O le Tusi Muamua o Samuelu 12:1-25
12 Mulimuli ane, ua fai atu Samuelu iā Isaraelu uma: “Ua ou faia* mea uma na outou fai mai ai iā te aʻu, ina ia ou tofia se tupu e pule iā te outou.+
2 O le tupu lenei e taʻitaʻiina* outou!+ A o aʻu, ua ou toeaina ma ulusinā, o loo iā te outou foʻi oʻu atalii,+ a o aʻu nei, na ou taʻitaʻia outou a o oʻu talavou e oo mai lava i le asō.+
3 O aʻu lenei. Ia outou tali mai iā te aʻu i luma o Ieova ma luma o lē na ia faauuina:+ Pe na iai se isi na ou aveina sana povi, po o sana asini?+ Pe na iai se isi na ou faasesēina, pe tuʻimomomoina? Pe na iai foʻi se isi na ou taliaina mai ai tupe faaalatua, ina ia ou lē amanaʻia ai le mea na ia faia?+ Afai o lea, ou te toe faafoʻi atu lava iā te outou.”+
4 Ona latou tali mai lea: “E te leʻi faasesēina i matou, pe tuʻimomomoina i matou, pe talia foʻi se mea mai i le lima o se tasi.”
5 Ona ia fai atu lea iā i latou: “O loo molimau Ieova iā te outou, o loo molimau foʻi i le asō lē na ia faauuina, tou te leʻi mauaina lava se mea e tuua‘ia ai a‘u.”* Ona latou fai mai lea: “O loo molimau o ia.”
6 Ua fai atu Samuelu i le nuu: “O Ieova o le molimau, o lē na faaaogāina Mose ma Arona, ma o lē foʻi na ia aveina aʻe o outou augātamā mai i le nuu o Aikupito.+
7 O lenei, inā tutū mai ia outou, ma o le a ou faamasino iā te outou i luma o Ieova, e tusa ai ma galuega tonu uma a Ieova na ia faia iā te outou ma o outou augātamā.
8 “Ina ua alu atu Iakopo i Aikupito,+ ma alalaga atu o outou augātamā iā Ieova mo se fesoasoani,+ ona aauina atu lea e Ieova o Mose+ ma Arona ina ia la aumaia o outou augātamā mai i Aikupito, ma faanonofo i lenei nuu.+
9 Ae ua latou faagalo Ieova lo latou Atua, ona ia faatau atu lea o i latou+ i lima o Sesera+ le taʻitaʻiʻau o Hasora, ma lima o Filisitia,+ ma lima foʻi o le tupu o Moapi,+ o ē na siitaua pea iā i latou.
10 Ona latou alalaga atu lea iā Ieova mo se fesoasoani+ ma faapea atu, ‘Ua matou agasala+ auā ua matou tuua Ieova ae auauna iā Paala+ ma tupua o Asaira;+ o lenei, ia e laveaʻi i matou mai i lima o matou fili, ina ia matou auauna atu iā te oe.’
11 Ona aauina mai lea e Ieova o Ierupaala,+ o Petana, o Iefata,+ ma aʻu,*+ e laveaʻi outou mai i lima o o outou fili i itu uma, ina ia outou nonofo ai ma le saogalemu.+
12 Ina ua outou iloa atu Naasa+ le tupu o tagata Amonī o siitaua mai iā te outou, na outou fai mai pea iā te aʻu, ‘E leai, ua matou maumauaʻi e fai so matou tupu e pule iā i matou!’+ e ui lava o Ieova lo outou Atua, o lo outou Tupu lea.+
13 O lea la, o le tupu lenei na outou filifilia, lea na outou talosaga mai ai. Faauta! Ua tofia e Ieova se tupu e pule iā te outou.+
14 Afai e tou te matataʻu iā Ieova+ ma auauna iā te ia,+ ma usiusitaʻi i lona siʻufofoga,+ tou te lē fouvale foʻi i faatonuga a Ieova, ma outou mulimuli iā Ieova lo outou Atua, o outou ma le tupu o le a pule iā te outou, ua lelei lea.
15 Ae afai e tou te lē usiusitaʻi i le siʻufofoga o Ieova ma fouvale i le faatonuga a Ieova, ona oo atu lea o le aao o Ieova iā te outou ma o outou tamā.+
16 O lenei, inā tutū ia outou ma vāai i lenei mea sili ua faia e Ieova i o outou luma.
17 Pe e lē o le aso ea lenei o le seleselega o saito? Ou te valaau atu iā Ieova ina ia aumaia e ia o faititili ma timuga, ina ia outou iloa ma malamalama ai i le matuā leaga o le mea ua outou faia i luma o Ieova, ina ua outou talosaga mai mo se tupu.”+
18 Ona valaau lea o Samuelu iā Ieova, ua tuuina mai foʻi e Ieova o faititili ma timuga i lenā aso, ona matuā matataʻu ai lea o tagata uma iā Ieova ma Samuelu.
19 Ua fai mai le nuu uma iā Samuelu: “Ia e tatalo iā Ieova lou Atua mo au auauna,+ ona matou te lē fia feoti; auā ua matou faaopoopoina atu i a matou agasala uma se isi mea leaga, ina ua matou talosaga atu mo se tupu.”
20 Ona fai atu lea o Samuelu i le nuu: “Aua tou te fefefe. E moni ua outou faia nei mea leaga uma, ae aua neʻi outou liliuese mai i le mulimuli atu iā Ieova,+ ma ia outou auauna iā Ieova ma o outou lotoatoa.+
21 Aua foʻi neʻi outou liliuese e mulimuli atu i mea e faatauvaa,*+ e lē aogā+ ma e lē laveaʻia ai outou, auā e faatauvaa* lava i latou.
22 Auā e lē tuulafoaʻiina e Ieova lona nuu+ ona o lona suafa sili,+ auā ua finagalo Ieova e fai outou ma ona nuu.+
23 A o aʻu, ia mamao iā te aʻu ona ou agasala iā Ieova i loʻu lē tatalo mo outou, ma ou te aʻoaʻoina pea outou i le ala e lelei ma tonu.
24 Tau ina ia outou matataʻu iā Ieova+ ma auauna iā te ia ma le faamaoni ma o outou lotoatoa; ia outou mafaufau foʻi i mea sili ua ia faia mo outou.+
25 Ae afai e tou te faauamaaa ma faia mea leaga, ona tafiesea+ lea o outou ma lo outou tupu.”+
Faamatalaga Pito i Lalo
^ Epe., “faalogo atu i a outou upu e tusa ma.”
^ Epe., “e savali i luma o.”
^ Epe., “leʻi mauaina lava se mea e tasi i loʻu lima.”
^ Epe., “Samuelu.”
^ Po o “e lē moni.”
^ Po o “e lē moni.”
