga talitutusa, ua manatu le Komiti o le Faaliliuga o le Tusi Paia o le Lalolagi Fou ua talafeagai foʻi ona faaaogā le faaleoga “Ieova,” e ui lava e lē o le faaleoga tonu lenā o le suafa o le Atua i le gagana Eperu anamua.

Aiseā ua faaaogā ai i le Faaliliuga a le Lalolagi Fou le suafa o “Ieova”? I le gagana Peretania, e tusia mataʻitusi e fā o le Tetakalamatone (יהוה) i konesane o le YHWH. O le Tetakalamatone e leai ni vaueli, e pei o isi upu uma na tusia i le gagana Eperu anamua. A o faaaogā le gagana Eperu anamua i aso faisoo, na iloa lava e le tagata faitau le vaega o le upu e tuu i ai le vaueli talafeagai.

 I le pe ā ma le afe tausaga talu ona māeʻa Tusitusiga Paia Eperu, na faia ai e faitofā Iutaia se faiga e faaaogā ai faailoga, ina ia iloa ai vaueli e faaaogā pe a faitau i le gagana Eperu. Peitaʻi, e oo ane i lenā taimi, ua taatele i tagata Iutaia le manatu e faapea e sesē le taʻu leotele o le suafa o le Atua, o lea na latou faaaogā ai ni taʻu e sui ai. E foliga mai ina ua latou toe tusia le Tetakalamatone, na latou tuufaatasia vaueli mo taʻu e sui ai le suafa o le Atua faatasi ma konesane e fā mo le suafa o le Atua. O lea, o na manusikulipi na iai faailoga mo vaueli, e leʻi fesoasoani ina ia iloa ai le auala tonu na muaʻi faaleo ai le suafa o le Atua i le gagana Eperu. Na manatu nisi na faaleoina lea suafa “Yahweh,” ae e ese foʻi manatu o isi. Na iai i Tusi Tāʻai o le Sami Mate se vaega o le tusi o Levitiko i le gagana Eleni, o loo faaliliu saʻo ai le suafa o le Atua iā Iao. Na manatu foʻi isi uluaʻi tusitala Eleni, o isi faaleoga o lenā suafa o le Iae, I·a·beʹ, ma le I·a·ou·eʹ. Peitaʻi, e leai se māfuaaga e tatou te maumauaʻi ai i se faaleoga patino. E tatou te lē iloa le auala na faaleo ai e auauna anamua a le Atua lona suafa i le gagana Eperu. (Kenese 13:4; Esoto 3:15) Ae e tatou te iloa na faaaogā e lē aunoa e le Atua lona suafa a o fetalai mai i ona tagata, na faaaogā foʻi e ona tagata lenā suafa pe a fesootaʻi atu iā te ia, ma na latou saʻoloto foʻi e faaaogā pe a talanoa ma isi.—Esoto 6:2; 1 Tupu 8:23; Salamo 99:9.

Aiseā la ua faaaogā ai i lenei faaliliuga le suafa o “Ieova”? Talu ai ua silia i le 150 tausaga o faaaogā lenā suafa i le gagana Samoa.

I le 1841, na faaliliuina muamua ai le Evagelia a Ioane i le gagana Samoa ma na taʻua O le Evagelia ia Iesu o le Tala Lelei Lea i le Alo o le Atua na Tusia e Ioane. O loo iai le suafa o “Ieova” i lenei faaliliuga. O le uluaʻi faaliliuga atoa o le Feagaiga Fou i le gagana Samoa sa mauaina i le 1849, sa taʻua O le Feagaiga Fou a lo Tatou Alii o Iesu Keriso. I lenei faaliliuga, e silia i le 60 taimi o loo faaaogā ai le suafa o “Ieova” i le Feagaiga Fou.  I le 1884, na lomia ai e le LMS (London Missionary Society) se faaliliuga o le Tusi Paia i le gagana Samoa na faaaogā ai le suafa o “Ieova” i le faitau afe o taimi i Tusitusiga Paia Eperu. E faafā foʻi ona faaaogā i Tusitusiga Paia Eleni le upu Aleluia, o lona uiga “Ia vivii atu iā Ioa,” o le faapuupuuga lenā o le suafa o le Atua. (Faaaliga 19:1-6) Na toe teuteuina lenā Tusi Paia i le 1969. E ui ina aveesea atoatoa i lenā toe teuteuga le suafa o “Ieova,” ae e tasi lava le mau o loo faatumauina ai pea le suafa o le Atua. (Esoto 33:14) E lē gata i lea, o loo faaaogā pea le suafa o “Ieova” i pese lotu ma tusitusiga i luma o falesā. E manino mai la, ua silia i le 150 tausaga o faaaogā le suafa o le Atua o “Ieova.”

O loo faaaogā foʻi faaliliuga o lenā suafa i isi gagana. O se faataʻitaʻiga, o le taimi muamua na faaliliu ai le suafa o le Atua i se Tusi Paia faa-Peretania, o le 1530 i le faaliliuga a William Tyndale o le Penetatuka. Na ia faaliliuina le suafa o le Atua, o “Iehouah.”

O le ā le uiga o le suafa o Ieova? I le gagana Eperu, o le suafa o Ieova e maua mai i se veape e uiga atu “e avea,” ma e manatu nisi o faitofā e atagia mai i lenā veape Eperu se gaoioiga o loo fai. O lea, o le malamalamaga o le Komiti o le Faaliliuga o le Tusi Paia o le Lalolagi Fou, o le uiga o le suafa o le Atua “E Gaoioi o Ia e Tusa ma Tulaga Manaʻomia.” E eseese manatu o faitofā, e lē mafai la ona tatou maumauaʻi i se uiga se tasi. Peitaʻi, e talafeagai lenā uiga ma le matafaioi a Ieova o Lē na foafoaina mea uma ma o Lē e faataunuuina lona finagalo. E lē gata o ia na māfua ai ona iai le vateatea ma foafoaga atamamai, ae o loo faaauau foʻi ona ia faapogaia le faataunuuina o lona finagalo.

O lea, e lē faatapulaa le uiga o le suafa o Ieova i le veape o loo i le Esoto 3:14 e faapea: “E Avea Aʻu ma Lē Ou te Loto i Ai.” O le tulaga moni, e lē mafai e na faaupuga ona faamatala atoatoa ai le uiga o le suafa o le Atua. Nai lo o lea, e faailoa mai ai se vala o uiga o le Atua, e avea o ia ma so o se mea e manaʻomia i tulaga taʻitasi ina ia faataunuu ai lona finagalo. O lea, o le suafa o Ieova e aofia ai lenā manatu, ae e lē faatapulaa i le tau ina avea o ia ma lē e loto i ai. E aofia ai foʻi lona faapogaia o se mea e tupu e fesootaʻi i ana foafoaga, ma le faataunuuina o lona finagalo.